| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༨. ཨཉྙཏིཏྠིཡསུཏྟཝཎྞནཱ
8. Aññatitthiyasuttavaṇṇanā
༦༩. ཨཊྛམེ བྷགཝཾམཱུལཀཱཏི བྷགཝཱ མཱུལཾ ཨེཏེསནྟི བྷགཝཾམཱུལཀཱ། ཨིདཾ ཝུཏྟཾ ཧོཏི – ཨིམེ, བྷནྟེ, ཨམྷཱཀཾ དྷམྨཱ པུབྦེ ཀསྶཔསམྨཱསམྦུདྡྷེན ཨུཔྤཱདིཏཱ, ཏསྨིཾ པརིནིབྦུཏེ ཨེཀཾ བུདྡྷནྟརཾ ཨཉྙོ སམཎོ ཝཱ བྲཱཧྨཎོ ཝཱ ཨིམེ དྷམྨེ ཨུཔྤཱདེཏུཾ སམཏྠོ ནཱམ ནཱཧོསི, བྷགཝཏོ པན ནོ ཨིམེ དྷམྨཱ ཨུཔྤཱདིཏཱ། བྷགཝནྟཉྷི ནིསྶཱཡ མཡཾ ཨིམེ དྷམྨེ ཨཱཛཱནཱམ པཊིཝིཛ྄ཛྷཱམཱཏི ཨེཝཾ བྷགཝཾམཱུལཀཱ ནོ, བྷནྟེ, དྷམྨཱཏི། བྷགཝཾནེཏྟིཀཱཏི བྷགཝཱ དྷམྨཱནཾ ནེཏཱ ཝིནེཏཱ ཨནུནེཏཱ ཡཐཱསབྷཱཝཏོ པཱཊིཡེཀྐཾ པཱཊིཡེཀྐཾ ནཱམཾ གཧེཏྭཱཝ དསྶེཏཱཏི དྷམྨཱ བྷགཝཾནེཏྟིཀཱ ནཱམ ཧོནྟི། བྷགཝཾཔཊིསརཎཱཏི ཙཏུབྷཱུམཀདྷམྨཱ སབྦཉྙུཏཉྙཱཎསྶ ཨཱཔཱཐཾ ཨཱགཙྪམཱནཱ བྷགཝཏི པཊིསརནྟི ནཱམཱཏི བྷགཝཾཔཊིསརཎཱ། པཊིསརནྟཱིཏི ཨོསརནྟི སམོསརནྟི། ཨཔིཙ མཧཱབོདྷིམཎྜེ ནིསིནྣསྶ བྷགཝཏོ པཊིཝེདྷཝསེན ཕསྶོ ཨཱགཙྪཏི – ‘‘ཨཧཾ བྷགཝཱ ཀིནྣཱམོ’’ཏི། ཏྭཾ ཕུསནཊྛེན ཕསྶོ ནཱམ། ཝེདནཱ, སཉྙཱ, སངྑཱརཱ, ཝིཉྙཱཎཾ ཨཱགཙྪཏི – ‘‘ཨཧཾ བྷགཝཱ ཀིནྣཱམ’’ནྟི། ཏྭཾ ཝིཛཱནནཊྛེན ཝིཉྙཱཎཾ ནཱམཱཏི། ཨེཝཾ ཙཏུབྷཱུམཀདྷམྨཱནཾ ཡཐཱསབྷཱཝཏོ པཱཊིཡེཀྐཾ པཱཊིཡེཀྐཾ ནཱམཾ གཎྷནྟོ བྷགཝཱ དྷམྨེ པཊིསརཏཱིཏི བྷགཝཾཔཊིསརཎཱ། བྷགཝནྟཾཡེཝ པཊིབྷཱཏཱུཏི བྷགཝཏོཝ ཨེཏསྶ བྷཱསིཏསྶ ཨཏྠོ ཨུཔཊྛཱཏུ, ཏུམྷེཡེཝ ནོ ཀཐེཏྭཱ དེཐཱཏི ཨཏྠོ།
69. Aṭṭhame bhagavaṃmūlakāti bhagavā mūlaṃ etesanti bhagavaṃmūlakā. Idaṃ vuttaṃ hoti – ime, bhante, amhākaṃ dhammā pubbe kassapasammāsambuddhena uppāditā, tasmiṃ parinibbute ekaṃ buddhantaraṃ añño samaṇo vā brāhmaṇo vā ime dhamme uppādetuṃ samattho nāma nāhosi, bhagavato pana no ime dhammā uppāditā. Bhagavantañhi nissāya mayaṃ ime dhamme ājānāma paṭivijjhāmāti evaṃ bhagavaṃmūlakā no, bhante, dhammāti. Bhagavaṃnettikāti bhagavā dhammānaṃ netā vinetā anunetā yathāsabhāvato pāṭiyekkaṃ pāṭiyekkaṃ nāmaṃ gahetvāva dassetāti dhammā bhagavaṃnettikā nāma honti. Bhagavaṃpaṭisaraṇāti catubhūmakadhammā sabbaññutaññāṇassa āpāthaṃ āgacchamānā bhagavati paṭisaranti nāmāti bhagavaṃpaṭisaraṇā. Paṭisarantīti osaranti samosaranti. Apica mahābodhimaṇḍe nisinnassa bhagavato paṭivedhavasena phasso āgacchati – ‘‘ahaṃ bhagavā kinnāmo’’ti. Tvaṃ phusanaṭṭhena phasso nāma. Vedanā, saññā, saṅkhārā, viññāṇaṃ āgacchati – ‘‘ahaṃ bhagavā kinnāma’’nti. Tvaṃ vijānanaṭṭhena viññāṇaṃ nāmāti. Evaṃ catubhūmakadhammānaṃ yathāsabhāvato pāṭiyekkaṃ pāṭiyekkaṃ nāmaṃ gaṇhanto bhagavā dhamme paṭisaratīti bhagavaṃpaṭisaraṇā. Bhagavantaṃyeva paṭibhātūti bhagavatova etassa bhāsitassa attho upaṭṭhātu, tumheyeva no kathetvā dethāti attho.
རཱགོ ཁོཏི རཛྫནཝསེན པཝཏྟརཱགོ། ཨཔྤསཱཝཛྫོཏི ལོཀཝཛྫཝསེནཔི ཝིཔཱཀཝཛྫཝསེནཔཱིཏི དྭཱིཧིཔི ཝཛྫེཧི ཨཔྤསཱཝཛྫོ, ཨཔྤདོསོཏི ཨཏྠོ། ཀཐཾ? མཱཏཱཔིཏརོ ཧི བྷཱཏིབྷགིནིཨཱདཡོ ཙ པུཏྟབྷཱཏིཀཱནཾ ཨཱཝཱཧཝིཝཱཧམངྒལཾ ནཱམ ཀཱརེནྟི། ཨེཝཾ ཏཱཝེསོ ལོཀཝཛྫཝསེན ཨཔྤསཱཝཛྫོ། སདཱརསནྟོསམཱུལིཀཱ པན ཨཔཱཡེ པཊིསནྡྷི ནཱམ ན ཧོཏཱིཏི ཨེཝཾ ཝིཔཱཀཝཛྫཝསེན ཨཔྤསཱཝཛྫོ། དནྡྷཝིརཱགཱིཏི ཝིརཛྫམཱནོ པནེས སཎིཀཾ ཝིརཛྫཏི, ན སཱིགྷཾ མུཙྩཏི། ཏེལམསིརཱགོ ཝིཡ ཙིརཾ ཨནུབནྡྷཏི, དྭེ ཏཱིཎི བྷཝནྟརཱནི གནྟྭཱཔི ནཱཔགཙྪཏཱིཏི དནྡྷཝིརཱགཱི།
Rāgokhoti rajjanavasena pavattarāgo. Appasāvajjoti lokavajjavasenapi vipākavajjavasenapīti dvīhipi vajjehi appasāvajjo, appadosoti attho. Kathaṃ? Mātāpitaro hi bhātibhaginiādayo ca puttabhātikānaṃ āvāhavivāhamaṅgalaṃ nāma kārenti. Evaṃ tāveso lokavajjavasena appasāvajjo. Sadārasantosamūlikā pana apāye paṭisandhi nāma na hotīti evaṃ vipākavajjavasena appasāvajjo. Dandhavirāgīti virajjamāno panesa saṇikaṃ virajjati, na sīghaṃ muccati. Telamasirāgo viya ciraṃ anubandhati, dve tīṇi bhavantarāni gantvāpi nāpagacchatīti dandhavirāgī.
ཏཏྲིདཾ ཝཏྠུ – ཨེཀོ ཀིར པུརིསོ བྷཱཏུ ཛཱཡཱཡ མིཙྪཱཙཱརཾ ཙརཏི། ཏསྶཱཔི ཨིཏྠིཡཱ ཨཏྟནོ སཱམིཀཏོ སོཡེཝ པིཡཏརོ ཨཧོསི། སཱ ཏམཱཧ – ‘‘ཨིམསྨིཾ ཀཱརཎེ པཱཀཊེ ཛཱཏེ མཧཏཱི གརཧཱ བྷཝིསྶཏི, ཏཝ བྷཱཏིཀཾ གྷཱཏེཧཱི’’ཏི། སོ ‘‘ནསྶ, ཝསལི, མཱ ཨེཝཾ པུན ཨཝཙཱ’’ཏི ཨཔསཱདེསི། སཱ ཏུཎྷཱི ཧུཏྭཱ ཀཏིཔཱཧཙྩཡེན པུན ཀཐེསི, ཏསྶ ཙིཏྟཾ དྭཛ྄ཛྷབྷཱཝཾ ཨགམཱསི། ཏཏོ ཏཏིཡཝཱརཾ ཀཐིཏོ ‘‘ཀིནྟི ཀཏྭཱ ཨོཀཱསཾ ལབྷིསྶཱམཱི’’ཏི ཨཱཧ། ཨཐསྶ སཱ ཨུཔཱཡཾ ཀཐེནྟཱི ‘‘ཏྭཾ མཡཱ ཝུཏྟམེཝ ཀརོཧི, ཨསུཀཊྛཱནེ མཧཱཀཀུདྷསམཱིཔེ ཏིཏྠཾ ཨཏྠི, ཏཏྠ ཏིཁིཎཾ དཎྜཀཝཱསིཾ གཧེཏྭཱ ཏིཊྛཱཧཱི’’ཏི། སོ ཏཐཱ ཨཀཱསི། ཛེཊྛབྷཱཏཱཔིསྶ ཨརཉྙེ ཀམྨཾ ཀཏྭཱ གྷརཾ ཨཱགཏོ། སཱ ཏསྨིཾ མུདུཙིཏྟཱ ཝིཡ ཧུཏྭཱ ‘‘ཨེཧི སཱམི , སཱིསེ ཏེ ཨོལིཁིསྶཱམཱི’’ཏི ཨོལིཁནྟཱི ‘‘ཨུཔཀྐིལིཊྛཾ ཏེ སཱིས’’ནྟི ཨཱམལཀཔིཎྜཾ དཏྭཱ ‘‘གཙྪ ཨསུཀཊྛཱནེ སཱིསཾ དྷོཝིཏྭཱ ཨཱགཙྪཱཧཱི’’ཏི པེསེསི། སོ ཏཱཡ ཝུཏྟཏིཏྠམེཝ གནྟྭཱ ཨཱམལཀཀཀྐེན སཱིསཾ མཀྑེཏྭཱ ཨུདཀཾ ཨོརུཡ྄ཧ ཨོནམིཏྭཱ སཱིསཾ དྷོཝི། ཨཐ ནཾ ཨིཏརོ རུཀྑནྟརཏོ ནིཀྑམིཏྭཱ ཁནྡྷཊྛིཀེ པཧརིཏྭཱ ཛཱིཝིཏཱ ཝོརོཔེཏྭཱ གེཧཾ ཨགམཱསི།
Tatridaṃ vatthu – eko kira puriso bhātu jāyāya micchācāraṃ carati. Tassāpi itthiyā attano sāmikato soyeva piyataro ahosi. Sā tamāha – ‘‘imasmiṃ kāraṇe pākaṭe jāte mahatī garahā bhavissati, tava bhātikaṃ ghātehī’’ti. So ‘‘nassa, vasali, mā evaṃ puna avacā’’ti apasādesi. Sā tuṇhī hutvā katipāhaccayena puna kathesi, tassa cittaṃ dvajjhabhāvaṃ agamāsi. Tato tatiyavāraṃ kathito ‘‘kinti katvā okāsaṃ labhissāmī’’ti āha. Athassa sā upāyaṃ kathentī ‘‘tvaṃ mayā vuttameva karohi, asukaṭṭhāne mahākakudhasamīpe titthaṃ atthi, tattha tikhiṇaṃ daṇḍakavāsiṃ gahetvā tiṭṭhāhī’’ti. So tathā akāsi. Jeṭṭhabhātāpissa araññe kammaṃ katvā gharaṃ āgato. Sā tasmiṃ muducittā viya hutvā ‘‘ehi sāmi , sīse te olikhissāmī’’ti olikhantī ‘‘upakkiliṭṭhaṃ te sīsa’’nti āmalakapiṇḍaṃ datvā ‘‘gaccha asukaṭṭhāne sīsaṃ dhovitvā āgacchāhī’’ti pesesi. So tāya vuttatitthameva gantvā āmalakakakkena sīsaṃ makkhetvā udakaṃ oruyha onamitvā sīsaṃ dhovi. Atha naṃ itaro rukkhantarato nikkhamitvā khandhaṭṭhike paharitvā jīvitā voropetvā gehaṃ agamāsi.
ཨིཏརོ བྷརིཡཱཡ སིནེཧཾ པརིཙྩཛིཏུམསཀྐོནྟོ ཏསྨིཾཡེཝ གེཧེ མཧཱདྷམྨནི ཧུཏྭཱ ནིབྦཏྟི། སོ ཏསྶཱ ཋིཏཱཡཔི ནིསིནྣཱཡཔི གནྟྭཱ སརཱིརེ པཏཏི། ཨཐ ནཾ སཱ ‘‘སོཡེཝ ཨཡཾ བྷཝིསྶཏཱི’’ཏི གྷཱཏཱཔེསི། སོ པུན ཏསྶཱ སིནེཧེན ཏསྨིཾཡེཝ གེཧེ ཀུཀྐུརོ ཧུཏྭཱ ནིབྦཏྟི། སོ པདསཱ གམནཀཱལཏོ པཊྛཱཡ ཏསྶཱ པཙྪཏོ པཙྪཏོ ཙརཏི། ཨརཉྙཾ གཙྪནྟིཡཱཔི སདྡྷིཾཡེཝ གཙྪཏི། ཏཾ དིསྭཱ མནུསྶཱ ‘‘ནིཀྑནྟོ སུནཁལུདྡཀོ, ཀཏརཊྛཱནཾ གམིསྶཏཱི’’ཏི ཨུཔྤཎྜེནྟི། སཱ པུན ཏཾ གྷཱཏཱཔེསི།
Itaro bhariyāya sinehaṃ pariccajitumasakkonto tasmiṃyeva gehe mahādhammani hutvā nibbatti. So tassā ṭhitāyapi nisinnāyapi gantvā sarīre patati. Atha naṃ sā ‘‘soyeva ayaṃ bhavissatī’’ti ghātāpesi. So puna tassā sinehena tasmiṃyeva gehe kukkuro hutvā nibbatti. So padasā gamanakālato paṭṭhāya tassā pacchato pacchato carati. Araññaṃ gacchantiyāpi saddhiṃyeva gacchati. Taṃ disvā manussā ‘‘nikkhanto sunakhaluddako, kataraṭṭhānaṃ gamissatī’’ti uppaṇḍenti. Sā puna taṃ ghātāpesi.
སོཔི པུན ཏསྨིཾཡེཝ གེཧེ ཝཙྪཀོ ཧུཏྭཱ ནིབྦཏྟི། ཏཐེཝ ཏསྶཱ པཙྪཏོ པཙྪཏོ ཙརཏི། ཏདཱཔི ནཾ མནུསྶཱ དིསྭཱ ‘‘ནིཀྑནྟོ གོཔཱལཀོ, ཀཏྠ གཱཝིཡོ ཙརིསྶནྟཱི’’ཏི ཨུཔྤཎྜེནྟི། སཱ ཏསྨིམྤི ཋཱནེ ཏཾ གྷཱཏཱཔེསི། སོ ཏདཱཔི ཏསྶཱ ཨུཔརི སིནེཧཾ ཚིནྡིཏུཾ ཨསཀྐོནྟོ ཙཏུཏྠེ ཝཱརེ ཏསྶཱཡེཝ ཀུཙྪིཡཾ ཛཱཏིསྶརོ ཧུཏྭཱ ནིབྦཏྟི། སོ པཊིཔཱཊིཡཱ ཙཏཱུསུ ཨཏྟབྷཱཝེསུ ཏཱཡ གྷཱཏིཏབྷཱཝཾ དིསྭཱ ‘‘ཨེཝརཱུཔཱཡ ནཱམ པཙྩཏྠིཀཱཡ ཀུཙྪིསྨིཾ ནིབྦཏྟོསྨཱི’’ཏི ཏཏོ པཊྛཱཡ ཏསྶཱ ཧཏྠེན ཨཏྟཱནཾ ཕུསིཏུཾ ན དེཏི། སཙེ ནཾ སཱ ཕུསཏི, ཀནྡཏི རོདཏི། ཨཐ ནཾ ཨཡྻཀོཝ པཊིཛགྒཏི། ཏཾ ཨཔརབྷཱགེ ཝུདྡྷིཔྤཏྟཾ ཨཡྻཀོ ཨཱཧ – ‘‘ཏཱཏ, ཀསྨཱ ཏྭཾ མཱཏུ ཧཏྠེན ཨཏྟཱནཾ ཕུསིཏུཾ ན དེསི། སཙེཔི ཏཾ ཕུསཏི, མཧཱསདྡེན རོདསི ཀནྡསཱི’’ཏི། ཨཡྻཀེན པུཊྛོ ‘‘ན ཨེསཱ མཡ྄ཧཾ མཱཏཱ, པཙྩཱམིཏྟཱ ཨེསཱ’’ཏི ཏཾ པཝཏྟིཾ སབྦཾ ཨཱརོཙེསི། སོ ཏཾ ཨཱལིངྒིཏྭཱ རོདིཏྭཱ ‘‘ཨེཧི, ཏཱཏ, ཀིཾ ཨམྷཱཀཾ ཨཱིདིསེ ཋཱནེ ནིཝཱསཀིཙྩ’’ནྟི ཏཾ ཨཱདཱཡ ནིཀྑམིཏྭཱ ཨེཀཾ ཝིཧཱརཾ གནྟྭཱ པབྦཛིཏྭཱ ཨུབྷོཔི ཏཏྠ ཝསནྟཱ ཨརཧཏྟཾ པཱཔུཎིཾསུ།
Sopi puna tasmiṃyeva gehe vacchako hutvā nibbatti. Tatheva tassā pacchato pacchato carati. Tadāpi naṃ manussā disvā ‘‘nikkhanto gopālako, kattha gāviyo carissantī’’ti uppaṇḍenti. Sā tasmimpi ṭhāne taṃ ghātāpesi. So tadāpi tassā upari sinehaṃ chindituṃ asakkonto catutthe vāre tassāyeva kucchiyaṃ jātissaro hutvā nibbatti. So paṭipāṭiyā catūsu attabhāvesu tāya ghātitabhāvaṃ disvā ‘‘evarūpāya nāma paccatthikāya kucchismiṃ nibbattosmī’’ti tato paṭṭhāya tassā hatthena attānaṃ phusituṃ na deti. Sace naṃ sā phusati, kandati rodati. Atha naṃ ayyakova paṭijaggati. Taṃ aparabhāge vuddhippattaṃ ayyako āha – ‘‘tāta, kasmā tvaṃ mātu hatthena attānaṃ phusituṃ na desi. Sacepi taṃ phusati, mahāsaddena rodasi kandasī’’ti. Ayyakena puṭṭho ‘‘na esā mayhaṃ mātā, paccāmittā esā’’ti taṃ pavattiṃ sabbaṃ ārocesi. So taṃ āliṅgitvā roditvā ‘‘ehi, tāta, kiṃ amhākaṃ īdise ṭhāne nivāsakicca’’nti taṃ ādāya nikkhamitvā ekaṃ vihāraṃ gantvā pabbajitvā ubhopi tattha vasantā arahattaṃ pāpuṇiṃsu.
མཧཱསཱཝཛྫོཏི ལོཀཝཛྫཝསེནཔི ཝིཔཱཀཝཛྫཝསེནཔཱིཏི དྭཱིཧིཔི ཀཱརཎེཧི མཧཱསཱཝཛྫོ། ཀཐཾ? དོསེན ཧི དུཊྛོ ཧུཏྭཱ མཱཏརིཔི ཨཔརཛ྄ཛྷཏི, པིཏརིཔི བྷཱཏིབྷགིནིཨཱདཱིསུཔི པབྦཛིཏེསུཔི། སོ གཏགཏཊྛཱནེསུ ‘‘ཨཡཾ པུགྒལོ མཱཏཱཔིཏཱུསུཔི ཨཔརཛ྄ཛྷཏི, བྷཱཏིབྷགིནིཨཱདཱིསུཔི, པབྦཛིཏེསུཔཱི’’ཏི མཧཏིཾ གརཧཾ ལབྷཏི། ཨེཝཾ ཏཱཝ ལོཀཝཛྫཝསེན མཧཱསཱཝཛྫོ། དོསཝསེན པན ཀཏེན ཨཱནནྟརིཡཀམྨེན ཀཔྤཾ ནིརཡེ པཙྩཏི། ཨེཝཾ ཝིཔཱཀཝཛྫཝསེན མཧཱསཱཝཛྫོ། ཁིཔྤཝིརཱགཱིཏི ཁིཔྤཾ ཝིརཛྫཏི། དོསེན ཧི དུཊྛོ མཱཏཱཔིཏཱུསུཔི ཙེཏིཡེཔི བོདྷིམྷིཔི པབྦཛིཏེསུཔི ཨཔརཛ྄ཛྷིཏྭཱ ‘‘མཡ྄ཧཾ ཁམཐཱ’’ཏི། ཨཙྩཡཾ དེསེཏི། ཏསྶ སཧ ཁམཱཔནེན ཏཾ ཀམྨཾ པཱཀཏིཀམེཝ ཧོཏི།
Mahāsāvajjoti lokavajjavasenapi vipākavajjavasenapīti dvīhipi kāraṇehi mahāsāvajjo. Kathaṃ? Dosena hi duṭṭho hutvā mātaripi aparajjhati, pitaripi bhātibhaginiādīsupi pabbajitesupi. So gatagataṭṭhānesu ‘‘ayaṃ puggalo mātāpitūsupi aparajjhati, bhātibhaginiādīsupi, pabbajitesupī’’ti mahatiṃ garahaṃ labhati. Evaṃ tāva lokavajjavasena mahāsāvajjo. Dosavasena pana katena ānantariyakammena kappaṃ niraye paccati. Evaṃ vipākavajjavasena mahāsāvajjo. Khippavirāgīti khippaṃ virajjati. Dosena hi duṭṭho mātāpitūsupi cetiyepi bodhimhipi pabbajitesupi aparajjhitvā ‘‘mayhaṃ khamathā’’ti. Accayaṃ deseti. Tassa saha khamāpanena taṃ kammaṃ pākatikameva hoti.
མོཧོཔི དྭཱིཧེཝ ཀཱརཎེཧི མཧཱསཱཝཛྫོ། མོཧེན ཧི མཱུལ༹ྷོ ཧུཏྭཱ མཱཏཱཔིཏཱུསུཔི ཙེཏིཡེཔི བོདྷིམྷིཔི པབྦཛིཏེསུཔི ཨཔརཛ྄ཛྷིཏྭཱ གཏགཏཊྛཱནེ གརཧཾ ལབྷཏི། ཨེཝཾ ཏཱཝ ལོཀཝཛྫཝསེན མཧཱསཱཝཛྫོ། མོཧཝསེན པན ཀཏེན ཨཱནནྟརིཡཀམྨེན ཀཔྤཾ ནིརཡེ པཙྩཏི། ཨེཝཾ ཝིཔཱཀཝཛྫཝསེནཔི མཧཱསཱཝཛྫོ། དནྡྷཝིརཱགཱིཏི སཎིཀཾ ཝིརཛྫཏི། མོཧེན མཱུལ༹ྷེན ཧི ཀཏཀམྨཾ སཎིཀཾ མུཙྩཏི། ཡཐཱ ཧི ཨཙྪཙམྨཾ སཏཀྑཏྟུམྤི དྷོཝིཡམཱནཾ ན པཎྜརཾ ཧོཏི, ཨེཝམེཝ མོཧེན མཱུལ༹ྷེན ཀཏཀམྨཾ སཱིགྷཾ ན མུཙྩཏི, སཎིཀམེཝ མུཙྩཏཱིཏི། སེསམེཏྠ ཨུཏྟཱནམེཝཱཏི།
Mohopi dvīheva kāraṇehi mahāsāvajjo. Mohena hi mūḷho hutvā mātāpitūsupi cetiyepi bodhimhipi pabbajitesupi aparajjhitvā gatagataṭṭhāne garahaṃ labhati. Evaṃ tāva lokavajjavasena mahāsāvajjo. Mohavasena pana katena ānantariyakammena kappaṃ niraye paccati. Evaṃ vipākavajjavasenapi mahāsāvajjo. Dandhavirāgīti saṇikaṃ virajjati. Mohena mūḷhena hi katakammaṃ saṇikaṃ muccati. Yathā hi acchacammaṃ satakkhattumpi dhoviyamānaṃ na paṇḍaraṃ hoti, evameva mohena mūḷhena katakammaṃ sīghaṃ na muccati, saṇikameva muccatīti. Sesamettha uttānamevāti.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༨. ཨཉྙཏིཏྠིཡསུཏྟཾ • 8. Aññatitthiyasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༨. ཨཉྙཏིཏྠིཡསུཏྟཝཎྞནཱ • 8. Aññatitthiyasuttavaṇṇanā
