| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
25. அஞ்ஞதித்தி²யபுப்³ப³வத்து²கதா²
25. Aññatitthiyapubbavatthukathā
86. யோ பனாதி யோ பன அஞ்ஞதித்தி²யபுப்³போ³. அஞ்ஞோபீதி பஸூரதோ அபரோபி. இதா⁴தி இமஸ்மிங் ஸாஸனே. தஸ்மிந்தி அஞ்ஞதித்தி²யபுப்³பே³. தத்தா²தி ‘‘யோ ஸோ பி⁴க்க²வே அஞ்ஞோபீ’’திஆதி³வசனே. அயந்தி பரிவாஸோ. நக்³க³பரிப்³பா³ஜகஸ்ஸேவாதி வத்வா தஸ்ஸ பே⁴த³ங் த³ஸ்ஸேதுங் வுத்தங் ‘‘ஆஜீவகஸ்ஸ வா அசேலகஸ்ஸ வா’’தி. தத்த² ஆஜீவகோ உபரி ஏகமேவ வத்த²ங் உபகச்ச²கே பவேஸெத்வா பரித³ஹதி, ஹெட்டா² நக்³கோ³. அசேலகோ பன ஸப்³பே³ன ஸப்³ப³ங் நக்³கோ³யேவ. ஸோபீதி =03 நக்³க³பரிப்³பா³ஜகோபி. வாலகம்ப³லாதீ³னந்தி வாலேன கதங் கம்ப³லங், ஆதி³ஸத்³தே³ன கேஸகம்ப³லாத³யோ ஸங்க³ண்ஹாதி. அஸ்ஸாதி பரிப்³பா³ஜகஸ்ஸ. அஞ்ஞஸ்ஸாதி நக்³க³பரிப்³பா³ஜகதோ அபரஸ்ஸ. பண்ட³ரங்கா³தி³கஸ்ஸாதி பண்ட³ரங் ஸேதவத்த²ங் அங்கே³ ஸரீரே ஏதஸ்ஸத்தீ²தி பண்ட³ரங்கோ³, ஆதி³ஸத்³தே³ன நீலங்கா³த³யோ ஸங்க³ண்ஹாதி.
86.Yo panāti yo pana aññatitthiyapubbo. Aññopīti pasūrato aparopi. Idhāti imasmiṃ sāsane. Tasminti aññatitthiyapubbe. Tatthāti ‘‘yo so bhikkhave aññopī’’tiādivacane. Ayanti parivāso. Naggaparibbājakassevāti vatvā tassa bhedaṃ dassetuṃ vuttaṃ ‘‘ājīvakassa vā acelakassa vā’’ti. Tattha ājīvako upari ekameva vatthaṃ upakacchake pavesetvā paridahati, heṭṭhā naggo. Acelako pana sabbena sabbaṃ naggoyeva. Sopīti =03 naggaparibbājakopi. Vālakambalādīnanti vālena kataṃ kambalaṃ, ādisaddena kesakambalādayo saṅgaṇhāti. Assāti paribbājakassa. Aññassāti naggaparibbājakato aparassa. Paṇḍaraṅgādikassāti paṇḍaraṃ setavatthaṃ aṅge sarīre etassatthīti paṇḍaraṅgo, ādisaddena nīlaṅgādayo saṅgaṇhāti.
ஏவந்தி இமினா கேஸமஸ்ஸுஓரோபனாதி³னா. பப்³பா³ஜெந்தேஹி பி⁴க்கூ²ஹீதி ஸம்ப³ந்தோ⁴. தஸ்மிந்தி அஞ்ஞதித்தி²யபுப்³பே³, நிஸின்னேயேவாதி யோஜனா. அனாத³ரே சேதங் பு⁴ம்மவசனங். தஸ்ஸாதி அஞ்ஞதித்தி²யபுப்³ப³ஸ்ஸ. நயிமேதி ந இமே, பி⁴க்கூ²தி ஸம்ப³ந்தோ⁴. தந்தி அஞ்ஞதித்தி²யபுப்³ப³ங்.
Evanti iminā kesamassuoropanādinā. Pabbājentehi bhikkhūhīti sambandho. Tasminti aññatitthiyapubbe, nisinneyevāti yojanā. Anādare cetaṃ bhummavacanaṃ. Tassāti aññatitthiyapubbassa. Nayimeti na ime, bhikkhūti sambandho. Tanti aññatitthiyapubbaṃ.
87. ‘‘ஏவங் கோ²…பே॰… அனாராத⁴கோ’’தி அயங் கதா² மாதிகாதி யோஜனா. அஸ்ஸாதி அஞ்ஞதித்தி²யபுப்³ப³ஸ்ஸ. தஸ்ஸேவாதி தஸ்ஸாயேவ மாதிகாய. தத்தா²தி விப⁴ங்கே³. அதிகாலேனாதி எத்த² ப⁴த்தகிச்சங் கத்வா வத்தகரணவேலாயேவ அதிகாலோ நாமாதி த³ஸ்ஸெந்தோ ஆஹ ‘‘வத்தகரணவேலாயமேவா’’தி. இமினா பு⁴ம்மத்தே² கரணவசனந்திபி த³ஸ்ஸேதி. தத்தே²வாதி குலக⁴ரேஸுயேவ. அஞ்ஞத³த்தூ²தி ஏகங்ஸேன, ‘‘கரொந்தோ’’தி இமினா பாட²ஸேஸங் த³ஸ்ஸேதி. ஏவம்பி கரொந்தோ அஞ்ஞதித்தி²யபுப்³போ³தி யோஜனா. ‘‘ஸம்பாத³கோ’’தி இமினா அனாராத⁴கோதி எத்த² ஆராத⁴ஸத்³த³ஸ்ஸ ஸாத⁴னத்த²ங் த³ஸ்ஸேதி, தோஸனத்தா²த³யோ நிவத்தேதி.
87. ‘‘Evaṃ kho…pe… anārādhako’’ti ayaṃ kathā mātikāti yojanā. Assāti aññatitthiyapubbassa. Tassevāti tassāyeva mātikāya. Tatthāti vibhaṅge. Atikālenāti ettha bhattakiccaṃ katvā vattakaraṇavelāyeva atikālo nāmāti dassento āha ‘‘vattakaraṇavelāyamevā’’ti. Iminā bhummatthe karaṇavacanantipi dasseti. Tatthevāti kulagharesuyeva. Aññadatthūti ekaṃsena, ‘‘karonto’’ti iminā pāṭhasesaṃ dasseti. Evampi karonto aññatitthiyapubboti yojanā. ‘‘Sampādako’’ti iminā anārādhakoti ettha ārādhasaddassa sādhanatthaṃ dasseti, tosanatthādayo nivatteti.
அஜ்ஜா²சாரத்தி²கா விஸந்தி பவிஸந்தி எத்தா²தி வேஸியா, ஸோப⁴ணரூபஸங்கா²தங் வேஸங் தா⁴ரேதீதி வா வேஸியா. தேன வுத்தங் ‘‘ஸுலப⁴ஜ்ஜா²சாரா’’திஆதி³. ஆமிஸோயேவ கிஞ்ஜக்கோ² அப்பமத்தகட்டே²னாதி ஆமிஸகிஞ்ஜக்கோ², விஸேஸனபரபதோ³. அத² வா ஆமிஸோ ச ததோ அஞ்ஞோ கிஞ்ஜக்கோ² ச ஆமிஸகிஞ்ஜக்க²ங், தஸ்ஸ ஸம்பதா³னங் ஆமிஸகிஞ்ஜக்க²ஸம்பதா³னங். கிஞ்ஜக்க²ஸத்³தோ³ கேஸரஸ்ஸேவ முக்²யதோ வாசகோ, அப்பமத்தகஸ்ஸ பன ரூள்ஹீவஸேன. வித⁴வாதி எத்த² த⁴வஸத்³தோ³ பதினோயேவ வாசகோ, ந ருக்க²விஸேஸஸ்ஸாதி த³ஸ்ஸெந்தோ ஆஹ ‘‘மதபதிகா வா’’திஆதி³. இமேஹி பதே³ஹி மதவஸேன வா பவுத்த²வஸேன வா விக³தோ த⁴வோ ஏதாஸங், த⁴வேன வா விக³தாதி வித⁴வாதி வசனத்த²ங் த³ஸ்ஸேதி. தாதி வித⁴வா. யொப்³ப³னபத்தத்தா வா யொப்³ப³னாதீதத்தா வா து²ல்லா மஹந்தா குமாரிகாதி து²ல்லகுமாரிகாதி த³ஸ்ஸெந்தோ ஆஹ ‘‘யொப்³ப³னபத்தா’’திஆதி³. பண்ட³காதி எத்த² ஆஸித்தபண்ட³காதீ³ஸு பஞ்சஸு பண்ட³கேஸு நபுங்ஸகபண்ட³கோவாதி⁴ப்பேதோதி ஆஹ ‘‘நபுங்ஸகா’’தி. ஸமானபப்³ப³ஜ்ஜாதி பி⁴க்கூ²ஹி ஸமானபப்³ப³ஜ்ஜா. ததோதி விஸ்ஸாஸதோ.
Ajjhācāratthikā visanti pavisanti etthāti vesiyā, sobhaṇarūpasaṅkhātaṃ vesaṃ dhāretīti vā vesiyā. Tena vuttaṃ ‘‘sulabhajjhācārā’’tiādi. Āmisoyeva kiñjakkho appamattakaṭṭhenāti āmisakiñjakkho, visesanaparapado. Atha vā āmiso ca tato añño kiñjakkho ca āmisakiñjakkhaṃ, tassa sampadānaṃ āmisakiñjakkhasampadānaṃ. Kiñjakkhasaddo kesarasseva mukhyato vācako, appamattakassa pana rūḷhīvasena. Vidhavāti ettha dhavasaddo patinoyeva vācako, na rukkhavisesassāti dassento āha ‘‘matapatikā vā’’tiādi. Imehi padehi matavasena vā pavutthavasena vā vigato dhavo etāsaṃ, dhavena vā vigatāti vidhavāti vacanatthaṃ dasseti. Tāti vidhavā. Yobbanapattattā vā yobbanātītattā vā thullā mahantā kumārikāti thullakumārikāti dassento āha ‘‘yobbanapattā’’tiādi. Paṇḍakāti ettha āsittapaṇḍakādīsu pañcasu paṇḍakesu napuṃsakapaṇḍakovādhippetoti āha ‘‘napuṃsakā’’ti. Samānapabbajjāti bhikkhūhi samānapabbajjā. Tatoti vissāsato.
தத்தா²தி வேஸியாதீ³ஸு. தாஸந்தி வேஸியானங். ஸோதி அஞ்ஞதித்தி²யபுப்³போ³. ஸப்³ப³த்தா²தி ஸப்³பே³ஸு =04 வித⁴வாதீ³ஸு. க³ந்தப்³ப³தங் த³ஸ்ஸெந்தோ ஆஹ ‘‘ஸசே பனா’’திஆதி³. ததா²தி யதா² க³ந்தப்³ப³த்தங் வுத்தங், ததா².
Tatthāti vesiyādīsu. Tāsanti vesiyānaṃ. Soti aññatitthiyapubbo. Sabbatthāti sabbesu =04 vidhavādīsu. Gantabbataṃ dassento āha ‘‘sace panā’’tiādi. Tathāti yathā gantabbattaṃ vuttaṃ, tathā.
உச்சாவசானீதி எத்த² உத்³த⁴ங் சயதி வட்³ட⁴தீதி உச்சங், சயதோ அவக³தோ வியோகோ³தி அவசங். உச்சஞ்ச அவசஞ்ச உச்சாவசானீதி வசனத்தே²ன மஹந்தகு²த்³த³கத்தோ²தி ஆஹ ‘‘மஹந்தகு²த்³த³கானீ’’தி. ‘‘கம்மானீ’’தி இமினா ‘‘கரணீயானீ’’திபத³ஸ்ஸ ஸரூபங் த³ஸ்ஸேதி. தங்த³ஸ்ஸனேன ச கத்தப்³பா³னீதி கரணீயானீதி வசனத்தோ² காதப்³போ³. தத்தா²தி மஹந்தகு²த்³த³கேஸு கம்மேஸு . தத்த² ந த³க்கோ²தி எத்த² தஸத்³த³ஸ்ஸ விஸயங் த³ஸ்ஸேதுங் வுத்தங் ‘‘தேஸு தேஸு நவகம்மேஸூ’’தி. ‘‘உட்டா²னவீரியஸம்பன்னோ’’தி இமினா நத்தி² அலஸோ கோஸஜ்ஜங் ஏதஸ்ஸாதி அனலஸோதி வசனத்த²ங் த³ஸ்ஸேதி. தத்ராதி எத்த² த்ரபச்சயோ ஸத்தம்யத்தே² விச்சா²ஜோதகோதி ஆஹ ‘‘தேஸு தேஸூ’’தி. ‘‘டா²னுப்பத்திகாய வீமங்ஸாயா’’தி வுத்தவசனஸ்ஸத்த²ங் த³ஸ்ஸெந்தோ ஆஹ ‘‘இத³மேவ’’ந்திஆதி³. ‘‘தஸ்மிங்யேவ க²ணே உப்பன்னபஞ்ஞாயா’’தி இமினா ‘‘டா²னுப்பத்திகாயா’’தி எத்த² டா²னஸத்³தோ³ தங்க²ணத்தோ²தி த³ஸ்ஸேதி. அலங் காதுந்தி எத்த² அலங்ஸத்³தோ³ பூ⁴ஸனவாரணபரியத்தஸங்கா²தேஸு தீஸு அத்தே²ஸு பரியத்தத்தோ²தி ஆஹ ‘‘காதுங் ஸமத்தோ²’’தி.
Uccāvacānīti ettha uddhaṃ cayati vaḍḍhatīti uccaṃ, cayato avagato viyogoti avacaṃ. Uccañca avacañca uccāvacānīti vacanatthena mahantakhuddakatthoti āha ‘‘mahantakhuddakānī’’ti. ‘‘Kammānī’’ti iminā ‘‘karaṇīyānī’’tipadassa sarūpaṃ dasseti. Taṃdassanena ca kattabbānīti karaṇīyānīti vacanattho kātabbo. Tatthāti mahantakhuddakesu kammesu . Tattha na dakkhoti ettha tasaddassa visayaṃ dassetuṃ vuttaṃ ‘‘tesu tesu navakammesū’’ti. ‘‘Uṭṭhānavīriyasampanno’’ti iminā natthi alaso kosajjaṃ etassāti analasoti vacanatthaṃ dasseti. Tatrāti ettha trapaccayo sattamyatthe vicchājotakoti āha ‘‘tesu tesū’’ti. ‘‘Ṭhānuppattikāya vīmaṃsāyā’’ti vuttavacanassatthaṃ dassento āha ‘‘idameva’’ntiādi. ‘‘Tasmiṃyeva khaṇe uppannapaññāyā’’ti iminā ‘‘ṭhānuppattikāyā’’ti ettha ṭhānasaddo taṅkhaṇatthoti dasseti. Alaṃ kātunti ettha alaṃsaddo bhūsanavāraṇapariyattasaṅkhātesu tīsu atthesu pariyattatthoti āha ‘‘kātuṃ samattho’’ti.
திப்³ப³ச்ச²ந்தோ³தி திகி²ணச²ந்தோ³. ‘‘ப³லவச்ச²ந்தோ³’’தி இமினா அதி⁴ப்பாயத்த²ங் த³ஸ்ஸேதி. லோகியஸமாதி⁴பா⁴வனாயாதி லோகியாய அட்ட²ஸமாபத்திஸங்கா²தாய ஸமாதி⁴பா⁴வனாய.
Tibbacchandoti tikhiṇachando. ‘‘Balavacchando’’ti iminā adhippāyatthaṃ dasseti. Lokiyasamādhibhāvanāyāti lokiyāya aṭṭhasamāpattisaṅkhātāya samādhibhāvanāya.
இதா⁴க³தோதி இமஸ்மிங் ஸாஸனே ஆக³தோ. தித்தா²யதனஸாமிகஸ்ஸாதி தரந்தி உப்லவந்தி ஸத்தா உம்முஜ்ஜனிமுஜ்ஜங் கரொந்தி எத்தா²தி தித்த²ங், த்³வாஸட்டி² தி³ட்டி²யோ. தமேவ ஆயதனங் தி³ட்டி²க³திகானந்தி தித்தா²யதனங். அத² வா தித்த²மேதேஸமத்தீ²தி தித்தி²னோ, தேஸமாயதனங் தித்தா²யதனங், தஸ்ஸ ஸாமிகோ தித்தா²யதனஸாமிகோ, தஸ்ஸ. தஸ்ஸ தி³ட்டி²யாதி எத்த² தி³ட்டி²ஸத்³தோ³ லத்³தி⁴பரியாயோதி ஆஹ ‘‘தஸ்ஸ ஸந்தகாய லத்³தி⁴யா’’தி. கஸ்மா ஸா லத்³தி⁴ ‘‘க²ந்தீ’’தி ச ‘‘ருசீ’’தி ச ‘‘ஆதா³யோ’’தி ச வுச்சதீதி ஆஹ ‘‘இதா³னீ’’திஆதி³. ஸாயேவ லத்³தி⁴ க²மதி சேவ ருச்சதி ச க³ஹிதா சாதி யோஜனா. தஸ்ஸ தித்த²கரஸ்ஸாதி கத்வத்தே² ஸாமிவசனங். தஸ்ஸாதி தித்தா²யதனஸாமிகஸ்ஸ. ப⁴ஞ்ஞமானாயாதி ப⁴ணியமானாய. அனபி⁴ரத்³தோ⁴தி எத்த² அனபி⁴ராதி⁴தோ அபரிதோஸிதசித்தோதி அத்த²ங் த³ஸ்ஸெந்தோ ஆஹ ‘‘அபரிபுண்ணஸங்கப்போ, நோ பக்³க³ஹிதசித்தோ’’தி. யதி³த³ந்தி யங் இத³ங் ‘‘அனத்தமனத்த’’ந்தி வா ‘‘அத்தமனத்த’’ந்தி வா ஸம்ப³ந்தோ⁴. இமினா ‘‘இத³’’ந்திபத³ஸ்ஸ அனியமங் த³ஸ்ஸேதி. இமேதி பி⁴க்கூ². யஞ்ச அனத்தமனத்தந்தி யோஜனா. தஸ்ஸேவாதி அஞ்ஞதித்தி²யபுப்³ப³ஸ்ஸ ஏவ அனத்தமனத்தந்தி ஸம்ப³ந்தோ⁴. இத³ந்தி த்³வே அத்தமனத்தானி, த்³வே அனத்தமனத்தானீதி சதுப்³பி³த⁴ங் இத³ங் த⁴ம்மஜாதங். ஸங்கா⁴டனீயந்தி ஸங்க⁴டிதப்³ப³ங், ஸன்னிசயங் காதப்³ப³ந்தி அத்தோ². ‘‘அனாராத⁴கே’’திஆதி³னா அனாராத⁴னீயஸ்மிந்தி =05 எத்த² ந ஆராதே⁴தி வத்தங் அனேன கம்மேனாதி அனாராத⁴னீயந்தி வசனத்த²ங் த³ஸ்ஸேதி. இத³ந்தி சதுப்³பி³த⁴ங். லிங்க³ந்தி காரணங். லக்க²ணந்தி சிஹனங். இதோதி அட்ட²ங்க³தோ நீஹடேனாதி ஸம்ப³ந்தோ⁴. வுத்தவிபல்லாஸேனாதி கண்ஹபக்கே² வுத்தவிபரீதேன.
Idhāgatoti imasmiṃ sāsane āgato. Titthāyatanasāmikassāti taranti uplavanti sattā ummujjanimujjaṃ karonti etthāti titthaṃ, dvāsaṭṭhi diṭṭhiyo. Tameva āyatanaṃ diṭṭhigatikānanti titthāyatanaṃ. Atha vā titthametesamatthīti titthino, tesamāyatanaṃ titthāyatanaṃ, tassa sāmiko titthāyatanasāmiko, tassa. Tassa diṭṭhiyāti ettha diṭṭhisaddo laddhipariyāyoti āha ‘‘tassa santakāya laddhiyā’’ti. Kasmā sā laddhi ‘‘khantī’’ti ca ‘‘rucī’’ti ca ‘‘ādāyo’’ti ca vuccatīti āha ‘‘idānī’’tiādi. Sāyeva laddhi khamati ceva ruccati ca gahitā cāti yojanā. Tassa titthakarassāti katvatthe sāmivacanaṃ. Tassāti titthāyatanasāmikassa. Bhaññamānāyāti bhaṇiyamānāya. Anabhiraddhoti ettha anabhirādhito aparitositacittoti atthaṃ dassento āha ‘‘aparipuṇṇasaṅkappo, no paggahitacitto’’ti. Yadidanti yaṃ idaṃ ‘‘anattamanatta’’nti vā ‘‘attamanatta’’nti vā sambandho. Iminā ‘‘ida’’ntipadassa aniyamaṃ dasseti. Imeti bhikkhū. Yañca anattamanattanti yojanā. Tassevāti aññatitthiyapubbassa eva anattamanattanti sambandho. Idanti dve attamanattāni, dve anattamanattānīti catubbidhaṃ idaṃ dhammajātaṃ. Saṅghāṭanīyanti saṅghaṭitabbaṃ, sannicayaṃ kātabbanti attho. ‘‘Anārādhake’’tiādinā anārādhanīyasminti =05 ettha na ārādheti vattaṃ anena kammenāti anārādhanīyanti vacanatthaṃ dasseti. Idanti catubbidhaṃ. Liṅganti kāraṇaṃ. Lakkhaṇanti cihanaṃ. Itoti aṭṭhaṅgato nīhaṭenāti sambandho. Vuttavipallāsenāti kaṇhapakkhe vuttaviparītena.
ஸுக்கபக்கே² அட்ட²ங்கா³னி ஸமோதா⁴னெத்வா த³ஸ்ஸெந்தோ ஆஹ ‘‘நாதிகாலேன கா³மபவேஸனங் நாதிதி³வா படிக்கமன’’ந்திஆதி³. கண்ஹபக்கே²பி இமினா நயேன அட்ட²ங்கா³னி ஸமோதா⁴னேதப்³பா³னி. ‘‘பரிதோஸகோ’’தி இமினா ஆராத⁴கஸத்³த³ஸ்ஸ தோஸனத்த²ங் த³ஸ்ஸேதி. ஹெட்டா² பன ‘‘ஸம்பாத³கோ’’தி வுத்தத்தா ஸாத⁴னத்த²ங் த³ஸ்ஸேதீதி த³ட்ட²ப்³ப³ங்.
Sukkapakkhe aṭṭhaṅgāni samodhānetvā dassento āha ‘‘nātikālena gāmapavesanaṃ nātidivā paṭikkamana’’ntiādi. Kaṇhapakkhepi iminā nayena aṭṭhaṅgāni samodhānetabbāni. ‘‘Paritosako’’ti iminā ārādhakasaddassa tosanatthaṃ dasseti. Heṭṭhā pana ‘‘sampādako’’ti vuttattā sādhanatthaṃ dassetīti daṭṭhabbaṃ.
உபஸம்பத³மாளகேபீதி உபஸம்பாத³ட்டா²னே ஏககூடயுத்தே அனேககோணே பதிஸ்ஸயவிஸேஸேபி. ஸோ ஹி ஏககூடங் கத்வா அனேகேஹி கோணேஹி மலீயதி விபூ⁴ஸீயதீதி மாளோதி வுச்சதி. ‘‘சத்தாரோ மாஸே பரிவஸிதப்³ப³’’ந்திவசனங் அஸதி³ஸூபமாய பாகடங் கரொந்தோ ‘‘யதா² பனா’’திஆதி³மாஹ. ஹீதி ஸச்சங். அஸ்ஸாதி அஞ்ஞதித்தி²யபுப்³ப³ஸ்ஸ. பரிவஸந்தோ அஞ்ஞதித்தி²யபுப்³போ³தி ஸம்ப³ந்தோ⁴. அந்தராதி சதுமாஸஸ்ஸ அப்³ப⁴ந்தரே. குப்பனஸபா⁴வோதி நஸ்ஸனஸபா⁴வோ. பரிக்³க³ண்ஹாதீதி பரிச்சி²ந்தி³த்வா க³ண்ஹாதி. நாமரூபங் வவத்த²பேதீதி ‘‘இத³ங் நாமங், இத³ங் ரூப’’ந்தி வவத்த²பேதி. லக்க²ணந்தி நமனருப்பனலக்க²ணங், அனிச்சாதி³லக்க²ணங் வா. ஸோதாபத்திமக்³க³ஸ்ஸ தி³ட்டி²விசிகிச்சா²பஹானங் ஸந்தா⁴ய வுத்தங் ‘‘ஸமூஹதானி…பே॰… ஸல்ல’’ந்தி. அப்³பு³ள்ஹந்தி ஆவஹியித்தா²தி அப்³பு³ள்ஹங், உத்³த⁴ங் வஹியித்தா²தி அத்தோ². ஆத்யூபஸக்³கோ³ ஹி உத்³த⁴ங்க³மத்தோ². தங்தி³வஸமேவாதி தஸ்மிங் ஸோதாபத்திமக்³க³ஸ்ஸ படிலப⁴னதி³வஸேயேவ. பு⁴ம்மத்தே² சேதங் உபயோக³வசனங். தத³ஹேவாதி தஸ்மிங் ஸோதாபன்னப⁴வனஅஹனி ஏவ.
Upasampadamāḷakepīti upasampādaṭṭhāne ekakūṭayutte anekakoṇe patissayavisesepi. So hi ekakūṭaṃ katvā anekehi koṇehi malīyati vibhūsīyatīti māḷoti vuccati. ‘‘Cattāro māse parivasitabba’’ntivacanaṃ asadisūpamāya pākaṭaṃ karonto ‘‘yathā panā’’tiādimāha. Hīti saccaṃ. Assāti aññatitthiyapubbassa. Parivasanto aññatitthiyapubboti sambandho. Antarāti catumāsassa abbhantare. Kuppanasabhāvoti nassanasabhāvo. Pariggaṇhātīti paricchinditvā gaṇhāti. Nāmarūpaṃ vavatthapetīti ‘‘idaṃ nāmaṃ, idaṃ rūpa’’nti vavatthapeti. Lakkhaṇanti namanaruppanalakkhaṇaṃ, aniccādilakkhaṇaṃ vā. Sotāpattimaggassa diṭṭhivicikicchāpahānaṃ sandhāya vuttaṃ ‘‘samūhatāni…pe… salla’’nti. Abbuḷhanti āvahiyitthāti abbuḷhaṃ, uddhaṃ vahiyitthāti attho. Ātyūpasaggo hi uddhaṅgamattho. Taṃdivasamevāti tasmiṃ sotāpattimaggassa paṭilabhanadivaseyeva. Bhummatthe cetaṃ upayogavacanaṃ. Tadahevāti tasmiṃ sotāpannabhavanaahani eva.
தஸ்ஸாதி அஞ்ஞதித்தி²யபுப்³ப³ஸ்ஸ. பாளியங் பத்தஸ்ஸ அனாக³தத்தா வுத்தங் ‘‘பத்தம்பி ததே²வா’’தி. யதா² உபஜ்ஜா²யமூலகங் சீவரங் பரியேஸிதப்³ப³ங், பத்தம்பி ததே²வாதி அத்தோ². இத³ந்தி பத்தசீவரங். இமஸ்ஸாதி அஞ்ஞதித்தி²யபுப்³ப³ஸ்ஸ. அஞ்ஞேதி உபஜ்ஜா²யதோ அபரே. தேஹிபீதி அஞ்ஞேஹிபி. விலோமாதி படிலோமா. ஆயத்தந்தி அதீ⁴னங். ஆயத்தஜீவிகத்தாதி அஞ்ஞதித்தி²யபுப்³ப³ஸ்ஸ உபஜ்ஜா²யேன ஆயத்தஜீவிகத்தா. தஸ்ஸாதி உபஜ்ஜா²யஸ்ஸ. வசனகரோதி வசனங் கரோ. வாக்யேபி ஸமாஸேபி வசனஸத்³த³ஸ்ஸ ‘‘தஸ்ஸா’’தி பத³மேவ அபெக்க²த்தா ‘‘வசனகரோ’’தி ஸமாஸோ ஹோதி. ஏஸேவ நயோ ‘‘உபஜ்ஜா²யேன ஆயத்தஜீவகத்தா’’தி எத்தா²பி. தேனாதி வசனகரஹேதுனா.
Tassāti aññatitthiyapubbassa. Pāḷiyaṃ pattassa anāgatattā vuttaṃ ‘‘pattampi tathevā’’ti. Yathā upajjhāyamūlakaṃ cīvaraṃ pariyesitabbaṃ, pattampi tathevāti attho. Idanti pattacīvaraṃ. Imassāti aññatitthiyapubbassa. Aññeti upajjhāyato apare. Tehipīti aññehipi. Vilomāti paṭilomā. Āyattanti adhīnaṃ. Āyattajīvikattāti aññatitthiyapubbassa upajjhāyena āyattajīvikattā. Tassāti upajjhāyassa. Vacanakaroti vacanaṃ karo. Vākyepi samāsepi vacanasaddassa ‘‘tassā’’ti padameva apekkhattā ‘‘vacanakaro’’ti samāso hoti. Eseva nayo ‘‘upajjhāyena āyattajīvakattā’’ti etthāpi. Tenāti vacanakarahetunā.
அக்³கி³பரிசரணகாதி =06 அக்³கி³பூஜகா. இமினா அக்³கி³ங் பரிசரந்தீதி அக்³கி³காதி வசனத்த²ங் த³ஸ்ஸேதி. தாபஸாதி ஜடாத⁴ரா. தே ஹி யஸ்மா ஜடா ச தபோ ச ஏதேஸமத்தி², தஸ்மா ‘‘ஜடிலா’’தி ச ‘‘தாபஸா’’தி ச வுச்சந்தி. ஏதேதி ஜடிலகா. ‘‘கிரியங் ந படிபா³ஹந்தீ’’தி வுத்தவசனஸ்ஸ அத்த²ங் த³ஸ்ஸெந்தோ ஆஹ ‘‘அத்தி² கம்மங், அத்தி² கம்மவிபாகோ’’தி. ஏததே³வ பப்³ப³ஜ்ஜந்தி ஏதங் ஏவ தாபஸபப்³ப³ஜ்ஜங். ஏதேஸந்தி ஜடிலானங். ஸாஸனேதி பு³த்³த⁴ஸ்ஸ ஸாஸனே. தேஸந்தி ஞாதீனங், இமங் பரிஹாரந்தி ஸம்ப³ந்தோ⁴. தேதி ஞாதயோ. ஹீதி ஸச்சங், யஸ்மா வா. ஞாதிஸெட்ட²ஸ்ஸாதி ஞாதியேவ ஸெட்டோ², ஞாதீனங் வாதி ஞாதிஸெட்டோ², தஸ்ஸ, பு³த்³த⁴ஸ்ஸாதி ஸம்ப³ந்தோ⁴.
Aggiparicaraṇakāti =06 aggipūjakā. Iminā aggiṃ paricarantīti aggikāti vacanatthaṃ dasseti. Tāpasāti jaṭādharā. Te hi yasmā jaṭā ca tapo ca etesamatthi, tasmā ‘‘jaṭilā’’ti ca ‘‘tāpasā’’ti ca vuccanti. Eteti jaṭilakā. ‘‘Kiriyaṃ na paṭibāhantī’’ti vuttavacanassa atthaṃ dassento āha ‘‘atthi kammaṃ, atthi kammavipāko’’ti. Etadeva pabbajjanti etaṃ eva tāpasapabbajjaṃ. Etesanti jaṭilānaṃ. Sāsaneti buddhassa sāsane. Tesanti ñātīnaṃ, imaṃ parihāranti sambandho. Teti ñātayo. Hīti saccaṃ, yasmā vā. Ñātiseṭṭhassāti ñātiyeva seṭṭho, ñātīnaṃ vāti ñātiseṭṭho, tassa, buddhassāti sambandho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 25. அஞ்ஞதித்தி²யபுப்³ப³கதா² • 25. Aññatitthiyapubbakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அஞ்ஞதித்தி²யபுப்³ப³வத்து²கதா² • Aññatitthiyapubbavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அஞ்ஞதித்தி²யபுப்³ப³வத்து²கதா²வண்ணனா • Aññatitthiyapubbavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அஞ்ஞதித்தி²யபுப்³ப³வத்து²கதா²வண்ணனா • Aññatitthiyapubbavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அஞ்ஞதித்தி²யபுப்³ப³வத்து²கதா²வண்ணனா • Aññatitthiyapubbavatthukathāvaṇṇanā
