| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಅಞ್ಞತಿತ್ಥಿಯಪುಬ್ಬವತ್ಥುಕಥಾ
Aññatitthiyapubbavatthukathā
೮೬. ಅಞ್ಞತಿತ್ಥಿಯಪುಬ್ಬವತ್ಥುಸ್ಮಿಂ – ಯೋ ತಾವ ಅಯಂ ಪಸೂರೋ, ಸೋ ತಿತ್ಥಿಯಪಕ್ಕನ್ತಕತ್ತಾ ನ ಉಪಸಮ್ಪಾದೇತಬ್ಬೋ। ಯೋ ಪನ ಅಞ್ಞೋಪಿ ನಯಿಧ ಪಬ್ಬಜಿತಪುಬ್ಬೋ ಆಗಚ್ಛತಿ, ತಸ್ಮಿಂ ಯಂ ಕತ್ತಬ್ಬಂ ತಂ ದಸ್ಸೇತುಂ ‘‘ಯೋ ಸೋ ಭಿಕ್ಖವೇ ಅಞ್ಞೋಪೀ’’ತಿಆದಿಮಾಹ। ತತ್ಥ ತಸ್ಸ ಚತ್ತಾರೋ ಮಾಸೇ ಪರಿವಾಸೋ ದಾತಬ್ಬೋತಿ ಅಯಂ ತಿತ್ಥಿಯಪರಿವಾಸೋ ನಾಮ; ಅಪ್ಪಟಿಚ್ಛನ್ನಪರಿವಾಸೋತಿಪಿ ವುಚ್ಚತಿ। ಅಯಂ ಪನ ನಗ್ಗಪರಿಬ್ಬಾಜಕಸ್ಸೇವ ಆಜೀವಕಸ್ಸ ವಾ ಅಚೇಲಕಸ್ಸ ವಾ ದಾತಬ್ಬೋ । ಸಚೇ ಸೋಪಿ ಸಾಟಕಂ ವಾ ವಾಳಕಮ್ಬಲಾದೀನಂ ಅಞ್ಞತರಂ ತಿತ್ಥಿಯದ್ಧಜಂ ವಾ ನಿವಾಸೇತ್ವಾ ಆಗಚ್ಛತಿ, ನಾಸ್ಸ ಪರಿವಾಸೋ ದಾತಬ್ಬೋ। ಅಞ್ಞಸ್ಸ ಪನ ತಾಪಸಪಣ್ಡರಙ್ಗಾದಿಕಸ್ಸ ನ ದಾತಬ್ಬೋವ।
86. Aññatitthiyapubbavatthusmiṃ – yo tāva ayaṃ pasūro, so titthiyapakkantakattā na upasampādetabbo. Yo pana aññopi nayidha pabbajitapubbo āgacchati, tasmiṃ yaṃ kattabbaṃ taṃ dassetuṃ ‘‘yo so bhikkhave aññopī’’tiādimāha. Tattha tassa cattāro māse parivāso dātabboti ayaṃ titthiyaparivāso nāma; appaṭicchannaparivāsotipi vuccati. Ayaṃ pana naggaparibbājakasseva ājīvakassa vā acelakassa vā dātabbo . Sace sopi sāṭakaṃ vā vāḷakambalādīnaṃ aññataraṃ titthiyaddhajaṃ vā nivāsetvā āgacchati, nāssa parivāso dātabbo. Aññassa pana tāpasapaṇḍaraṅgādikassa na dātabbova.
ಪಠಮಂ ಕೇಸಮಸ್ಸುನ್ತಿಆದಿನಾ ತಸ್ಸ ಆದಿತೋವ ಸಾಮಣೇರಪಬ್ಬಜ್ಜಂ ದಸ್ಸೇತಿ। ಏವಂ ಪಬ್ಬಾಜೇನ್ತೇಹಿ ಪನ ತಸ್ಮಿಂ ಸಙ್ಘಮಜ್ಝೇ ನಿಸಿನ್ನೇಯೇವ ‘‘ತ್ವಂ ಪಬ್ಬಾಜೇಹಿ, ತ್ವಂ ಆಚರಿಯೋ ಹೋಹಿ, ತ್ವಂ ಉಪಜ್ಝಾಯೋ ಹೋಹೀ’’ತಿ ಥೇರಾ ಭಿಕ್ಖೂ ನ ವತ್ತಬ್ಬಾ। ಏವಂ ವುತ್ತಾ ಹಿ ಸಚೇ ತಸ್ಸ ಆಚರಿಯುಪಜ್ಝಾಯಭಾವೇನ ಜಿಗುಚ್ಛನ್ತಾ ನ ಸಮ್ಪಟಿಚ್ಛನ್ತಿ, ಅಥ ಸೋ ‘‘ನಯಿಮೇ ಮಯ್ಹಂ ಸದ್ದಹನ್ತೀ’’ತಿ ಕುಜ್ಝಿತ್ವಾಪಿ ಗಚ್ಛೇಯ್ಯ। ತಸ್ಮಾ ತಂ ಏಕಮನ್ತಂ ನೇತ್ವಾ ತಸ್ಸ ಆಚರಿಯುಪಜ್ಝಾಯಾ ಪರಿಯೇಸಿತಬ್ಬಾ।
Paṭhamaṃ kesamassuntiādinā tassa āditova sāmaṇerapabbajjaṃ dasseti. Evaṃ pabbājentehi pana tasmiṃ saṅghamajjhe nisinneyeva ‘‘tvaṃ pabbājehi, tvaṃ ācariyo hohi, tvaṃ upajjhāyo hohī’’ti therā bhikkhū na vattabbā. Evaṃ vuttā hi sace tassa ācariyupajjhāyabhāvena jigucchantā na sampaṭicchanti, atha so ‘‘nayime mayhaṃ saddahantī’’ti kujjhitvāpi gaccheyya. Tasmā taṃ ekamantaṃ netvā tassa ācariyupajjhāyā pariyesitabbā.
೮೭. ಏವಂ ಖೋ ಭಿಕ್ಖವೇ ಅಞ್ಞತಿತ್ಥಿಯಪುಬ್ಬೋ ಆರಾಧಕೋ ಹೋತಿ, ಏವಂ ಅನಾರಾಧಕೋತಿ ಅಯಮಸ್ಸ ಪರಿವಾಸವತ್ತದಸ್ಸನತ್ಥಂ ಮಾತಿಕಾ। ಕಥಞ್ಚ ಭಿಕ್ಖವೇತಿಆದಿ ತಸ್ಸೇವ ವಿಭಙ್ಗೋ। ತತ್ಥ ಅತಿಕಾಲೇನ ಗಾಮಂ ಪವಿಸತೀತಿ ಭಿಕ್ಖೂನಂ ವತ್ತಕರಣವೇಲಾಯಮೇವ ಗಾಮಂ ಪಿಣ್ಡಾಯ ಪವಿಸತಿ। ಅತಿದಿವಾ ಪಟಿಕ್ಕಮತೀತಿ ಕುಲಘರೇಸು ಇತ್ಥಿಪುರಿಸದಾರಕದಾರಿಕಾದೀಹಿ ಸದ್ಧಿಂ ಗೇಹಸ್ಸಿತಕಥಂ ಕಥೇನ್ತೋ ತತ್ಥೇವ ಭುಞ್ಜಿತ್ವಾ ಭಿಕ್ಖೂಸು ಪತ್ತಚೀವರಂ ಪಟಿಸಾಮೇತ್ವಾ ಉದ್ದೇಸಪರಿಪುಚ್ಛಾದೀನಿ ವಾ ಕರೋನ್ತೇಸು ಪಟಿಸಲ್ಲೀನೇಸು ವಾ ಆಗಚ್ಛತಿ; ನ ಉಪಜ್ಝಾಯವತ್ತಂ ನಾಚರಿಯವತ್ತಂ ಕರೋತಿ, ಅಞ್ಞದತ್ಥು ವಸನಟ್ಠಾನಂ ಪವಿಸಿತ್ವಾ ನಿದ್ದಾಯತಿ। ಏವಮ್ಪಿ ಭಿಕ್ಖವೇ ಅಞ್ಞತಿತ್ಥಿಯಪುಬ್ಬೋ ಅನಾರಾಧಕೋ ಹೋತೀತಿ ಏವಮ್ಪಿ ಕರೋನ್ತೋ ಪರಿವಾಸವತ್ತಸ್ಸ ಸಮ್ಪಾದಕೋ ಪೂರಕೋ ನ ಹೋತಿ।
87.Evaṃ kho bhikkhave aññatitthiyapubbo ārādhako hoti, evaṃ anārādhakoti ayamassa parivāsavattadassanatthaṃ mātikā. Kathañca bhikkhavetiādi tasseva vibhaṅgo. Tattha atikālena gāmaṃ pavisatīti bhikkhūnaṃ vattakaraṇavelāyameva gāmaṃ piṇḍāya pavisati. Atidivā paṭikkamatīti kulagharesu itthipurisadārakadārikādīhi saddhiṃ gehassitakathaṃ kathento tattheva bhuñjitvā bhikkhūsu pattacīvaraṃ paṭisāmetvā uddesaparipucchādīni vā karontesu paṭisallīnesu vā āgacchati; na upajjhāyavattaṃ nācariyavattaṃ karoti, aññadatthu vasanaṭṭhānaṃ pavisitvā niddāyati. Evampi bhikkhave aññatitthiyapubbo anārādhako hotīti evampi karonto parivāsavattassa sampādako pūrako na hoti.
ವೇಸಿಯಾಗೋಚರೋ ವಾತಿಆದೀಸು ವೇಸಿಯಾತಿ ಆಮಿಸಕಿಞ್ಚಿಕ್ಖಸಮ್ಪದಾನಾದಿನಾ ಸುಲಭಜ್ಝಾಚಾರಾ ರೂಪೂಪಜೀವಿಕಾ ಇತ್ಥಿಯೋ। ವಿಧವಾತಿ ಮತಪತಿಕಾ ವಾ ಪವುತ್ಥಪತಿಕಾ ವಾ ಇತ್ಥಿಯೋ; ತಾ ಯೇನ ಕೇನಚಿ ಸದ್ಧಿಂ ಮಿತ್ತಭಾವಂ ಪತ್ಥೇನ್ತಿ। ಥುಲ್ಲಕುಮಾರಿಕಾತಿ ಯೋಬ್ಬನ್ನಪ್ಪತ್ತಾ ಯೋಬ್ಬನ್ನಾತೀತಾ ವಾ ಕುಮಾರಿಯೋ; ತಾ ಪುರಿಸಾಧಿಪ್ಪಾಯಾವ ವಿಚರನ್ತಿ, ಯೇನ ಕೇನಚಿ ಸದ್ಧಿಂ ಮಿತ್ತಭಾವಂ ಪತ್ಥೇನ್ತಿ। ಪಣ್ಡಕಾತಿ ಉಸ್ಸನ್ನಕಿಲೇಸಾ ಅವೂಪಸನ್ತಪರಿಳಾಹಾ ನಪುಂಸಕಾ; ತೇ ಪರಿಳಾಹವೇಗಾಭಿಭೂತಾ ಯೇನ ಕೇನಚಿ ಸದ್ಧಿಂ ಮಿತ್ತಭಾವಂ ಪತ್ಥೇನ್ತಿ । ಭಿಕ್ಖುನಿಯೋತಿ ಸಮಾನಪಬ್ಬಜ್ಜಾ ಇತ್ಥಿಯೋ; ತಾಹಿ ಸದ್ಧಿಂ ಖಿಪ್ಪಮೇವ ವಿಸ್ಸಾಸೋ ಹೋತಿ, ತತೋ ಸೀಲಂ ಭಿಜ್ಜತಿ।
Vesiyāgocaro vātiādīsu vesiyāti āmisakiñcikkhasampadānādinā sulabhajjhācārā rūpūpajīvikā itthiyo. Vidhavāti matapatikā vā pavutthapatikā vā itthiyo; tā yena kenaci saddhiṃ mittabhāvaṃ patthenti. Thullakumārikāti yobbannappattā yobbannātītā vā kumāriyo; tā purisādhippāyāva vicaranti, yena kenaci saddhiṃ mittabhāvaṃ patthenti. Paṇḍakāti ussannakilesā avūpasantapariḷāhā napuṃsakā; te pariḷāhavegābhibhūtā yena kenaci saddhiṃ mittabhāvaṃ patthenti . Bhikkhuniyoti samānapabbajjā itthiyo; tāhi saddhiṃ khippameva vissāso hoti, tato sīlaṃ bhijjati.
ತತ್ಥ ವೇಸಿಯಾನಂ ಕುಲೇಸು ಕುಲುಪಕೋ ಹುತ್ವಾ ಪಿಣ್ಡಪಾತಚರಿಯಾದೀಹಿ ವಾ ಅಪದಿಸಿತ್ವಾ ಸಿನೇಹಸನ್ಥವಜಾತೇನ ಹದಯೇನ ಅಭಿಣ್ಹದಸ್ಸನಸಲ್ಲಾಪಕಾಮತಾಯ ತಾಸಂ ಸನ್ತಿಕಂ ಉಪಸಙ್ಕಮನ್ತೋ ‘‘ವೇಸಿಯಾಗೋಚರೋ’’ತಿ ವುಚ್ಚತಿ, ಸೋ ನಚಿರಸ್ಸೇವ ‘‘ಅಸುಕವೇಸಿಯಾ ಸದ್ಧಿಂ ಗತೋ’’ತಿ ವತ್ತಬ್ಬತಂ ಪಾಪುಣಾತಿ। ಏಸ ನಯೋ ಸಬ್ಬತ್ಥ। ಸಚೇ ಪನ ವೇಸಿಯಾದಯೋ ಸಲಾಕಭತ್ತಾದೀನಿ ದೇನ್ತಿ, ಭಿಕ್ಖೂಹಿ ಸದ್ಧಿಂ ಗನ್ತ್ವಾ ಸದ್ಧಿಂಯೇವ ಭುಞ್ಜಿತ್ವಾ ವಾ ಗಹೇತ್ವಾ ವಾ ಆಗನ್ತುಂ ವಟ್ಟತಿ। ಗಿಲಾನಾ ಭಿಕ್ಖುನಿಯೋ ಓವದಿತುಂ ವಾ ಧಮ್ಮಂ ವಾ ದೇಸೇತುಂ ಉದ್ದೇಸಪರಿಪುಚ್ಛಾದೀನಿ ವಾ ದಾತುಂ ಗಚ್ಛನ್ತೇಹಿ ಭಿಕ್ಖೂಹಿ ಸದ್ಧಿಂ ಗನ್ತುಂ ವಟ್ಟತಿ। ಯೋ ಪನ ತಥಾ ಆಗನ್ತ್ವಾ ಮಿತ್ತಸನ್ಥವವಸೇನ ಗಚ್ಛತಿ, ಅಯಂ ಅನಾರಾಧಕೋ ಹೋತಿ।
Tattha vesiyānaṃ kulesu kulupako hutvā piṇḍapātacariyādīhi vā apadisitvā sinehasanthavajātena hadayena abhiṇhadassanasallāpakāmatāya tāsaṃ santikaṃ upasaṅkamanto ‘‘vesiyāgocaro’’ti vuccati, so nacirasseva ‘‘asukavesiyā saddhiṃ gato’’ti vattabbataṃ pāpuṇāti. Esa nayo sabbattha. Sace pana vesiyādayo salākabhattādīni denti, bhikkhūhi saddhiṃ gantvā saddhiṃyeva bhuñjitvā vā gahetvā vā āgantuṃ vaṭṭati. Gilānā bhikkhuniyo ovadituṃ vā dhammaṃ vā desetuṃ uddesaparipucchādīni vā dātuṃ gacchantehi bhikkhūhi saddhiṃ gantuṃ vaṭṭati. Yo pana tathā āgantvā mittasanthavavasena gacchati, ayaṃ anārādhako hoti.
ಉಚ್ಚಾವಚಾನಿ ಕರಣೀಯಾನೀತಿ ಮಹನ್ತಖುದ್ದಕಾನಿ ಕಮ್ಮಾನಿ। ತತ್ಥ ಘಣ್ಟಿಂ ಪಹರಿತ್ವಾ ಸಮಗ್ಗೇನ ಸಙ್ಘೇನ ಸನ್ನಿಪತಿತ್ವಾ ಕತ್ತಬ್ಬಾನಿ ಚೇತಿಯಮಹಾಪಾಸಾದಪಟಿಸಙ್ಖರಣಾದೀನಿ ಕಮ್ಮಾನಿ ಉಚ್ಚಾನಿ ನಾಮ। ಚೀವರಧೋವನರಜನಾದೀನಿ ಖನ್ಧಕಪರಿಯಾಪನ್ನಾನಿ ಚ ಅಗ್ಗಿಸಾಲವತ್ತಾದೀನಿ ಆಭಿಸಮಾಚಾರಿಕಾನಿ ಅವಚಾನಿ ನಾಮ। ತತ್ಥ ನ ದಕ್ಖೋ ಹೋತೀತಿ ತೇಸು ಕಮ್ಮೇಸು ಛೇಕೋ ಸುಸಿಕ್ಖಿತೋ ನ ಹೋತಿ। ನ ಅನಲಸೋತಿ ಉಟ್ಠಾನವೀರಿಯಸಮ್ಪನ್ನೋ ನ ಹೋತಿ; ‘‘ಭಿಕ್ಖುಸಙ್ಘಸ್ಸ ಕಮ್ಮಂ ಅತ್ಥೀ’’ತಿ ಸುತ್ವಾ ಪಗೇವ ಭತ್ತಕಿಚ್ಚಂ ಕತ್ವಾ ಗಬ್ಭನ್ತರಂ ಪವಿಸಿತ್ವಾ ಯಾವದತ್ಥಂ ಸುಪಿತ್ವಾ ಸಾಯಂ ನಿಕ್ಖಮತಿ। ತತ್ರುಪಾಯಾಯಾತಿ ತೇಸು ಕಮ್ಮೇಸು ಉಪಾಯಭೂತಾಯ। ವೀಮಂಸಾಯಾತಿ ಠಾನುಪ್ಪತ್ತಿಕವೀಮಂಸಾಯ। ‘‘ಇದಮೇವಂ ಕತ್ತಬ್ಬಂ, ಇದಮೇವಂ ನ ಕತ್ತಬ್ಬ’’ನ್ತಿ ತಸ್ಮಿಂಯೇವ ಖಣೇ ಉಪ್ಪನ್ನಪಞ್ಞಾಯ ಸಮನ್ನಾಗತೋ ನ ಹೋತಿ। ನ ಅಲಂ ಕಾತುಂ ನ ಅಲಂ ಸಂವಿಧಾತುನ್ತಿ ಸಹತ್ಥಾಪಿ ಕಾತುಂ ಸಮತ್ಥೋ ನ ಹೋತಿ; ‘‘ಗಣ್ಹಥ ಭನ್ತೇ, ಗಣ್ಹ ದಹರ, ಗಣ್ಹ ಸಾಮಣೇರ, ಸಚೇ ತುಮ್ಹೇ ವಾ ನ ಕರಿಸ್ಸಥ, ಅಮ್ಹೇ ವಾ ನ ಕರಿಸ್ಸಾಮ, ಕೋ ದಾನಿ ಇಮಂ ಕರಿಸ್ಸತೀ’’ತಿ ಏವಂ ಉಸ್ಸಾಹಂ ಜನೇತ್ವಾ ಸಂವಿಧಾತುಂ ಅಞ್ಞಮಞ್ಞಂ ಕಾರೇತುಮ್ಪಿ ಸಮತ್ಥೋ ನ ಹೋತಿ। ಭಿಕ್ಖೂಹಿ ‘‘ಕಮ್ಮಂ ಕರಿಸ್ಸಾಮಾ’’ತಿ ವುತ್ತೇ ಕಿಞ್ಚಿ ರೋಗಂ ಅಪದಿಸತಿ, ಭಿಕ್ಖೂನಂ ಕಮ್ಮಂ ಕರೋನ್ತಾನಂ ಸಮೀಪೇನೇವ ವಿಚರತಿ, ಸೀಸಮೇವ ದಸ್ಸೇತಿ, ಅಯಮ್ಪಿ ಅನಾರಾಧಕೋ ಹೋತಿ।
Uccāvacāni karaṇīyānīti mahantakhuddakāni kammāni. Tattha ghaṇṭiṃ paharitvā samaggena saṅghena sannipatitvā kattabbāni cetiyamahāpāsādapaṭisaṅkharaṇādīni kammāni uccāni nāma. Cīvaradhovanarajanādīni khandhakapariyāpannāni ca aggisālavattādīni ābhisamācārikāni avacāni nāma. Tattha na dakkho hotīti tesu kammesu cheko susikkhito na hoti. Na analasoti uṭṭhānavīriyasampanno na hoti; ‘‘bhikkhusaṅghassa kammaṃ atthī’’ti sutvā pageva bhattakiccaṃ katvā gabbhantaraṃ pavisitvā yāvadatthaṃ supitvā sāyaṃ nikkhamati. Tatrupāyāyāti tesu kammesu upāyabhūtāya. Vīmaṃsāyāti ṭhānuppattikavīmaṃsāya. ‘‘Idamevaṃ kattabbaṃ, idamevaṃ na kattabba’’nti tasmiṃyeva khaṇe uppannapaññāya samannāgato na hoti. Na alaṃ kātuṃ na alaṃ saṃvidhātunti sahatthāpi kātuṃ samattho na hoti; ‘‘gaṇhatha bhante, gaṇha dahara, gaṇha sāmaṇera, sace tumhe vā na karissatha, amhe vā na karissāma, ko dāni imaṃ karissatī’’ti evaṃ ussāhaṃ janetvā saṃvidhātuṃ aññamaññaṃ kāretumpi samattho na hoti. Bhikkhūhi ‘‘kammaṃ karissāmā’’ti vutte kiñci rogaṃ apadisati, bhikkhūnaṃ kammaṃ karontānaṃ samīpeneva vicarati, sīsameva dasseti, ayampi anārādhako hoti.
ನ ತಿಬ್ಬಚ್ಛನ್ದೋ ಹೋತೀತಿ ಬಲವಚ್ಛನ್ದೋ ನ ಹೋತಿ। ಉದ್ದೇಸೇತಿ ಪಾಳಿಪರಿಯಾಪುಣನೇ। ಪರಿಪುಚ್ಛಾಯಾತಿ ಅತ್ಥಸವನೇ। ಅಧಿಸೀಲೇತಿ ಪಾತಿಮೋಕ್ಖಸೀಲೇ। ಅಧಿಚಿತ್ತೇತಿ ಲೋಕಿಯಸಮಾಧಿಭಾವನಾಯ। ಅಧಿಪಞ್ಞಾಯಾತಿ ಲೋಕುತ್ತರಮಗ್ಗಭಾವನಾಯ।
Na tibbacchando hotīti balavacchando na hoti. Uddeseti pāḷipariyāpuṇane. Paripucchāyāti atthasavane. Adhisīleti pātimokkhasīle. Adhicitteti lokiyasamādhibhāvanāya. Adhipaññāyāti lokuttaramaggabhāvanāya.
ಸಙ್ಕನ್ತೋ ಹೋತೀತಿ ಇಧಾಗತೋ ಹೋತಿ। ತಸ್ಸ ಸತ್ಥುನೋತಿ ತಸ್ಸ ತಿತ್ಥಾಯತನಸಾಮಿಕಸ್ಸ। ತಸ್ಸ ದಿಟ್ಠಿಯಾತಿ ತಸ್ಸ ಸನ್ತಕಾಯ ಲದ್ಧಿಯಾ। ಇದಾನಿ ಸಾಯೇವ ಲದ್ಧಿ ಯಸ್ಮಾ ತಸ್ಸ ತಿತ್ಥಕರಸ್ಸ ಖಮತಿ ಚೇವ ರುಚ್ಚತಿ ಚ ‘‘ಇದಮೇವ ಸಚ್ಚ’’ನ್ತಿ ಚ ದಳ್ಹಗ್ಗಾಹೇನ ಗಹಿತಾ; ತಸ್ಮಾ ತಸ್ಸ ಖನ್ತಿ ರುಚಿ ಆದಾಯೋತಿ ವುಚ್ಚತಿ। ತೇನ ವುತ್ತಂ – ‘‘ತಸ್ಸ ಖನ್ತಿಯಾ ತಸ್ಸ ರುಚಿಯಾ ತಸ್ಸ ಆದಾಯಸ್ಸಾ’’ತಿ। ಅವಣ್ಣೇ ಭಞ್ಞಮಾನೇತಿ ಗರಹಾಯ ಭಞ್ಞಮಾನಾಯ। ಅನಭಿರದ್ಧೋತಿ ಅಪರಿಪುಣ್ಣಸಙ್ಕಪ್ಪೋ; ನೋ ಪಗ್ಗಹಿತಚಿತ್ತೋ। ಉದಗ್ಗೋತಿ ಅಬ್ಭುನ್ನತಕಾಯಚಿತ್ತೋ। ಇದಂ ಭಿಕ್ಖವೇ ಸಙ್ಘಾತನಿಕಂ ಅಞ್ಞತಿತ್ಥಿಯಪುಬ್ಬಸ್ಸ ಅನಾರಾಧನೀಯಸ್ಮಿನ್ತಿ ಭಿಕ್ಖವೇ ಯಮಿದಂ ತಸ್ಸ ಸತ್ಥುನೋ ತಸ್ಸೇವ ಚ ಲದ್ಧಿಯಾ ಅವಣ್ಣೇ ಭಞ್ಞಮಾನೇ ‘‘ಕಿಂ ಇಮೇ ಪರಂ ಗರಹನ್ತೀ’’ತಿ ಕಾಯವಚೀವಿಕಾರನಿಬ್ಬತ್ತಕಂ ಅನತ್ತಮನತ್ತಂ, ಬುದ್ಧಾದೀನಞ್ಚ ಅವಣ್ಣೇ ಭಞ್ಞಮಾನೇ ಅತ್ತಮನತ್ತಂ, ಯಞ್ಚ ತಸ್ಸೇವ ಸತ್ಥುನೋ ತಸ್ಸೇವ ಚ ಲದ್ಧಿಯಾ ವಣ್ಣೇ ಭಞ್ಞಮಾನೇ ಅತ್ತಮನತ್ತಂ, ಬುದ್ಧಾದೀನಞ್ಚ ವಣ್ಣಭಣನೇ ಅನತ್ತಮನತ್ತಂ, ಇದಂ ಅಞ್ಞತಿತ್ಥಿಯಪುಬ್ಬಸ್ಸ ಅನಾರಾಧನೀಯಸ್ಮಿಂ ಸಙ್ಘಾತನಿಕಂ, ಅನಾರಾಧಕೇ ಪರಿವಾಸವತ್ತಂ ಅಪೂರಕೇ ಕಮ್ಮೇ ಇದಂ ಲಿಙ್ಗಂ, ಇದಂ ಲಕ್ಖಣಂ, ಇದಮಚಲಪ್ಪಮಾಣನ್ತಿ ವುತ್ತಂ ಹೋತಿ। ಏವಂ ಅನಾರಾಧಕೋ ಖೋ ಭಿಕ್ಖವೇ ಅಞ್ಞತಿತ್ಥಿಯಪುಬ್ಬೋ ಆಗತೋ ನ ಉಪಸಮ್ಪಾದೇತಬ್ಬೋತಿ ಇತೋ ಏಕೇನಪಿ ಅಙ್ಗೇನ ಸಮನ್ನಾಗತೋ ನ ಉಪಸಮ್ಪಾದೇತಬ್ಬೋ। ಸುಕ್ಕಪಕ್ಖೇ ಸಬ್ಬಂ ವುತ್ತವಿಪಲ್ಲಾಸೇನ ವೇದಿತಬ್ಬಂ।
Saṅkantohotīti idhāgato hoti. Tassa satthunoti tassa titthāyatanasāmikassa. Tassa diṭṭhiyāti tassa santakāya laddhiyā. Idāni sāyeva laddhi yasmā tassa titthakarassa khamati ceva ruccati ca ‘‘idameva sacca’’nti ca daḷhaggāhena gahitā; tasmā tassa khanti ruci ādāyoti vuccati. Tena vuttaṃ – ‘‘tassa khantiyā tassa ruciyā tassa ādāyassā’’ti. Avaṇṇe bhaññamāneti garahāya bhaññamānāya. Anabhiraddhoti aparipuṇṇasaṅkappo; no paggahitacitto. Udaggoti abbhunnatakāyacitto. Idaṃ bhikkhave saṅghātanikaṃ aññatitthiyapubbassa anārādhanīyasminti bhikkhave yamidaṃ tassa satthuno tasseva ca laddhiyā avaṇṇe bhaññamāne ‘‘kiṃ ime paraṃ garahantī’’ti kāyavacīvikāranibbattakaṃ anattamanattaṃ, buddhādīnañca avaṇṇe bhaññamāne attamanattaṃ, yañca tasseva satthuno tasseva ca laddhiyā vaṇṇe bhaññamāne attamanattaṃ, buddhādīnañca vaṇṇabhaṇane anattamanattaṃ, idaṃ aññatitthiyapubbassa anārādhanīyasmiṃ saṅghātanikaṃ, anārādhake parivāsavattaṃ apūrake kamme idaṃ liṅgaṃ, idaṃ lakkhaṇaṃ, idamacalappamāṇanti vuttaṃ hoti. Evaṃ anārādhako kho bhikkhave aññatitthiyapubbo āgato na upasampādetabboti ito ekenapi aṅgena samannāgato na upasampādetabbo. Sukkapakkhe sabbaṃ vuttavipallāsena veditabbaṃ.
ಏವಂ ಆರಾಧಕೋ ಖೋ ಭಿಕ್ಖವೇತಿ ಏವಂ ನಾತಿಕಾಲೇನ ಗಾಮಪ್ಪವೇಸನಾ ನಾತಿದಿವಾ ಪಟಿಕ್ಕಮನಂ, ನ ವೇಸಿಯಾದಿಗೋಚರತಾ, ಸಬ್ರಹ್ಮಚಾರೀನಂ ಕಿಚ್ಚೇಸು ದಕ್ಖತಾದಿ, ಉದ್ದೇಸಾದೀಸು ತಿಬ್ಬಚ್ಛನ್ದತಾ, ತಿತ್ಥಿಯಾನಂ ಅವಣ್ಣಭಣನೇ ಅತ್ತಮನತಾ, ಬುದ್ಧಾದೀನಂ ಅವಣ್ಣಭಣನೇ ಅನತ್ತಮನತಾ, ತಿತ್ಥಿಯಾನಂ ವಣ್ಣಭಣನೇ ಅನತ್ತಮನತಾ, ಬುದ್ಧಾದೀನಂ ವಣ್ಣಭಣನೇ ಅತ್ತಮನತಾತಿ ಇಮೇಸಂ ಅಟ್ಠನ್ನಂ ತಿತ್ಥಿಯವತ್ತಾನಂ ಪರಿಪೂರಣೇನ ಆರಾಧಕೋ ಪರಿತೋಸಕೋ ಭಿಕ್ಖೂನಂ ಅಞ್ಞತಿತ್ಥಿಯಪುಬ್ಬೋ ಆಗತೋ ಉಪಸಮ್ಪಾದೇತಬ್ಬೋ।
Evaṃ ārādhako kho bhikkhaveti evaṃ nātikālena gāmappavesanā nātidivā paṭikkamanaṃ, na vesiyādigocaratā, sabrahmacārīnaṃ kiccesu dakkhatādi, uddesādīsu tibbacchandatā, titthiyānaṃ avaṇṇabhaṇane attamanatā, buddhādīnaṃ avaṇṇabhaṇane anattamanatā, titthiyānaṃ vaṇṇabhaṇane anattamanatā, buddhādīnaṃ vaṇṇabhaṇane attamanatāti imesaṃ aṭṭhannaṃ titthiyavattānaṃ paripūraṇena ārādhako paritosako bhikkhūnaṃ aññatitthiyapubbo āgato upasampādetabbo.
ಸಚೇ ಪನ ಉಪಸಮ್ಪದಮಾಳಕೇಪಿ ಏಕಂ ವತ್ತಂ ಭಿನ್ದತಿ, ಪುನ ಚತ್ತಾರೋ ಮಾಸೇ ಪರಿವಸಿತಬ್ಬಂ। ಯಥಾ ಪನ ಭಿನ್ನಸಿಕ್ಖಾಯ ಸಿಕ್ಖಮಾನಾಯ ಪುನ ಸಿಕ್ಖಾಪದಾನಿ ಚ ಸಿಕ್ಖಾಸಮ್ಮುತಿ ಚ ದಿಯ್ಯತಿ, ಏವಂ ನಯಿಮಸ್ಸ ಕಿಞ್ಚಿ ಪುನ ದಾತಬ್ಬಮತ್ಥಿ। ಪುಬ್ಬೇ ದಿನ್ನಪರಿವಾಸೋಯೇವ ಹಿ ತಸ್ಸ ಪರಿವಾಸೋ। ತಸ್ಮಾ ಪುನ ಚತ್ತಾರೋ ಮಾಸೇ ಪರಿವಸಿತಬ್ಬಂ। ಸಚೇ ಪರಿವಸನ್ತೋ ಅನ್ತರಾ ಅಟ್ಠ ಸಮಾಪತ್ತಿಯೋ ನಿಬ್ಬತ್ತೇತಿ, ಲೋಕಿಯಧಮ್ಮೋ ನಾಮ ಕುಪ್ಪನಸಭಾವೋ, ನ ಉಪಸಮ್ಪಾದೇತಬ್ಬೋ। ಚತ್ತಾರೋ ಮಾಸೇ ಪೂರಿತವತ್ತೋವ ಉಪಸಮ್ಪಾದೇತಬ್ಬೋ। ಸಚೇ ಪನ ಪರಿವಸನ್ತೋ ಚತ್ತಾರಿ ಮಹಾಭೂತಾನಿ ಪರಿಗ್ಗಣ್ಹತಿ, ಉಪಾದಾರೂಪಾನಿ ಪರಿಚ್ಛಿನ್ದತಿ, ನಾಮರೂಪಂ ವವತ್ಥಪೇತಿ, ತಿಲಕ್ಖಣಂ ಆರೋಪೇತ್ವಾ ವಿಪಸ್ಸನಂ ಆರಭತಿ, ಲೋಕಿಯಧಮ್ಮೋ ನಾಮ ಕುಪ್ಪನಸಭಾವೋ, ನೇವ ಉಪಸಮ್ಪಾದೇತಬ್ಬೋ। ಸಚೇ ಪನ ವಿಪಸ್ಸನಂ ವಡ್ಢೇತ್ವಾ ಸೋತಾಪತ್ತಿಮಗ್ಗಂ ಪಟಿಲಭತಿ, ಪರಿಪುಣ್ಣಂಯೇವ ಹೋತಿ ವತ್ತಂ। ಸಮೂಹತಾನಿ ಸಬ್ಬದಿಟ್ಠಿಗತಾನಿ ಅಬ್ಬುಳ್ಹಂ ವಿಚಿಕಿಚ್ಛಾಸಲ್ಲಂ ತಂದಿವಸಮೇವ ಉಪಸಮ್ಪಾದೇತಬ್ಬೋ। ಸಚೇಪಿ ತಿತ್ಥಿಯಲಿಙ್ಗೇ ಠಿತೋ ಸೋತಾಪನ್ನೋ ಹೋತಿ, ಪರಿವಾಸಕಿಚ್ಚಂ ನತ್ಥಿ, ತದಹೇವ ಪಬ್ಬಾಜೇತ್ವಾ ಉಪಸಮ್ಪಾದೇತಬ್ಬೋ।
Sace pana upasampadamāḷakepi ekaṃ vattaṃ bhindati, puna cattāro māse parivasitabbaṃ. Yathā pana bhinnasikkhāya sikkhamānāya puna sikkhāpadāni ca sikkhāsammuti ca diyyati, evaṃ nayimassa kiñci puna dātabbamatthi. Pubbe dinnaparivāsoyeva hi tassa parivāso. Tasmā puna cattāro māse parivasitabbaṃ. Sace parivasanto antarā aṭṭha samāpattiyo nibbatteti, lokiyadhammo nāma kuppanasabhāvo, na upasampādetabbo. Cattāro māse pūritavattova upasampādetabbo. Sace pana parivasanto cattāri mahābhūtāni pariggaṇhati, upādārūpāni paricchindati, nāmarūpaṃ vavatthapeti, tilakkhaṇaṃ āropetvā vipassanaṃ ārabhati, lokiyadhammo nāma kuppanasabhāvo, neva upasampādetabbo. Sace pana vipassanaṃ vaḍḍhetvā sotāpattimaggaṃ paṭilabhati, paripuṇṇaṃyeva hoti vattaṃ. Samūhatāni sabbadiṭṭhigatāni abbuḷhaṃ vicikicchāsallaṃ taṃdivasameva upasampādetabbo. Sacepi titthiyaliṅge ṭhito sotāpanno hoti, parivāsakiccaṃ natthi, tadaheva pabbājetvā upasampādetabbo.
ಉಪಜ್ಝಾಯಮೂಲಕಂ ಚೀವರಂ ಪರಿಯೇಸಿತಬ್ಬನ್ತಿ ಉಪಜ್ಝಾಯಂ ಇಸ್ಸರಂ ಕತ್ವಾ ತಸ್ಸ ಚೀವರಂ ಪರಿಯೇಸಿತಬ್ಬಂ। ಪತ್ತಮ್ಪಿ ತಥೇವ। ತಸ್ಮಾ ಯದಿ ಉಪಜ್ಝಾಯಸ್ಸ ಪತ್ತಚೀವರಂ ಅತ್ಥಿ, ‘‘ಇಮಸ್ಸ ದೇಹೀ’’ತಿ ವತ್ತಬ್ಬೋ। ಅಥ ನತ್ಥಿ, ಅಞ್ಞೇ ದಾತುಕಾಮಾ ಹೋನ್ತಿ, ತೇಹಿಪಿ ಉಪಜ್ಝಾಯಸ್ಸೇವ ದಾತಬ್ಬಂ ‘‘ಇದಂ ತುಮ್ಹಾಕಂ ಕತ್ವಾ ಇಮಸ್ಸ ದೇಥಾ’’ತಿ। ಕಸ್ಮಾ? ತಿತ್ಥಿಯಾ ನಾಮ ವಿಲೋಮಾ ಹೋನ್ತಿ ‘‘ಸಙ್ಘೇನ ಮೇ ಪತ್ತಚೀವರಂ ದಿನ್ನಂ, ಕಿಂ ಮಯ್ಹಂ ತುಮ್ಹೇಸು ಆಯತ್ತ’’ನ್ತಿ ವತ್ವಾ ಓವಾದಾನುಸಾಸನಿಂ ನ ಕರೇಯ್ಯುಂ, ಉಪಜ್ಝಾಯೇನ ಪನ ಆಯತ್ತಜೀವಿಕತ್ತಾ ತಸ್ಸ ವಚನಕರೋ ಭವಿಸ್ಸತಿ। ತೇನಸ್ಸ ‘‘ಉಪಜ್ಝಾಯಮೂಲಕಂ ಚೀವರಂ ಪರಿಯೇಸಿತಬ್ಬ’’ನ್ತಿ ವುತ್ತಂ। ಭಣ್ಡುಕಮ್ಮಾಯಾತಿ ಕೇಸೋರೋಪನತ್ಥಂ। ಭಣ್ಡುಕಮ್ಮಕಥಾ ಪರತೋ ಆಗಮಿಸ್ಸತಿ।
Upajjhāyamūlakaṃ cīvaraṃ pariyesitabbanti upajjhāyaṃ issaraṃ katvā tassa cīvaraṃ pariyesitabbaṃ. Pattampi tatheva. Tasmā yadi upajjhāyassa pattacīvaraṃ atthi, ‘‘imassa dehī’’ti vattabbo. Atha natthi, aññe dātukāmā honti, tehipi upajjhāyasseva dātabbaṃ ‘‘idaṃ tumhākaṃ katvā imassa dethā’’ti. Kasmā? Titthiyā nāma vilomā honti ‘‘saṅghena me pattacīvaraṃ dinnaṃ, kiṃ mayhaṃ tumhesu āyatta’’nti vatvā ovādānusāsaniṃ na kareyyuṃ, upajjhāyena pana āyattajīvikattā tassa vacanakaro bhavissati. Tenassa ‘‘upajjhāyamūlakaṃ cīvaraṃ pariyesitabba’’nti vuttaṃ. Bhaṇḍukammāyāti kesoropanatthaṃ. Bhaṇḍukammakathā parato āgamissati.
ಅಗ್ಗಿಕಾತಿ ಅಗ್ಗಿಪರಿಚರಣಕಾ। ಜಟಿಲಕಾತಿ ತಾಪಸಾ। ಏತೇ ಭಿಕ್ಖವೇ ಕಿರಿಯವಾದಿನೋತಿ ಏತೇ ಕಿರಿಯಂ ನ ಪಟಿಬಾಹನ್ತಿ, ‘‘ಅತ್ಥಿ ಕಮ್ಮಂ, ಅತ್ಥಿ ಕಮ್ಮವಿಪಾಕೋ’’ತಿ ಏವಂದಿಟ್ಠಿಕಾ। ಸಬ್ಬಬುದ್ಧಾ ಹಿ ನೇಕ್ಖಮ್ಮಪಾರಮಿಂ ಪೂರಯಮಾನಾ ಏತದೇವ ಪಬ್ಬಜ್ಜಂ ಪಬ್ಬಜಿತ್ವಾ ಪೂರೇಸುಂ, ಮಯಾಪಿ ತಥೇವ ಪೂರಿತಾ, ನ ಏತೇಸಂ ಸಾಸನೇ ಪಬ್ಬಜ್ಜಾ ವಿಲೋಮಾ, ತಸ್ಮಾ ಉಪಸಮ್ಪಾದೇತಬ್ಬಾ, ನ ತೇಸಂ ಪರಿವಾಸೋ ದಾತಬ್ಬೋತಿ। ಇಮಾಹಂ ಭಿಕ್ಖವೇ ಞಾತೀನಂ ಆವೇಣಿಕಂ ಪರಿಹಾರಂ ದಮ್ಮೀತಿ ಇಮಂ ಅಹಂ ತೇಸಂ ಪಾಟೇಕ್ಕಂ ಓದಿಸ್ಸಕಂ ಪರಿಹಾರಂ ದದಾಮಿ। ಕಸ್ಮಾ ಏವಮಾಹ? ತೇ ಹಿ ತಿತ್ಥಾಯತನೇ ಪಬ್ಬಜಿತಾಪಿ ಸಾಸನಸ್ಸ ಅವಣ್ಣಕಾಮಾ ನ ಹೋನ್ತಿ, ಅಮ್ಹಾಕಂ ಞಾತಿಸೇಟ್ಠಸ್ಸ ಸಾಸನನ್ತಿ ವಣ್ಣವಾದಿನೋವ ಹೋನ್ತಿ, ತಸ್ಮಾ ಏವಮಾಹಾತಿ।
Aggikāti aggiparicaraṇakā. Jaṭilakāti tāpasā. Ete bhikkhave kiriyavādinoti ete kiriyaṃ na paṭibāhanti, ‘‘atthi kammaṃ, atthi kammavipāko’’ti evaṃdiṭṭhikā. Sabbabuddhā hi nekkhammapāramiṃ pūrayamānā etadeva pabbajjaṃ pabbajitvā pūresuṃ, mayāpi tatheva pūritā, na etesaṃ sāsane pabbajjā vilomā, tasmā upasampādetabbā, na tesaṃ parivāso dātabboti. Imāhaṃ bhikkhave ñātīnaṃ āveṇikaṃ parihāraṃ dammīti imaṃ ahaṃ tesaṃ pāṭekkaṃ odissakaṃ parihāraṃ dadāmi. Kasmā evamāha? Te hi titthāyatane pabbajitāpi sāsanassa avaṇṇakāmā na honti, amhākaṃ ñātiseṭṭhassa sāsananti vaṇṇavādinova honti, tasmā evamāhāti.
ಅಞ್ಞತಿತ್ಥಿಯಪುಬ್ಬವತ್ಥುಕಥಾ ನಿಟ್ಠಿತಾ।
Aññatitthiyapubbavatthukathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨೫. ಅಞ್ಞತಿತ್ಥಿಯಪುಬ್ಬಕಥಾ • 25. Aññatitthiyapubbakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಞ್ಞತಿತ್ಥಿಯಪುಬ್ಬವತ್ಥುಕಥಾವಣ್ಣನಾ • Aññatitthiyapubbavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅಞ್ಞತಿತ್ಥಿಯಪುಬ್ಬವತ್ಥುಕಥಾವಣ್ಣನಾ • Aññatitthiyapubbavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಞ್ಞತಿತ್ಥಿಯಪುಬ್ಬವತ್ಥುಕಥಾವಣ್ಣನಾ • Aññatitthiyapubbavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨೫. ಅಞ್ಞತಿತ್ಥಿಯಪುಬ್ಬವತ್ಥುಕಥಾ • 25. Aññatitthiyapubbavatthukathā
