| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
5. අඤ්‌ඤතිත්‌ථියපෙය්‍යාලවග්‌ගවණ්‌ණනා
5. Aññatitthiyapeyyālavaggavaṇṇanā
41-48. අපරාපරං පරිවත්‌තමානෙන වත්‌තසම්‌පන්‌නෙන සංසාරද්‌ධානපරිඤ්‌ඤාවසෙනෙව නිබ්‌බානස්‌ස පත්‌තබ්‌බත්‌තා වුත්‌තං – ‘‘නිබ්‌බානං පත්‌වා පරිඤ්‌ඤාතං නාම හොතී’’ති. නිබ්‌බානං පත්‌වාති නිබ්‌බානප්‌පත්‌තිහෙතු. හෙතුඅත්‌ථො හි අයං ත්‌වා-සද්‌දො යථා – ‘‘ඝතං පිවිත්‌වා බලං හොති, සීහං දිස්‌වා භයං හොතී’’ති. තස්‌මාති යස්‌මා අපරිඤ්‌ඤෙය්‍යපරිජානනකිච්‌චෙන නිබ්‌බානස්‌ස පත්‌තියා අද්‌ධානපරිඤ්‌ඤාසිද්‌ධි ඤායති, තස්‌මා උපචාරවසෙන නිබ්‌බානං ‘‘අද්‌ධානපරිඤ්‌ඤා’’ති වුච්‌චති යථා ‘‘හිමසන්‌ති සූරියං උග්‌ගමෙතී’’ති. විජ්‌ජාවිමුත්‌තිඵලසච්‌ඡිකිරියත්‌ථන්‌ති එත්‌ථ විජ්‌ජාති අග්‌ගමග්‌ගවිජ්‌ජා. විමුත්‌තීති අග්‌ගමග්‌ගසමාධි අධිප්‌පෙතො . තෙසං ඵලං අඤ්‌ඤාති ආහ – ‘‘විජ්‌ජාවිමුත්‌තිඵලෙන අරහත්‌තං කථිත’’න්‌ති. යාථාවතො ජානනතො පච්‌චක්‌ඛතො දස්‌සනතො ච ඤාණදස්‌සනන්‌ති ඉධ ඵලනිබ්‌බානපච්‌චවෙක්‌ඛණා අධිප්‌පෙතාති ආහ – ‘‘ඤාණදස්‌සනෙන පච්‌චවෙක්‌ඛණා කථිතා’’ති. සෙසෙහීති රාග-විරාග-සංයොජනප්‌පහාන-අනුසයසමුග්‌ඝාත-අද්‌ධානපරිඤ්‌ඤා- ආසවක්‌ඛය-විජ්‌ජා-විමුත්‌ති-ඵලසච්‌ඡිකිරියා-ඤාණදස්‌සන-අනුපාදාපරිනිබ්‌බානපදෙහි.
41-48. Aparāparaṃ parivattamānena vattasampannena saṃsāraddhānapariññāvaseneva nibbānassa pattabbattā vuttaṃ – ‘‘nibbānaṃ patvā pariññātaṃ nāma hotī’’ti. Nibbānaṃ patvāti nibbānappattihetu. Hetuattho hi ayaṃ tvā-saddo yathā – ‘‘ghataṃ pivitvā balaṃ hoti, sīhaṃ disvā bhayaṃ hotī’’ti. Tasmāti yasmā apariññeyyaparijānanakiccena nibbānassa pattiyā addhānapariññāsiddhi ñāyati, tasmā upacāravasena nibbānaṃ ‘‘addhānapariññā’’ti vuccati yathā ‘‘himasanti sūriyaṃ uggametī’’ti. Vijjāvimuttiphalasacchikiriyatthanti ettha vijjāti aggamaggavijjā. Vimuttīti aggamaggasamādhi adhippeto . Tesaṃ phalaṃ aññāti āha – ‘‘vijjāvimuttiphalena arahattaṃ kathita’’nti. Yāthāvato jānanato paccakkhato dassanato ca ñāṇadassananti idha phalanibbānapaccavekkhaṇā adhippetāti āha – ‘‘ñāṇadassanena paccavekkhaṇā kathitā’’ti. Sesehīti rāga-virāga-saṃyojanappahāna-anusayasamugghāta-addhānapariññā- āsavakkhaya-vijjā-vimutti-phalasacchikiriyā-ñāṇadassana-anupādāparinibbānapadehi.
අඤ්‌ඤතිත්‌ථියපෙය්‍යාලවග්‌ගවණ්‌ණනා නිට්‌ඨිතා.
Aññatitthiyapeyyālavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
1. රාගවිරාගසුත්‌තං • 1. Rāgavirāgasuttaṃ
2-7. සංයොජනප්‌පහානාදිසුත්‌තඡක්‌කං • 2-7. Saṃyojanappahānādisuttachakkaṃ
8. අනුපාදාපරිනිබ්‌බානසුත්‌තං • 8. Anupādāparinibbānasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. අඤ්‌ඤතිත්‌ථියපෙය්‍යාලවග්‌ගවණ්‌ණනා • 5. Aññatitthiyapeyyālavaggavaṇṇanā
