| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২৫. অঞ্ঞতিত্থিযপুব্বৰত্থুকথা
25. Aññatitthiyapubbavatthukathā
৮৬. যো পনাতি যো পন অঞ্ঞতিত্থিযপুব্বো। অঞ্ঞোপীতি পসূরতো অপরোপি। ইধাতি ইমস্মিং সাসনে। তস্মিন্তি অঞ্ঞতিত্থিযপুব্বে। তত্থাতি ‘‘যো সো ভিক্খৰে অঞ্ঞোপী’’তিআদিৰচনে। অযন্তি পরিৰাসো। নগ্গপরিব্বাজকস্সেৰাতি ৰত্ৰা তস্স ভেদং দস্সেতুং ৰুত্তং ‘‘আজীৰকস্স ৰা অচেলকস্স ৰা’’তি। তত্থ আজীৰকো উপরি একমেৰ ৰত্থং উপকচ্ছকে পৰেসেত্ৰা পরিদহতি, হেট্ঠা নগ্গো। অচেলকো পন সব্বেন সব্বং নগ্গোযেৰ। সোপীতি =০৩ নগ্গপরিব্বাজকোপি। ৰালকম্বলাদীনন্তি ৰালেন কতং কম্বলং, আদিসদ্দেন কেসকম্বলাদযো সঙ্গণ্হাতি। অস্সাতি পরিব্বাজকস্স। অঞ্ঞস্সাতি নগ্গপরিব্বাজকতো অপরস্স। পণ্ডরঙ্গাদিকস্সাতি পণ্ডরং সেতৰত্থং অঙ্গে সরীরে এতস্সত্থীতি পণ্ডরঙ্গো, আদিসদ্দেন নীলঙ্গাদযো সঙ্গণ্হাতি।
86.Yo panāti yo pana aññatitthiyapubbo. Aññopīti pasūrato aparopi. Idhāti imasmiṃ sāsane. Tasminti aññatitthiyapubbe. Tatthāti ‘‘yo so bhikkhave aññopī’’tiādivacane. Ayanti parivāso. Naggaparibbājakassevāti vatvā tassa bhedaṃ dassetuṃ vuttaṃ ‘‘ājīvakassa vā acelakassa vā’’ti. Tattha ājīvako upari ekameva vatthaṃ upakacchake pavesetvā paridahati, heṭṭhā naggo. Acelako pana sabbena sabbaṃ naggoyeva. Sopīti =03 naggaparibbājakopi. Vālakambalādīnanti vālena kataṃ kambalaṃ, ādisaddena kesakambalādayo saṅgaṇhāti. Assāti paribbājakassa. Aññassāti naggaparibbājakato aparassa. Paṇḍaraṅgādikassāti paṇḍaraṃ setavatthaṃ aṅge sarīre etassatthīti paṇḍaraṅgo, ādisaddena nīlaṅgādayo saṅgaṇhāti.
এৰন্তি ইমিনা কেসমস্সুওরোপনাদিনা। পব্বাজেন্তেহি ভিক্খূহীতি সম্বন্ধো। তস্মিন্তি অঞ্ঞতিত্থিযপুব্বে, নিসিন্নেযেৰাতি যোজনা। অনাদরে চেতং ভুম্মৰচনং। তস্সাতি অঞ্ঞতিত্থিযপুব্বস্স। নযিমেতি ন ইমে, ভিক্খূতি সম্বন্ধো। তন্তি অঞ্ঞতিত্থিযপুব্বং।
Evanti iminā kesamassuoropanādinā. Pabbājentehi bhikkhūhīti sambandho. Tasminti aññatitthiyapubbe, nisinneyevāti yojanā. Anādare cetaṃ bhummavacanaṃ. Tassāti aññatitthiyapubbassa. Nayimeti na ime, bhikkhūti sambandho. Tanti aññatitthiyapubbaṃ.
৮৭. ‘‘এৰং খো…পে॰… অনারাধকো’’তি অযং কথা মাতিকাতি যোজনা। অস্সাতি অঞ্ঞতিত্থিযপুব্বস্স। তস্সেৰাতি তস্সাযেৰ মাতিকায। তত্থাতি ৰিভঙ্গে। অতিকালেনাতি এত্থ ভত্তকিচ্চং কত্ৰা ৰত্তকরণৰেলাযেৰ অতিকালো নামাতি দস্সেন্তো আহ ‘‘ৰত্তকরণৰেলাযমেৰা’’তি। ইমিনা ভুম্মত্থে করণৰচনন্তিপি দস্সেতি। তত্থেৰাতি কুলঘরেসুযেৰ। অঞ্ঞদত্থূতি একংসেন, ‘‘করোন্তো’’তি ইমিনা পাঠসেসং দস্সেতি। এৰম্পি করোন্তো অঞ্ঞতিত্থিযপুব্বোতি যোজনা। ‘‘সম্পাদকো’’তি ইমিনা অনারাধকোতি এত্থ আরাধসদ্দস্স সাধনত্থং দস্সেতি, তোসনত্থাদযো নিৰত্তেতি।
87. ‘‘Evaṃ kho…pe… anārādhako’’ti ayaṃ kathā mātikāti yojanā. Assāti aññatitthiyapubbassa. Tassevāti tassāyeva mātikāya. Tatthāti vibhaṅge. Atikālenāti ettha bhattakiccaṃ katvā vattakaraṇavelāyeva atikālo nāmāti dassento āha ‘‘vattakaraṇavelāyamevā’’ti. Iminā bhummatthe karaṇavacanantipi dasseti. Tatthevāti kulagharesuyeva. Aññadatthūti ekaṃsena, ‘‘karonto’’ti iminā pāṭhasesaṃ dasseti. Evampi karonto aññatitthiyapubboti yojanā. ‘‘Sampādako’’ti iminā anārādhakoti ettha ārādhasaddassa sādhanatthaṃ dasseti, tosanatthādayo nivatteti.
অজ্ঝাচারত্থিকা ৰিসন্তি পৰিসন্তি এত্থাতি ৰেসিযা, সোভণরূপসঙ্খাতং ৰেসং ধারেতীতি ৰা ৰেসিযা। তেন ৰুত্তং ‘‘সুলভজ্ঝাচারা’’তিআদি। আমিসোযেৰ কিঞ্জক্খো অপ্পমত্তকট্ঠেনাতি আমিসকিঞ্জক্খো, ৰিসেসনপরপদো। অথ ৰা আমিসো চ ততো অঞ্ঞো কিঞ্জক্খো চ আমিসকিঞ্জক্খং, তস্স সম্পদানং আমিসকিঞ্জক্খসম্পদানং। কিঞ্জক্খসদ্দো কেসরস্সেৰ মুখ্যতো ৰাচকো, অপ্পমত্তকস্স পন রূল়্হীৰসেন। ৰিধৰাতি এত্থ ধৰসদ্দো পতিনোযেৰ ৰাচকো, ন রুক্খৰিসেসস্সাতি দস্সেন্তো আহ ‘‘মতপতিকা ৰা’’তিআদি। ইমেহি পদেহি মতৰসেন ৰা পৰুত্থৰসেন ৰা ৰিগতো ধৰো এতাসং, ধৰেন ৰা ৰিগতাতি ৰিধৰাতি ৰচনত্থং দস্সেতি। তাতি ৰিধৰা। যোব্বনপত্তত্তা ৰা যোব্বনাতীতত্তা ৰা থুল্লা মহন্তা কুমারিকাতি থুল্লকুমারিকাতি দস্সেন্তো আহ ‘‘যোব্বনপত্তা’’তিআদি। পণ্ডকাতি এত্থ আসিত্তপণ্ডকাদীসু পঞ্চসু পণ্ডকেসু নপুংসকপণ্ডকোৰাধিপ্পেতোতি আহ ‘‘নপুংসকা’’তি। সমানপব্বজ্জাতি ভিক্খূহি সমানপব্বজ্জা। ততোতি ৰিস্সাসতো।
Ajjhācāratthikā visanti pavisanti etthāti vesiyā, sobhaṇarūpasaṅkhātaṃ vesaṃ dhāretīti vā vesiyā. Tena vuttaṃ ‘‘sulabhajjhācārā’’tiādi. Āmisoyeva kiñjakkho appamattakaṭṭhenāti āmisakiñjakkho, visesanaparapado. Atha vā āmiso ca tato añño kiñjakkho ca āmisakiñjakkhaṃ, tassa sampadānaṃ āmisakiñjakkhasampadānaṃ. Kiñjakkhasaddo kesarasseva mukhyato vācako, appamattakassa pana rūḷhīvasena. Vidhavāti ettha dhavasaddo patinoyeva vācako, na rukkhavisesassāti dassento āha ‘‘matapatikā vā’’tiādi. Imehi padehi matavasena vā pavutthavasena vā vigato dhavo etāsaṃ, dhavena vā vigatāti vidhavāti vacanatthaṃ dasseti. Tāti vidhavā. Yobbanapattattā vā yobbanātītattā vā thullā mahantā kumārikāti thullakumārikāti dassento āha ‘‘yobbanapattā’’tiādi. Paṇḍakāti ettha āsittapaṇḍakādīsu pañcasu paṇḍakesu napuṃsakapaṇḍakovādhippetoti āha ‘‘napuṃsakā’’ti. Samānapabbajjāti bhikkhūhi samānapabbajjā. Tatoti vissāsato.
তত্থাতি ৰেসিযাদীসু। তাসন্তি ৰেসিযানং। সোতি অঞ্ঞতিত্থিযপুব্বো। সব্বত্থাতি সব্বেসু =০৪ ৰিধৰাদীসু। গন্তব্বতং দস্সেন্তো আহ ‘‘সচে পনা’’তিআদি। তথাতি যথা গন্তব্বত্তং ৰুত্তং, তথা।
Tatthāti vesiyādīsu. Tāsanti vesiyānaṃ. Soti aññatitthiyapubbo. Sabbatthāti sabbesu =04 vidhavādīsu. Gantabbataṃ dassento āha ‘‘sace panā’’tiādi. Tathāti yathā gantabbattaṃ vuttaṃ, tathā.
উচ্চাৰচানীতি এত্থ উদ্ধং চযতি ৰড্ঢতীতি উচ্চং, চযতো অৰগতো ৰিযোগোতি অৰচং। উচ্চঞ্চ অৰচঞ্চ উচ্চাৰচানীতি ৰচনত্থেন মহন্তখুদ্দকত্থোতি আহ ‘‘মহন্তখুদ্দকানী’’তি। ‘‘কম্মানী’’তি ইমিনা ‘‘করণীযানী’’তিপদস্স সরূপং দস্সেতি। তংদস্সনেন চ কত্তব্বানীতি করণীযানীতি ৰচনত্থো কাতব্বো। তত্থাতি মহন্তখুদ্দকেসু কম্মেসু । তত্থ ন দক্খোতি এত্থ তসদ্দস্স ৰিসযং দস্সেতুং ৰুত্তং ‘‘তেসু তেসু নৰকম্মেসূ’’তি। ‘‘উট্ঠানৰীরিযসম্পন্নো’’তি ইমিনা নত্থি অলসো কোসজ্জং এতস্সাতি অনলসোতি ৰচনত্থং দস্সেতি। তত্রাতি এত্থ ত্রপচ্চযো সত্তম্যত্থে ৰিচ্ছাজোতকোতি আহ ‘‘তেসু তেসূ’’তি। ‘‘ঠানুপ্পত্তিকায ৰীমংসাযা’’তি ৰুত্তৰচনস্সত্থং দস্সেন্তো আহ ‘‘ইদমেৰ’’ন্তিআদি। ‘‘তস্মিংযেৰ খণে উপ্পন্নপঞ্ঞাযা’’তি ইমিনা ‘‘ঠানুপ্পত্তিকাযা’’তি এত্থ ঠানসদ্দো তঙ্খণত্থোতি দস্সেতি। অলং কাতুন্তি এত্থ অলংসদ্দো ভূসনৰারণপরিযত্তসঙ্খাতেসু তীসু অত্থেসু পরিযত্তত্থোতি আহ ‘‘কাতুং সমত্থো’’তি।
Uccāvacānīti ettha uddhaṃ cayati vaḍḍhatīti uccaṃ, cayato avagato viyogoti avacaṃ. Uccañca avacañca uccāvacānīti vacanatthena mahantakhuddakatthoti āha ‘‘mahantakhuddakānī’’ti. ‘‘Kammānī’’ti iminā ‘‘karaṇīyānī’’tipadassa sarūpaṃ dasseti. Taṃdassanena ca kattabbānīti karaṇīyānīti vacanattho kātabbo. Tatthāti mahantakhuddakesu kammesu . Tattha na dakkhoti ettha tasaddassa visayaṃ dassetuṃ vuttaṃ ‘‘tesu tesu navakammesū’’ti. ‘‘Uṭṭhānavīriyasampanno’’ti iminā natthi alaso kosajjaṃ etassāti analasoti vacanatthaṃ dasseti. Tatrāti ettha trapaccayo sattamyatthe vicchājotakoti āha ‘‘tesu tesū’’ti. ‘‘Ṭhānuppattikāya vīmaṃsāyā’’ti vuttavacanassatthaṃ dassento āha ‘‘idameva’’ntiādi. ‘‘Tasmiṃyeva khaṇe uppannapaññāyā’’ti iminā ‘‘ṭhānuppattikāyā’’ti ettha ṭhānasaddo taṅkhaṇatthoti dasseti. Alaṃ kātunti ettha alaṃsaddo bhūsanavāraṇapariyattasaṅkhātesu tīsu atthesu pariyattatthoti āha ‘‘kātuṃ samattho’’ti.
তিব্বচ্ছন্দোতি তিখিণছন্দো। ‘‘বলৰচ্ছন্দো’’তি ইমিনা অধিপ্পাযত্থং দস্সেতি। লোকিযসমাধিভাৰনাযাতি লোকিযায অট্ঠসমাপত্তিসঙ্খাতায সমাধিভাৰনায।
Tibbacchandoti tikhiṇachando. ‘‘Balavacchando’’ti iminā adhippāyatthaṃ dasseti. Lokiyasamādhibhāvanāyāti lokiyāya aṭṭhasamāpattisaṅkhātāya samādhibhāvanāya.
ইধাগতোতি ইমস্মিং সাসনে আগতো। তিত্থাযতনসামিকস্সাতি তরন্তি উপ্লৰন্তি সত্তা উম্মুজ্জনিমুজ্জং করোন্তি এত্থাতি তিত্থং, দ্ৰাসট্ঠি দিট্ঠিযো। তমেৰ আযতনং দিট্ঠিগতিকানন্তি তিত্থাযতনং। অথ ৰা তিত্থমেতেসমত্থীতি তিত্থিনো, তেসমাযতনং তিত্থাযতনং, তস্স সামিকো তিত্থাযতনসামিকো, তস্স। তস্স দিট্ঠিযাতি এত্থ দিট্ঠিসদ্দো লদ্ধিপরিযাযোতি আহ ‘‘তস্স সন্তকায লদ্ধিযা’’তি। কস্মা সা লদ্ধি ‘‘খন্তী’’তি চ ‘‘রুচী’’তি চ ‘‘আদাযো’’তি চ ৰুচ্চতীতি আহ ‘‘ইদানী’’তিআদি। সাযেৰ লদ্ধি খমতি চেৰ রুচ্চতি চ গহিতা চাতি যোজনা। তস্স তিত্থকরস্সাতি কত্ৰত্থে সামিৰচনং। তস্সাতি তিত্থাযতনসামিকস্স। ভঞ্ঞমানাযাতি ভণিযমানায। অনভিরদ্ধোতি এত্থ অনভিরাধিতো অপরিতোসিতচিত্তোতি অত্থং দস্সেন্তো আহ ‘‘অপরিপুণ্ণসঙ্কপ্পো, নো পগ্গহিতচিত্তো’’তি। যদিদন্তি যং ইদং ‘‘অনত্তমনত্ত’’ন্তি ৰা ‘‘অত্তমনত্ত’’ন্তি ৰা সম্বন্ধো। ইমিনা ‘‘ইদ’’ন্তিপদস্স অনিযমং দস্সেতি। ইমেতি ভিক্খূ। যঞ্চ অনত্তমনত্তন্তি যোজনা। তস্সেৰাতি অঞ্ঞতিত্থিযপুব্বস্স এৰ অনত্তমনত্তন্তি সম্বন্ধো। ইদন্তি দ্ৰে অত্তমনত্তানি, দ্ৰে অনত্তমনত্তানীতি চতুব্বিধং ইদং ধম্মজাতং। সঙ্ঘাটনীযন্তি সঙ্ঘটিতব্বং, সন্নিচযং কাতব্বন্তি অত্থো। ‘‘অনারাধকে’’তিআদিনা অনারাধনীযস্মিন্তি =০৫ এত্থ ন আরাধেতি ৰত্তং অনেন কম্মেনাতি অনারাধনীযন্তি ৰচনত্থং দস্সেতি। ইদন্তি চতুব্বিধং। লিঙ্গন্তি কারণং। লক্খণন্তি চিহনং। ইতোতি অট্ঠঙ্গতো নীহটেনাতি সম্বন্ধো। ৰুত্তৰিপল্লাসেনাতি কণ্হপক্খে ৰুত্তৰিপরীতেন।
Idhāgatoti imasmiṃ sāsane āgato. Titthāyatanasāmikassāti taranti uplavanti sattā ummujjanimujjaṃ karonti etthāti titthaṃ, dvāsaṭṭhi diṭṭhiyo. Tameva āyatanaṃ diṭṭhigatikānanti titthāyatanaṃ. Atha vā titthametesamatthīti titthino, tesamāyatanaṃ titthāyatanaṃ, tassa sāmiko titthāyatanasāmiko, tassa. Tassa diṭṭhiyāti ettha diṭṭhisaddo laddhipariyāyoti āha ‘‘tassa santakāya laddhiyā’’ti. Kasmā sā laddhi ‘‘khantī’’ti ca ‘‘rucī’’ti ca ‘‘ādāyo’’ti ca vuccatīti āha ‘‘idānī’’tiādi. Sāyeva laddhi khamati ceva ruccati ca gahitā cāti yojanā. Tassa titthakarassāti katvatthe sāmivacanaṃ. Tassāti titthāyatanasāmikassa. Bhaññamānāyāti bhaṇiyamānāya. Anabhiraddhoti ettha anabhirādhito aparitositacittoti atthaṃ dassento āha ‘‘aparipuṇṇasaṅkappo, no paggahitacitto’’ti. Yadidanti yaṃ idaṃ ‘‘anattamanatta’’nti vā ‘‘attamanatta’’nti vā sambandho. Iminā ‘‘ida’’ntipadassa aniyamaṃ dasseti. Imeti bhikkhū. Yañca anattamanattanti yojanā. Tassevāti aññatitthiyapubbassa eva anattamanattanti sambandho. Idanti dve attamanattāni, dve anattamanattānīti catubbidhaṃ idaṃ dhammajātaṃ. Saṅghāṭanīyanti saṅghaṭitabbaṃ, sannicayaṃ kātabbanti attho. ‘‘Anārādhake’’tiādinā anārādhanīyasminti =05 ettha na ārādheti vattaṃ anena kammenāti anārādhanīyanti vacanatthaṃ dasseti. Idanti catubbidhaṃ. Liṅganti kāraṇaṃ. Lakkhaṇanti cihanaṃ. Itoti aṭṭhaṅgato nīhaṭenāti sambandho. Vuttavipallāsenāti kaṇhapakkhe vuttaviparītena.
সুক্কপক্খে অট্ঠঙ্গানি সমোধানেত্ৰা দস্সেন্তো আহ ‘‘নাতিকালেন গামপৰেসনং নাতিদিৰা পটিক্কমন’’ন্তিআদি। কণ্হপক্খেপি ইমিনা নযেন অট্ঠঙ্গানি সমোধানেতব্বানি। ‘‘পরিতোসকো’’তি ইমিনা আরাধকসদ্দস্স তোসনত্থং দস্সেতি। হেট্ঠা পন ‘‘সম্পাদকো’’তি ৰুত্তত্তা সাধনত্থং দস্সেতীতি দট্ঠব্বং।
Sukkapakkhe aṭṭhaṅgāni samodhānetvā dassento āha ‘‘nātikālena gāmapavesanaṃ nātidivā paṭikkamana’’ntiādi. Kaṇhapakkhepi iminā nayena aṭṭhaṅgāni samodhānetabbāni. ‘‘Paritosako’’ti iminā ārādhakasaddassa tosanatthaṃ dasseti. Heṭṭhā pana ‘‘sampādako’’ti vuttattā sādhanatthaṃ dassetīti daṭṭhabbaṃ.
উপসম্পদমাল়কেপীতি উপসম্পাদট্ঠানে এককূটযুত্তে অনেককোণে পতিস্সযৰিসেসেপি। সো হি এককূটং কত্ৰা অনেকেহি কোণেহি মলীযতি ৰিভূসীযতীতি মাল়োতি ৰুচ্চতি। ‘‘চত্তারো মাসে পরিৰসিতব্ব’’ন্তিৰচনং অসদিসূপমায পাকটং করোন্তো ‘‘যথা পনা’’তিআদিমাহ। হীতি সচ্চং। অস্সাতি অঞ্ঞতিত্থিযপুব্বস্স। পরিৰসন্তো অঞ্ঞতিত্থিযপুব্বোতি সম্বন্ধো। অন্তরাতি চতুমাসস্স অব্ভন্তরে। কুপ্পনসভাৰোতি নস্সনসভাৰো। পরিগ্গণ্হাতীতি পরিচ্ছিন্দিত্ৰা গণ্হাতি। নামরূপং ৰৰত্থপেতীতি ‘‘ইদং নামং, ইদং রূপ’’ন্তি ৰৰত্থপেতি। লক্খণন্তি নমনরুপ্পনলক্খণং, অনিচ্চাদিলক্খণং ৰা। সোতাপত্তিমগ্গস্স দিট্ঠিৰিচিকিচ্ছাপহানং সন্ধায ৰুত্তং ‘‘সমূহতানি…পে॰… সল্ল’’ন্তি। অব্বুল়্হন্তি আৰহিযিত্থাতি অব্বুল়্হং, উদ্ধং ৰহিযিত্থাতি অত্থো। আত্যূপসগ্গো হি উদ্ধঙ্গমত্থো। তংদিৰসমেৰাতি তস্মিং সোতাপত্তিমগ্গস্স পটিলভনদিৰসেযেৰ। ভুম্মত্থে চেতং উপযোগৰচনং। তদহেৰাতি তস্মিং সোতাপন্নভৰনঅহনি এৰ।
Upasampadamāḷakepīti upasampādaṭṭhāne ekakūṭayutte anekakoṇe patissayavisesepi. So hi ekakūṭaṃ katvā anekehi koṇehi malīyati vibhūsīyatīti māḷoti vuccati. ‘‘Cattāro māse parivasitabba’’ntivacanaṃ asadisūpamāya pākaṭaṃ karonto ‘‘yathā panā’’tiādimāha. Hīti saccaṃ. Assāti aññatitthiyapubbassa. Parivasanto aññatitthiyapubboti sambandho. Antarāti catumāsassa abbhantare. Kuppanasabhāvoti nassanasabhāvo. Pariggaṇhātīti paricchinditvā gaṇhāti. Nāmarūpaṃ vavatthapetīti ‘‘idaṃ nāmaṃ, idaṃ rūpa’’nti vavatthapeti. Lakkhaṇanti namanaruppanalakkhaṇaṃ, aniccādilakkhaṇaṃ vā. Sotāpattimaggassa diṭṭhivicikicchāpahānaṃ sandhāya vuttaṃ ‘‘samūhatāni…pe… salla’’nti. Abbuḷhanti āvahiyitthāti abbuḷhaṃ, uddhaṃ vahiyitthāti attho. Ātyūpasaggo hi uddhaṅgamattho. Taṃdivasamevāti tasmiṃ sotāpattimaggassa paṭilabhanadivaseyeva. Bhummatthe cetaṃ upayogavacanaṃ. Tadahevāti tasmiṃ sotāpannabhavanaahani eva.
তস্সাতি অঞ্ঞতিত্থিযপুব্বস্স। পাল়িযং পত্তস্স অনাগতত্তা ৰুত্তং ‘‘পত্তম্পি তথেৰা’’তি। যথা উপজ্ঝাযমূলকং চীৰরং পরিযেসিতব্বং, পত্তম্পি তথেৰাতি অত্থো। ইদন্তি পত্তচীৰরং। ইমস্সাতি অঞ্ঞতিত্থিযপুব্বস্স। অঞ্ঞেতি উপজ্ঝাযতো অপরে। তেহিপীতি অঞ্ঞেহিপি। ৰিলোমাতি পটিলোমা। আযত্তন্তি অধীনং। আযত্তজীৰিকত্তাতি অঞ্ঞতিত্থিযপুব্বস্স উপজ্ঝাযেন আযত্তজীৰিকত্তা। তস্সাতি উপজ্ঝাযস্স। ৰচনকরোতি ৰচনং করো। ৰাক্যেপি সমাসেপি ৰচনসদ্দস্স ‘‘তস্সা’’তি পদমেৰ অপেক্খত্তা ‘‘ৰচনকরো’’তি সমাসো হোতি। এসেৰ নযো ‘‘উপজ্ঝাযেন আযত্তজীৰকত্তা’’তি এত্থাপি। তেনাতি ৰচনকরহেতুনা।
Tassāti aññatitthiyapubbassa. Pāḷiyaṃ pattassa anāgatattā vuttaṃ ‘‘pattampi tathevā’’ti. Yathā upajjhāyamūlakaṃ cīvaraṃ pariyesitabbaṃ, pattampi tathevāti attho. Idanti pattacīvaraṃ. Imassāti aññatitthiyapubbassa. Aññeti upajjhāyato apare. Tehipīti aññehipi. Vilomāti paṭilomā. Āyattanti adhīnaṃ. Āyattajīvikattāti aññatitthiyapubbassa upajjhāyena āyattajīvikattā. Tassāti upajjhāyassa. Vacanakaroti vacanaṃ karo. Vākyepi samāsepi vacanasaddassa ‘‘tassā’’ti padameva apekkhattā ‘‘vacanakaro’’ti samāso hoti. Eseva nayo ‘‘upajjhāyena āyattajīvakattā’’ti etthāpi. Tenāti vacanakarahetunā.
অগ্গিপরিচরণকাতি =০৬ অগ্গিপূজকা। ইমিনা অগ্গিং পরিচরন্তীতি অগ্গিকাতি ৰচনত্থং দস্সেতি। তাপসাতি জটাধরা। তে হি যস্মা জটা চ তপো চ এতেসমত্থি, তস্মা ‘‘জটিলা’’তি চ ‘‘তাপসা’’তি চ ৰুচ্চন্তি। এতেতি জটিলকা। ‘‘কিরিযং ন পটিবাহন্তী’’তি ৰুত্তৰচনস্স অত্থং দস্সেন্তো আহ ‘‘অত্থি কম্মং, অত্থি কম্মৰিপাকো’’তি। এতদেৰ পব্বজ্জন্তি এতং এৰ তাপসপব্বজ্জং। এতেসন্তি জটিলানং। সাসনেতি বুদ্ধস্স সাসনে। তেসন্তি ঞাতীনং, ইমং পরিহারন্তি সম্বন্ধো। তেতি ঞাতযো। হীতি সচ্চং, যস্মা ৰা। ঞাতিসেট্ঠস্সাতি ঞাতিযেৰ সেট্ঠো, ঞাতীনং ৰাতি ঞাতিসেট্ঠো, তস্স, বুদ্ধস্সাতি সম্বন্ধো।
Aggiparicaraṇakāti =06 aggipūjakā. Iminā aggiṃ paricarantīti aggikāti vacanatthaṃ dasseti. Tāpasāti jaṭādharā. Te hi yasmā jaṭā ca tapo ca etesamatthi, tasmā ‘‘jaṭilā’’ti ca ‘‘tāpasā’’ti ca vuccanti. Eteti jaṭilakā. ‘‘Kiriyaṃ na paṭibāhantī’’ti vuttavacanassa atthaṃ dassento āha ‘‘atthi kammaṃ, atthi kammavipāko’’ti. Etadeva pabbajjanti etaṃ eva tāpasapabbajjaṃ. Etesanti jaṭilānaṃ. Sāsaneti buddhassa sāsane. Tesanti ñātīnaṃ, imaṃ parihāranti sambandho. Teti ñātayo. Hīti saccaṃ, yasmā vā. Ñātiseṭṭhassāti ñātiyeva seṭṭho, ñātīnaṃ vāti ñātiseṭṭho, tassa, buddhassāti sambandho.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২৫. অঞ্ঞতিত্থিযপুব্বকথা • 25. Aññatitthiyapubbakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অঞ্ঞতিত্থিযপুব্বৰত্থুকথা • Aññatitthiyapubbavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অঞ্ঞতিত্থিযপুব্বৰত্থুকথাৰণ্ণনা • Aññatitthiyapubbavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অঞ্ঞতিত্থিযপুব্বৰত্থুকথাৰণ্ণনা • Aññatitthiyapubbavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অঞ্ঞতিত্থিযপুব্বৰত্থুকথাৰণ্ণনা • Aññatitthiyapubbavatthukathāvaṇṇanā
