| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. অঞ্ঞতিত্থিযসুত্তং
8. Aññatitthiyasuttaṃ
৬৯. ‘‘সচে, ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘তযোমে, আৰুসো, ধম্মা। কতমে তযো? রাগো, দোসো, মোহো – ইমে খো, আৰুসো, তযো ধম্মা। ইমেসং, আৰুসো, তিণ্ণং ধম্মানং কো ৰিসেসো কো অধিপ্পযাসো 1 কিং নানাকরণ’ন্তি? এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং কিন্তি ব্যাকরেয্যাথা’’তি? ‘‘ভগৰংমূলকা নো, ভন্তে, ধম্মা ভগৰংনেত্তিকা ভগৰংপটিসরণা। সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো। ভগৰতো সুত্ৰা ভিক্খূ ধারেস্সন্তী’’তি। ‘‘তেন হি, ভিক্খৰে, সুণাথ, সাধুকং মনসি করোথ; ভাসিস্সামী’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ –
69. ‘‘Sace, bhikkhave, aññatitthiyā paribbājakā evaṃ puccheyyuṃ – ‘tayome, āvuso, dhammā. Katame tayo? Rāgo, doso, moho – ime kho, āvuso, tayo dhammā. Imesaṃ, āvuso, tiṇṇaṃ dhammānaṃ ko viseso ko adhippayāso 2 kiṃ nānākaraṇa’nti? Evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ kinti byākareyyāthā’’ti? ‘‘Bhagavaṃmūlakā no, bhante, dhammā bhagavaṃnettikā bhagavaṃpaṭisaraṇā. Sādhu vata, bhante, bhagavantaṃyeva paṭibhātu etassa bhāsitassa attho. Bhagavato sutvā bhikkhū dhāressantī’’ti. ‘‘Tena hi, bhikkhave, suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘সচে , ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘তযোমে, আৰুসো, ধম্মা। কতমে তযো? রাগো, দোসো, মোহো – ইমে খো, আৰুসো, তযো ধম্মা; ইমেসং, আৰুসো, তিণ্ণং ধম্মানং কো ৰিসেসো কো অধিপ্পযাসো কিং নানাকরণ’ন্তি? এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ – ‘রাগো খো, আৰুসো, অপ্পসাৰজ্জো দন্ধৰিরাগী, দোসো মহাসাৰজ্জো খিপ্পৰিরাগী, মোহো মহাসাৰজ্জো দন্ধৰিরাগী’’’ তি।
‘‘Sace , bhikkhave, aññatitthiyā paribbājakā evaṃ puccheyyuṃ – ‘tayome, āvuso, dhammā. Katame tayo? Rāgo, doso, moho – ime kho, āvuso, tayo dhammā; imesaṃ, āvuso, tiṇṇaṃ dhammānaṃ ko viseso ko adhippayāso kiṃ nānākaraṇa’nti? Evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘rāgo kho, āvuso, appasāvajjo dandhavirāgī, doso mahāsāvajjo khippavirāgī, moho mahāsāvajjo dandhavirāgī’’’ ti.
‘‘‘কো পনাৰুসো, হেতু কো পচ্চযো যেন অনুপ্পন্নো ৰা রাগো উপ্পজ্জতি উপ্পন্নো ৰা রাগো ভিয্যোভাৰায ৰেপুল্লায সংৰত্ততী’তি? ‘সুভনিমিত্তন্তিস্স ৰচনীযং। তস্স সুভনিমিত্তং অযোনিসো মনসি করোতো অনুপ্পন্নো ৰা রাগো উপ্পজ্জতি উপ্পন্নো ৰা রাগো ভিয্যোভাৰায ৰেপুল্লায সংৰত্ততি। অযং খো, আৰুসো, হেতু অযং পচ্চযো যেন অনুপ্পন্নো ৰা রাগো উপ্পজ্জতি উপ্পন্নো ৰা রাগো ভিয্যোভাৰায ৰেপুল্লায সংৰত্ততী’’’তি।
‘‘‘Ko panāvuso, hetu ko paccayo yena anuppanno vā rāgo uppajjati uppanno vā rāgo bhiyyobhāvāya vepullāya saṃvattatī’ti? ‘Subhanimittantissa vacanīyaṃ. Tassa subhanimittaṃ ayoniso manasi karoto anuppanno vā rāgo uppajjati uppanno vā rāgo bhiyyobhāvāya vepullāya saṃvattati. Ayaṃ kho, āvuso, hetu ayaṃ paccayo yena anuppanno vā rāgo uppajjati uppanno vā rāgo bhiyyobhāvāya vepullāya saṃvattatī’’’ti.
‘‘‘কো পনাৰুসো, হেতু কো পচ্চযো যেন অনুপ্পন্নো ৰা দোসো উপ্পজ্জতি উপ্পন্নো ৰা দোসো ভিয্যোভাৰায ৰেপুল্লায সংৰত্ততী’তি? ‘পটিঘনিমিত্তং তিস্স ৰচনীযং। তস্স পটিঘনিমিত্তং অযোনিসো মনসি করোতো অনুপ্পন্নো ৰা দোসো উপ্পজ্জতি উপ্পন্নো ৰা দোসো ভিয্যোভাৰায ৰেপুল্লায সংৰত্ততি। অযং খো, আৰুসো, হেতু অযং পচ্চযো যেন অনুপ্পন্নো ৰা দোসো উপ্পজ্জতি উপ্পন্নো ৰা দোসো ভিয্যোভাৰায ৰেপুল্লায সংৰত্ততী’’’তি।
‘‘‘Ko panāvuso, hetu ko paccayo yena anuppanno vā doso uppajjati uppanno vā doso bhiyyobhāvāya vepullāya saṃvattatī’ti? ‘Paṭighanimittaṃ tissa vacanīyaṃ. Tassa paṭighanimittaṃ ayoniso manasi karoto anuppanno vā doso uppajjati uppanno vā doso bhiyyobhāvāya vepullāya saṃvattati. Ayaṃ kho, āvuso, hetu ayaṃ paccayo yena anuppanno vā doso uppajjati uppanno vā doso bhiyyobhāvāya vepullāya saṃvattatī’’’ti.
‘‘‘কো পনাৰুসো, হেতু কো পচ্চযো যেন অনুপ্পন্নো ৰা মোহো উপ্পজ্জতি উপ্পন্নো ৰা মোহো ভিয্যোভাৰায ৰেপুল্লায সংৰত্ততী’তি? ‘অযোনিসো মনসিকারো তিস্স ৰচনীযং। তস্স অযোনিসো মনসি করোতো অনুপ্পন্নো ৰা মোহো উপ্পজ্জতি উপ্পন্নো ৰা মোহো ভিয্যোভাৰায ৰেপুল্লায সংৰত্ততি। অযং খো, আৰুসো, হেতু অযং পচ্চযো যেন অনুপ্পন্নো ৰা মোহো উপ্পজ্জতি উপ্পন্নো ৰা মোহো ভিয্যোভাৰায ৰেপুল্লায সংৰত্ততী’’’তি।
‘‘‘Ko panāvuso, hetu ko paccayo yena anuppanno vā moho uppajjati uppanno vā moho bhiyyobhāvāya vepullāya saṃvattatī’ti? ‘Ayoniso manasikāro tissa vacanīyaṃ. Tassa ayoniso manasi karoto anuppanno vā moho uppajjati uppanno vā moho bhiyyobhāvāya vepullāya saṃvattati. Ayaṃ kho, āvuso, hetu ayaṃ paccayo yena anuppanno vā moho uppajjati uppanno vā moho bhiyyobhāvāya vepullāya saṃvattatī’’’ti.
‘‘‘কো পনাৰুসো, হেতু কো পচ্চযো যেন অনুপ্পন্নো চেৰ রাগো নুপ্পজ্জতি উপ্পন্নো চ রাগো পহীযতী’তি? ‘অসুভনিমিত্তন্তিস্স ৰচনীযং। তস্স অসুভনিমিত্তং যোনিসো মনসি করোতো অনুপ্পন্নো চেৰ রাগো নুপ্পজ্জতি উপ্পন্নো চ রাগো পহীযতি। অযং খো, আৰুসো , হেতু অযং পচ্চযো যেন অনুপ্পন্নো চেৰ রাগো নুপ্পজ্জতি উপ্পন্নো চ রাগো পহীযতী’’’তি।
‘‘‘Ko panāvuso, hetu ko paccayo yena anuppanno ceva rāgo nuppajjati uppanno ca rāgo pahīyatī’ti? ‘Asubhanimittantissa vacanīyaṃ. Tassa asubhanimittaṃ yoniso manasi karoto anuppanno ceva rāgo nuppajjati uppanno ca rāgo pahīyati. Ayaṃ kho, āvuso , hetu ayaṃ paccayo yena anuppanno ceva rāgo nuppajjati uppanno ca rāgo pahīyatī’’’ti.
‘‘‘কো পনাৰুসো, হেতু কো পচ্চযো যেন অনুপ্পন্নো চেৰ দোসো নুপ্পজ্জতি উপ্পন্নো চ দোসো পহীযতী’তি? ‘মেত্তা চেতোৰিমুত্তী তিস্স ৰচনীযং। তস্স মেত্তং চেতোৰিমুত্তিং যোনিসো মনসি করোতো অনুপ্পন্নো চেৰ দোসো নুপ্পজ্জতি উপ্পন্নো চ দোসো পহীযতি। অযং খো, আৰুসো, হেতু অযং পচ্চযো যেন অনুপ্পন্নো চেৰ দোসো নুপ্পজ্জতি উপ্পন্নো চ দোসো পহীযতী’’’তি।
‘‘‘Ko panāvuso, hetu ko paccayo yena anuppanno ceva doso nuppajjati uppanno ca doso pahīyatī’ti? ‘Mettā cetovimuttī tissa vacanīyaṃ. Tassa mettaṃ cetovimuttiṃ yoniso manasi karoto anuppanno ceva doso nuppajjati uppanno ca doso pahīyati. Ayaṃ kho, āvuso, hetu ayaṃ paccayo yena anuppanno ceva doso nuppajjati uppanno ca doso pahīyatī’’’ti.
‘‘‘কো পনাৰুসো, হেতু কো পচ্চযো যেন অনুপ্পন্নো চেৰ মোহো নুপ্পজ্জতি উপ্পন্নো চ মোহো পহীযতী’তি? ‘যোনিসোমনসিকারো তিস্স ৰচনীযং। তস্স যোনিসো মনসি করোতো অনুপ্পন্নো চেৰ মোহো নুপ্পজ্জতি উপ্পন্নো চ মোহো পহীযতি। অযং খো, আৰুসো, হেতু অযং পচ্চযো যেন অনুপ্পন্নো ৰা মোহো নুপ্পজ্জতি উপ্পন্নো চ মোহো পহীযতী’’’তি। অট্ঠমং।
‘‘‘Ko panāvuso, hetu ko paccayo yena anuppanno ceva moho nuppajjati uppanno ca moho pahīyatī’ti? ‘Yonisomanasikāro tissa vacanīyaṃ. Tassa yoniso manasi karoto anuppanno ceva moho nuppajjati uppanno ca moho pahīyati. Ayaṃ kho, āvuso, hetu ayaṃ paccayo yena anuppanno vā moho nuppajjati uppanno ca moho pahīyatī’’’ti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. অঞ্ঞতিত্থিযসুত্তৰণ্ণনা • 8. Aññatitthiyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮. অঞ্ঞতিত্থিযসুত্তৰণ্ণনা • 8. Aññatitthiyasuttavaṇṇanā
