| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. অঞ্ঞতিত্থিযপেয্যালৰগ্গৰণ্ণনা
5. Aññatitthiyapeyyālavaggavaṇṇanā
৪১-৪৮. অপরাপরং পরিৰত্তমানেন ৰত্তসম্পন্নেন সংসারদ্ধানপরিঞ্ঞাৰসেনেৰ নিব্বানস্স পত্তব্বত্তা ৰুত্তং – ‘‘নিব্বানং পত্ৰা পরিঞ্ঞাতং নাম হোতী’’তি। নিব্বানং পত্ৰাতি নিব্বানপ্পত্তিহেতু। হেতুঅত্থো হি অযং ত্ৰা-সদ্দো যথা – ‘‘ঘতং পিৰিত্ৰা বলং হোতি, সীহং দিস্ৰা ভযং হোতী’’তি। তস্মাতি যস্মা অপরিঞ্ঞেয্যপরিজাননকিচ্চেন নিব্বানস্স পত্তিযা অদ্ধানপরিঞ্ঞাসিদ্ধি ঞাযতি, তস্মা উপচারৰসেন নিব্বানং ‘‘অদ্ধানপরিঞ্ঞা’’তি ৰুচ্চতি যথা ‘‘হিমসন্তি সূরিযং উগ্গমেতী’’তি। ৰিজ্জাৰিমুত্তিফলসচ্ছিকিরিযত্থন্তি এত্থ ৰিজ্জাতি অগ্গমগ্গৰিজ্জা। ৰিমুত্তীতি অগ্গমগ্গসমাধি অধিপ্পেতো । তেসং ফলং অঞ্ঞাতি আহ – ‘‘ৰিজ্জাৰিমুত্তিফলেন অরহত্তং কথিত’’ন্তি। যাথাৰতো জাননতো পচ্চক্খতো দস্সনতো চ ঞাণদস্সনন্তি ইধ ফলনিব্বানপচ্চৰেক্খণা অধিপ্পেতাতি আহ – ‘‘ঞাণদস্সনেন পচ্চৰেক্খণা কথিতা’’তি। সেসেহীতি রাগ-ৰিরাগ-সংযোজনপ্পহান-অনুসযসমুগ্ঘাত-অদ্ধানপরিঞ্ঞা- আসৰক্খয-ৰিজ্জা-ৰিমুত্তি-ফলসচ্ছিকিরিযা-ঞাণদস্সন-অনুপাদাপরিনিব্বানপদেহি।
41-48. Aparāparaṃ parivattamānena vattasampannena saṃsāraddhānapariññāvaseneva nibbānassa pattabbattā vuttaṃ – ‘‘nibbānaṃ patvā pariññātaṃ nāma hotī’’ti. Nibbānaṃ patvāti nibbānappattihetu. Hetuattho hi ayaṃ tvā-saddo yathā – ‘‘ghataṃ pivitvā balaṃ hoti, sīhaṃ disvā bhayaṃ hotī’’ti. Tasmāti yasmā apariññeyyaparijānanakiccena nibbānassa pattiyā addhānapariññāsiddhi ñāyati, tasmā upacāravasena nibbānaṃ ‘‘addhānapariññā’’ti vuccati yathā ‘‘himasanti sūriyaṃ uggametī’’ti. Vijjāvimuttiphalasacchikiriyatthanti ettha vijjāti aggamaggavijjā. Vimuttīti aggamaggasamādhi adhippeto . Tesaṃ phalaṃ aññāti āha – ‘‘vijjāvimuttiphalena arahattaṃ kathita’’nti. Yāthāvato jānanato paccakkhato dassanato ca ñāṇadassananti idha phalanibbānapaccavekkhaṇā adhippetāti āha – ‘‘ñāṇadassanena paccavekkhaṇā kathitā’’ti. Sesehīti rāga-virāga-saṃyojanappahāna-anusayasamugghāta-addhānapariññā- āsavakkhaya-vijjā-vimutti-phalasacchikiriyā-ñāṇadassana-anupādāparinibbānapadehi.
অঞ্ঞতিত্থিযপেয্যালৰগ্গৰণ্ণনা নিট্ঠিতা।
Aññatitthiyapeyyālavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
১. রাগৰিরাগসুত্তং • 1. Rāgavirāgasuttaṃ
২-৭. সংযোজনপ্পহানাদিসুত্তছক্কং • 2-7. Saṃyojanappahānādisuttachakkaṃ
৮. অনুপাদাপরিনিব্বানসুত্তং • 8. Anupādāparinibbānasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. অঞ্ঞতিত্থিযপেয্যালৰগ্গৰণ্ণনা • 5. Aññatitthiyapeyyālavaggavaṇṇanā
