| Library / Tipiṭaka / තිපිටක • Tipiṭaka / වජිරබුද්‌ධි-ටීකා • Vajirabuddhi-ṭīkā |
අඤ්‌ඤතිත්‌ථියපුබ්‌බවත්‌ථුකථාවණ්‌ණනා
Aññatitthiyapubbavatthukathāvaṇṇanā
86. යො සො අඤ්‌ඤතිත්‌ථියපුබ්‌බොති එත්‌ථ ද්‌වෙ අත්‌ථවිකප්‌පා – තස්‌ස පසූරස්‌ස භික්‌ඛුභාවං සන්‌ධාය අඤ්‌ඤතිත්‌ථියපුබ්‌බො, සො භික්‌ඛු තංයෙව තිත්‌ථායතනං සඞ්‌කමීති අයමෙකො අත්‌ථො. එවං තිත්‌ථියපක්‌කන්‌තකො පුන ගිහිවෙසෙන ආගතො අඤ්‌ඤතිත්‌ථියපුබ්‌බො, සො ආගතො න උපසම්‌පාදෙතබ්‌බොති අයමෙකො අත්‌ථො. තං අඤ්‌ඤතිත්‌ථියපක්‌කන්‌තකං ඨපෙත්‌වා ‘‘යො සො, භික්‌ඛවෙ, අඤ්‌ඤතිත්‌ථියපුබ්‌බො’’ති එත්‌ථ න ගිහිවෙසධාරණොව පුබ්‌බසද්‌දෙන වුත්‌තො, කින්‌තු තස්‌මිං අත්‌තනො යථාසමාදින්‌නතිත්‌ථියවෙසෙ ඨිතොපි. දිට්‌ඨිවසෙන අතිත්‌ථියභූතත්‌තා අතිත්‌ථියපුබ්‌බො, සො පනාගතො විබ්‌භන්‌තො ආගච්‌ඡති, තස්‌ස පරිවාසදානකිච්‌චං නත්‌ථි. කිං ඉමස්‌ස අඤ්‌ඤතිත්‌ථියපුබ්‌බස්‌ස භික්‌ඛුවෙසං ගහෙත්‌වා සරණගමනෙන සාමණෙරපබ්‌බජ්‌ජා ජාතා, න ජාතාති? කිඤ්‌චෙත්‌ථ යදි ජාතා, ‘‘යො සො, භික්‌ඛවෙ, අඤ්‌ඤොපි අඤ්‌ඤතිත්‌ථියපුබ්‌බො ඉමස්‌මිං ධම්‌මවිනයෙ ආකඞ්‌ඛති පබ්‌බජ්‌ජං, ආකඞ්‌ඛති උපසම්‌පදං, තස්‌ස චත්‌තාරො මාසෙ පරිවාසො දාතබ්‌බො’’ති (මහාව. 86) වචනං විරුජ්‌ඣති. අථ න ජාතා, පරිවාසකම්‌මවාචාය පබ්‌බජ්‌ජාය අපරාමසනං විරුජ්‌ඣතීති. තත්‌ථ මහාවිහාරවාසිනො ‘‘සාමණෙරස්‌සෙව සතො පරිවාසො දාතබ්‌බො’’ති වදන්‌ති. ඉතරෙ තථා න වදන්‌ති. තෙ හි ‘‘එවං ආරාධකො ඛො භික්‌ඛවෙ අඤ්‌ඤතිත්‌ථියපුබ්‌බො ආගතො උපසම්‌පාදෙතබ්‌බො’ති (මහාව. 87) සුත්‌තපදං පරිහරිතබ්‌බං, පුරෙ ච පච්‌ඡා ච ‘අඤ්‌ඤතිත්‌ථියපුබ්‌බො’ති වචනසාමඤ්‌ඤතො න සාමණෙරො ජාතොති චෙ, යදි එවං අපබ්‌බාජෙත්‌වාව උපසම්‌පාදෙතබ්‌බොති ආපජ්‌ජති. තතො ච සබ්‌බපඨමං වුත්‌තසුත්‌තං විරුජ්‌ඣති. ‘තිත්‌ථායතනං සඞ්‌කන්‌තො’ති පාඨොපි න සුන්‌දරං. පාණාතිපාතාදීසු අඤ්‌ඤතරං සචෙ භින්‌දති, චත්‌තාරො මාසෙ පරිපුණ්‌ණෙපි පුන පරිපූරෙතබ්‌බං විය දිස්‌සති. වුත්‌තම්‌පි තස්‌ස සංවරං භික්‌ඛුකරණත්‌ථාය අනුඤ්‌ඤාතත්‌තා සීලෙ වත්‌තබ්‌බං නත්‌ථී’’ති වදන්‌ති, විචාරෙත්‌වා ගහෙතබ්‌බං. සරණානි සචෙ භිජ්‌ජන්‌ති සාමණෙරස්‌සෙව.
86.Yo so aññatitthiyapubboti ettha dve atthavikappā – tassa pasūrassa bhikkhubhāvaṃ sandhāya aññatitthiyapubbo, so bhikkhu taṃyeva titthāyatanaṃ saṅkamīti ayameko attho. Evaṃ titthiyapakkantako puna gihivesena āgato aññatitthiyapubbo, so āgato na upasampādetabboti ayameko attho. Taṃ aññatitthiyapakkantakaṃ ṭhapetvā ‘‘yo so, bhikkhave, aññatitthiyapubbo’’ti ettha na gihivesadhāraṇova pubbasaddena vutto, kintu tasmiṃ attano yathāsamādinnatitthiyavese ṭhitopi. Diṭṭhivasena atitthiyabhūtattā atitthiyapubbo, so panāgato vibbhanto āgacchati, tassa parivāsadānakiccaṃ natthi. Kiṃ imassa aññatitthiyapubbassa bhikkhuvesaṃ gahetvā saraṇagamanena sāmaṇerapabbajjā jātā, na jātāti? Kiñcettha yadi jātā, ‘‘yo so, bhikkhave, aññopi aññatitthiyapubbo imasmiṃ dhammavinaye ākaṅkhati pabbajjaṃ, ākaṅkhati upasampadaṃ, tassa cattāro māse parivāso dātabbo’’ti (mahāva. 86) vacanaṃ virujjhati. Atha na jātā, parivāsakammavācāya pabbajjāya aparāmasanaṃ virujjhatīti. Tattha mahāvihāravāsino ‘‘sāmaṇerasseva sato parivāso dātabbo’’ti vadanti. Itare tathā na vadanti. Te hi ‘‘evaṃ ārādhako kho bhikkhave aññatitthiyapubbo āgato upasampādetabbo’ti (mahāva. 87) suttapadaṃ pariharitabbaṃ, pure ca pacchā ca ‘aññatitthiyapubbo’ti vacanasāmaññato na sāmaṇero jātoti ce, yadi evaṃ apabbājetvāva upasampādetabboti āpajjati. Tato ca sabbapaṭhamaṃ vuttasuttaṃ virujjhati. ‘Titthāyatanaṃ saṅkanto’ti pāṭhopi na sundaraṃ. Pāṇātipātādīsu aññataraṃ sace bhindati, cattāro māse paripuṇṇepi puna paripūretabbaṃ viya dissati. Vuttampi tassa saṃvaraṃ bhikkhukaraṇatthāya anuññātattā sīle vattabbaṃ natthī’’ti vadanti, vicāretvā gahetabbaṃ. Saraṇāni sace bhijjanti sāmaṇerasseva.
අඤ්‌ඤතිත්‌ථියපුබ්‌බවත්‌ථුකථාවණ්‌ණනා නිට්‌ඨිතා.
Aññatitthiyapubbavatthukathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 25. අඤ්‌ඤතිත්‌ථියපුබ්‌බකථා • 25. Aññatitthiyapubbakathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / අඤ්‌ඤතිත්‌ථියපුබ්‌බවත්‌ථුකථා • Aññatitthiyapubbavatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අඤ්‌ඤතිත්‌ථියපුබ්‌බවත්‌ථුකථාවණ්‌ණනා • Aññatitthiyapubbavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අඤ්‌ඤතිත්‌ථියපුබ්‌බවත්‌ථුකථාවණ්‌ණනා • Aññatitthiyapubbavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 25. අඤ්‌ඤතිත්‌ථියපුබ්‌බවත්‌ථුකථා • 25. Aññatitthiyapubbavatthukathā
