| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
8. ан̃н̃ад̇ид̇т̇ияасуд̇д̇аван̣н̣анаа
8. Aññatitthiyasuttavaṇṇanā
69. адтамз бхаг̇авам̣муулагаад̇и бхаг̇аваа муулам̣ зд̇зсанд̇и бхаг̇авам̣муулагаа. ид̣̇ам̣ вуд̇д̇ам̣ ход̇и – имз, бханд̇з, амхаагам̣ д̇хаммаа буб̣б̣з гассабасаммаасамб̣уд̣̇д̇хзна уббаад̣̇ид̇аа, д̇асмим̣ бариниб̣б̣уд̇з згам̣ б̣уд̣̇д̇ханд̇арам̣ ан̃н̃о саман̣о ваа б̣раахман̣о ваа имз д̇хаммз уббаад̣̇зд̇ум̣ самад̇т̇о наама наахоси, бхаг̇авад̇о бана но имз д̇хаммаа уббаад̣̇ид̇аа. бхаг̇аванд̇ан̃хи ниссааяа маяам̣ имз д̇хаммз ааж̇аанаама бадивиж̇жхаамаад̇и звам̣ бхаг̇авам̣муулагаа но, бханд̇з, д̇хаммаад̇и. бхаг̇авам̣нзд̇д̇игаад̇и бхаг̇аваа д̇хаммаанам̣ нзд̇аа винзд̇аа анунзд̇аа яат̇аасабхаавад̇о баадиязггам̣ баадиязггам̣ наамам̣ г̇ахзд̇ваава д̣̇ассзд̇аад̇и д̇хаммаа бхаг̇авам̣нзд̇д̇игаа наама хонд̇и. бхаг̇авам̣бадисаран̣аад̇и жад̇убхуумагад̇хаммаа саб̣б̣ан̃н̃уд̇ан̃н̃аан̣асса аабаат̇ам̣ ааг̇ажчамаанаа бхаг̇авад̇и бадисаранд̇и наамаад̇и бхаг̇авам̣бадисаран̣аа. бадисаранд̇ийд̇и осаранд̇и самосаранд̇и. абижа махааб̣од̇химан̣д̣з нисиннасса бхаг̇авад̇о бадивзд̇хавасзна пассо ааг̇ажчад̇и – ‘‘ахам̣ бхаг̇аваа гиннаамо’’д̇и. д̇вам̣ пусанадтзна пассо наама. взд̣̇анаа, сан̃н̃аа, сан̇каараа, вин̃н̃аан̣ам̣ ааг̇ажчад̇и – ‘‘ахам̣ бхаг̇аваа гиннаама’’нд̇и. д̇вам̣ виж̇аананадтзна вин̃н̃аан̣ам̣ наамаад̇и. звам̣ жад̇убхуумагад̇хаммаанам̣ яат̇аасабхаавад̇о баадиязггам̣ баадиязггам̣ наамам̣ г̇ан̣ханд̇о бхаг̇аваа д̇хаммз бадисарад̇ийд̇и бхаг̇авам̣бадисаран̣аа. бхаг̇аванд̇ам̣язва бадибхаад̇ууд̇и бхаг̇авад̇ова зд̇асса бхаасид̇асса ад̇т̇о убадтаад̇у, д̇умхзязва но гат̇зд̇ваа д̣̇зт̇аад̇и ад̇т̇о.
69. Aṭṭhame bhagavaṃmūlakāti bhagavā mūlaṃ etesanti bhagavaṃmūlakā. Idaṃ vuttaṃ hoti – ime, bhante, amhākaṃ dhammā pubbe kassapasammāsambuddhena uppāditā, tasmiṃ parinibbute ekaṃ buddhantaraṃ añño samaṇo vā brāhmaṇo vā ime dhamme uppādetuṃ samattho nāma nāhosi, bhagavato pana no ime dhammā uppāditā. Bhagavantañhi nissāya mayaṃ ime dhamme ājānāma paṭivijjhāmāti evaṃ bhagavaṃmūlakā no, bhante, dhammāti. Bhagavaṃnettikāti bhagavā dhammānaṃ netā vinetā anunetā yathāsabhāvato pāṭiyekkaṃ pāṭiyekkaṃ nāmaṃ gahetvāva dassetāti dhammā bhagavaṃnettikā nāma honti. Bhagavaṃpaṭisaraṇāti catubhūmakadhammā sabbaññutaññāṇassa āpāthaṃ āgacchamānā bhagavati paṭisaranti nāmāti bhagavaṃpaṭisaraṇā. Paṭisarantīti osaranti samosaranti. Apica mahābodhimaṇḍe nisinnassa bhagavato paṭivedhavasena phasso āgacchati – ‘‘ahaṃ bhagavā kinnāmo’’ti. Tvaṃ phusanaṭṭhena phasso nāma. Vedanā, saññā, saṅkhārā, viññāṇaṃ āgacchati – ‘‘ahaṃ bhagavā kinnāma’’nti. Tvaṃ vijānanaṭṭhena viññāṇaṃ nāmāti. Evaṃ catubhūmakadhammānaṃ yathāsabhāvato pāṭiyekkaṃ pāṭiyekkaṃ nāmaṃ gaṇhanto bhagavā dhamme paṭisaratīti bhagavaṃpaṭisaraṇā. Bhagavantaṃyeva paṭibhātūti bhagavatova etassa bhāsitassa attho upaṭṭhātu, tumheyeva no kathetvā dethāti attho.
рааг̇о код̇и раж̇ж̇анавасзна бавад̇д̇арааг̇о. аббасааваж̇ж̇од̇и логаваж̇ж̇авасзнаби вибаагаваж̇ж̇авасзнабийд̇и д̣̇вийхиби важ̇ж̇зхи аббасааваж̇ж̇о, аббад̣̇осод̇и ад̇т̇о. гат̇ам̣? маад̇аабид̇аро хи бхаад̇ибхаг̇иниаад̣̇аяо жа буд̇д̇абхаад̇игаанам̣ ааваахавиваахаман̇г̇алам̣ наама гаарзнд̇и. звам̣ д̇аавзсо логаваж̇ж̇авасзна аббасааваж̇ж̇о. сад̣̇аарасанд̇осамуулигаа бана абааяз бадисанд̇хи наама на ход̇ийд̇и звам̣ вибаагаваж̇ж̇авасзна аббасааваж̇ж̇о. д̣̇анд̇хавирааг̇ийд̇и вираж̇ж̇амаано банзса сан̣игам̣ вираж̇ж̇ад̇и, на сийгхам̣ мужжад̇и. д̇зламасирааг̇о вияа жирам̣ ануб̣анд̇хад̇и, д̣̇вз д̇ийн̣и бхаванд̇араани г̇анд̇вааби наабаг̇ажчад̇ийд̇и д̣̇анд̇хавирааг̇ий.
Rāgokhoti rajjanavasena pavattarāgo. Appasāvajjoti lokavajjavasenapi vipākavajjavasenapīti dvīhipi vajjehi appasāvajjo, appadosoti attho. Kathaṃ? Mātāpitaro hi bhātibhaginiādayo ca puttabhātikānaṃ āvāhavivāhamaṅgalaṃ nāma kārenti. Evaṃ tāveso lokavajjavasena appasāvajjo. Sadārasantosamūlikā pana apāye paṭisandhi nāma na hotīti evaṃ vipākavajjavasena appasāvajjo. Dandhavirāgīti virajjamāno panesa saṇikaṃ virajjati, na sīghaṃ muccati. Telamasirāgo viya ciraṃ anubandhati, dve tīṇi bhavantarāni gantvāpi nāpagacchatīti dandhavirāgī.
д̇ад̇рид̣̇ам̣ вад̇т̇у – зго гира бурисо бхаад̇у ж̇ааяааяа мижчаажаарам̣ жарад̇и. д̇ассааби ид̇т̇ияаа ад̇д̇ано саамигад̇о соязва бияад̇аро ахоси. саа д̇амааха – ‘‘имасмим̣ гааран̣з баагадз ж̇аад̇з махад̇ий г̇арахаа бхависсад̇и, д̇ава бхаад̇игам̣ гхаад̇зхий’’д̇и. со ‘‘насса, васали, маа звам̣ буна аважаа’’д̇и абасаад̣̇зси. саа д̇ун̣хий худ̇ваа гад̇ибаахажжаязна буна гат̇зси, д̇асса жид̇д̇ам̣ д̣̇важ̇жхабхаавам̣ аг̇амааси. д̇ад̇о д̇ад̇ияаваарам̣ гат̇ид̇о ‘‘гинд̇и гад̇ваа огаасам̣ лабхиссаамий’’д̇и ааха. ат̇асса саа убааяам̣ гат̇знд̇ий ‘‘д̇вам̣ маяаа вуд̇д̇амзва гарохи, асугадтаанз махаагагуд̇хасамийбз д̇ид̇т̇ам̣ ад̇т̇и, д̇ад̇т̇а д̇икин̣ам̣ д̣̇ан̣д̣агаваасим̣ г̇ахзд̇ваа д̇идтаахий’’д̇и. со д̇ат̇аа агааси. ж̇здтабхаад̇аабисса аран̃н̃з гаммам̣ гад̇ваа гхарам̣ ааг̇ад̇о. саа д̇асмим̣ муд̣̇ужид̇д̇аа вияа худ̇ваа ‘‘зхи саами , сийсз д̇з оликиссаамий’’д̇и оликанд̇ий ‘‘убаггилидтам̣ д̇з сийса’’нд̇и аамалагабин̣д̣ам̣ д̣̇ад̇ваа ‘‘г̇ажча асугадтаанз сийсам̣ д̇ховид̇ваа ааг̇ажчаахий’’д̇и бзсзси. со д̇ааяа вуд̇д̇ад̇ид̇т̇амзва г̇анд̇ваа аамалагагаггзна сийсам̣ магкзд̇ваа уд̣̇агам̣ оруяха онамид̇ваа сийсам̣ д̇хови. ат̇а нам̣ ид̇аро ругканд̇арад̇о нигкамид̇ваа канд̇хадтигз бахарид̇ваа ж̇ийвид̇аа воробзд̇ваа г̇зхам̣ аг̇амааси.
Tatridaṃ vatthu – eko kira puriso bhātu jāyāya micchācāraṃ carati. Tassāpi itthiyā attano sāmikato soyeva piyataro ahosi. Sā tamāha – ‘‘imasmiṃ kāraṇe pākaṭe jāte mahatī garahā bhavissati, tava bhātikaṃ ghātehī’’ti. So ‘‘nassa, vasali, mā evaṃ puna avacā’’ti apasādesi. Sā tuṇhī hutvā katipāhaccayena puna kathesi, tassa cittaṃ dvajjhabhāvaṃ agamāsi. Tato tatiyavāraṃ kathito ‘‘kinti katvā okāsaṃ labhissāmī’’ti āha. Athassa sā upāyaṃ kathentī ‘‘tvaṃ mayā vuttameva karohi, asukaṭṭhāne mahākakudhasamīpe titthaṃ atthi, tattha tikhiṇaṃ daṇḍakavāsiṃ gahetvā tiṭṭhāhī’’ti. So tathā akāsi. Jeṭṭhabhātāpissa araññe kammaṃ katvā gharaṃ āgato. Sā tasmiṃ muducittā viya hutvā ‘‘ehi sāmi , sīse te olikhissāmī’’ti olikhantī ‘‘upakkiliṭṭhaṃ te sīsa’’nti āmalakapiṇḍaṃ datvā ‘‘gaccha asukaṭṭhāne sīsaṃ dhovitvā āgacchāhī’’ti pesesi. So tāya vuttatitthameva gantvā āmalakakakkena sīsaṃ makkhetvā udakaṃ oruyha onamitvā sīsaṃ dhovi. Atha naṃ itaro rukkhantarato nikkhamitvā khandhaṭṭhike paharitvā jīvitā voropetvā gehaṃ agamāsi.
ид̇аро бхарияааяа синзхам̣ барижжаж̇ид̇умасаггонд̇о д̇асмим̣язва г̇зхз махаад̇хаммани худ̇ваа ниб̣б̣ад̇д̇и. со д̇ассаа тид̇ааяаби нисиннааяаби г̇анд̇ваа сарийрз бад̇ад̇и. ат̇а нам̣ саа ‘‘соязва аяам̣ бхависсад̇ий’’д̇и гхаад̇аабзси. со буна д̇ассаа синзхзна д̇асмим̣язва г̇зхз гуггуро худ̇ваа ниб̣б̣ад̇д̇и. со бад̣̇асаа г̇аманагаалад̇о бадтааяа д̇ассаа бажчад̇о бажчад̇о жарад̇и. аран̃н̃ам̣ г̇ажчанд̇ияааби сад̣̇д̇хим̣язва г̇ажчад̇и. д̇ам̣ д̣̇исваа мануссаа ‘‘нигканд̇о сунакалуд̣̇д̣̇аго, гад̇арадтаанам̣ г̇амиссад̇ий’’д̇и уббан̣д̣знд̇и. саа буна д̇ам̣ гхаад̇аабзси.
Itaro bhariyāya sinehaṃ pariccajitumasakkonto tasmiṃyeva gehe mahādhammani hutvā nibbatti. So tassā ṭhitāyapi nisinnāyapi gantvā sarīre patati. Atha naṃ sā ‘‘soyeva ayaṃ bhavissatī’’ti ghātāpesi. So puna tassā sinehena tasmiṃyeva gehe kukkuro hutvā nibbatti. So padasā gamanakālato paṭṭhāya tassā pacchato pacchato carati. Araññaṃ gacchantiyāpi saddhiṃyeva gacchati. Taṃ disvā manussā ‘‘nikkhanto sunakhaluddako, kataraṭṭhānaṃ gamissatī’’ti uppaṇḍenti. Sā puna taṃ ghātāpesi.
соби буна д̇асмим̣язва г̇зхз важчаго худ̇ваа ниб̣б̣ад̇д̇и. д̇ат̇зва д̇ассаа бажчад̇о бажчад̇о жарад̇и. д̇ад̣̇ааби нам̣ мануссаа д̣̇исваа ‘‘нигканд̇о г̇обаалаго, гад̇т̇а г̇аавияо жариссанд̇ий’’д̇и уббан̣д̣знд̇и. саа д̇асмимби таанз д̇ам̣ гхаад̇аабзси. со д̇ад̣̇ааби д̇ассаа убари синзхам̣ чинд̣̇ид̇ум̣ асаггонд̇о жад̇уд̇т̇з ваарз д̇ассааязва гужчияам̣ ж̇аад̇иссаро худ̇ваа ниб̣б̣ад̇д̇и. со бадибаадияаа жад̇уусу ад̇д̇абхаавзсу д̇ааяа гхаад̇ид̇абхаавам̣ д̣̇исваа ‘‘зваруубааяа наама бажжад̇т̇игааяа гужчисмим̣ ниб̣б̣ад̇д̇осмий’’д̇и д̇ад̇о бадтааяа д̇ассаа хад̇т̇зна ад̇д̇аанам̣ пусид̇ум̣ на д̣̇зд̇и. сажз нам̣ саа пусад̇и, ганд̣̇ад̇и род̣̇ад̇и. ат̇а нам̣ аяяагова бадиж̇аг̇г̇ад̇и. д̇ам̣ абарабхааг̇з вуд̣̇д̇хиббад̇д̇ам̣ аяяаго ааха – ‘‘д̇аад̇а, гасмаа д̇вам̣ маад̇у хад̇т̇зна ад̇д̇аанам̣ пусид̇ум̣ на д̣̇зси. сажзби д̇ам̣ пусад̇и, махаасад̣̇д̣̇зна род̣̇аси ганд̣̇асий’’д̇и. аяяагзна будто ‘‘на зсаа маяхам̣ маад̇аа, бажжаамид̇д̇аа зсаа’’д̇и д̇ам̣ бавад̇д̇им̣ саб̣б̣ам̣ аарожзси. со д̇ам̣ аалин̇г̇ид̇ваа род̣̇ид̇ваа ‘‘зхи, д̇аад̇а, гим̣ амхаагам̣ ийд̣̇исз таанз ниваасагижжа’’нд̇и д̇ам̣ аад̣̇ааяа нигкамид̇ваа згам̣ вихаарам̣ г̇анд̇ваа баб̣б̣аж̇ид̇ваа убхоби д̇ад̇т̇а васанд̇аа арахад̇д̇ам̣ баабун̣им̣су.
Sopi puna tasmiṃyeva gehe vacchako hutvā nibbatti. Tatheva tassā pacchato pacchato carati. Tadāpi naṃ manussā disvā ‘‘nikkhanto gopālako, kattha gāviyo carissantī’’ti uppaṇḍenti. Sā tasmimpi ṭhāne taṃ ghātāpesi. So tadāpi tassā upari sinehaṃ chindituṃ asakkonto catutthe vāre tassāyeva kucchiyaṃ jātissaro hutvā nibbatti. So paṭipāṭiyā catūsu attabhāvesu tāya ghātitabhāvaṃ disvā ‘‘evarūpāya nāma paccatthikāya kucchismiṃ nibbattosmī’’ti tato paṭṭhāya tassā hatthena attānaṃ phusituṃ na deti. Sace naṃ sā phusati, kandati rodati. Atha naṃ ayyakova paṭijaggati. Taṃ aparabhāge vuddhippattaṃ ayyako āha – ‘‘tāta, kasmā tvaṃ mātu hatthena attānaṃ phusituṃ na desi. Sacepi taṃ phusati, mahāsaddena rodasi kandasī’’ti. Ayyakena puṭṭho ‘‘na esā mayhaṃ mātā, paccāmittā esā’’ti taṃ pavattiṃ sabbaṃ ārocesi. So taṃ āliṅgitvā roditvā ‘‘ehi, tāta, kiṃ amhākaṃ īdise ṭhāne nivāsakicca’’nti taṃ ādāya nikkhamitvā ekaṃ vihāraṃ gantvā pabbajitvā ubhopi tattha vasantā arahattaṃ pāpuṇiṃsu.
махаасааваж̇ж̇од̇и логаваж̇ж̇авасзнаби вибаагаваж̇ж̇авасзнабийд̇и д̣̇вийхиби гааран̣зхи махаасааваж̇ж̇о. гат̇ам̣? д̣̇осзна хи д̣̇удто худ̇ваа маад̇ариби абараж̇жхад̇и, бид̇ариби бхаад̇ибхаг̇иниаад̣̇ийсуби баб̣б̣аж̇ид̇зсуби. со г̇ад̇аг̇ад̇адтаанзсу ‘‘аяам̣ буг̇г̇ало маад̇аабид̇уусуби абараж̇жхад̇и, бхаад̇ибхаг̇иниаад̣̇ийсуби, баб̣б̣аж̇ид̇зсубий’’д̇и махад̇им̣ г̇арахам̣ лабхад̇и. звам̣ д̇аава логаваж̇ж̇авасзна махаасааваж̇ж̇о. д̣̇осавасзна бана гад̇зна аананд̇арияагаммзна габбам̣ нираяз бажжад̇и. звам̣ вибаагаваж̇ж̇авасзна махаасааваж̇ж̇о. киббавирааг̇ийд̇и киббам̣ вираж̇ж̇ад̇и. д̣̇осзна хи д̣̇удто маад̇аабид̇уусуби жзд̇иязби б̣од̇химхиби баб̣б̣аж̇ид̇зсуби абараж̇жхид̇ваа ‘‘маяхам̣ камат̇аа’’д̇и. ажжаяам̣ д̣̇зсзд̇и. д̇асса саха камаабанзна д̇ам̣ гаммам̣ баагад̇игамзва ход̇и.
Mahāsāvajjoti lokavajjavasenapi vipākavajjavasenapīti dvīhipi kāraṇehi mahāsāvajjo. Kathaṃ? Dosena hi duṭṭho hutvā mātaripi aparajjhati, pitaripi bhātibhaginiādīsupi pabbajitesupi. So gatagataṭṭhānesu ‘‘ayaṃ puggalo mātāpitūsupi aparajjhati, bhātibhaginiādīsupi, pabbajitesupī’’ti mahatiṃ garahaṃ labhati. Evaṃ tāva lokavajjavasena mahāsāvajjo. Dosavasena pana katena ānantariyakammena kappaṃ niraye paccati. Evaṃ vipākavajjavasena mahāsāvajjo. Khippavirāgīti khippaṃ virajjati. Dosena hi duṭṭho mātāpitūsupi cetiyepi bodhimhipi pabbajitesupi aparajjhitvā ‘‘mayhaṃ khamathā’’ti. Accayaṃ deseti. Tassa saha khamāpanena taṃ kammaṃ pākatikameva hoti.
мохоби д̣̇вийхзва гааран̣зхи махаасааваж̇ж̇о. мохзна хи муул̣хо худ̇ваа маад̇аабид̇уусуби жзд̇иязби б̣од̇химхиби баб̣б̣аж̇ид̇зсуби абараж̇жхид̇ваа г̇ад̇аг̇ад̇адтаанз г̇арахам̣ лабхад̇и. звам̣ д̇аава логаваж̇ж̇авасзна махаасааваж̇ж̇о. мохавасзна бана гад̇зна аананд̇арияагаммзна габбам̣ нираяз бажжад̇и. звам̣ вибаагаваж̇ж̇авасзнаби махаасааваж̇ж̇о. д̣̇анд̇хавирааг̇ийд̇и сан̣игам̣ вираж̇ж̇ад̇и. мохзна муул̣хзна хи гад̇агаммам̣ сан̣игам̣ мужжад̇и. яат̇аа хи ажчажаммам̣ сад̇агкад̇д̇умби д̇ховияамаанам̣ на бан̣д̣арам̣ ход̇и, звамзва мохзна муул̣хзна гад̇агаммам̣ сийгхам̣ на мужжад̇и, сан̣игамзва мужжад̇ийд̇и. сзсамзд̇т̇а уд̇д̇аанамзваад̇и.
Mohopi dvīheva kāraṇehi mahāsāvajjo. Mohena hi mūḷho hutvā mātāpitūsupi cetiyepi bodhimhipi pabbajitesupi aparajjhitvā gatagataṭṭhāne garahaṃ labhati. Evaṃ tāva lokavajjavasena mahāsāvajjo. Mohavasena pana katena ānantariyakammena kappaṃ niraye paccati. Evaṃ vipākavajjavasenapi mahāsāvajjo. Dandhavirāgīti saṇikaṃ virajjati. Mohena mūḷhena hi katakammaṃ saṇikaṃ muccati. Yathā hi acchacammaṃ satakkhattumpi dhoviyamānaṃ na paṇḍaraṃ hoti, evameva mohena mūḷhena katakammaṃ sīghaṃ na muccati, saṇikameva muccatīti. Sesamettha uttānamevāti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 8. ан̃н̃ад̇ид̇т̇ияасуд̇д̇ам̣ • 8. Aññatitthiyasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 8. ан̃н̃ад̇ид̇т̇ияасуд̇д̇аван̣н̣анаа • 8. Aññatitthiyasuttavaṇṇanā
