| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. அஞ்ஞதித்தி²யஸுத்தவண்ணனா
8. Aññatitthiyasuttavaṇṇanā
69. அட்ட²மே ப⁴க³வா மூலங் காரணங் ஏதேஸங் யாதா²வதோ அதி⁴க³மாயாதி ப⁴க³வங்மூலகா. தேனாஹ ‘‘ப⁴க³வந்தஞ்ஹி நிஸ்ஸாய மயங் இமே த⁴ம்மே ஆஜானாம படிவிஜ்ஜா²மா’’தி. அம்ஹாகங் த⁴ம்மாதி தேஹி அத்தனா அதி⁴க³ந்தப்³ப³தாய வுத்தங். ஸேவிதப்³பா³ஸேவிதப்³பா³னஞ்ஹி யாதா²வதோ அதி⁴க³மஞ்ஞாணானி அதி⁴க³ச்ச²னகஸம்ப³ந்தீ⁴னி, தானி ச ஸம்மாஸம்பு³த்³த⁴மூலகானி அனஞ்ஞவிஸயத்தா. தேனாஹ ‘‘புப்³பே³ கஸ்ஸபஸம்மாஸம்பு³த்³தே⁴னா’’திஆதி³. இமே த⁴ம்மாதி இமே ஞாணத⁴ம்மா. ஆஜானாமாதி அபி⁴முக²ங் பச்சக்க²தோ ஜானாம. படிவிஜ்ஜா²மாதி தஸ்ஸேவ வேவசனங், அதி⁴க³ச்சா²மாதி அத்தோ². ப⁴க³வா நேதா ஏதேஸந்தி ப⁴க³வங்னெத்திகா. நேதாதி ஸேவிதப்³ப³த⁴ம்மே வேனெய்யஸந்தானங் பாபேதா. வினேதாதி அஸேவிதப்³ப³த⁴ம்மே வேனெய்யஸந்தானதோ அபனேதா. தத³ங்க³வினயாதி³வஸேன வா வினேதா. அத² வா யதா² அலமரியஞாணத³ஸ்ஸனவிஸேஸோ ஹோதி, ஏவங் விஸேஸதோ நேதா. அனுனேதாதி ‘‘இமே த⁴ம்மா ஸேவிதப்³பா³, இமே ந ஸேவிதப்³பா³’’தி உப⁴யஸம்பாபனாபனயனத்த²ங் பஞ்ஞாபேதா. தேனாஹ ‘‘யதா²ஸபா⁴வதோ’’திஆதி³.
69. Aṭṭhame bhagavā mūlaṃ kāraṇaṃ etesaṃ yāthāvato adhigamāyāti bhagavaṃmūlakā. Tenāha ‘‘bhagavantañhi nissāya mayaṃ ime dhamme ājānāma paṭivijjhāmā’’ti. Amhākaṃ dhammāti tehi attanā adhigantabbatāya vuttaṃ. Sevitabbāsevitabbānañhi yāthāvato adhigamaññāṇāni adhigacchanakasambandhīni, tāni ca sammāsambuddhamūlakāni anaññavisayattā. Tenāha ‘‘pubbe kassapasammāsambuddhenā’’tiādi. Ime dhammāti ime ñāṇadhammā. Ājānāmāti abhimukhaṃ paccakkhato jānāma. Paṭivijjhāmāti tasseva vevacanaṃ, adhigacchāmāti attho. Bhagavā netā etesanti bhagavaṃnettikā. Netāti sevitabbadhamme veneyyasantānaṃ pāpetā. Vinetāti asevitabbadhamme veneyyasantānato apanetā. Tadaṅgavinayādivasena vā vinetā. Atha vā yathā alamariyañāṇadassanaviseso hoti, evaṃ visesato netā. Anunetāti ‘‘ime dhammā sevitabbā, ime na sevitabbā’’ti ubhayasampāpanāpanayanatthaṃ paññāpetā. Tenāha ‘‘yathāsabhāvato’’tiādi.
படிஸரந்தி எத்தா²தி படிஸரணங், ப⁴க³வா படிஸரணங் ஏதேஸந்தி ப⁴க³வங்படிஸரணா. ஆபாத²ங் உபக³ச்ச²ந்தா ஹி ப⁴க³வா படிஸரணங் ஸமோஸரணட்டா²னங். தேனாஹ ‘‘சதுபூ⁴மகத⁴ம்மா’’திஆதி³. படிஸரதி ஸபா⁴வஸம்படிவேத⁴வஸேன பச்சேகங் உபக³ச்ச²தீதி வா படிஸரணங், ப⁴க³வா படிஸரணங் ஏதேஸந்தி ப⁴க³வங்படிஸரணா. படிஸரதி படிவிஜ்ஜ²தீதி வா படிஸரணங், தஸ்மா படிவிஜ்ஜ²னவஸேன ப⁴க³வா படிஸரணங் ஏதேஸந்தி ப⁴க³வங்படிஸரணா. தேனாஹ ‘‘அபிசா’’திஆதி³. படிவேத⁴வஸேனாதி படிவிஜ்ஜி²தப்³ப³தாவஸேன. அஸதிபி முகே² அத்த²தோ ஏவங் வத³ந்தோ விய ஹோதீதி ஆஹ ‘‘ப²ஸ்ஸோ ஆக³ச்ச²தி அஹங் ப⁴க³வா கின்னாமோ’’தி. ப²ஸ்ஸோ ஞாணஸ்ஸ ஆபாத²ங் ஆக³ச்ச²ந்தோயேவ ஹி அத்தனோ ‘‘அஹங் கின்னாமோ’’தி நாமங் புச்ச²ந்தோ விய, ப⁴க³வா சஸ்ஸ நாமங் கரொந்தோ விய ஹோதி.
Paṭisaranti etthāti paṭisaraṇaṃ, bhagavā paṭisaraṇaṃ etesanti bhagavaṃpaṭisaraṇā. Āpāthaṃ upagacchantā hi bhagavā paṭisaraṇaṃ samosaraṇaṭṭhānaṃ. Tenāha ‘‘catubhūmakadhammā’’tiādi. Paṭisarati sabhāvasampaṭivedhavasena paccekaṃ upagacchatīti vā paṭisaraṇaṃ, bhagavā paṭisaraṇaṃ etesanti bhagavaṃpaṭisaraṇā. Paṭisarati paṭivijjhatīti vā paṭisaraṇaṃ, tasmā paṭivijjhanavasena bhagavā paṭisaraṇaṃ etesanti bhagavaṃpaṭisaraṇā. Tenāha ‘‘apicā’’tiādi. Paṭivedhavasenāti paṭivijjhitabbatāvasena. Asatipi mukhe atthato evaṃ vadanto viya hotīti āha ‘‘phasso āgacchati ahaṃ bhagavā kinnāmo’’ti. Phasso ñāṇassa āpāthaṃ āgacchantoyeva hi attano ‘‘ahaṃ kinnāmo’’ti nāmaṃ pucchanto viya, bhagavā cassa nāmaṃ karonto viya hoti.
படிபா⁴தூதி எத்த² படிஸத்³தா³பெக்கா²ய ‘‘ப⁴க³வந்த’’ந்தி உபயோக³வசனங், அத்தோ² பன ஸாமிவசனவஸேனேவ வேதி³தப்³போ³தி த³ஸ்ஸெந்தோ ஆஹ ‘‘ப⁴க³வதோ’’தி. படிபா⁴தூதி ச பா⁴கோ³ ஹோது. ப⁴க³வதோ ஹி ஏஸ பா⁴கோ³, யதி³த³ங் த⁴ம்மஸ்ஸ தே³ஸனா, அம்ஹாகங் பன பா⁴கோ³ ஸவனந்தி அதி⁴ப்பாயோ. ஏவஞ்ஹி ஸத்³த³லக்க²ணேன ஸமேதி. கேசி பன படிபா⁴தூதி பத³ஸ்ஸ தி³ஸ்ஸதூதி அத்த²ங் வத³ந்தி, ஞாணேன தி³ஸ்ஸது, தே³ஸீயதூதி வா அத்தோ². உபட்டா²தூதி ஞாணஸ்ஸ பச்சுபதிட்ட²து. பாளியங் கோ அதி⁴ப்பயாஸோதி எத்த² கோ அதி⁴கப்பயோகோ³தி அத்தோ².
Paṭibhātūti ettha paṭisaddāpekkhāya ‘‘bhagavanta’’nti upayogavacanaṃ, attho pana sāmivacanavaseneva veditabboti dassento āha ‘‘bhagavato’’ti. Paṭibhātūti ca bhāgo hotu. Bhagavato hi esa bhāgo, yadidaṃ dhammassa desanā, amhākaṃ pana bhāgo savananti adhippāyo. Evañhi saddalakkhaṇena sameti. Keci pana paṭibhātūti padassa dissatūti atthaṃ vadanti, ñāṇena dissatu, desīyatūti vā attho. Upaṭṭhātūti ñāṇassa paccupatiṭṭhatu. Pāḷiyaṃ ko adhippayāsoti ettha ko adhikappayogoti attho.
லோகவஜ்ஜவஸேனாதி லோகியஜனேஹி பகதியா க³ரஹிதப்³ப³வஜ்ஜவஸேன. விபாகவஜ்ஜவஸேனாதி விபாகஸ்ஸ அபாயஸங்வத்தனிகவஜ்ஜவஸேன. கத²ந்திஆதி³னா உப⁴யவஜ்ஜவஸேனபி அப்பஸாவஜ்ஜதாய விஸயங் த³ஸ்ஸேதி. ஸேஸமெத்த² ஸுவிஞ்ஞெய்யமேவ.
Lokavajjavasenāti lokiyajanehi pakatiyā garahitabbavajjavasena. Vipākavajjavasenāti vipākassa apāyasaṃvattanikavajjavasena. Kathantiādinā ubhayavajjavasenapi appasāvajjatāya visayaṃ dasseti. Sesamettha suviññeyyameva.
அஞ்ஞதித்தி²யஸுத்தவண்ணனா நிட்டி²தா.
Aññatitthiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. அஞ்ஞதித்தி²யஸுத்தங் • 8. Aññatitthiyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. அஞ்ஞதித்தி²யஸுத்தவண்ணனா • 8. Aññatitthiyasuttavaṇṇanā
