| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
அஞ்ஞதித்தி²யபுப்³ப³வத்து²கதா²வண்ணனா
Aññatitthiyapubbavatthukathāvaṇṇanā
86. யோ ஸோ அஞ்ஞதித்தி²யபுப்³போ³தி எத்த² த்³வே அத்த²விகப்பா – தஸ்ஸ பஸூரஸ்ஸ பி⁴க்கு²பா⁴வங் ஸந்தா⁴ய அஞ்ஞதித்தி²யபுப்³போ³, ஸோ பி⁴க்கு² தங்யேவ தித்தா²யதனங் ஸங்கமீதி அயமேகோ அத்தோ². ஏவங் தித்தி²யபக்கந்தகோ புன கி³ஹிவேஸேன ஆக³தோ அஞ்ஞதித்தி²யபுப்³போ³, ஸோ ஆக³தோ ந உபஸம்பாதே³தப்³போ³தி அயமேகோ அத்தோ². தங் அஞ்ஞதித்தி²யபக்கந்தகங் ட²பெத்வா ‘‘யோ ஸோ, பி⁴க்க²வே, அஞ்ஞதித்தி²யபுப்³போ³’’தி எத்த² ந கி³ஹிவேஸதா⁴ரணோவ புப்³ப³ஸத்³தே³ன வுத்தோ, கிந்து தஸ்மிங் அத்தனோ யதா²ஸமாதி³ன்னதித்தி²யவேஸே டி²தோபி. தி³ட்டி²வஸேன அதித்தி²யபூ⁴தத்தா அதித்தி²யபுப்³போ³, ஸோ பனாக³தோ விப்³ப⁴ந்தோ ஆக³ச்ச²தி, தஸ்ஸ பரிவாஸதா³னகிச்சங் நத்தி². கிங் இமஸ்ஸ அஞ்ஞதித்தி²யபுப்³ப³ஸ்ஸ பி⁴க்கு²வேஸங் க³ஹெத்வா ஸரணக³மனேன ஸாமணேரபப்³ப³ஜ்ஜா ஜாதா, ந ஜாதாதி? கிஞ்செத்த² யதி³ ஜாதா, ‘‘யோ ஸோ, பி⁴க்க²வே, அஞ்ஞோபி அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்க²தி பப்³ப³ஜ்ஜங், ஆகங்க²தி உபஸம்பத³ங், தஸ்ஸ சத்தாரோ மாஸே பரிவாஸோ தா³தப்³போ³’’தி (மஹாவ॰ 86) வசனங் விருஜ்ஜ²தி. அத² ந ஜாதா, பரிவாஸகம்மவாசாய பப்³ப³ஜ்ஜாய அபராமஸனங் விருஜ்ஜ²தீதி. தத்த² மஹாவிஹாரவாஸினோ ‘‘ஸாமணேரஸ்ஸேவ ஸதோ பரிவாஸோ தா³தப்³போ³’’தி வத³ந்தி. இதரே ததா² ந வத³ந்தி. தே ஹி ‘‘ஏவங் ஆராத⁴கோ கோ² பி⁴க்க²வே அஞ்ஞதித்தி²யபுப்³போ³ ஆக³தோ உபஸம்பாதே³தப்³போ³’தி (மஹாவ॰ 87) ஸுத்தபத³ங் பரிஹரிதப்³ப³ங், புரே ச பச்சா² ச ‘அஞ்ஞதித்தி²யபுப்³போ³’தி வசனஸாமஞ்ஞதோ ந ஸாமணேரோ ஜாதோதி சே, யதி³ ஏவங் அபப்³பா³ஜெத்வாவ உபஸம்பாதே³தப்³போ³தி ஆபஜ்ஜதி. ததோ ச ஸப்³ப³பட²மங் வுத்தஸுத்தங் விருஜ்ஜ²தி. ‘தித்தா²யதனங் ஸங்கந்தோ’தி பாடோ²பி ந ஸுந்த³ரங். பாணாதிபாதாதீ³ஸு அஞ்ஞதரங் ஸசே பி⁴ந்த³தி, சத்தாரோ மாஸே பரிபுண்ணேபி புன பரிபூரேதப்³ப³ங் விய தி³ஸ்ஸதி. வுத்தம்பி தஸ்ஸ ஸங்வரங் பி⁴க்கு²கரணத்தா²ய அனுஞ்ஞாதத்தா ஸீலே வத்தப்³ப³ங் நத்தீ²’’தி வத³ந்தி, விசாரெத்வா க³ஹேதப்³ப³ங். ஸரணானி ஸசே பி⁴ஜ்ஜந்தி ஸாமணேரஸ்ஸேவ.
86.Yo so aññatitthiyapubboti ettha dve atthavikappā – tassa pasūrassa bhikkhubhāvaṃ sandhāya aññatitthiyapubbo, so bhikkhu taṃyeva titthāyatanaṃ saṅkamīti ayameko attho. Evaṃ titthiyapakkantako puna gihivesena āgato aññatitthiyapubbo, so āgato na upasampādetabboti ayameko attho. Taṃ aññatitthiyapakkantakaṃ ṭhapetvā ‘‘yo so, bhikkhave, aññatitthiyapubbo’’ti ettha na gihivesadhāraṇova pubbasaddena vutto, kintu tasmiṃ attano yathāsamādinnatitthiyavese ṭhitopi. Diṭṭhivasena atitthiyabhūtattā atitthiyapubbo, so panāgato vibbhanto āgacchati, tassa parivāsadānakiccaṃ natthi. Kiṃ imassa aññatitthiyapubbassa bhikkhuvesaṃ gahetvā saraṇagamanena sāmaṇerapabbajjā jātā, na jātāti? Kiñcettha yadi jātā, ‘‘yo so, bhikkhave, aññopi aññatitthiyapubbo imasmiṃ dhammavinaye ākaṅkhati pabbajjaṃ, ākaṅkhati upasampadaṃ, tassa cattāro māse parivāso dātabbo’’ti (mahāva. 86) vacanaṃ virujjhati. Atha na jātā, parivāsakammavācāya pabbajjāya aparāmasanaṃ virujjhatīti. Tattha mahāvihāravāsino ‘‘sāmaṇerasseva sato parivāso dātabbo’’ti vadanti. Itare tathā na vadanti. Te hi ‘‘evaṃ ārādhako kho bhikkhave aññatitthiyapubbo āgato upasampādetabbo’ti (mahāva. 87) suttapadaṃ pariharitabbaṃ, pure ca pacchā ca ‘aññatitthiyapubbo’ti vacanasāmaññato na sāmaṇero jātoti ce, yadi evaṃ apabbājetvāva upasampādetabboti āpajjati. Tato ca sabbapaṭhamaṃ vuttasuttaṃ virujjhati. ‘Titthāyatanaṃ saṅkanto’ti pāṭhopi na sundaraṃ. Pāṇātipātādīsu aññataraṃ sace bhindati, cattāro māse paripuṇṇepi puna paripūretabbaṃ viya dissati. Vuttampi tassa saṃvaraṃ bhikkhukaraṇatthāya anuññātattā sīle vattabbaṃ natthī’’ti vadanti, vicāretvā gahetabbaṃ. Saraṇāni sace bhijjanti sāmaṇerasseva.
அஞ்ஞதித்தி²யபுப்³ப³வத்து²கதா²வண்ணனா நிட்டி²தா.
Aññatitthiyapubbavatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 25. அஞ்ஞதித்தி²யபுப்³ப³கதா² • 25. Aññatitthiyapubbakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அஞ்ஞதித்தி²யபுப்³ப³வத்து²கதா² • Aññatitthiyapubbavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அஞ்ஞதித்தி²யபுப்³ப³வத்து²கதா²வண்ணனா • Aññatitthiyapubbavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அஞ்ஞதித்தி²யபுப்³ப³வத்து²கதா²வண்ணனா • Aññatitthiyapubbavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 25. அஞ்ஞதித்தி²யபுப்³ப³வத்து²கதா² • 25. Aññatitthiyapubbavatthukathā
