| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၈. အညတိတ္ထိယသုတ္တဝဏ္ဏနာ
8. Aññatitthiyasuttavaṇṇanā
၆၉. အဋ္ဌမေ ဘဂဝံမူလကာတိ ဘဂဝာ မူလံ ဧတေသန္တိ ဘဂဝံမူလကာ။ ဣဒံ ဝုတ္တံ ဟောတိ – ဣမေ, ဘန္တေ, အမ္ဟာကံ ဓမ္မာ ပုဗ္ဗေ ကသ္သပသမ္မာသမ္ဗုဒ္ဓေန ဥပ္ပာဒိတာ, တသ္မိံ ပရိနိဗ္ဗုတေ ဧကံ ဗုဒ္ဓန္တရံ အညော သမဏော ဝာ ဗ္ရာဟ္မဏော ဝာ ဣမေ ဓမ္မေ ဥပ္ပာဒေတုံ သမတ္ထော နာမ နာဟောသိ, ဘဂဝတော ပန နော ဣမေ ဓမ္မာ ဥပ္ပာဒိတာ။ ဘဂဝန္တဉ္ဟိ နိသ္သာယ မယံ ဣမေ ဓမ္မေ အာဇာနာမ ပဋိဝိဇ္ဈာမာတိ ဧဝံ ဘဂဝံမူလကာ နော, ဘန္တေ, ဓမ္မာတိ။ ဘဂဝံနေတ္တိကာတိ ဘဂဝာ ဓမ္မာနံ နေတာ ဝိနေတာ အနုနေတာ ယထာသဘာဝတော ပာဋိယေက္ကံ ပာဋိယေက္ကံ နာမံ ဂဟေတ္ဝာဝ ဒသ္သေတာတိ ဓမ္မာ ဘဂဝံနေတ္တိကာ နာမ ဟောန္တိ။ ဘဂဝံပဋိသရဏာတိ စတုဘူမကဓမ္မာ သဗ္ဗညုတညာဏသ္သ အာပာထံ အာဂစ္ဆမာနာ ဘဂဝတိ ပဋိသရန္တိ နာမာတိ ဘဂဝံပဋိသရဏာ။ ပဋိသရန္တီတိ ဩသရန္တိ သမောသရန္တိ။ အပိစ မဟာဗောဓိမဏ္ဍေ နိသိန္နသ္သ ဘဂဝတော ပဋိဝေဓဝသေန ဖသ္သော အာဂစ္ဆတိ – ‘‘အဟံ ဘဂဝာ ကိန္နာမော’’တိ။ တ္ဝံ ဖုသနဋ္ဌေန ဖသ္သော နာမ။ ဝေဒနာ, သညာ, သင္ခာရာ, ဝိညာဏံ အာဂစ္ဆတိ – ‘‘အဟံ ဘဂဝာ ကိန္နာမ’’န္တိ။ တ္ဝံ ဝိဇာနနဋ္ဌေန ဝိညာဏံ နာမာတိ။ ဧဝံ စတုဘူမကဓမ္မာနံ ယထာသဘာဝတော ပာဋိယေက္ကံ ပာဋိယေက္ကံ နာမံ ဂဏ္ဟန္တော ဘဂဝာ ဓမ္မေ ပဋိသရတီတိ ဘဂဝံပဋိသရဏာ။ ဘဂဝန္တံယေဝ ပဋိဘာတူတိ ဘဂဝတောဝ ဧတသ္သ ဘာသိတသ္သ အတ္ထော ဥပဋ္ဌာတု, တုမ္ဟေယေဝ နော ကထေတ္ဝာ ဒေထာတိ အတ္ထော။
69. Aṭṭhame bhagavaṃmūlakāti bhagavā mūlaṃ etesanti bhagavaṃmūlakā. Idaṃ vuttaṃ hoti – ime, bhante, amhākaṃ dhammā pubbe kassapasammāsambuddhena uppāditā, tasmiṃ parinibbute ekaṃ buddhantaraṃ añño samaṇo vā brāhmaṇo vā ime dhamme uppādetuṃ samattho nāma nāhosi, bhagavato pana no ime dhammā uppāditā. Bhagavantañhi nissāya mayaṃ ime dhamme ājānāma paṭivijjhāmāti evaṃ bhagavaṃmūlakā no, bhante, dhammāti. Bhagavaṃnettikāti bhagavā dhammānaṃ netā vinetā anunetā yathāsabhāvato pāṭiyekkaṃ pāṭiyekkaṃ nāmaṃ gahetvāva dassetāti dhammā bhagavaṃnettikā nāma honti. Bhagavaṃpaṭisaraṇāti catubhūmakadhammā sabbaññutaññāṇassa āpāthaṃ āgacchamānā bhagavati paṭisaranti nāmāti bhagavaṃpaṭisaraṇā. Paṭisarantīti osaranti samosaranti. Apica mahābodhimaṇḍe nisinnassa bhagavato paṭivedhavasena phasso āgacchati – ‘‘ahaṃ bhagavā kinnāmo’’ti. Tvaṃ phusanaṭṭhena phasso nāma. Vedanā, saññā, saṅkhārā, viññāṇaṃ āgacchati – ‘‘ahaṃ bhagavā kinnāma’’nti. Tvaṃ vijānanaṭṭhena viññāṇaṃ nāmāti. Evaṃ catubhūmakadhammānaṃ yathāsabhāvato pāṭiyekkaṃ pāṭiyekkaṃ nāmaṃ gaṇhanto bhagavā dhamme paṭisaratīti bhagavaṃpaṭisaraṇā. Bhagavantaṃyeva paṭibhātūti bhagavatova etassa bhāsitassa attho upaṭṭhātu, tumheyeva no kathetvā dethāti attho.
ရာဂော ခောတိ ရဇ္ဇနဝသေန ပဝတ္တရာဂော။ အပ္ပသာဝဇ္ဇောတိ လောကဝဇ္ဇဝသေနပိ ဝိပာကဝဇ္ဇဝသေနပီတိ ဒ္ဝီဟိပိ ဝဇ္ဇေဟိ အပ္ပသာဝဇ္ဇော, အပ္ပဒောသောတိ အတ္ထော။ ကထံ? မာတာပိတရော ဟိ ဘာတိဘဂိနိအာဒယော စ ပုတ္တဘာတိကာနံ အာဝာဟဝိဝာဟမင္ဂလံ နာမ ကာရေန္တိ။ ဧဝံ တာဝေသော လောကဝဇ္ဇဝသေန အပ္ပသာဝဇ္ဇော။ သဒာရသန္တောသမူလိကာ ပန အပာယေ ပဋိသန္ဓိ နာမ န ဟောတီတိ ဧဝံ ဝိပာကဝဇ္ဇဝသေန အပ္ပသာဝဇ္ဇော။ ဒန္ဓဝိရာဂီတိ ဝိရဇ္ဇမာနော ပနေသ သဏိကံ ဝိရဇ္ဇတိ, န သီဃံ မုစ္စတိ။ တေလမသိရာဂော ဝိယ စိရံ အနုဗန္ဓတိ, ဒ္ဝေ တီဏိ ဘဝန္တရာနိ ဂန္တ္ဝာပိ နာပဂစ္ဆတီတိ ဒန္ဓဝိရာဂီ။
Rāgokhoti rajjanavasena pavattarāgo. Appasāvajjoti lokavajjavasenapi vipākavajjavasenapīti dvīhipi vajjehi appasāvajjo, appadosoti attho. Kathaṃ? Mātāpitaro hi bhātibhaginiādayo ca puttabhātikānaṃ āvāhavivāhamaṅgalaṃ nāma kārenti. Evaṃ tāveso lokavajjavasena appasāvajjo. Sadārasantosamūlikā pana apāye paṭisandhi nāma na hotīti evaṃ vipākavajjavasena appasāvajjo. Dandhavirāgīti virajjamāno panesa saṇikaṃ virajjati, na sīghaṃ muccati. Telamasirāgo viya ciraṃ anubandhati, dve tīṇi bhavantarāni gantvāpi nāpagacchatīti dandhavirāgī.
တတ္ရိဒံ ဝတ္ထု – ဧကော ကိရ ပုရိသော ဘာတု ဇာယာယ မိစ္ဆာစာရံ စရတိ။ တသ္သာပိ ဣတ္ထိယာ အတ္တနော သာမိကတော သောယေဝ ပိယတရော အဟောသိ။ သာ တမာဟ – ‘‘ဣမသ္မိံ ကာရဏေ ပာကဋေ ဇာတေ မဟတီ ဂရဟာ ဘဝိသ္သတိ, တဝ ဘာတိကံ ဃာတေဟီ’’တိ။ သော ‘‘နသ္သ, ဝသလိ, မာ ဧဝံ ပုန အဝစာ’’တိ အပသာဒေသိ။ သာ တုဏ္ဟီ ဟုတ္ဝာ ကတိပာဟစ္စယေန ပုန ကထေသိ, တသ္သ စိတ္တံ ဒ္ဝဇ္ဈဘာဝံ အဂမာသိ။ တတော တတိယဝာရံ ကထိတော ‘‘ကိန္တိ ကတ္ဝာ ဩကာသံ လဘိသ္သာမီ’’တိ အာဟ။ အထသ္သ သာ ဥပာယံ ကထေန္တီ ‘‘တ္ဝံ မယာ ဝုတ္တမေဝ ကရောဟိ, အသုကဋ္ဌာနေ မဟာကကုဓသမီပေ တိတ္ထံ အတ္ထိ, တတ္ထ တိခိဏံ ဒဏ္ဍကဝာသိံ ဂဟေတ္ဝာ တိဋ္ဌာဟီ’’တိ။ သော တထာ အကာသိ။ ဇေဋ္ဌဘာတာပိသ္သ အရညေ ကမ္မံ ကတ္ဝာ ဃရံ အာဂတော။ သာ တသ္မိံ မုဒုစိတ္တာ ဝိယ ဟုတ္ဝာ ‘‘ဧဟိ သာမိ , သီသေ တေ ဩလိခိသ္သာမီ’’တိ ဩလိခန္တီ ‘‘ဥပက္ကိလိဋ္ဌံ တေ သီသ’’န္တိ အာမလကပိဏ္ဍံ ဒတ္ဝာ ‘‘ဂစ္ဆ အသုကဋ္ဌာနေ သီသံ ဓောဝိတ္ဝာ အာဂစ္ဆာဟီ’’တိ ပေသေသိ။ သော တာယ ဝုတ္တတိတ္ထမေဝ ဂန္တ္ဝာ အာမလကကက္ကေန သီသံ မက္ခေတ္ဝာ ဥဒကံ ဩရုယ္ဟ ဩနမိတ္ဝာ သီသံ ဓောဝိ။ အထ နံ ဣတရော ရုက္ခန္တရတော နိက္ခမိတ္ဝာ ခန္ဓဋ္ဌိကေ ပဟရိတ္ဝာ ဇီဝိတာ ဝောရောပေတ္ဝာ ဂေဟံ အဂမာသိ။
Tatridaṃ vatthu – eko kira puriso bhātu jāyāya micchācāraṃ carati. Tassāpi itthiyā attano sāmikato soyeva piyataro ahosi. Sā tamāha – ‘‘imasmiṃ kāraṇe pākaṭe jāte mahatī garahā bhavissati, tava bhātikaṃ ghātehī’’ti. So ‘‘nassa, vasali, mā evaṃ puna avacā’’ti apasādesi. Sā tuṇhī hutvā katipāhaccayena puna kathesi, tassa cittaṃ dvajjhabhāvaṃ agamāsi. Tato tatiyavāraṃ kathito ‘‘kinti katvā okāsaṃ labhissāmī’’ti āha. Athassa sā upāyaṃ kathentī ‘‘tvaṃ mayā vuttameva karohi, asukaṭṭhāne mahākakudhasamīpe titthaṃ atthi, tattha tikhiṇaṃ daṇḍakavāsiṃ gahetvā tiṭṭhāhī’’ti. So tathā akāsi. Jeṭṭhabhātāpissa araññe kammaṃ katvā gharaṃ āgato. Sā tasmiṃ muducittā viya hutvā ‘‘ehi sāmi , sīse te olikhissāmī’’ti olikhantī ‘‘upakkiliṭṭhaṃ te sīsa’’nti āmalakapiṇḍaṃ datvā ‘‘gaccha asukaṭṭhāne sīsaṃ dhovitvā āgacchāhī’’ti pesesi. So tāya vuttatitthameva gantvā āmalakakakkena sīsaṃ makkhetvā udakaṃ oruyha onamitvā sīsaṃ dhovi. Atha naṃ itaro rukkhantarato nikkhamitvā khandhaṭṭhike paharitvā jīvitā voropetvā gehaṃ agamāsi.
ဣတရော ဘရိယာယ သိနေဟံ ပရိစ္စဇိတုမသက္ကောန္တော တသ္မိံယေဝ ဂေဟေ မဟာဓမ္မနိ ဟုတ္ဝာ နိဗ္ဗတ္တိ။ သော တသ္သာ ဌိတာယပိ နိသိန္နာယပိ ဂန္တ္ဝာ သရီရေ ပတတိ။ အထ နံ သာ ‘‘သောယေဝ အယံ ဘဝိသ္သတီ’’တိ ဃာတာပေသိ။ သော ပုန တသ္သာ သိနေဟေန တသ္မိံယေဝ ဂေဟေ ကုက္ကုရော ဟုတ္ဝာ နိဗ္ဗတ္တိ။ သော ပဒသာ ဂမနကာလတော ပဋ္ဌာယ တသ္သာ ပစ္ဆတော ပစ္ဆတော စရတိ။ အရညံ ဂစ္ဆန္တိယာပိ သဒ္ဓိံယေဝ ဂစ္ဆတိ။ တံ ဒိသ္ဝာ မနုသ္သာ ‘‘နိက္ခန္တော သုနခလုဒ္ဒကော, ကတရဋ္ဌာနံ ဂမိသ္သတီ’’တိ ဥပ္ပဏ္ဍေန္တိ။ သာ ပုန တံ ဃာတာပေသိ။
Itaro bhariyāya sinehaṃ pariccajitumasakkonto tasmiṃyeva gehe mahādhammani hutvā nibbatti. So tassā ṭhitāyapi nisinnāyapi gantvā sarīre patati. Atha naṃ sā ‘‘soyeva ayaṃ bhavissatī’’ti ghātāpesi. So puna tassā sinehena tasmiṃyeva gehe kukkuro hutvā nibbatti. So padasā gamanakālato paṭṭhāya tassā pacchato pacchato carati. Araññaṃ gacchantiyāpi saddhiṃyeva gacchati. Taṃ disvā manussā ‘‘nikkhanto sunakhaluddako, kataraṭṭhānaṃ gamissatī’’ti uppaṇḍenti. Sā puna taṃ ghātāpesi.
သောပိ ပုန တသ္မိံယေဝ ဂေဟေ ဝစ္ဆကော ဟုတ္ဝာ နိဗ္ဗတ္တိ။ တထေဝ တသ္သာ ပစ္ဆတော ပစ္ဆတော စရတိ။ တဒာပိ နံ မနုသ္သာ ဒိသ္ဝာ ‘‘နိက္ခန္တော ဂောပာလကော, ကတ္ထ ဂာဝိယော စရိသ္သန္တီ’’တိ ဥပ္ပဏ္ဍေန္တိ။ သာ တသ္မိမ္ပိ ဌာနေ တံ ဃာတာပေသိ။ သော တဒာပိ တသ္သာ ဥပရိ သိနေဟံ ဆိန္ဒိတုံ အသက္ကောန္တော စတုတ္ထေ ဝာရေ တသ္သာယေဝ ကုစ္ဆိယံ ဇာတိသ္သရော ဟုတ္ဝာ နိဗ္ဗတ္တိ။ သော ပဋိပာဋိယာ စတူသု အတ္တဘာဝေသု တာယ ဃာတိတဘာဝံ ဒိသ္ဝာ ‘‘ဧဝရူပာယ နာမ ပစ္စတ္ထိကာယ ကုစ္ဆိသ္မိံ နိဗ္ဗတ္တောသ္မီ’’တိ တတော ပဋ္ဌာယ တသ္သာ ဟတ္ထေန အတ္တာနံ ဖုသိတုံ န ဒေတိ။ သစေ နံ သာ ဖုသတိ, ကန္ဒတိ ရောဒတိ။ အထ နံ အယ္ယကောဝ ပဋိဇဂ္ဂတိ။ တံ အပရဘာဂေ ဝုဒ္ဓိပ္ပတ္တံ အယ္ယကော အာဟ – ‘‘တာတ, ကသ္မာ တ္ဝံ မာတု ဟတ္ထေန အတ္တာနံ ဖုသိတုံ န ဒေသိ။ သစေပိ တံ ဖုသတိ, မဟာသဒ္ဒေန ရောဒသိ ကန္ဒသီ’’တိ။ အယ္ယကေန ပုဋ္ဌော ‘‘န ဧသာ မယ္ဟံ မာတာ, ပစ္စာမိတ္တာ ဧသာ’’တိ တံ ပဝတ္တိံ သဗ္ဗံ အာရောစေသိ။ သော တံ အာလိင္ဂိတ္ဝာ ရောဒိတ္ဝာ ‘‘ဧဟိ, တာတ, ကိံ အမ္ဟာကံ ဤဒိသေ ဌာနေ နိဝာသကိစ္စ’’န္တိ တံ အာဒာယ နိက္ခမိတ္ဝာ ဧကံ ဝိဟာရံ ဂန္တ္ဝာ ပဗ္ဗဇိတ္ဝာ ဥဘောပိ တတ္ထ ဝသန္တာ အရဟတ္တံ ပာပုဏိံသု။
Sopi puna tasmiṃyeva gehe vacchako hutvā nibbatti. Tatheva tassā pacchato pacchato carati. Tadāpi naṃ manussā disvā ‘‘nikkhanto gopālako, kattha gāviyo carissantī’’ti uppaṇḍenti. Sā tasmimpi ṭhāne taṃ ghātāpesi. So tadāpi tassā upari sinehaṃ chindituṃ asakkonto catutthe vāre tassāyeva kucchiyaṃ jātissaro hutvā nibbatti. So paṭipāṭiyā catūsu attabhāvesu tāya ghātitabhāvaṃ disvā ‘‘evarūpāya nāma paccatthikāya kucchismiṃ nibbattosmī’’ti tato paṭṭhāya tassā hatthena attānaṃ phusituṃ na deti. Sace naṃ sā phusati, kandati rodati. Atha naṃ ayyakova paṭijaggati. Taṃ aparabhāge vuddhippattaṃ ayyako āha – ‘‘tāta, kasmā tvaṃ mātu hatthena attānaṃ phusituṃ na desi. Sacepi taṃ phusati, mahāsaddena rodasi kandasī’’ti. Ayyakena puṭṭho ‘‘na esā mayhaṃ mātā, paccāmittā esā’’ti taṃ pavattiṃ sabbaṃ ārocesi. So taṃ āliṅgitvā roditvā ‘‘ehi, tāta, kiṃ amhākaṃ īdise ṭhāne nivāsakicca’’nti taṃ ādāya nikkhamitvā ekaṃ vihāraṃ gantvā pabbajitvā ubhopi tattha vasantā arahattaṃ pāpuṇiṃsu.
မဟာသာဝဇ္ဇောတိ လောကဝဇ္ဇဝသေနပိ ဝိပာကဝဇ္ဇဝသေနပီတိ ဒ္ဝီဟိပိ ကာရဏေဟိ မဟာသာဝဇ္ဇော။ ကထံ? ဒောသေန ဟိ ဒုဋ္ဌော ဟုတ္ဝာ မာတရိပိ အပရဇ္ဈတိ, ပိတရိပိ ဘာတိဘဂိနိအာဒီသုပိ ပဗ္ဗဇိတေသုပိ။ သော ဂတဂတဋ္ဌာနေသု ‘‘အယံ ပုဂ္ဂလော မာတာပိတူသုပိ အပရဇ္ဈတိ, ဘာတိဘဂိနိအာဒီသုပိ, ပဗ္ဗဇိတေသုပီ’’တိ မဟတိံ ဂရဟံ လဘတိ။ ဧဝံ တာဝ လောကဝဇ္ဇဝသေန မဟာသာဝဇ္ဇော။ ဒောသဝသေန ပန ကတေန အာနန္တရိယကမ္မေန ကပ္ပံ နိရယေ ပစ္စတိ။ ဧဝံ ဝိပာကဝဇ္ဇဝသေန မဟာသာဝဇ္ဇော။ ခိပ္ပဝိရာဂီတိ ခိပ္ပံ ဝိရဇ္ဇတိ။ ဒောသေန ဟိ ဒုဋ္ဌော မာတာပိတူသုပိ စေတိယေပိ ဗောဓိမ္ဟိပိ ပဗ္ဗဇိတေသုပိ အပရဇ္ဈိတ္ဝာ ‘‘မယ္ဟံ ခမထာ’’တိ။ အစ္စယံ ဒေသေတိ။ တသ္သ သဟ ခမာပနေန တံ ကမ္မံ ပာကတိကမေဝ ဟောတိ။
Mahāsāvajjoti lokavajjavasenapi vipākavajjavasenapīti dvīhipi kāraṇehi mahāsāvajjo. Kathaṃ? Dosena hi duṭṭho hutvā mātaripi aparajjhati, pitaripi bhātibhaginiādīsupi pabbajitesupi. So gatagataṭṭhānesu ‘‘ayaṃ puggalo mātāpitūsupi aparajjhati, bhātibhaginiādīsupi, pabbajitesupī’’ti mahatiṃ garahaṃ labhati. Evaṃ tāva lokavajjavasena mahāsāvajjo. Dosavasena pana katena ānantariyakammena kappaṃ niraye paccati. Evaṃ vipākavajjavasena mahāsāvajjo. Khippavirāgīti khippaṃ virajjati. Dosena hi duṭṭho mātāpitūsupi cetiyepi bodhimhipi pabbajitesupi aparajjhitvā ‘‘mayhaṃ khamathā’’ti. Accayaṃ deseti. Tassa saha khamāpanena taṃ kammaṃ pākatikameva hoti.
မောဟောပိ ဒ္ဝီဟေဝ ကာရဏေဟိ မဟာသာဝဇ္ဇော။ မောဟေန ဟိ မူဠ္ဟော ဟုတ္ဝာ မာတာပိတူသုပိ စေတိယေပိ ဗောဓိမ္ဟိပိ ပဗ္ဗဇိတေသုပိ အပရဇ္ဈိတ္ဝာ ဂတဂတဋ္ဌာနေ ဂရဟံ လဘတိ။ ဧဝံ တာဝ လောကဝဇ္ဇဝသေန မဟာသာဝဇ္ဇော။ မောဟဝသေန ပန ကတေန အာနန္တရိယကမ္မေန ကပ္ပံ နိရယေ ပစ္စတိ။ ဧဝံ ဝိပာကဝဇ္ဇဝသေနပိ မဟာသာဝဇ္ဇော။ ဒန္ဓဝိရာဂီတိ သဏိကံ ဝိရဇ္ဇတိ။ မောဟေန မူဠ္ဟေန ဟိ ကတကမ္မံ သဏိကံ မုစ္စတိ။ ယထာ ဟိ အစ္ဆစမ္မံ သတက္ခတ္တုမ္ပိ ဓောဝိယမာနံ န ပဏ္ဍရံ ဟောတိ, ဧဝမေဝ မောဟေန မူဠ္ဟေန ကတကမ္မံ သီဃံ န မုစ္စတိ, သဏိကမေဝ မုစ္စတီတိ။ သေသမေတ္ထ ဥတ္တာနမေဝာတိ။
Mohopi dvīheva kāraṇehi mahāsāvajjo. Mohena hi mūḷho hutvā mātāpitūsupi cetiyepi bodhimhipi pabbajitesupi aparajjhitvā gatagataṭṭhāne garahaṃ labhati. Evaṃ tāva lokavajjavasena mahāsāvajjo. Mohavasena pana katena ānantariyakammena kappaṃ niraye paccati. Evaṃ vipākavajjavasenapi mahāsāvajjo. Dandhavirāgīti saṇikaṃ virajjati. Mohena mūḷhena hi katakammaṃ saṇikaṃ muccati. Yathā hi acchacammaṃ satakkhattumpi dhoviyamānaṃ na paṇḍaraṃ hoti, evameva mohena mūḷhena katakammaṃ sīghaṃ na muccati, saṇikameva muccatīti. Sesamettha uttānamevāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. အညတိတ္ထိယသုတ္တံ • 8. Aññatitthiyasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈. အညတိတ္ထိယသုတ္တဝဏ္ဏနာ • 8. Aññatitthiyasuttavaṇṇanā
