| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. அஞ்ஞதித்தி²யஸுத்தவண்ணனா
4. Aññatitthiyasuttavaṇṇanā
24. சதுத்தே² பாவிஸீதி பவிட்டோ². ஸோ ச ந தாவ பவிட்டோ², ‘‘பவிஸிஸ்ஸாமீ’’தி நிக்க²ந்தத்தா பன ஏவங் வுத்தோ. யதா² கிங்? யதா² ‘‘கா³மங் க³மிஸ்ஸாமீ’’தி நிக்க²ந்தபுரிஸோ தங் கா³மங் அப்பத்தோபி ‘‘கஹங் இத்த²ன்னாமோ’’தி வுத்தே ‘‘கா³மங் க³தோ’’தி வுச்சதி, ஏவங். அதிப்பகோ³தி ததா³ கிர தே²ரஸ்ஸ அதிப்பகோ³யேவ நிக்க²ந்ததி³வஸோ அஹோஸி, அதிப்பகோ³யேவ நிக்க²ந்தபி⁴க்கூ² போ³தி⁴யங்க³ணே சேதியங்க³ணே நிவாஸனபாருபனட்டா²னேதி இமேஸு டா²னேஸு யாவ பி⁴க்கா²சாரவேலா ஹோதி, தாவ பபஞ்சங் கரொந்தி. தே²ரஸ்ஸ பன ‘‘யாவ பி⁴க்கா²சாரவேலா ஹோதி, தாவ பரிப்³பா³ஜகேஹி ஸத்³தி⁴ங் ஏகத்³வேகதா²வாரே கரிஸ்ஸாமீ’’தி சிந்தயதோ யங்னூனாஹந்தி ஏதத³ஹோஸி. பரிப்³பா³ஜகானங் ஆராமோதி ஸோ கிர ஆராமோ த³க்கி²ணத்³வாரஸ்ஸ ச வேளுவனஸ்ஸ ச அந்தரா அஹோஸி. இதா⁴தி இமேஸு சதூஸு வாதே³ஸு. கிங்வாதீ³ கிமக்கா²யீதி கிங் வத³தி கிங் ஆசிக்க²தி, கிங் எத்த² ஸமணஸ்ஸ கோ³தமஸ்ஸ த³ஸ்ஸனந்தி புச்ச²ந்தி. த⁴ம்மஸ்ஸ சானுத⁴ம்மங் ப்³யாகரெய்யாமாதி, போ⁴தா கோ³தமேன யங் வுத்தங் காரணங், தஸ்ஸ அனுகாரணங் கதெ²ய்யாம. ஸஹத⁴ம்மிகோ வாதா³னுபாதோதி பரேஹி வுத்தகாரணேன ஸகாரணோ ஹுத்வா ஸமணஸ்ஸ கோ³தமஸ்ஸ வாதா³னுபாதோ வாத³ப்பவத்தி விஞ்ஞூஹி க³ரஹிதப்³ப³ங் காரணங் கோசி அப்பமத்தகோபி கத²ங் நாக³ச்செ²ய்ய? இத³ங் வுத்தங் ஹோதி – கத²ங் ஸப்³பா³காரேனபி ஸமணஸ்ஸ கோ³தமஸ்ஸ வாதே³ கா³ரய்ஹங் காரணங் ந ப⁴வெய்யாதி?
24. Catutthe pāvisīti paviṭṭho. So ca na tāva paviṭṭho, ‘‘pavisissāmī’’ti nikkhantattā pana evaṃ vutto. Yathā kiṃ? Yathā ‘‘gāmaṃ gamissāmī’’ti nikkhantapuriso taṃ gāmaṃ appattopi ‘‘kahaṃ itthannāmo’’ti vutte ‘‘gāmaṃ gato’’ti vuccati, evaṃ. Atippagoti tadā kira therassa atippagoyeva nikkhantadivaso ahosi, atippagoyeva nikkhantabhikkhū bodhiyaṅgaṇe cetiyaṅgaṇe nivāsanapārupanaṭṭhāneti imesu ṭhānesu yāva bhikkhācāravelā hoti, tāva papañcaṃ karonti. Therassa pana ‘‘yāva bhikkhācāravelā hoti, tāva paribbājakehi saddhiṃ ekadvekathāvāre karissāmī’’ti cintayato yaṃnūnāhanti etadahosi. Paribbājakānaṃ ārāmoti so kira ārāmo dakkhiṇadvārassa ca veḷuvanassa ca antarā ahosi. Idhāti imesu catūsu vādesu. Kiṃvādī kimakkhāyīti kiṃ vadati kiṃ ācikkhati, kiṃ ettha samaṇassa gotamassa dassananti pucchanti. Dhammassa cānudhammaṃ byākareyyāmāti, bhotā gotamena yaṃ vuttaṃ kāraṇaṃ, tassa anukāraṇaṃ katheyyāma. Sahadhammiko vādānupātoti parehi vuttakāraṇena sakāraṇo hutvā samaṇassa gotamassa vādānupāto vādappavatti viññūhi garahitabbaṃ kāraṇaṃ koci appamattakopi kathaṃ nāgaccheyya? Idaṃ vuttaṃ hoti – kathaṃ sabbākārenapi samaṇassa gotamassa vāde gārayhaṃ kāraṇaṃ na bhaveyyāti?
இதி வத³ந்தி ப²ஸ்ஸபச்சயா து³க்க²ந்தி ஏவங் வத³ந்தோதி அத்தோ². தத்ராதி தேஸு சதூஸு வாதே³ஸு. தே வத அஞ்ஞத்ர ப²ஸ்ஸாதி இத³ங் ‘‘தத³பி ப²ஸ்ஸபச்சயா’’தி படிஞ்ஞாய ஸாத⁴கவசனங். யஸ்மா ஹி ந வினா ப²ஸ்ஸேன து³க்க²படிஸங்வேத³னா அத்தி², தஸ்மா ஜானிதப்³ப³மேதங் யதா² ‘‘தத³பி ப²ஸ்ஸபச்சயா’’தி அயமெத்த² அதி⁴ப்பாயோ.
Itivadanti phassapaccayā dukkhanti evaṃ vadantoti attho. Tatrāti tesu catūsu vādesu. Te vata aññatra phassāti idaṃ ‘‘tadapi phassapaccayā’’ti paṭiññāya sādhakavacanaṃ. Yasmā hi na vinā phassena dukkhapaṭisaṃvedanā atthi, tasmā jānitabbametaṃ yathā ‘‘tadapi phassapaccayā’’ti ayamettha adhippāyo.
ஸாது⁴ , ஸாது⁴, ஆனந்தா³தி அயங் ஸாது⁴காரோ ஸாரிபுத்தத்தே²ரஸ்ஸ தி³ன்னோ, ஆனந்த³த்தே²ரேன பன ஸத்³தி⁴ங் ப⁴க³வா ஆமந்தேஸி. ஏகமிதா³ஹந்தி எத்த² இதா⁴தி நிபாதமத்தங், ஏகங் ஸமயந்தி அத்தோ². இத³ங் வசனங் ‘‘ந கேவலங் ஸாரிபுத்தோவ ராஜக³ஹங் பவிட்டோ², அஹம்பி பாவிஸிங். ந கேவலஞ்ச தஸ்ஸேவாயங் விதக்கோ உப்பன்னோ, மய்ஹம்பி உப்பஜ்ஜி. ந கேவலஞ்ச தஸ்ஸேவ ஸா தித்தி²யேஹி ஸத்³தி⁴ங் கதா² ஜாதா, மய்ஹம்பி ஜாதபுப்³பா³’’தி த³ஸ்ஸனத்த²ங் வுத்தங்.
Sādhu, sādhu, ānandāti ayaṃ sādhukāro sāriputtattherassa dinno, ānandattherena pana saddhiṃ bhagavā āmantesi. Ekamidāhanti ettha idhāti nipātamattaṃ, ekaṃ samayanti attho. Idaṃ vacanaṃ ‘‘na kevalaṃ sāriputtova rājagahaṃ paviṭṭho, ahampi pāvisiṃ. Na kevalañca tassevāyaṃ vitakko uppanno, mayhampi uppajji. Na kevalañca tasseva sā titthiyehi saddhiṃ kathā jātā, mayhampi jātapubbā’’ti dassanatthaṃ vuttaṃ.
அச்ச²ரியங் அப்³பு⁴தந்தி உப⁴யம்பேதங் விம்ஹயதீ³பனமேவ. வசனத்தோ² பனெத்த² அச்ச²ரங் பஹரிதுங் யுத்தந்தி அச்ச²ரியங். அபூ⁴தபுப்³ப³ங் பூ⁴தந்தி அப்³பு⁴தங். ஏகேன பதே³னாதி ‘‘ப²ஸ்ஸபச்சயா து³க்க²’’ந்தி இமினா ஏகேன பதே³ன. ஏதேன ஹி ஸப்³ப³வாதா³னங் படிக்கே²பத்தோ² வுத்தோ. ஏஸேவத்தோ²தி ஏஸோயேவ ப²ஸ்ஸபச்சயா து³க்க²ந்தி படிச்சஸமுப்பாத³த்தோ². தஞ்ஞேவெத்த² படிபா⁴தூதி தஞ்ஞேவெத்த² உபட்டா²து. இதா³னி தே²ரோ ஜராமரணாதி³காய படிச்சஸமுப்பாத³கதா²ய தங் அத்த²க³ம்பீ⁴ரஞ்சேவ க³ம்பீ⁴ராவபா⁴ஸஞ்ச கரொந்தோ ஸசே மங், ப⁴ந்தேதிஆதி³ங் வத்வா யங்மூலகா கதா² உப்பன்னா, ததே³வ பத³ங் க³ஹெத்வா விவட்டங் த³ஸ்ஸெந்தோ ச²ன்னங்த்வேவாதிஆதி³மாஹ. ஸேஸங் உத்தானமேவாதி. சதுத்த²ங்.
Acchariyaṃabbhutanti ubhayampetaṃ vimhayadīpanameva. Vacanattho panettha accharaṃ paharituṃ yuttanti acchariyaṃ. Abhūtapubbaṃ bhūtanti abbhutaṃ. Ekena padenāti ‘‘phassapaccayā dukkha’’nti iminā ekena padena. Etena hi sabbavādānaṃ paṭikkhepattho vutto. Esevatthoti esoyeva phassapaccayā dukkhanti paṭiccasamuppādattho. Taññevettha paṭibhātūti taññevettha upaṭṭhātu. Idāni thero jarāmaraṇādikāya paṭiccasamuppādakathāya taṃ atthagambhīrañceva gambhīrāvabhāsañca karonto sace maṃ, bhantetiādiṃ vatvā yaṃmūlakā kathā uppannā, tadeva padaṃ gahetvā vivaṭṭaṃ dassento channaṃtvevātiādimāha. Sesaṃ uttānamevāti. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அஞ்ஞதித்தி²யஸுத்தங் • 4. Aññatitthiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. அஞ்ஞதித்தி²யஸுத்தவண்ணனா • 4. Aññatitthiyasuttavaṇṇanā
