| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. පඨමආමකධඤ්‌ඤපෙය්‍යාලවග්‌ගො
7. Paṭhamaāmakadhaññapeyyālavaggo
1. අඤ්‌ඤත්‍රසුත්‌තං
1. Aññatrasuttaṃ
1131. අථ ඛො භගවා පරිත්‌තං නඛසිඛායං පංසුං ආරොපෙත්‌වා භික්‌ඛූ ආමන්‌තෙසි – ‘‘තං කිං මඤ්‌ඤථ, භික්‌ඛවෙ, කතමං නු ඛො බහුතරං – යො වායං මයා පරිත්‌තො නඛසිඛායං පංසු ආරොපිතො, අයං වා මහාපථවී’’ති? ‘‘එතදෙව , භන්‌තෙ, බහුතරං, යදිදං – මහාපථවී; අප්‌පමත්‌තකායං භගවතා පරිත්‌තො නඛසිඛායං පංසු ආරොපිතො. සඞ්‌ඛම්‌පි න උපෙති, උපනිධම්‌පි න උපෙති, කලභාගම්‌පි න උපෙති මහාපථවිං උපනිධාය භගවතා පරිත්‌තො නඛසිඛායං පංසු ආරොපිතො’’ති.
1131. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yo vāyaṃ mayā paritto nakhasikhāyaṃ paṃsu āropito, ayaṃ vā mahāpathavī’’ti? ‘‘Etadeva , bhante, bahutaraṃ, yadidaṃ – mahāpathavī; appamattakāyaṃ bhagavatā paritto nakhasikhāyaṃ paṃsu āropito. Saṅkhampi na upeti, upanidhampi na upeti, kalabhāgampi na upeti mahāpathaviṃ upanidhāya bhagavatā paritto nakhasikhāyaṃ paṃsu āropito’’ti.
‘‘එවමෙව ඛො, භික්‌ඛවෙ, අප්‌පමත්‌තකා තෙ සත්‌තා යෙ මනුස්‌සෙසු පච්‌චාජායන්‌ති; අථ ඛො එතෙව බහුතරා සත්‌තා යෙ අඤ්‌ඤත්‍ර මනුස්‌සෙහි 1 පච්‌චාජායන්‌ති. තං කිස්‌ස හෙතු? අදිට්‌ඨත්‌තා, භික්‌ඛවෙ, චතුන්‌නං අරියසච්‌චානං. කතමෙසං චතුන්‌නං? දුක්‌ඛස්‌ස අරියසච්‌චස්‌ස…පෙ.… දුක්‌ඛනිරොධගාමිනියා පටිපදාය අරියසච්‌චස්‌ස’’.
‘‘Evameva kho, bhikkhave, appamattakā te sattā ye manussesu paccājāyanti; atha kho eteva bahutarā sattā ye aññatra manussehi 2 paccājāyanti. Taṃ kissa hetu? Adiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa’’.
‘‘තස්‌මාතිහ , භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. පඨමං.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Paṭhamaṃ.
Footnotes:
