| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
25. அஞ்ஞதித்தி²யபுப்³ப³கதா²
25. Aññatitthiyapubbakathā
86. தேன கோ² பன ஸமயேன யோ ஸோ அஞ்ஞதித்தி²யபுப்³போ³ 1 பஜ்ஜா²யேன ஸஹத⁴ம்மிகங் வுச்சமானோ உபஜ்ஜா²யஸ்ஸ வாத³ங் ஆரோபெத்வா தங்யேவ தித்தா²யதனங் ஸங்கமி. ஸோ புன பச்சாக³ந்த்வா பி⁴க்கூ² உபஸம்பத³ங் யாசி. பி⁴க்கூ² ப⁴க³வதோ ஏதமத்த²ங் ஆரோசேஸுங். யோ ஸோ, பி⁴க்க²வே, அஞ்ஞதித்தி²யபுப்³போ³ உபஜ்ஜா²யேன ஸஹத⁴ம்மிகங் வுச்சமானோ உபஜ்ஜா²யஸ்ஸ வாத³ங் ஆரோபெத்வா தங்யேவ தித்தா²யதனங் ஸங்கந்தோ, ஸோ ஆக³தோ ந உபஸம்பாதே³தப்³போ³. யோ ஸோ, பி⁴க்க²வே, அஞ்ஞோபி அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்க²தி பப்³ப³ஜ்ஜங், ஆகங்க²தி உபஸம்பத³ங், தஸ்ஸ சத்தாரோ மாஸே பரிவாஸோ தா³தப்³போ³. ஏவஞ்ச பன, பி⁴க்க²வே, தா³தப்³போ³ – பட²மங் கேஸமஸ்ஸுங் ஓஹாராபெத்வா காஸாயானி வத்தா²னி அச்சா²தா³பெத்வா ஏகங்ஸங் உத்தராஸங்க³ங் காராபெத்வா பி⁴க்கூ²னங் பாதே³ வந்தா³பெத்வா உக்குடிகங் நிஸீதா³பெத்வா அஞ்ஜலிங் பக்³க³ண்ஹாபெத்வா ஏவங் வதே³ஹீதி வத்தப்³போ³ – ‘‘பு³த்³த⁴ங் ஸரணங் க³ச்சா²மி, த⁴ம்மங் ஸரணங் க³ச்சா²மி, ஸங்க⁴ங் ஸரணங் க³ச்சா²மி; து³தியம்பி பு³த்³த⁴ங் ஸரணங் க³ச்சா²மி, து³தியம்பி த⁴ம்மங் ஸரணங் க³ச்சா²மி, து³தியம்பி ஸங்க⁴ங் ஸரணங் க³ச்சா²மி; ததியம்பி பு³த்³த⁴ங் ஸரணங் க³ச்சா²மி, ததியம்பி த⁴ம்மங் ஸரணங் க³ச்சா²மி, ததியம்பி ஸங்க⁴ங் ஸரணங் க³ச்சா²மீ’’தி.
86. Tena kho pana samayena yo so aññatitthiyapubbo 2 pajjhāyena sahadhammikaṃ vuccamāno upajjhāyassa vādaṃ āropetvā taṃyeva titthāyatanaṃ saṅkami. So puna paccāgantvā bhikkhū upasampadaṃ yāci. Bhikkhū bhagavato etamatthaṃ ārocesuṃ. Yo so, bhikkhave, aññatitthiyapubbo upajjhāyena sahadhammikaṃ vuccamāno upajjhāyassa vādaṃ āropetvā taṃyeva titthāyatanaṃ saṅkanto, so āgato na upasampādetabbo. Yo so, bhikkhave, aññopi aññatitthiyapubbo imasmiṃ dhammavinaye ākaṅkhati pabbajjaṃ, ākaṅkhati upasampadaṃ, tassa cattāro māse parivāso dātabbo. Evañca pana, bhikkhave, dātabbo – paṭhamaṃ kesamassuṃ ohārāpetvā kāsāyāni vatthāni acchādāpetvā ekaṃsaṃ uttarāsaṅgaṃ kārāpetvā bhikkhūnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā evaṃ vadehīti vattabbo – ‘‘buddhaṃ saraṇaṃ gacchāmi, dhammaṃ saraṇaṃ gacchāmi, saṅghaṃ saraṇaṃ gacchāmi; dutiyampi buddhaṃ saraṇaṃ gacchāmi, dutiyampi dhammaṃ saraṇaṃ gacchāmi, dutiyampi saṅghaṃ saraṇaṃ gacchāmi; tatiyampi buddhaṃ saraṇaṃ gacchāmi, tatiyampi dhammaṃ saraṇaṃ gacchāmi, tatiyampi saṅghaṃ saraṇaṃ gacchāmī’’ti.
தேன, பி⁴க்க²வே, அஞ்ஞதித்தி²யபுப்³பே³ன ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘அஹங், ப⁴ந்தே, அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்கா²மி உபஸம்பத³ங். ஸோஹங், ப⁴ந்தே, ஸங்க⁴ங் சத்தாரோ மாஸே பரிவாஸங் யாசாமீ’’தி. து³தியம்பி யாசிதப்³போ³. ததியம்பி யாசிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Tena, bhikkhave, aññatitthiyapubbena saṅghaṃ upasaṅkamitvā ekaṃsaṃ uttarāsaṅgaṃ karitvā bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, bhante, aññatitthiyapubbo imasmiṃ dhammavinaye ākaṅkhāmi upasampadaṃ. Sohaṃ, bhante, saṅghaṃ cattāro māse parivāsaṃ yācāmī’’ti. Dutiyampi yācitabbo. Tatiyampi yācitabbo. Byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்க²தி உபஸம்பத³ங். ஸோ ஸங்க⁴ங் சத்தாரோ மாஸே பரிவாஸங் யாசதி. யதி³ ஸங்க⁴ஸ்ஸ பத்தகல்லங் ஸங்கோ⁴ இத்த²ன்னாமஸ்ஸ அஞ்ஞதித்தி²யபுப்³ப³ஸ்ஸ சத்தாரோ மாஸே பரிவாஸங் த³தெ³ய்ய. ஏஸா ஞத்தி.
‘‘Suṇātu me, bhante, saṅgho. Ayaṃ itthannāmo aññatitthiyapubbo imasmiṃ dhammavinaye ākaṅkhati upasampadaṃ. So saṅghaṃ cattāro māse parivāsaṃ yācati. Yadi saṅghassa pattakallaṃ saṅgho itthannāmassa aññatitthiyapubbassa cattāro māse parivāsaṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்க²தி உபஸம்பத³ங். ஸோ ஸங்க⁴ங் சத்தாரோ மாஸே பரிவாஸங் யாசதி. ஸங்கோ⁴ இத்த²ன்னாமஸ்ஸ அஞ்ஞதித்தி²யபுப்³ப³ஸ்ஸ சத்தாரோ மாஸே பரிவாஸங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ அஞ்ஞதித்தி²யபுப்³ப³ஸ்ஸ சத்தாரோ மாஸே பரிவாஸஸ்ஸ தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ itthannāmo aññatitthiyapubbo imasmiṃ dhammavinaye ākaṅkhati upasampadaṃ. So saṅghaṃ cattāro māse parivāsaṃ yācati. Saṅgho itthannāmassa aññatitthiyapubbassa cattāro māse parivāsaṃ deti. Yassāyasmato khamati itthannāmassa aññatitthiyapubbassa cattāro māse parivāsassa dānaṃ, so tuṇhassa; yassa nakkhamati, so bhāseyya.
‘‘தி³ன்னோ ஸங்கே⁴ன இத்த²ன்னாமஸ்ஸ அஞ்ஞதித்தி²யபுப்³ப³ஸ்ஸ சத்தாரோ மாஸே பரிவாஸோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinno saṅghena itthannāmassa aññatitthiyapubbassa cattāro māse parivāso. Khamati saṅghassa, tasmā tuṇhī, evametaṃ dhārayāmī’’ti.
87. ‘‘ஏவங் கோ², பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி, ஏவங் அனாராத⁴கோ. கத²ஞ்ச, பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி? இத⁴, பி⁴க்க²வே, அஞ்ஞதித்தி²யபுப்³போ³ அதிகாலேன கா³மங் பவிஸதி, அதிதி³வா படிக்கமதி. ஏவம்பி, பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி.
87. ‘‘Evaṃ kho, bhikkhave, aññatitthiyapubbo ārādhako hoti, evaṃ anārādhako. Kathañca, bhikkhave, aññatitthiyapubbo anārādhako hoti? Idha, bhikkhave, aññatitthiyapubbo atikālena gāmaṃ pavisati, atidivā paṭikkamati. Evampi, bhikkhave, aññatitthiyapubbo anārādhako hoti.
‘‘புன சபரங், பி⁴க்க²வே, அஞ்ஞதித்தி²யபுப்³போ³ வேஸியாகோ³சரோ வா ஹோதி, வித⁴வாகோ³சரோ வா ஹோதி, து²ல்லகுமாரிகாகோ³சரோ வா ஹோதி, பண்ட³ககோ³சரோ வா ஹோதி, பி⁴க்கு²னிகோ³சரோ வா ஹோதி. ஏவம்பி, பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி.
‘‘Puna caparaṃ, bhikkhave, aññatitthiyapubbo vesiyāgocaro vā hoti, vidhavāgocaro vā hoti, thullakumārikāgocaro vā hoti, paṇḍakagocaro vā hoti, bhikkhunigocaro vā hoti. Evampi, bhikkhave, aññatitthiyapubbo anārādhako hoti.
‘‘புன சபரங், பி⁴க்க²வே, அஞ்ஞதித்தி²யபுப்³போ³ யானி தானி ஸப்³ரஹ்மசாரீனங் உச்சாவசானி கரணீயானி, தத்த² ந த³க்கோ² ஹோதி, ந அனலஸோ, ந தத்ருபாயாய வீமங்ஸாய ஸமன்னாக³தோ, ந அலங் காதுங், ந அலங் ஸங்விதா⁴துங். ஏவம்பி, பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி.
‘‘Puna caparaṃ, bhikkhave, aññatitthiyapubbo yāni tāni sabrahmacārīnaṃ uccāvacāni karaṇīyāni, tattha na dakkho hoti, na analaso, na tatrupāyāya vīmaṃsāya samannāgato, na alaṃ kātuṃ, na alaṃ saṃvidhātuṃ. Evampi, bhikkhave, aññatitthiyapubbo anārādhako hoti.
‘‘புன சபரங், பி⁴க்க²வே, அஞ்ஞதித்தி²யபுப்³போ³ ந திப்³ப³ச்ச²ந்தோ³ ஹோதி உத்³தே³ஸே, பரிபுச்சா²ய, அதி⁴ஸீலே, அதி⁴சித்தே, அதி⁴பஞ்ஞாய. ஏவம்பி, பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி.
‘‘Puna caparaṃ, bhikkhave, aññatitthiyapubbo na tibbacchando hoti uddese, paripucchāya, adhisīle, adhicitte, adhipaññāya. Evampi, bhikkhave, aññatitthiyapubbo anārādhako hoti.
‘‘புன சபரங், பி⁴க்க²வே, அஞ்ஞதித்தி²யபுப்³போ³ யஸ்ஸ தித்தா²யதனா ஸங்கந்தோ ஹோதி, தஸ்ஸ ஸத்து²னோ தஸ்ஸ தி³ட்டி²யா தஸ்ஸ க²ந்தியா தஸ்ஸ ருசியா தஸ்ஸ ஆதா³யஸ்ஸ அவண்ணே ப⁴ஞ்ஞமானே குபிதோ ஹோதி அனத்தமனோ அனபி⁴ரத்³தோ⁴, பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ வா அவண்ணே ப⁴ஞ்ஞமானே அத்தமனோ ஹோதி உத³க்³கோ³ அபி⁴ரத்³தோ⁴. யஸ்ஸ வா பன தித்தா²யதனா ஸங்கந்தோ ஹோதி, தஸ்ஸ ஸத்து²னோ தஸ்ஸ தி³ட்டி²யா தஸ்ஸ க²ந்தியா தஸ்ஸ ருசியா தஸ்ஸ ஆதா³யஸ்ஸ வண்ணே ப⁴ஞ்ஞமானே அத்தமனோ ஹோதி உத³க்³கோ³ அபி⁴ரத்³தோ⁴, பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ வா வண்ணே ப⁴ஞ்ஞமானே குபிதோ ஹோதி அனத்தமனோ அனபி⁴ரத்³தோ⁴. இத³ங், பி⁴க்க²வே, ஸங்கா⁴தனிகங் அஞ்ஞதித்தி²யபுப்³ப³ஸ்ஸ அனாராத⁴னீயஸ்மிங். ஏவம்பி கோ², பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி. ஏவங் அனாராத⁴கோ கோ², பி⁴க்க²வே, அஞ்ஞதித்தி²யபுப்³போ³ ஆக³தோ ந உபஸம்பாதே³தப்³போ³.
‘‘Puna caparaṃ, bhikkhave, aññatitthiyapubbo yassa titthāyatanā saṅkanto hoti, tassa satthuno tassa diṭṭhiyā tassa khantiyā tassa ruciyā tassa ādāyassa avaṇṇe bhaññamāne kupito hoti anattamano anabhiraddho, buddhassa vā dhammassa vā saṅghassa vā avaṇṇe bhaññamāne attamano hoti udaggo abhiraddho. Yassa vā pana titthāyatanā saṅkanto hoti, tassa satthuno tassa diṭṭhiyā tassa khantiyā tassa ruciyā tassa ādāyassa vaṇṇe bhaññamāne attamano hoti udaggo abhiraddho, buddhassa vā dhammassa vā saṅghassa vā vaṇṇe bhaññamāne kupito hoti anattamano anabhiraddho. Idaṃ, bhikkhave, saṅghātanikaṃ aññatitthiyapubbassa anārādhanīyasmiṃ. Evampi kho, bhikkhave, aññatitthiyapubbo anārādhako hoti. Evaṃ anārādhako kho, bhikkhave, aññatitthiyapubbo āgato na upasampādetabbo.
‘‘கத²ஞ்ச, பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி? இத⁴, பி⁴க்க²வே, அஞ்ஞதித்தி²யபுப்³போ³ நாதிகாலேன கா³மங் பவிஸதி நாதிதி³வா படிக்கமதி. ஏவம்பி, பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி.
‘‘Kathañca, bhikkhave, aññatitthiyapubbo ārādhako hoti? Idha, bhikkhave, aññatitthiyapubbo nātikālena gāmaṃ pavisati nātidivā paṭikkamati. Evampi, bhikkhave, aññatitthiyapubbo ārādhako hoti.
‘‘புன சபரங், பி⁴க்க²வே, அஞ்ஞதித்தி²யபுப்³போ³ ந வேஸியாகோ³சரோ ஹோதி, ந வித⁴வாகோ³சரோ ஹோதி, ந து²ல்லகுமாரிகாகோ³சரோ ஹோதி, ந பண்ட³ககோ³சரோ ஹோதி, ந பி⁴க்கு²னிகோ³சரோ ஹோதி. ஏவம்பி, பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி.
‘‘Puna caparaṃ, bhikkhave, aññatitthiyapubbo na vesiyāgocaro hoti, na vidhavāgocaro hoti, na thullakumārikāgocaro hoti, na paṇḍakagocaro hoti, na bhikkhunigocaro hoti. Evampi, bhikkhave, aññatitthiyapubbo ārādhako hoti.
‘‘புன சபரங், பி⁴க்க²வே, அஞ்ஞதித்தி²யபுப்³போ³ யானி தானி ஸப்³ரஹ்மசாரீனங் உச்சாவசானி கரணீயானி, தத்த² த³க்கோ² ஹோதி, அனலஸோ, தத்ருபாயாய வீமங்ஸாய ஸமன்னாக³தோ, அலங் காதுங், அலங் ஸங்விதா⁴துங். ஏவம்பி, பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி.
‘‘Puna caparaṃ, bhikkhave, aññatitthiyapubbo yāni tāni sabrahmacārīnaṃ uccāvacāni karaṇīyāni, tattha dakkho hoti, analaso, tatrupāyāya vīmaṃsāya samannāgato, alaṃ kātuṃ, alaṃ saṃvidhātuṃ. Evampi, bhikkhave, aññatitthiyapubbo ārādhako hoti.
‘‘புன சபரங், பி⁴க்க²வே , அஞ்ஞதித்தி²யபுப்³போ³ திப்³ப³ச்ச²ந்தோ³ ஹோதி உத்³தே³ஸே, பரிபுச்சா²ய, அதி⁴ஸீலே, அதி⁴சித்தே, அதி⁴பஞ்ஞாய. ஏவம்பி, பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி.
‘‘Puna caparaṃ, bhikkhave , aññatitthiyapubbo tibbacchando hoti uddese, paripucchāya, adhisīle, adhicitte, adhipaññāya. Evampi, bhikkhave, aññatitthiyapubbo ārādhako hoti.
‘‘புன சபரங், பி⁴க்க²வே, அஞ்ஞதித்தி²யபுப்³போ³ யஸ்ஸ தித்தா²யதனா ஸங்கந்தோ ஹோதி, தஸ்ஸ ஸத்து²னோ தஸ்ஸ தி³ட்டி²யா தஸ்ஸ க²ந்தியா தஸ்ஸ ருசியா தஸ்ஸ ஆதா³யஸ்ஸ அவண்ணே ப⁴ஞ்ஞமானே அத்தமனோ ஹோதி உத³க்³கோ³ அபி⁴ரத்³தோ⁴, பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ வா அவண்ணே ப⁴ஞ்ஞமானே குபிதோ ஹோதி அனத்தமனோ அனபி⁴ரத்³தோ⁴. யஸ்ஸ வா பன தித்தா²யதனா ஸங்கந்தோ ஹோதி, தஸ்ஸ ஸத்து²னோ தஸ்ஸ தி³ட்டி²யா தஸ்ஸ க²ந்தியா தஸ்ஸ ருசியா தஸ்ஸ ஆதா³யஸ்ஸ வண்ணே ப⁴ஞ்ஞமானே குபிதோ ஹோதி அனத்தமனோ அனபி⁴ரத்³தோ⁴, பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ வா வண்ணே ப⁴ஞ்ஞமானே அத்தமனோ ஹோதி உத³க்³கோ³ அபி⁴ரத்³தோ⁴. இத³ங், பி⁴க்க²வே, ஸங்கா⁴தனிகங் அஞ்ஞதித்தி²யபுப்³ப³ஸ்ஸ ஆராத⁴னீயஸ்மிங். ஏவம்பி கோ², பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி. ஏவங் ஆராத⁴கோ கோ², பி⁴க்க²வே, அஞ்ஞதித்தி²யபுப்³போ³ ஆக³தோ உபஸம்பாதே³தப்³போ³.
‘‘Puna caparaṃ, bhikkhave, aññatitthiyapubbo yassa titthāyatanā saṅkanto hoti, tassa satthuno tassa diṭṭhiyā tassa khantiyā tassa ruciyā tassa ādāyassa avaṇṇe bhaññamāne attamano hoti udaggo abhiraddho, buddhassa vā dhammassa vā saṅghassa vā avaṇṇe bhaññamāne kupito hoti anattamano anabhiraddho. Yassa vā pana titthāyatanā saṅkanto hoti, tassa satthuno tassa diṭṭhiyā tassa khantiyā tassa ruciyā tassa ādāyassa vaṇṇe bhaññamāne kupito hoti anattamano anabhiraddho, buddhassa vā dhammassa vā saṅghassa vā vaṇṇe bhaññamāne attamano hoti udaggo abhiraddho. Idaṃ, bhikkhave, saṅghātanikaṃ aññatitthiyapubbassa ārādhanīyasmiṃ. Evampi kho, bhikkhave, aññatitthiyapubbo ārādhako hoti. Evaṃ ārādhako kho, bhikkhave, aññatitthiyapubbo āgato upasampādetabbo.
‘‘ஸசே, பி⁴க்க²வே, அஞ்ஞதித்தி²யபுப்³போ³ நக்³கோ³ ஆக³ச்ச²தி, உபஜ்ஜா²யமூலகங் சீவரங் பரியேஸிதப்³ப³ங். ஸசே அச்சி²ன்னகேஸோ ஆக³ச்ச²தி, ஸங்கோ⁴ அபலோகேதப்³போ³ ப⁴ண்டு³கம்மாய. யே தே, பி⁴க்க²வே, அக்³கி³கா ஜடிலகா, தே ஆக³தா உபஸம்பாதே³தப்³பா³, ந தேஸங் பரிவாஸோ தா³தப்³போ³. தங் கிஸ்ஸ ஹேது? கம்மவாதி³னோ ஏதே, பி⁴க்க²வே, கிரியவாதி³னோ. ஸசே, பி⁴க்க²வே, ஜாதியா ஸாகியோ அஞ்ஞதித்தி²யபுப்³போ³ ஆக³ச்ச²தி , ஸோ ஆக³தோ உபஸம்பாதே³தப்³போ³, ந தஸ்ஸ பரிவாஸோ தா³தப்³போ³. இமாஹங், பி⁴க்க²வே, ஞாதீனங் ஆவேணிகங் பரிஹாரங் த³ம்மீ’’தி.
‘‘Sace, bhikkhave, aññatitthiyapubbo naggo āgacchati, upajjhāyamūlakaṃ cīvaraṃ pariyesitabbaṃ. Sace acchinnakeso āgacchati, saṅgho apaloketabbo bhaṇḍukammāya. Ye te, bhikkhave, aggikā jaṭilakā, te āgatā upasampādetabbā, na tesaṃ parivāso dātabbo. Taṃ kissa hetu? Kammavādino ete, bhikkhave, kiriyavādino. Sace, bhikkhave, jātiyā sākiyo aññatitthiyapubbo āgacchati , so āgato upasampādetabbo, na tassa parivāso dātabbo. Imāhaṃ, bhikkhave, ñātīnaṃ āveṇikaṃ parihāraṃ dammī’’ti.
அஞ்ஞதித்தி²யபுப்³ப³கதா² நிட்டி²தா.
Aññatitthiyapubbakathā niṭṭhitā.
ஸத்தமபா⁴ணவாரோ.
Sattamabhāṇavāro.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அஞ்ஞதித்தி²யபுப்³ப³வத்து²கதா² • Aññatitthiyapubbavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அஞ்ஞதித்தி²யபுப்³ப³வத்து²கதா²வண்ணனா • Aññatitthiyapubbavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அஞ்ஞதித்தி²யபுப்³ப³வத்து²கதா²வண்ணனா • Aññatitthiyapubbavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அஞ்ஞதித்தி²யபுப்³ப³வத்து²கதா²வண்ணனா • Aññatitthiyapubbavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 25. அஞ்ஞதித்தி²யபுப்³ப³வத்து²கதா² • 25. Aññatitthiyapubbavatthukathā
