| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
অঞ্ঞতিত্থিযপুব্বৰত্থুকথা
Aññatitthiyapubbavatthukathā
৮৬. অঞ্ঞতিত্থিযপুব্বৰত্থুস্মিং – যো তাৰ অযং পসূরো, সো তিত্থিযপক্কন্তকত্তা ন উপসম্পাদেতব্বো। যো পন অঞ্ঞোপি নযিধ পব্বজিতপুব্বো আগচ্ছতি, তস্মিং যং কত্তব্বং তং দস্সেতুং ‘‘যো সো ভিক্খৰে অঞ্ঞোপী’’তিআদিমাহ। তত্থ তস্স চত্তারো মাসে পরিৰাসো দাতব্বোতি অযং তিত্থিযপরিৰাসো নাম; অপ্পটিচ্ছন্নপরিৰাসোতিপি ৰুচ্চতি। অযং পন নগ্গপরিব্বাজকস্সেৰ আজীৰকস্স ৰা অচেলকস্স ৰা দাতব্বো । সচে সোপি সাটকং ৰা ৰাল়কম্বলাদীনং অঞ্ঞতরং তিত্থিযদ্ধজং ৰা নিৰাসেত্ৰা আগচ্ছতি, নাস্স পরিৰাসো দাতব্বো। অঞ্ঞস্স পন তাপসপণ্ডরঙ্গাদিকস্স ন দাতব্বোৰ।
86. Aññatitthiyapubbavatthusmiṃ – yo tāva ayaṃ pasūro, so titthiyapakkantakattā na upasampādetabbo. Yo pana aññopi nayidha pabbajitapubbo āgacchati, tasmiṃ yaṃ kattabbaṃ taṃ dassetuṃ ‘‘yo so bhikkhave aññopī’’tiādimāha. Tattha tassa cattāro māse parivāso dātabboti ayaṃ titthiyaparivāso nāma; appaṭicchannaparivāsotipi vuccati. Ayaṃ pana naggaparibbājakasseva ājīvakassa vā acelakassa vā dātabbo . Sace sopi sāṭakaṃ vā vāḷakambalādīnaṃ aññataraṃ titthiyaddhajaṃ vā nivāsetvā āgacchati, nāssa parivāso dātabbo. Aññassa pana tāpasapaṇḍaraṅgādikassa na dātabbova.
পঠমং কেসমস্সুন্তিআদিনা তস্স আদিতোৰ সামণেরপব্বজ্জং দস্সেতি। এৰং পব্বাজেন্তেহি পন তস্মিং সঙ্ঘমজ্ঝে নিসিন্নেযেৰ ‘‘ত্ৰং পব্বাজেহি, ত্ৰং আচরিযো হোহি, ত্ৰং উপজ্ঝাযো হোহী’’তি থেরা ভিক্খূ ন ৰত্তব্বা। এৰং ৰুত্তা হি সচে তস্স আচরিযুপজ্ঝাযভাৰেন জিগুচ্ছন্তা ন সম্পটিচ্ছন্তি, অথ সো ‘‘নযিমে ময্হং সদ্দহন্তী’’তি কুজ্ঝিত্ৰাপি গচ্ছেয্য। তস্মা তং একমন্তং নেত্ৰা তস্স আচরিযুপজ্ঝাযা পরিযেসিতব্বা।
Paṭhamaṃ kesamassuntiādinā tassa āditova sāmaṇerapabbajjaṃ dasseti. Evaṃ pabbājentehi pana tasmiṃ saṅghamajjhe nisinneyeva ‘‘tvaṃ pabbājehi, tvaṃ ācariyo hohi, tvaṃ upajjhāyo hohī’’ti therā bhikkhū na vattabbā. Evaṃ vuttā hi sace tassa ācariyupajjhāyabhāvena jigucchantā na sampaṭicchanti, atha so ‘‘nayime mayhaṃ saddahantī’’ti kujjhitvāpi gaccheyya. Tasmā taṃ ekamantaṃ netvā tassa ācariyupajjhāyā pariyesitabbā.
৮৭. এৰং খো ভিক্খৰে অঞ্ঞতিত্থিযপুব্বো আরাধকো হোতি, এৰং অনারাধকোতি অযমস্স পরিৰাসৰত্তদস্সনত্থং মাতিকা। কথঞ্চ ভিক্খৰেতিআদি তস্সেৰ ৰিভঙ্গো। তত্থ অতিকালেন গামং পৰিসতীতি ভিক্খূনং ৰত্তকরণৰেলাযমেৰ গামং পিণ্ডায পৰিসতি। অতিদিৰা পটিক্কমতীতি কুলঘরেসু ইত্থিপুরিসদারকদারিকাদীহি সদ্ধিং গেহস্সিতকথং কথেন্তো তত্থেৰ ভুঞ্জিত্ৰা ভিক্খূসু পত্তচীৰরং পটিসামেত্ৰা উদ্দেসপরিপুচ্ছাদীনি ৰা করোন্তেসু পটিসল্লীনেসু ৰা আগচ্ছতি; ন উপজ্ঝাযৰত্তং নাচরিযৰত্তং করোতি, অঞ্ঞদত্থু ৰসনট্ঠানং পৰিসিত্ৰা নিদ্দাযতি। এৰম্পি ভিক্খৰে অঞ্ঞতিত্থিযপুব্বো অনারাধকো হোতীতি এৰম্পি করোন্তো পরিৰাসৰত্তস্স সম্পাদকো পূরকো ন হোতি।
87.Evaṃ kho bhikkhave aññatitthiyapubbo ārādhako hoti, evaṃ anārādhakoti ayamassa parivāsavattadassanatthaṃ mātikā. Kathañca bhikkhavetiādi tasseva vibhaṅgo. Tattha atikālena gāmaṃ pavisatīti bhikkhūnaṃ vattakaraṇavelāyameva gāmaṃ piṇḍāya pavisati. Atidivā paṭikkamatīti kulagharesu itthipurisadārakadārikādīhi saddhiṃ gehassitakathaṃ kathento tattheva bhuñjitvā bhikkhūsu pattacīvaraṃ paṭisāmetvā uddesaparipucchādīni vā karontesu paṭisallīnesu vā āgacchati; na upajjhāyavattaṃ nācariyavattaṃ karoti, aññadatthu vasanaṭṭhānaṃ pavisitvā niddāyati. Evampi bhikkhave aññatitthiyapubbo anārādhako hotīti evampi karonto parivāsavattassa sampādako pūrako na hoti.
ৰেসিযাগোচরো ৰাতিআদীসু ৰেসিযাতি আমিসকিঞ্চিক্খসম্পদানাদিনা সুলভজ্ঝাচারা রূপূপজীৰিকা ইত্থিযো। ৰিধৰাতি মতপতিকা ৰা পৰুত্থপতিকা ৰা ইত্থিযো; তা যেন কেনচি সদ্ধিং মিত্তভাৰং পত্থেন্তি। থুল্লকুমারিকাতি যোব্বন্নপ্পত্তা যোব্বন্নাতীতা ৰা কুমারিযো; তা পুরিসাধিপ্পাযাৰ ৰিচরন্তি, যেন কেনচি সদ্ধিং মিত্তভাৰং পত্থেন্তি। পণ্ডকাতি উস্সন্নকিলেসা অৰূপসন্তপরিল়াহা নপুংসকা; তে পরিল়াহৰেগাভিভূতা যেন কেনচি সদ্ধিং মিত্তভাৰং পত্থেন্তি । ভিক্খুনিযোতি সমানপব্বজ্জা ইত্থিযো; তাহি সদ্ধিং খিপ্পমেৰ ৰিস্সাসো হোতি, ততো সীলং ভিজ্জতি।
Vesiyāgocaro vātiādīsu vesiyāti āmisakiñcikkhasampadānādinā sulabhajjhācārā rūpūpajīvikā itthiyo. Vidhavāti matapatikā vā pavutthapatikā vā itthiyo; tā yena kenaci saddhiṃ mittabhāvaṃ patthenti. Thullakumārikāti yobbannappattā yobbannātītā vā kumāriyo; tā purisādhippāyāva vicaranti, yena kenaci saddhiṃ mittabhāvaṃ patthenti. Paṇḍakāti ussannakilesā avūpasantapariḷāhā napuṃsakā; te pariḷāhavegābhibhūtā yena kenaci saddhiṃ mittabhāvaṃ patthenti . Bhikkhuniyoti samānapabbajjā itthiyo; tāhi saddhiṃ khippameva vissāso hoti, tato sīlaṃ bhijjati.
তত্থ ৰেসিযানং কুলেসু কুলুপকো হুত্ৰা পিণ্ডপাতচরিযাদীহি ৰা অপদিসিত্ৰা সিনেহসন্থৰজাতেন হদযেন অভিণ্হদস্সনসল্লাপকামতায তাসং সন্তিকং উপসঙ্কমন্তো ‘‘ৰেসিযাগোচরো’’তি ৰুচ্চতি, সো নচিরস্সেৰ ‘‘অসুকৰেসিযা সদ্ধিং গতো’’তি ৰত্তব্বতং পাপুণাতি। এস নযো সব্বত্থ। সচে পন ৰেসিযাদযো সলাকভত্তাদীনি দেন্তি, ভিক্খূহি সদ্ধিং গন্ত্ৰা সদ্ধিংযেৰ ভুঞ্জিত্ৰা ৰা গহেত্ৰা ৰা আগন্তুং ৰট্টতি। গিলানা ভিক্খুনিযো ওৰদিতুং ৰা ধম্মং ৰা দেসেতুং উদ্দেসপরিপুচ্ছাদীনি ৰা দাতুং গচ্ছন্তেহি ভিক্খূহি সদ্ধিং গন্তুং ৰট্টতি। যো পন তথা আগন্ত্ৰা মিত্তসন্থৰৰসেন গচ্ছতি, অযং অনারাধকো হোতি।
Tattha vesiyānaṃ kulesu kulupako hutvā piṇḍapātacariyādīhi vā apadisitvā sinehasanthavajātena hadayena abhiṇhadassanasallāpakāmatāya tāsaṃ santikaṃ upasaṅkamanto ‘‘vesiyāgocaro’’ti vuccati, so nacirasseva ‘‘asukavesiyā saddhiṃ gato’’ti vattabbataṃ pāpuṇāti. Esa nayo sabbattha. Sace pana vesiyādayo salākabhattādīni denti, bhikkhūhi saddhiṃ gantvā saddhiṃyeva bhuñjitvā vā gahetvā vā āgantuṃ vaṭṭati. Gilānā bhikkhuniyo ovadituṃ vā dhammaṃ vā desetuṃ uddesaparipucchādīni vā dātuṃ gacchantehi bhikkhūhi saddhiṃ gantuṃ vaṭṭati. Yo pana tathā āgantvā mittasanthavavasena gacchati, ayaṃ anārādhako hoti.
উচ্চাৰচানি করণীযানীতি মহন্তখুদ্দকানি কম্মানি। তত্থ ঘণ্টিং পহরিত্ৰা সমগ্গেন সঙ্ঘেন সন্নিপতিত্ৰা কত্তব্বানি চেতিযমহাপাসাদপটিসঙ্খরণাদীনি কম্মানি উচ্চানি নাম। চীৰরধোৰনরজনাদীনি খন্ধকপরিযাপন্নানি চ অগ্গিসালৰত্তাদীনি আভিসমাচারিকানি অৰচানি নাম। তত্থ ন দক্খো হোতীতি তেসু কম্মেসু ছেকো সুসিক্খিতো ন হোতি। ন অনলসোতি উট্ঠানৰীরিযসম্পন্নো ন হোতি; ‘‘ভিক্খুসঙ্ঘস্স কম্মং অত্থী’’তি সুত্ৰা পগেৰ ভত্তকিচ্চং কত্ৰা গব্ভন্তরং পৰিসিত্ৰা যাৰদত্থং সুপিত্ৰা সাযং নিক্খমতি। তত্রুপাযাযাতি তেসু কম্মেসু উপাযভূতায। ৰীমংসাযাতি ঠানুপ্পত্তিকৰীমংসায। ‘‘ইদমেৰং কত্তব্বং, ইদমেৰং ন কত্তব্ব’’ন্তি তস্মিংযেৰ খণে উপ্পন্নপঞ্ঞায সমন্নাগতো ন হোতি। ন অলং কাতুং ন অলং সংৰিধাতুন্তি সহত্থাপি কাতুং সমত্থো ন হোতি; ‘‘গণ্হথ ভন্তে, গণ্হ দহর, গণ্হ সামণের, সচে তুম্হে ৰা ন করিস্সথ, অম্হে ৰা ন করিস্সাম, কো দানি ইমং করিস্সতী’’তি এৰং উস্সাহং জনেত্ৰা সংৰিধাতুং অঞ্ঞমঞ্ঞং কারেতুম্পি সমত্থো ন হোতি। ভিক্খূহি ‘‘কম্মং করিস্সামা’’তি ৰুত্তে কিঞ্চি রোগং অপদিসতি, ভিক্খূনং কম্মং করোন্তানং সমীপেনেৰ ৰিচরতি, সীসমেৰ দস্সেতি, অযম্পি অনারাধকো হোতি।
Uccāvacāni karaṇīyānīti mahantakhuddakāni kammāni. Tattha ghaṇṭiṃ paharitvā samaggena saṅghena sannipatitvā kattabbāni cetiyamahāpāsādapaṭisaṅkharaṇādīni kammāni uccāni nāma. Cīvaradhovanarajanādīni khandhakapariyāpannāni ca aggisālavattādīni ābhisamācārikāni avacāni nāma. Tattha na dakkho hotīti tesu kammesu cheko susikkhito na hoti. Na analasoti uṭṭhānavīriyasampanno na hoti; ‘‘bhikkhusaṅghassa kammaṃ atthī’’ti sutvā pageva bhattakiccaṃ katvā gabbhantaraṃ pavisitvā yāvadatthaṃ supitvā sāyaṃ nikkhamati. Tatrupāyāyāti tesu kammesu upāyabhūtāya. Vīmaṃsāyāti ṭhānuppattikavīmaṃsāya. ‘‘Idamevaṃ kattabbaṃ, idamevaṃ na kattabba’’nti tasmiṃyeva khaṇe uppannapaññāya samannāgato na hoti. Na alaṃ kātuṃ na alaṃ saṃvidhātunti sahatthāpi kātuṃ samattho na hoti; ‘‘gaṇhatha bhante, gaṇha dahara, gaṇha sāmaṇera, sace tumhe vā na karissatha, amhe vā na karissāma, ko dāni imaṃ karissatī’’ti evaṃ ussāhaṃ janetvā saṃvidhātuṃ aññamaññaṃ kāretumpi samattho na hoti. Bhikkhūhi ‘‘kammaṃ karissāmā’’ti vutte kiñci rogaṃ apadisati, bhikkhūnaṃ kammaṃ karontānaṃ samīpeneva vicarati, sīsameva dasseti, ayampi anārādhako hoti.
ন তিব্বচ্ছন্দো হোতীতি বলৰচ্ছন্দো ন হোতি। উদ্দেসেতি পাল়িপরিযাপুণনে। পরিপুচ্ছাযাতি অত্থসৰনে। অধিসীলেতি পাতিমোক্খসীলে। অধিচিত্তেতি লোকিযসমাধিভাৰনায। অধিপঞ্ঞাযাতি লোকুত্তরমগ্গভাৰনায।
Na tibbacchando hotīti balavacchando na hoti. Uddeseti pāḷipariyāpuṇane. Paripucchāyāti atthasavane. Adhisīleti pātimokkhasīle. Adhicitteti lokiyasamādhibhāvanāya. Adhipaññāyāti lokuttaramaggabhāvanāya.
সঙ্কন্তো হোতীতি ইধাগতো হোতি। তস্স সত্থুনোতি তস্স তিত্থাযতনসামিকস্স। তস্স দিট্ঠিযাতি তস্স সন্তকায লদ্ধিযা। ইদানি সাযেৰ লদ্ধি যস্মা তস্স তিত্থকরস্স খমতি চেৰ রুচ্চতি চ ‘‘ইদমেৰ সচ্চ’’ন্তি চ দল়্হগ্গাহেন গহিতা; তস্মা তস্স খন্তি রুচি আদাযোতি ৰুচ্চতি। তেন ৰুত্তং – ‘‘তস্স খন্তিযা তস্স রুচিযা তস্স আদাযস্সা’’তি। অৰণ্ণে ভঞ্ঞমানেতি গরহায ভঞ্ঞমানায। অনভিরদ্ধোতি অপরিপুণ্ণসঙ্কপ্পো; নো পগ্গহিতচিত্তো। উদগ্গোতি অব্ভুন্নতকাযচিত্তো। ইদং ভিক্খৰে সঙ্ঘাতনিকং অঞ্ঞতিত্থিযপুব্বস্স অনারাধনীযস্মিন্তি ভিক্খৰে যমিদং তস্স সত্থুনো তস্সেৰ চ লদ্ধিযা অৰণ্ণে ভঞ্ঞমানে ‘‘কিং ইমে পরং গরহন্তী’’তি কাযৰচীৰিকারনিব্বত্তকং অনত্তমনত্তং, বুদ্ধাদীনঞ্চ অৰণ্ণে ভঞ্ঞমানে অত্তমনত্তং, যঞ্চ তস্সেৰ সত্থুনো তস্সেৰ চ লদ্ধিযা ৰণ্ণে ভঞ্ঞমানে অত্তমনত্তং, বুদ্ধাদীনঞ্চ ৰণ্ণভণনে অনত্তমনত্তং, ইদং অঞ্ঞতিত্থিযপুব্বস্স অনারাধনীযস্মিং সঙ্ঘাতনিকং, অনারাধকে পরিৰাসৰত্তং অপূরকে কম্মে ইদং লিঙ্গং, ইদং লক্খণং, ইদমচলপ্পমাণন্তি ৰুত্তং হোতি। এৰং অনারাধকো খো ভিক্খৰে অঞ্ঞতিত্থিযপুব্বো আগতো ন উপসম্পাদেতব্বোতি ইতো একেনপি অঙ্গেন সমন্নাগতো ন উপসম্পাদেতব্বো। সুক্কপক্খে সব্বং ৰুত্তৰিপল্লাসেন ৰেদিতব্বং।
Saṅkantohotīti idhāgato hoti. Tassa satthunoti tassa titthāyatanasāmikassa. Tassa diṭṭhiyāti tassa santakāya laddhiyā. Idāni sāyeva laddhi yasmā tassa titthakarassa khamati ceva ruccati ca ‘‘idameva sacca’’nti ca daḷhaggāhena gahitā; tasmā tassa khanti ruci ādāyoti vuccati. Tena vuttaṃ – ‘‘tassa khantiyā tassa ruciyā tassa ādāyassā’’ti. Avaṇṇe bhaññamāneti garahāya bhaññamānāya. Anabhiraddhoti aparipuṇṇasaṅkappo; no paggahitacitto. Udaggoti abbhunnatakāyacitto. Idaṃ bhikkhave saṅghātanikaṃ aññatitthiyapubbassa anārādhanīyasminti bhikkhave yamidaṃ tassa satthuno tasseva ca laddhiyā avaṇṇe bhaññamāne ‘‘kiṃ ime paraṃ garahantī’’ti kāyavacīvikāranibbattakaṃ anattamanattaṃ, buddhādīnañca avaṇṇe bhaññamāne attamanattaṃ, yañca tasseva satthuno tasseva ca laddhiyā vaṇṇe bhaññamāne attamanattaṃ, buddhādīnañca vaṇṇabhaṇane anattamanattaṃ, idaṃ aññatitthiyapubbassa anārādhanīyasmiṃ saṅghātanikaṃ, anārādhake parivāsavattaṃ apūrake kamme idaṃ liṅgaṃ, idaṃ lakkhaṇaṃ, idamacalappamāṇanti vuttaṃ hoti. Evaṃ anārādhako kho bhikkhave aññatitthiyapubbo āgato na upasampādetabboti ito ekenapi aṅgena samannāgato na upasampādetabbo. Sukkapakkhe sabbaṃ vuttavipallāsena veditabbaṃ.
এৰং আরাধকো খো ভিক্খৰেতি এৰং নাতিকালেন গামপ্পৰেসনা নাতিদিৰা পটিক্কমনং, ন ৰেসিযাদিগোচরতা, সব্রহ্মচারীনং কিচ্চেসু দক্খতাদি, উদ্দেসাদীসু তিব্বচ্ছন্দতা, তিত্থিযানং অৰণ্ণভণনে অত্তমনতা, বুদ্ধাদীনং অৰণ্ণভণনে অনত্তমনতা, তিত্থিযানং ৰণ্ণভণনে অনত্তমনতা, বুদ্ধাদীনং ৰণ্ণভণনে অত্তমনতাতি ইমেসং অট্ঠন্নং তিত্থিযৰত্তানং পরিপূরণেন আরাধকো পরিতোসকো ভিক্খূনং অঞ্ঞতিত্থিযপুব্বো আগতো উপসম্পাদেতব্বো।
Evaṃ ārādhako kho bhikkhaveti evaṃ nātikālena gāmappavesanā nātidivā paṭikkamanaṃ, na vesiyādigocaratā, sabrahmacārīnaṃ kiccesu dakkhatādi, uddesādīsu tibbacchandatā, titthiyānaṃ avaṇṇabhaṇane attamanatā, buddhādīnaṃ avaṇṇabhaṇane anattamanatā, titthiyānaṃ vaṇṇabhaṇane anattamanatā, buddhādīnaṃ vaṇṇabhaṇane attamanatāti imesaṃ aṭṭhannaṃ titthiyavattānaṃ paripūraṇena ārādhako paritosako bhikkhūnaṃ aññatitthiyapubbo āgato upasampādetabbo.
সচে পন উপসম্পদমাল়কেপি একং ৰত্তং ভিন্দতি, পুন চত্তারো মাসে পরিৰসিতব্বং। যথা পন ভিন্নসিক্খায সিক্খমানায পুন সিক্খাপদানি চ সিক্খাসম্মুতি চ দিয্যতি, এৰং নযিমস্স কিঞ্চি পুন দাতব্বমত্থি। পুব্বে দিন্নপরিৰাসোযেৰ হি তস্স পরিৰাসো। তস্মা পুন চত্তারো মাসে পরিৰসিতব্বং। সচে পরিৰসন্তো অন্তরা অট্ঠ সমাপত্তিযো নিব্বত্তেতি, লোকিযধম্মো নাম কুপ্পনসভাৰো, ন উপসম্পাদেতব্বো। চত্তারো মাসে পূরিতৰত্তোৰ উপসম্পাদেতব্বো। সচে পন পরিৰসন্তো চত্তারি মহাভূতানি পরিগ্গণ্হতি, উপাদারূপানি পরিচ্ছিন্দতি, নামরূপং ৰৰত্থপেতি, তিলক্খণং আরোপেত্ৰা ৰিপস্সনং আরভতি, লোকিযধম্মো নাম কুপ্পনসভাৰো, নেৰ উপসম্পাদেতব্বো। সচে পন ৰিপস্সনং ৰড্ঢেত্ৰা সোতাপত্তিমগ্গং পটিলভতি, পরিপুণ্ণংযেৰ হোতি ৰত্তং। সমূহতানি সব্বদিট্ঠিগতানি অব্বুল়্হং ৰিচিকিচ্ছাসল্লং তংদিৰসমেৰ উপসম্পাদেতব্বো। সচেপি তিত্থিযলিঙ্গে ঠিতো সোতাপন্নো হোতি, পরিৰাসকিচ্চং নত্থি, তদহেৰ পব্বাজেত্ৰা উপসম্পাদেতব্বো।
Sace pana upasampadamāḷakepi ekaṃ vattaṃ bhindati, puna cattāro māse parivasitabbaṃ. Yathā pana bhinnasikkhāya sikkhamānāya puna sikkhāpadāni ca sikkhāsammuti ca diyyati, evaṃ nayimassa kiñci puna dātabbamatthi. Pubbe dinnaparivāsoyeva hi tassa parivāso. Tasmā puna cattāro māse parivasitabbaṃ. Sace parivasanto antarā aṭṭha samāpattiyo nibbatteti, lokiyadhammo nāma kuppanasabhāvo, na upasampādetabbo. Cattāro māse pūritavattova upasampādetabbo. Sace pana parivasanto cattāri mahābhūtāni pariggaṇhati, upādārūpāni paricchindati, nāmarūpaṃ vavatthapeti, tilakkhaṇaṃ āropetvā vipassanaṃ ārabhati, lokiyadhammo nāma kuppanasabhāvo, neva upasampādetabbo. Sace pana vipassanaṃ vaḍḍhetvā sotāpattimaggaṃ paṭilabhati, paripuṇṇaṃyeva hoti vattaṃ. Samūhatāni sabbadiṭṭhigatāni abbuḷhaṃ vicikicchāsallaṃ taṃdivasameva upasampādetabbo. Sacepi titthiyaliṅge ṭhito sotāpanno hoti, parivāsakiccaṃ natthi, tadaheva pabbājetvā upasampādetabbo.
উপজ্ঝাযমূলকং চীৰরং পরিযেসিতব্বন্তি উপজ্ঝাযং ইস্সরং কত্ৰা তস্স চীৰরং পরিযেসিতব্বং। পত্তম্পি তথেৰ। তস্মা যদি উপজ্ঝাযস্স পত্তচীৰরং অত্থি, ‘‘ইমস্স দেহী’’তি ৰত্তব্বো। অথ নত্থি, অঞ্ঞে দাতুকামা হোন্তি, তেহিপি উপজ্ঝাযস্সেৰ দাতব্বং ‘‘ইদং তুম্হাকং কত্ৰা ইমস্স দেথা’’তি। কস্মা? তিত্থিযা নাম ৰিলোমা হোন্তি ‘‘সঙ্ঘেন মে পত্তচীৰরং দিন্নং, কিং ময্হং তুম্হেসু আযত্ত’’ন্তি ৰত্ৰা ওৰাদানুসাসনিং ন করেয্যুং, উপজ্ঝাযেন পন আযত্তজীৰিকত্তা তস্স ৰচনকরো ভৰিস্সতি। তেনস্স ‘‘উপজ্ঝাযমূলকং চীৰরং পরিযেসিতব্ব’’ন্তি ৰুত্তং। ভণ্ডুকম্মাযাতি কেসোরোপনত্থং। ভণ্ডুকম্মকথা পরতো আগমিস্সতি।
Upajjhāyamūlakaṃ cīvaraṃ pariyesitabbanti upajjhāyaṃ issaraṃ katvā tassa cīvaraṃ pariyesitabbaṃ. Pattampi tatheva. Tasmā yadi upajjhāyassa pattacīvaraṃ atthi, ‘‘imassa dehī’’ti vattabbo. Atha natthi, aññe dātukāmā honti, tehipi upajjhāyasseva dātabbaṃ ‘‘idaṃ tumhākaṃ katvā imassa dethā’’ti. Kasmā? Titthiyā nāma vilomā honti ‘‘saṅghena me pattacīvaraṃ dinnaṃ, kiṃ mayhaṃ tumhesu āyatta’’nti vatvā ovādānusāsaniṃ na kareyyuṃ, upajjhāyena pana āyattajīvikattā tassa vacanakaro bhavissati. Tenassa ‘‘upajjhāyamūlakaṃ cīvaraṃ pariyesitabba’’nti vuttaṃ. Bhaṇḍukammāyāti kesoropanatthaṃ. Bhaṇḍukammakathā parato āgamissati.
অগ্গিকাতি অগ্গিপরিচরণকা। জটিলকাতি তাপসা। এতে ভিক্খৰে কিরিযৰাদিনোতি এতে কিরিযং ন পটিবাহন্তি, ‘‘অত্থি কম্মং, অত্থি কম্মৰিপাকো’’তি এৰংদিট্ঠিকা। সব্ববুদ্ধা হি নেক্খম্মপারমিং পূরযমানা এতদেৰ পব্বজ্জং পব্বজিত্ৰা পূরেসুং, মযাপি তথেৰ পূরিতা, ন এতেসং সাসনে পব্বজ্জা ৰিলোমা, তস্মা উপসম্পাদেতব্বা, ন তেসং পরিৰাসো দাতব্বোতি। ইমাহং ভিক্খৰে ঞাতীনং আৰেণিকং পরিহারং দম্মীতি ইমং অহং তেসং পাটেক্কং ওদিস্সকং পরিহারং দদামি। কস্মা এৰমাহ? তে হি তিত্থাযতনে পব্বজিতাপি সাসনস্স অৰণ্ণকামা ন হোন্তি, অম্হাকং ঞাতিসেট্ঠস্স সাসনন্তি ৰণ্ণৰাদিনোৰ হোন্তি, তস্মা এৰমাহাতি।
Aggikāti aggiparicaraṇakā. Jaṭilakāti tāpasā. Ete bhikkhave kiriyavādinoti ete kiriyaṃ na paṭibāhanti, ‘‘atthi kammaṃ, atthi kammavipāko’’ti evaṃdiṭṭhikā. Sabbabuddhā hi nekkhammapāramiṃ pūrayamānā etadeva pabbajjaṃ pabbajitvā pūresuṃ, mayāpi tatheva pūritā, na etesaṃ sāsane pabbajjā vilomā, tasmā upasampādetabbā, na tesaṃ parivāso dātabboti. Imāhaṃ bhikkhave ñātīnaṃ āveṇikaṃ parihāraṃ dammīti imaṃ ahaṃ tesaṃ pāṭekkaṃ odissakaṃ parihāraṃ dadāmi. Kasmā evamāha? Te hi titthāyatane pabbajitāpi sāsanassa avaṇṇakāmā na honti, amhākaṃ ñātiseṭṭhassa sāsananti vaṇṇavādinova honti, tasmā evamāhāti.
অঞ্ঞতিত্থিযপুব্বৰত্থুকথা নিট্ঠিতা।
Aññatitthiyapubbavatthukathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২৫. অঞ্ঞতিত্থিযপুব্বকথা • 25. Aññatitthiyapubbakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অঞ্ঞতিত্থিযপুব্বৰত্থুকথাৰণ্ণনা • Aññatitthiyapubbavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অঞ্ঞতিত্থিযপুব্বৰত্থুকথাৰণ্ণনা • Aññatitthiyapubbavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অঞ্ঞতিত্থিযপুব্বৰত্থুকথাৰণ্ণনা • Aññatitthiyapubbavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৫. অঞ্ঞতিত্থিযপুব্বৰত্থুকথা • 25. Aññatitthiyapubbavatthukathā
