| Library / Tipiṭaka / ติปิฎก • Tipiṭaka / วชิรพุทฺธิ-ฎีกา • Vajirabuddhi-ṭīkā |
อญฺญติตฺถิยปุพฺพวตฺถุกถาวณฺณนา
Aññatitthiyapubbavatthukathāvaṇṇanā
๘๖. โย โส อญฺญติตฺถิยปุโพฺพติ เอตฺถ เทฺว อตฺถวิกปฺปา – ตสฺส ปสูรสฺส ภิกฺขุภาวํ สนฺธาย อญฺญติตฺถิยปุโพฺพ, โส ภิกฺขุ ตํเยว ติตฺถายตนํ สงฺกมีติ อยเมโก อโตฺถฯ เอวํ ติตฺถิยปกฺกนฺตโก ปุน คิหิเวเสน อาคโต อญฺญติตฺถิยปุโพฺพ, โส อาคโต น อุปสมฺปาเทตโพฺพติ อยเมโก อโตฺถฯ ตํ อญฺญติตฺถิยปกฺกนฺตกํ ฐเปตฺวา ‘‘โย โส, ภิกฺขเว, อญฺญติตฺถิยปุโพฺพ’’ติ เอตฺถ น คิหิเวสธารโณว ปุพฺพสเทฺทน วุโตฺต, กินฺตุ ตสฺมิํ อตฺตโน ยถาสมาทินฺนติตฺถิยเวเส ฐิโตปิฯ ทิฎฺฐิวเสน อติตฺถิยภูตตฺตา อติตฺถิยปุโพฺพ, โส ปนาคโต วิพฺภโนฺต อาคจฺฉติ, ตสฺส ปริวาสทานกิจฺจํ นตฺถิฯ กิํ อิมสฺส อญฺญติตฺถิยปุพฺพสฺส ภิกฺขุเวสํ คเหตฺวา สรณคมเนน สามเณรปพฺพชฺชา ชาตา, น ชาตาติ? กิเญฺจตฺถ ยทิ ชาตา, ‘‘โย โส, ภิกฺขเว, อโญฺญปิ อญฺญติตฺถิยปุโพฺพ อิมสฺมิํ ธมฺมวินเย อากงฺขติ ปพฺพชฺชํ, อากงฺขติ อุปสมฺปทํ, ตสฺส จตฺตาโร มาเส ปริวาโส ทาตโพฺพ’’ติ (มหาว. ๘๖) วจนํ วิรุชฺฌติฯ อถ น ชาตา, ปริวาสกมฺมวาจาย ปพฺพชฺชาย อปรามสนํ วิรุชฺฌตีติฯ ตตฺถ มหาวิหารวาสิโน ‘‘สามเณรเสฺสว สโต ปริวาโส ทาตโพฺพ’’ติ วทนฺติฯ อิตเร ตถา น วทนฺติฯ เต หิ ‘‘เอวํ อาราธโก โข ภิกฺขเว อญฺญติตฺถิยปุโพฺพ อาคโต อุปสมฺปาเทตโพฺพ’ติ (มหาว. ๘๗) สุตฺตปทํ ปริหริตพฺพํ, ปุเร จ ปจฺฉา จ ‘อญฺญติตฺถิยปุโพฺพ’ติ วจนสามญฺญโต น สามเณโร ชาโตติ เจ, ยทิ เอวํ อปพฺพาเชตฺวาว อุปสมฺปาเทตโพฺพติ อาปชฺชติฯ ตโต จ สพฺพปฐมํ วุตฺตสุตฺตํ วิรุชฺฌติฯ ‘ติตฺถายตนํ สงฺกโนฺต’ติ ปาโฐปิ น สุนฺทรํฯ ปาณาติปาตาทีสุ อญฺญตรํ สเจ ภินฺทติ, จตฺตาโร มาเส ปริปุเณฺณปิ ปุน ปริปูเรตพฺพํ วิย ทิสฺสติฯ วุตฺตมฺปิ ตสฺส สํวรํ ภิกฺขุกรณตฺถาย อนุญฺญาตตฺตา สีเล วตฺตพฺพํ นตฺถี’’ติ วทนฺติ, วิจาเรตฺวา คเหตพฺพํฯ สรณานิ สเจ ภิชฺชนฺติ สามเณรเสฺสวฯ
86.Yo so aññatitthiyapubboti ettha dve atthavikappā – tassa pasūrassa bhikkhubhāvaṃ sandhāya aññatitthiyapubbo, so bhikkhu taṃyeva titthāyatanaṃ saṅkamīti ayameko attho. Evaṃ titthiyapakkantako puna gihivesena āgato aññatitthiyapubbo, so āgato na upasampādetabboti ayameko attho. Taṃ aññatitthiyapakkantakaṃ ṭhapetvā ‘‘yo so, bhikkhave, aññatitthiyapubbo’’ti ettha na gihivesadhāraṇova pubbasaddena vutto, kintu tasmiṃ attano yathāsamādinnatitthiyavese ṭhitopi. Diṭṭhivasena atitthiyabhūtattā atitthiyapubbo, so panāgato vibbhanto āgacchati, tassa parivāsadānakiccaṃ natthi. Kiṃ imassa aññatitthiyapubbassa bhikkhuvesaṃ gahetvā saraṇagamanena sāmaṇerapabbajjā jātā, na jātāti? Kiñcettha yadi jātā, ‘‘yo so, bhikkhave, aññopi aññatitthiyapubbo imasmiṃ dhammavinaye ākaṅkhati pabbajjaṃ, ākaṅkhati upasampadaṃ, tassa cattāro māse parivāso dātabbo’’ti (mahāva. 86) vacanaṃ virujjhati. Atha na jātā, parivāsakammavācāya pabbajjāya aparāmasanaṃ virujjhatīti. Tattha mahāvihāravāsino ‘‘sāmaṇerasseva sato parivāso dātabbo’’ti vadanti. Itare tathā na vadanti. Te hi ‘‘evaṃ ārādhako kho bhikkhave aññatitthiyapubbo āgato upasampādetabbo’ti (mahāva. 87) suttapadaṃ pariharitabbaṃ, pure ca pacchā ca ‘aññatitthiyapubbo’ti vacanasāmaññato na sāmaṇero jātoti ce, yadi evaṃ apabbājetvāva upasampādetabboti āpajjati. Tato ca sabbapaṭhamaṃ vuttasuttaṃ virujjhati. ‘Titthāyatanaṃ saṅkanto’ti pāṭhopi na sundaraṃ. Pāṇātipātādīsu aññataraṃ sace bhindati, cattāro māse paripuṇṇepi puna paripūretabbaṃ viya dissati. Vuttampi tassa saṃvaraṃ bhikkhukaraṇatthāya anuññātattā sīle vattabbaṃ natthī’’ti vadanti, vicāretvā gahetabbaṃ. Saraṇāni sace bhijjanti sāmaṇerasseva.
อญฺญติตฺถิยปุพฺพวตฺถุกถาวณฺณนา นิฎฺฐิตาฯ
Aññatitthiyapubbavatthukathāvaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๒๕. อญฺญติตฺถิยปุพฺพกถา • 25. Aññatitthiyapubbakathā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / อญฺญติตฺถิยปุพฺพวตฺถุกถา • Aññatitthiyapubbavatthukathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / อญฺญติตฺถิยปุพฺพวตฺถุกถาวณฺณนา • Aññatitthiyapubbavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / อญฺญติตฺถิยปุพฺพวตฺถุกถาวณฺณนา • Aññatitthiyapubbavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๒๕. อญฺญติตฺถิยปุพฺพวตฺถุกถา • 25. Aññatitthiyapubbavatthukathā
