| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. পঠমআমকধঞ্ঞপেয্যালৰগ্গো
7. Paṭhamaāmakadhaññapeyyālavaggo
১. অঞ্ঞত্রসুত্তং
1. Aññatrasuttaṃ
১১৩১. অথ খো ভগৰা পরিত্তং নখসিখাযং পংসুং আরোপেত্ৰা ভিক্খূ আমন্তেসি – ‘‘তং কিং মঞ্ঞথ, ভিক্খৰে, কতমং নু খো বহুতরং – যো ৰাযং মযা পরিত্তো নখসিখাযং পংসু আরোপিতো, অযং ৰা মহাপথৰী’’তি? ‘‘এতদেৰ , ভন্তে, বহুতরং, যদিদং – মহাপথৰী; অপ্পমত্তকাযং ভগৰতা পরিত্তো নখসিখাযং পংসু আরোপিতো। সঙ্খম্পি ন উপেতি, উপনিধম্পি ন উপেতি, কলভাগম্পি ন উপেতি মহাপথৰিং উপনিধায ভগৰতা পরিত্তো নখসিখাযং পংসু আরোপিতো’’তি।
1131. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yo vāyaṃ mayā paritto nakhasikhāyaṃ paṃsu āropito, ayaṃ vā mahāpathavī’’ti? ‘‘Etadeva , bhante, bahutaraṃ, yadidaṃ – mahāpathavī; appamattakāyaṃ bhagavatā paritto nakhasikhāyaṃ paṃsu āropito. Saṅkhampi na upeti, upanidhampi na upeti, kalabhāgampi na upeti mahāpathaviṃ upanidhāya bhagavatā paritto nakhasikhāyaṃ paṃsu āropito’’ti.
‘‘এৰমেৰ খো, ভিক্খৰে, অপ্পমত্তকা তে সত্তা যে মনুস্সেসু পচ্চাজাযন্তি; অথ খো এতেৰ বহুতরা সত্তা যে অঞ্ঞত্র মনুস্সেহি 1 পচ্চাজাযন্তি। তং কিস্স হেতু? অদিট্ঠত্তা, ভিক্খৰে, চতুন্নং অরিযসচ্চানং। কতমেসং চতুন্নং? দুক্খস্স অরিযসচ্চস্স…পে॰… দুক্খনিরোধগামিনিযা পটিপদায অরিযসচ্চস্স’’।
‘‘Evameva kho, bhikkhave, appamattakā te sattā ye manussesu paccājāyanti; atha kho eteva bahutarā sattā ye aññatra manussehi 2 paccājāyanti. Taṃ kissa hetu? Adiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa’’.
‘‘তস্মাতিহ , ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। পঠমং।
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Paṭhamaṃ.
Footnotes:
