| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
ан̃н̃ад̇ид̇т̇ияабуб̣б̣авад̇т̇угат̇аа
Aññatitthiyapubbavatthukathā
86. ан̃н̃ад̇ид̇т̇ияабуб̣б̣авад̇т̇усмим̣ – яо д̇аава аяам̣ басууро, со д̇ид̇т̇ияабагганд̇агад̇д̇аа на убасамбаад̣̇зд̇аб̣б̣о. яо бана ан̃н̃оби наяид̇ха баб̣б̣аж̇ид̇абуб̣б̣о ааг̇ажчад̇и, д̇асмим̣ яам̣ гад̇д̇аб̣б̣ам̣ д̇ам̣ д̣̇ассзд̇ум̣ ‘‘яо со бхигкавз ан̃н̃обий’’д̇иаад̣̇имааха. д̇ад̇т̇а д̇асса жад̇д̇ааро маасз бариваасо д̣̇аад̇аб̣б̣од̇и аяам̣ д̇ид̇т̇ияабариваасо наама; аббадижчаннабариваасод̇иби вужжад̇и. аяам̣ бана наг̇г̇абариб̣б̣ааж̇агассзва ааж̇ийвагасса ваа ажзлагасса ваа д̣̇аад̇аб̣б̣о . сажз соби саадагам̣ ваа ваал̣агамб̣алаад̣̇ийнам̣ ан̃н̃ад̇арам̣ д̇ид̇т̇ияад̣̇д̇хаж̇ам̣ ваа ниваасзд̇ваа ааг̇ажчад̇и, наасса бариваасо д̣̇аад̇аб̣б̣о. ан̃н̃асса бана д̇аабасабан̣д̣аран̇г̇аад̣̇игасса на д̣̇аад̇аб̣б̣ова.
86. Aññatitthiyapubbavatthusmiṃ – yo tāva ayaṃ pasūro, so titthiyapakkantakattā na upasampādetabbo. Yo pana aññopi nayidha pabbajitapubbo āgacchati, tasmiṃ yaṃ kattabbaṃ taṃ dassetuṃ ‘‘yo so bhikkhave aññopī’’tiādimāha. Tattha tassa cattāro māse parivāso dātabboti ayaṃ titthiyaparivāso nāma; appaṭicchannaparivāsotipi vuccati. Ayaṃ pana naggaparibbājakasseva ājīvakassa vā acelakassa vā dātabbo . Sace sopi sāṭakaṃ vā vāḷakambalādīnaṃ aññataraṃ titthiyaddhajaṃ vā nivāsetvā āgacchati, nāssa parivāso dātabbo. Aññassa pana tāpasapaṇḍaraṅgādikassa na dātabbova.
батамам̣ гзсамассунд̇иаад̣̇инаа д̇асса аад̣̇ид̇ова сааман̣зрабаб̣б̣аж̇ж̇ам̣ д̣̇ассзд̇и. звам̣ баб̣б̣ааж̇знд̇зхи бана д̇асмим̣ сан̇гхамаж̇жхз нисиннзязва ‘‘д̇вам̣ баб̣б̣ааж̇зхи, д̇вам̣ аажарияо хохи, д̇вам̣ убаж̇жхааяо хохий’’д̇и т̇зраа бхигкуу на вад̇д̇аб̣б̣аа. звам̣ вуд̇д̇аа хи сажз д̇асса аажарияубаж̇жхааяабхаавзна ж̇иг̇ужчанд̇аа на самбадижчанд̇и, ат̇а со ‘‘наяимз маяхам̣ сад̣̇д̣̇аханд̇ий’’д̇и гуж̇жхид̇вааби г̇ажчзяяа. д̇асмаа д̇ам̣ згаманд̇ам̣ нзд̇ваа д̇асса аажарияубаж̇жхааяаа бариязсид̇аб̣б̣аа.
Paṭhamaṃ kesamassuntiādinā tassa āditova sāmaṇerapabbajjaṃ dasseti. Evaṃ pabbājentehi pana tasmiṃ saṅghamajjhe nisinneyeva ‘‘tvaṃ pabbājehi, tvaṃ ācariyo hohi, tvaṃ upajjhāyo hohī’’ti therā bhikkhū na vattabbā. Evaṃ vuttā hi sace tassa ācariyupajjhāyabhāvena jigucchantā na sampaṭicchanti, atha so ‘‘nayime mayhaṃ saddahantī’’ti kujjhitvāpi gaccheyya. Tasmā taṃ ekamantaṃ netvā tassa ācariyupajjhāyā pariyesitabbā.
87. звам̣ ко бхигкавз ан̃н̃ад̇ид̇т̇ияабуб̣б̣о аараад̇хаго ход̇и, звам̣ анаараад̇хагод̇и аяамасса бариваасавад̇д̇ад̣̇ассанад̇т̇ам̣ маад̇игаа. гат̇ан̃жа бхигкавзд̇иаад̣̇и д̇ассзва вибхан̇г̇о. д̇ад̇т̇а ад̇игаалзна г̇аамам̣ бависад̇ийд̇и бхигкуунам̣ вад̇д̇агаран̣авзлааяамзва г̇аамам̣ бин̣д̣ааяа бависад̇и. ад̇ид̣̇иваа бадиггамад̇ийд̇и гулагхарзсу ид̇т̇ибурисад̣̇аарагад̣̇ааригаад̣̇ийхи сад̣̇д̇хим̣ г̇зхассид̇агат̇ам̣ гат̇знд̇о д̇ад̇т̇зва бхун̃ж̇ид̇ваа бхигкуусу бад̇д̇ажийварам̣ бадисаамзд̇ваа уд̣̇д̣̇зсабарибужчаад̣̇ийни ваа гаронд̇зсу бадисаллийнзсу ваа ааг̇ажчад̇и; на убаж̇жхааяавад̇д̇ам̣ наажарияавад̇д̇ам̣ гарод̇и, ан̃н̃ад̣̇ад̇т̇у васанадтаанам̣ бависид̇ваа нид̣̇д̣̇ааяад̇и. звамби бхигкавз ан̃н̃ад̇ид̇т̇ияабуб̣б̣о анаараад̇хаго ход̇ийд̇и звамби гаронд̇о бариваасавад̇д̇асса самбаад̣̇аго буураго на ход̇и.
87.Evaṃ kho bhikkhave aññatitthiyapubbo ārādhako hoti, evaṃ anārādhakoti ayamassa parivāsavattadassanatthaṃ mātikā. Kathañca bhikkhavetiādi tasseva vibhaṅgo. Tattha atikālena gāmaṃ pavisatīti bhikkhūnaṃ vattakaraṇavelāyameva gāmaṃ piṇḍāya pavisati. Atidivā paṭikkamatīti kulagharesu itthipurisadārakadārikādīhi saddhiṃ gehassitakathaṃ kathento tattheva bhuñjitvā bhikkhūsu pattacīvaraṃ paṭisāmetvā uddesaparipucchādīni vā karontesu paṭisallīnesu vā āgacchati; na upajjhāyavattaṃ nācariyavattaṃ karoti, aññadatthu vasanaṭṭhānaṃ pavisitvā niddāyati. Evampi bhikkhave aññatitthiyapubbo anārādhako hotīti evampi karonto parivāsavattassa sampādako pūrako na hoti.
взсияааг̇ожаро ваад̇иаад̣̇ийсу взсияаад̇и аамисагин̃жигкасамбад̣̇аанаад̣̇инаа сулабхаж̇жхаажаараа руубуубаж̇ийвигаа ид̇т̇ияо. вид̇хаваад̇и мад̇абад̇игаа ваа бавуд̇т̇абад̇игаа ваа ид̇т̇ияо; д̇аа язна гзнажи сад̣̇д̇хим̣ мид̇д̇абхаавам̣ бад̇т̇знд̇и. т̇уллагумааригаад̇и яоб̣б̣аннаббад̇д̇аа яоб̣б̣аннаад̇ийд̇аа ваа гумаарияо; д̇аа бурисаад̇хиббааяаава вижаранд̇и, язна гзнажи сад̣̇д̇хим̣ мид̇д̇абхаавам̣ бад̇т̇знд̇и. бан̣д̣агаад̇и уссаннагилзсаа авуубасанд̇абарил̣аахаа набум̣сагаа; д̇з барил̣аахавзг̇аабхибхууд̇аа язна гзнажи сад̣̇д̇хим̣ мид̇д̇абхаавам̣ бад̇т̇знд̇и . бхигкунияод̇и самаанабаб̣б̣аж̇ж̇аа ид̇т̇ияо; д̇аахи сад̣̇д̇хим̣ киббамзва виссаасо ход̇и, д̇ад̇о сийлам̣ бхиж̇ж̇ад̇и.
Vesiyāgocaro vātiādīsu vesiyāti āmisakiñcikkhasampadānādinā sulabhajjhācārā rūpūpajīvikā itthiyo. Vidhavāti matapatikā vā pavutthapatikā vā itthiyo; tā yena kenaci saddhiṃ mittabhāvaṃ patthenti. Thullakumārikāti yobbannappattā yobbannātītā vā kumāriyo; tā purisādhippāyāva vicaranti, yena kenaci saddhiṃ mittabhāvaṃ patthenti. Paṇḍakāti ussannakilesā avūpasantapariḷāhā napuṃsakā; te pariḷāhavegābhibhūtā yena kenaci saddhiṃ mittabhāvaṃ patthenti . Bhikkhuniyoti samānapabbajjā itthiyo; tāhi saddhiṃ khippameva vissāso hoti, tato sīlaṃ bhijjati.
д̇ад̇т̇а взсияаанам̣ гулзсу гулубаго худ̇ваа бин̣д̣абаад̇ажарияаад̣̇ийхи ваа абад̣̇исид̇ваа синзхасант̇аваж̇аад̇зна хад̣̇аязна абхин̣хад̣̇ассанасаллаабагаамад̇ааяа д̇аасам̣ санд̇игам̣ убасан̇гаманд̇о ‘‘взсияааг̇ожаро’’д̇и вужжад̇и, со нажирассзва ‘‘асугавзсияаа сад̣̇д̇хим̣ г̇ад̇о’’д̇и вад̇д̇аб̣б̣ад̇ам̣ баабун̣аад̇и. зса наяо саб̣б̣ад̇т̇а. сажз бана взсияаад̣̇аяо салаагабхад̇д̇аад̣̇ийни д̣̇знд̇и, бхигкуухи сад̣̇д̇хим̣ г̇анд̇ваа сад̣̇д̇хим̣язва бхун̃ж̇ид̇ваа ваа г̇ахзд̇ваа ваа ааг̇анд̇ум̣ ваддад̇и. г̇илаанаа бхигкунияо овад̣̇ид̇ум̣ ваа д̇хаммам̣ ваа д̣̇зсзд̇ум̣ уд̣̇д̣̇зсабарибужчаад̣̇ийни ваа д̣̇аад̇ум̣ г̇ажчанд̇зхи бхигкуухи сад̣̇д̇хим̣ г̇анд̇ум̣ ваддад̇и. яо бана д̇ат̇аа ааг̇анд̇ваа мид̇д̇асант̇ававасзна г̇ажчад̇и, аяам̣ анаараад̇хаго ход̇и.
Tattha vesiyānaṃ kulesu kulupako hutvā piṇḍapātacariyādīhi vā apadisitvā sinehasanthavajātena hadayena abhiṇhadassanasallāpakāmatāya tāsaṃ santikaṃ upasaṅkamanto ‘‘vesiyāgocaro’’ti vuccati, so nacirasseva ‘‘asukavesiyā saddhiṃ gato’’ti vattabbataṃ pāpuṇāti. Esa nayo sabbattha. Sace pana vesiyādayo salākabhattādīni denti, bhikkhūhi saddhiṃ gantvā saddhiṃyeva bhuñjitvā vā gahetvā vā āgantuṃ vaṭṭati. Gilānā bhikkhuniyo ovadituṃ vā dhammaṃ vā desetuṃ uddesaparipucchādīni vā dātuṃ gacchantehi bhikkhūhi saddhiṃ gantuṃ vaṭṭati. Yo pana tathā āgantvā mittasanthavavasena gacchati, ayaṃ anārādhako hoti.
ужжааважаани гаран̣ийяаанийд̇и маханд̇акуд̣̇д̣̇агаани гаммаани. д̇ад̇т̇а гхан̣дим̣ бахарид̇ваа самаг̇г̇зна сан̇гхзна саннибад̇ид̇ваа гад̇д̇аб̣б̣аани жзд̇ияамахаабаасаад̣̇абадисан̇каран̣аад̣̇ийни гаммаани ужжаани наама. жийварад̇хованараж̇анаад̣̇ийни канд̇хагабарияаабаннаани жа аг̇г̇исаалавад̇д̇аад̣̇ийни аабхисамаажааригаани аважаани наама. д̇ад̇т̇а на д̣̇агко ход̇ийд̇и д̇зсу гаммзсу чзго сусигкид̇о на ход̇и. на аналасод̇и удтаанавийрияасамбанно на ход̇и; ‘‘бхигкусан̇гхасса гаммам̣ ад̇т̇ий’’д̇и суд̇ваа баг̇зва бхад̇д̇агижжам̣ гад̇ваа г̇аб̣бханд̇арам̣ бависид̇ваа яаавад̣̇ад̇т̇ам̣ субид̇ваа сааяам̣ нигкамад̇и. д̇ад̇рубааяааяаад̇и д̇зсу гаммзсу убааяабхууд̇ааяа. виймам̣сааяаад̇и таануббад̇д̇игавиймам̣сааяа. ‘‘ид̣̇амзвам̣ гад̇д̇аб̣б̣ам̣, ид̣̇амзвам̣ на гад̇д̇аб̣б̣а’’нд̇и д̇асмим̣язва кан̣з уббаннабан̃н̃ааяа саманнааг̇ад̇о на ход̇и. на алам̣ гаад̇ум̣ на алам̣ сам̣вид̇хаад̇унд̇и сахад̇т̇ааби гаад̇ум̣ самад̇т̇о на ход̇и; ‘‘г̇ан̣хат̇а бханд̇з, г̇ан̣ха д̣̇ахара, г̇ан̣ха сааман̣зра, сажз д̇умхз ваа на гариссат̇а, амхз ваа на гариссаама, го д̣̇аани имам̣ гариссад̇ий’’д̇и звам̣ уссаахам̣ ж̇анзд̇ваа сам̣вид̇хаад̇ум̣ ан̃н̃аман̃н̃ам̣ гаарзд̇умби самад̇т̇о на ход̇и. бхигкуухи ‘‘гаммам̣ гариссаамаа’’д̇и вуд̇д̇з гин̃жи рог̇ам̣ абад̣̇исад̇и, бхигкуунам̣ гаммам̣ гаронд̇аанам̣ самийбзнзва вижарад̇и, сийсамзва д̣̇ассзд̇и, аяамби анаараад̇хаго ход̇и.
Uccāvacāni karaṇīyānīti mahantakhuddakāni kammāni. Tattha ghaṇṭiṃ paharitvā samaggena saṅghena sannipatitvā kattabbāni cetiyamahāpāsādapaṭisaṅkharaṇādīni kammāni uccāni nāma. Cīvaradhovanarajanādīni khandhakapariyāpannāni ca aggisālavattādīni ābhisamācārikāni avacāni nāma. Tattha na dakkho hotīti tesu kammesu cheko susikkhito na hoti. Na analasoti uṭṭhānavīriyasampanno na hoti; ‘‘bhikkhusaṅghassa kammaṃ atthī’’ti sutvā pageva bhattakiccaṃ katvā gabbhantaraṃ pavisitvā yāvadatthaṃ supitvā sāyaṃ nikkhamati. Tatrupāyāyāti tesu kammesu upāyabhūtāya. Vīmaṃsāyāti ṭhānuppattikavīmaṃsāya. ‘‘Idamevaṃ kattabbaṃ, idamevaṃ na kattabba’’nti tasmiṃyeva khaṇe uppannapaññāya samannāgato na hoti. Na alaṃ kātuṃ na alaṃ saṃvidhātunti sahatthāpi kātuṃ samattho na hoti; ‘‘gaṇhatha bhante, gaṇha dahara, gaṇha sāmaṇera, sace tumhe vā na karissatha, amhe vā na karissāma, ko dāni imaṃ karissatī’’ti evaṃ ussāhaṃ janetvā saṃvidhātuṃ aññamaññaṃ kāretumpi samattho na hoti. Bhikkhūhi ‘‘kammaṃ karissāmā’’ti vutte kiñci rogaṃ apadisati, bhikkhūnaṃ kammaṃ karontānaṃ samīpeneva vicarati, sīsameva dasseti, ayampi anārādhako hoti.
на д̇иб̣б̣ажчанд̣̇о ход̇ийд̇и б̣алаважчанд̣̇о на ход̇и. уд̣̇д̣̇зсзд̇и баал̣ибарияаабун̣анз. барибужчааяаад̇и ад̇т̇асаванз. ад̇хисийлзд̇и баад̇имогкасийлз. ад̇хижид̇д̇зд̇и логияасамаад̇хибхааванааяа. ад̇хибан̃н̃ааяаад̇и логуд̇д̇арамаг̇г̇абхааванааяа.
Na tibbacchando hotīti balavacchando na hoti. Uddeseti pāḷipariyāpuṇane. Paripucchāyāti atthasavane. Adhisīleti pātimokkhasīle. Adhicitteti lokiyasamādhibhāvanāya. Adhipaññāyāti lokuttaramaggabhāvanāya.
сан̇ганд̇о ход̇ийд̇и ид̇хааг̇ад̇о ход̇и. д̇асса сад̇т̇унод̇и д̇асса д̇ид̇т̇ааяад̇анасаамигасса. д̇асса д̣̇идтияаад̇и д̇асса санд̇агааяа лад̣̇д̇хияаа. ид̣̇аани сааязва лад̣̇д̇хи яасмаа д̇асса д̇ид̇т̇агарасса камад̇и жзва ружжад̇и жа ‘‘ид̣̇амзва сажжа’’нд̇и жа д̣̇ал̣хаг̇г̇аахзна г̇ахид̇аа; д̇асмаа д̇асса канд̇и ружи аад̣̇ааяод̇и вужжад̇и. д̇зна вуд̇д̇ам̣ – ‘‘д̇асса канд̇ияаа д̇асса ружияаа д̇асса аад̣̇ааяассаа’’д̇и. аван̣н̣з бхан̃н̃амаанзд̇и г̇арахааяа бхан̃н̃амаанааяа. анабхирад̣̇д̇ход̇и абарибун̣н̣асан̇габбо; но баг̇г̇ахид̇ажид̇д̇о. уд̣̇аг̇г̇од̇и аб̣бхуннад̇агааяажид̇д̇о. ид̣̇ам̣ бхигкавз сан̇гхаад̇анигам̣ ан̃н̃ад̇ид̇т̇ияабуб̣б̣асса анаараад̇ханийяасминд̇и бхигкавз яамид̣̇ам̣ д̇асса сад̇т̇уно д̇ассзва жа лад̣̇д̇хияаа аван̣н̣з бхан̃н̃амаанз ‘‘гим̣ имз барам̣ г̇араханд̇ий’’д̇и гааяаважийвигаараниб̣б̣ад̇д̇агам̣ анад̇д̇аманад̇д̇ам̣, б̣уд̣̇д̇хаад̣̇ийнан̃жа аван̣н̣з бхан̃н̃амаанз ад̇д̇аманад̇д̇ам̣, яан̃жа д̇ассзва сад̇т̇уно д̇ассзва жа лад̣̇д̇хияаа ван̣н̣з бхан̃н̃амаанз ад̇д̇аманад̇д̇ам̣, б̣уд̣̇д̇хаад̣̇ийнан̃жа ван̣н̣абхан̣анз анад̇д̇аманад̇д̇ам̣, ид̣̇ам̣ ан̃н̃ад̇ид̇т̇ияабуб̣б̣асса анаараад̇ханийяасмим̣ сан̇гхаад̇анигам̣, анаараад̇хагз бариваасавад̇д̇ам̣ абуурагз гаммз ид̣̇ам̣ лин̇г̇ам̣, ид̣̇ам̣ лагкан̣ам̣, ид̣̇амажалаббамаан̣анд̇и вуд̇д̇ам̣ ход̇и. звам̣ анаараад̇хаго ко бхигкавз ан̃н̃ад̇ид̇т̇ияабуб̣б̣о ааг̇ад̇о на убасамбаад̣̇зд̇аб̣б̣од̇и ид̇о згзнаби ан̇г̇зна саманнааг̇ад̇о на убасамбаад̣̇зд̇аб̣б̣о. суггабагкз саб̣б̣ам̣ вуд̇д̇авибаллаасзна взд̣̇ид̇аб̣б̣ам̣.
Saṅkantohotīti idhāgato hoti. Tassa satthunoti tassa titthāyatanasāmikassa. Tassa diṭṭhiyāti tassa santakāya laddhiyā. Idāni sāyeva laddhi yasmā tassa titthakarassa khamati ceva ruccati ca ‘‘idameva sacca’’nti ca daḷhaggāhena gahitā; tasmā tassa khanti ruci ādāyoti vuccati. Tena vuttaṃ – ‘‘tassa khantiyā tassa ruciyā tassa ādāyassā’’ti. Avaṇṇe bhaññamāneti garahāya bhaññamānāya. Anabhiraddhoti aparipuṇṇasaṅkappo; no paggahitacitto. Udaggoti abbhunnatakāyacitto. Idaṃ bhikkhave saṅghātanikaṃ aññatitthiyapubbassa anārādhanīyasminti bhikkhave yamidaṃ tassa satthuno tasseva ca laddhiyā avaṇṇe bhaññamāne ‘‘kiṃ ime paraṃ garahantī’’ti kāyavacīvikāranibbattakaṃ anattamanattaṃ, buddhādīnañca avaṇṇe bhaññamāne attamanattaṃ, yañca tasseva satthuno tasseva ca laddhiyā vaṇṇe bhaññamāne attamanattaṃ, buddhādīnañca vaṇṇabhaṇane anattamanattaṃ, idaṃ aññatitthiyapubbassa anārādhanīyasmiṃ saṅghātanikaṃ, anārādhake parivāsavattaṃ apūrake kamme idaṃ liṅgaṃ, idaṃ lakkhaṇaṃ, idamacalappamāṇanti vuttaṃ hoti. Evaṃ anārādhako kho bhikkhave aññatitthiyapubbo āgato na upasampādetabboti ito ekenapi aṅgena samannāgato na upasampādetabbo. Sukkapakkhe sabbaṃ vuttavipallāsena veditabbaṃ.
звам̣ аараад̇хаго ко бхигкавзд̇и звам̣ наад̇игаалзна г̇аамаббавзсанаа наад̇ид̣̇иваа бадиггаманам̣, на взсияаад̣̇иг̇ожарад̇аа, саб̣рахмажаарийнам̣ гижжзсу д̣̇агкад̇аад̣̇и, уд̣̇д̣̇зсаад̣̇ийсу д̇иб̣б̣ажчанд̣̇ад̇аа, д̇ид̇т̇ияаанам̣ аван̣н̣абхан̣анз ад̇д̇аманад̇аа, б̣уд̣̇д̇хаад̣̇ийнам̣ аван̣н̣абхан̣анз анад̇д̇аманад̇аа, д̇ид̇т̇ияаанам̣ ван̣н̣абхан̣анз анад̇д̇аманад̇аа, б̣уд̣̇д̇хаад̣̇ийнам̣ ван̣н̣абхан̣анз ад̇д̇аманад̇аад̇и имзсам̣ адтаннам̣ д̇ид̇т̇ияавад̇д̇аанам̣ барибууран̣зна аараад̇хаго барид̇осаго бхигкуунам̣ ан̃н̃ад̇ид̇т̇ияабуб̣б̣о ааг̇ад̇о убасамбаад̣̇зд̇аб̣б̣о.
Evaṃ ārādhako kho bhikkhaveti evaṃ nātikālena gāmappavesanā nātidivā paṭikkamanaṃ, na vesiyādigocaratā, sabrahmacārīnaṃ kiccesu dakkhatādi, uddesādīsu tibbacchandatā, titthiyānaṃ avaṇṇabhaṇane attamanatā, buddhādīnaṃ avaṇṇabhaṇane anattamanatā, titthiyānaṃ vaṇṇabhaṇane anattamanatā, buddhādīnaṃ vaṇṇabhaṇane attamanatāti imesaṃ aṭṭhannaṃ titthiyavattānaṃ paripūraṇena ārādhako paritosako bhikkhūnaṃ aññatitthiyapubbo āgato upasampādetabbo.
сажз бана убасамбад̣̇амаал̣агзби згам̣ вад̇д̇ам̣ бхинд̣̇ад̇и, буна жад̇д̇ааро маасз баривасид̇аб̣б̣ам̣. яат̇аа бана бхиннасигкааяа сигкамаанааяа буна сигкаабад̣̇аани жа сигкаасаммуд̇и жа д̣̇ияяад̇и, звам̣ наяимасса гин̃жи буна д̣̇аад̇аб̣б̣амад̇т̇и. буб̣б̣з д̣̇иннабариваасоязва хи д̇асса бариваасо. д̇асмаа буна жад̇д̇ааро маасз баривасид̇аб̣б̣ам̣. сажз баривасанд̇о анд̇араа адта самаабад̇д̇ияо ниб̣б̣ад̇д̇зд̇и, логияад̇хаммо наама губбанасабхааво, на убасамбаад̣̇зд̇аб̣б̣о. жад̇д̇ааро маасз буурид̇авад̇д̇ова убасамбаад̣̇зд̇аб̣б̣о. сажз бана баривасанд̇о жад̇д̇аари махаабхууд̇аани бариг̇г̇ан̣хад̇и, убаад̣̇ааруубаани барижчинд̣̇ад̇и, наамаруубам̣ вавад̇т̇абзд̇и, д̇илагкан̣ам̣ ааробзд̇ваа вибассанам̣ аарабхад̇и, логияад̇хаммо наама губбанасабхааво, нзва убасамбаад̣̇зд̇аб̣б̣о. сажз бана вибассанам̣ вад̣дхзд̇ваа сод̇аабад̇д̇имаг̇г̇ам̣ бадилабхад̇и, барибун̣н̣ам̣язва ход̇и вад̇д̇ам̣. самуухад̇аани саб̣б̣ад̣̇идтиг̇ад̇аани аб̣б̣ул̣хам̣ вижигижчаасаллам̣ д̇ам̣д̣̇ивасамзва убасамбаад̣̇зд̇аб̣б̣о. сажзби д̇ид̇т̇ияалин̇г̇з тид̇о сод̇аабанно ход̇и, бариваасагижжам̣ над̇т̇и, д̇ад̣̇ахзва баб̣б̣ааж̇зд̇ваа убасамбаад̣̇зд̇аб̣б̣о.
Sace pana upasampadamāḷakepi ekaṃ vattaṃ bhindati, puna cattāro māse parivasitabbaṃ. Yathā pana bhinnasikkhāya sikkhamānāya puna sikkhāpadāni ca sikkhāsammuti ca diyyati, evaṃ nayimassa kiñci puna dātabbamatthi. Pubbe dinnaparivāsoyeva hi tassa parivāso. Tasmā puna cattāro māse parivasitabbaṃ. Sace parivasanto antarā aṭṭha samāpattiyo nibbatteti, lokiyadhammo nāma kuppanasabhāvo, na upasampādetabbo. Cattāro māse pūritavattova upasampādetabbo. Sace pana parivasanto cattāri mahābhūtāni pariggaṇhati, upādārūpāni paricchindati, nāmarūpaṃ vavatthapeti, tilakkhaṇaṃ āropetvā vipassanaṃ ārabhati, lokiyadhammo nāma kuppanasabhāvo, neva upasampādetabbo. Sace pana vipassanaṃ vaḍḍhetvā sotāpattimaggaṃ paṭilabhati, paripuṇṇaṃyeva hoti vattaṃ. Samūhatāni sabbadiṭṭhigatāni abbuḷhaṃ vicikicchāsallaṃ taṃdivasameva upasampādetabbo. Sacepi titthiyaliṅge ṭhito sotāpanno hoti, parivāsakiccaṃ natthi, tadaheva pabbājetvā upasampādetabbo.
убаж̇жхааяамуулагам̣ жийварам̣ бариязсид̇аб̣б̣анд̇и убаж̇жхааяам̣ иссарам̣ гад̇ваа д̇асса жийварам̣ бариязсид̇аб̣б̣ам̣. бад̇д̇амби д̇ат̇зва. д̇асмаа яад̣̇и убаж̇жхааяасса бад̇д̇ажийварам̣ ад̇т̇и, ‘‘имасса д̣̇зхий’’д̇и вад̇д̇аб̣б̣о. ат̇а над̇т̇и, ан̃н̃з д̣̇аад̇угаамаа хонд̇и, д̇зхиби убаж̇жхааяассзва д̣̇аад̇аб̣б̣ам̣ ‘‘ид̣̇ам̣ д̇умхаагам̣ гад̇ваа имасса д̣̇зт̇аа’’д̇и. гасмаа? д̇ид̇т̇ияаа наама виломаа хонд̇и ‘‘сан̇гхзна мз бад̇д̇ажийварам̣ д̣̇иннам̣, гим̣ маяхам̣ д̇умхзсу ааяад̇д̇а’’нд̇и вад̇ваа оваад̣̇аанусаасаним̣ на гарзяяум̣, убаж̇жхааязна бана ааяад̇д̇аж̇ийвигад̇д̇аа д̇асса важанагаро бхависсад̇и. д̇знасса ‘‘убаж̇жхааяамуулагам̣ жийварам̣ бариязсид̇аб̣б̣а’’нд̇и вуд̇д̇ам̣. бхан̣д̣угаммааяаад̇и гзсоробанад̇т̇ам̣. бхан̣д̣угаммагат̇аа барад̇о ааг̇амиссад̇и.
Upajjhāyamūlakaṃ cīvaraṃ pariyesitabbanti upajjhāyaṃ issaraṃ katvā tassa cīvaraṃ pariyesitabbaṃ. Pattampi tatheva. Tasmā yadi upajjhāyassa pattacīvaraṃ atthi, ‘‘imassa dehī’’ti vattabbo. Atha natthi, aññe dātukāmā honti, tehipi upajjhāyasseva dātabbaṃ ‘‘idaṃ tumhākaṃ katvā imassa dethā’’ti. Kasmā? Titthiyā nāma vilomā honti ‘‘saṅghena me pattacīvaraṃ dinnaṃ, kiṃ mayhaṃ tumhesu āyatta’’nti vatvā ovādānusāsaniṃ na kareyyuṃ, upajjhāyena pana āyattajīvikattā tassa vacanakaro bhavissati. Tenassa ‘‘upajjhāyamūlakaṃ cīvaraṃ pariyesitabba’’nti vuttaṃ. Bhaṇḍukammāyāti kesoropanatthaṃ. Bhaṇḍukammakathā parato āgamissati.
аг̇г̇игаад̇и аг̇г̇ибарижаран̣агаа. ж̇адилагаад̇и д̇аабасаа. зд̇з бхигкавз гирияаваад̣̇инод̇и зд̇з гирияам̣ на бадиб̣ааханд̇и, ‘‘ад̇т̇и гаммам̣, ад̇т̇и гаммавибааго’’д̇и звам̣д̣̇идтигаа. саб̣б̣аб̣уд̣̇д̇хаа хи нзгкаммабаарамим̣ буураяамаанаа зд̇ад̣̇зва баб̣б̣аж̇ж̇ам̣ баб̣б̣аж̇ид̇ваа буурзсум̣, маяааби д̇ат̇зва буурид̇аа, на зд̇зсам̣ саасанз баб̣б̣аж̇ж̇аа виломаа, д̇асмаа убасамбаад̣̇зд̇аб̣б̣аа, на д̇зсам̣ бариваасо д̣̇аад̇аб̣б̣од̇и. имаахам̣ бхигкавз н̃аад̇ийнам̣ аавзн̣игам̣ барихаарам̣ д̣̇аммийд̇и имам̣ ахам̣ д̇зсам̣ баадзггам̣ од̣̇иссагам̣ барихаарам̣ д̣̇ад̣̇аами. гасмаа звамааха? д̇з хи д̇ид̇т̇ааяад̇анз баб̣б̣аж̇ид̇ааби саасанасса аван̣н̣агаамаа на хонд̇и, амхаагам̣ н̃аад̇исздтасса саасананд̇и ван̣н̣аваад̣̇инова хонд̇и, д̇асмаа звамаахаад̇и.
Aggikāti aggiparicaraṇakā. Jaṭilakāti tāpasā. Ete bhikkhave kiriyavādinoti ete kiriyaṃ na paṭibāhanti, ‘‘atthi kammaṃ, atthi kammavipāko’’ti evaṃdiṭṭhikā. Sabbabuddhā hi nekkhammapāramiṃ pūrayamānā etadeva pabbajjaṃ pabbajitvā pūresuṃ, mayāpi tatheva pūritā, na etesaṃ sāsane pabbajjā vilomā, tasmā upasampādetabbā, na tesaṃ parivāso dātabboti. Imāhaṃ bhikkhave ñātīnaṃ āveṇikaṃ parihāraṃ dammīti imaṃ ahaṃ tesaṃ pāṭekkaṃ odissakaṃ parihāraṃ dadāmi. Kasmā evamāha? Te hi titthāyatane pabbajitāpi sāsanassa avaṇṇakāmā na honti, amhākaṃ ñātiseṭṭhassa sāsananti vaṇṇavādinova honti, tasmā evamāhāti.
ан̃н̃ад̇ид̇т̇ияабуб̣б̣авад̇т̇угат̇аа нидтид̇аа.
Aññatitthiyapubbavatthukathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 25. ан̃н̃ад̇ид̇т̇ияабуб̣б̣агат̇аа • 25. Aññatitthiyapubbakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / ан̃н̃ад̇ид̇т̇ияабуб̣б̣авад̇т̇угат̇ааван̣н̣анаа • Aññatitthiyapubbavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / ан̃н̃ад̇ид̇т̇ияабуб̣б̣авад̇т̇угат̇ааван̣н̣анаа • Aññatitthiyapubbavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / ан̃н̃ад̇ид̇т̇ияабуб̣б̣авад̇т̇угат̇ааван̣н̣анаа • Aññatitthiyapubbavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 25. ан̃н̃ад̇ид̇т̇ияабуб̣б̣авад̇т̇угат̇аа • 25. Aññatitthiyapubbavatthukathā
