| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
2. அஞ்ஞவாத³கஸிக்கா²பத³வண்ணனா
2. Aññavādakasikkhāpadavaṇṇanā
94. து³தியஸிக்கா²பதே³ – அனாசாரங் ஆசரித்வாதி அகாதப்³ப³ங் கத்வா; காயவசீத்³வாரேஸு ஆபத்திங் ஆபஜ்ஜித்வாதி வுத்தங் ஹோதி. அஞ்ஞேனஞ்ஞங் படிசரதீதி அஞ்ஞேன வசனேன அஞ்ஞங் வசனங் படிசரதி படிச்சா²தே³தி அஜ்ஜொ²த்த²ரதி; இதா³னி தங் படிசரணவிதி⁴ங் த³ஸ்ஸெந்தோ ‘‘கோ ஆபன்னோ’’திஆதி³மாஹ. தத்ராயங் வசனஸம்ப³ந்தோ⁴ – ஸோ கிர கிஞ்சி வீதிக்கமங் தி³ஸ்வா ‘‘ஆவுஸோ, ஆபத்திங் ஆபன்னோஸீ’’தி ஸங்க⁴மஜ்ஜே² ஆபத்தியா அனுயுஞ்ஜியமானோ ‘‘கோ ஆபன்னோ’’தி வத³தி. ‘‘ததோ த்வ’’ந்தி வுத்தே ‘‘அஹங் கிங் ஆபன்னோ’’தி வத³தி. அத² ‘‘பாசித்தியங் வா து³க்கடங் வா’’தி வுத்தே வத்து²ங் புச்ச²ந்தோ ‘‘அஹங் கிஸ்மிங் ஆபன்னோ’’தி வத³தி. ததோ ‘‘அஸுகஸ்மிங் நாம வத்து²ஸ்மி’’ந்தி வுத்தே ‘‘அஹங் கத²ங் ஆபன்னோ, கிங் கரொந்தோ ஆபன்னொம்ஹீ’’தி புச்ச²தி. அத² ‘‘இத³ங் நாம கரொந்தோ ஆபன்னோ’’தி வுத்தே ‘‘கங் ப⁴ணதா²’’தி வத³தி. ததோ ‘‘தங் ப⁴ணாமா’’தி வுத்தே ‘‘கிங் ப⁴ணதா²’’தி வத³தி.
94. Dutiyasikkhāpade – anācāraṃ ācaritvāti akātabbaṃ katvā; kāyavacīdvāresu āpattiṃ āpajjitvāti vuttaṃ hoti. Aññenaññaṃ paṭicaratīti aññena vacanena aññaṃ vacanaṃ paṭicarati paṭicchādeti ajjhottharati; idāni taṃ paṭicaraṇavidhiṃ dassento ‘‘ko āpanno’’tiādimāha. Tatrāyaṃ vacanasambandho – so kira kiñci vītikkamaṃ disvā ‘‘āvuso, āpattiṃ āpannosī’’ti saṅghamajjhe āpattiyā anuyuñjiyamāno ‘‘ko āpanno’’ti vadati. ‘‘Tato tva’’nti vutte ‘‘ahaṃ kiṃ āpanno’’ti vadati. Atha ‘‘pācittiyaṃ vā dukkaṭaṃ vā’’ti vutte vatthuṃ pucchanto ‘‘ahaṃ kismiṃ āpanno’’ti vadati. Tato ‘‘asukasmiṃ nāma vatthusmi’’nti vutte ‘‘ahaṃ kathaṃ āpanno, kiṃ karonto āpannomhī’’ti pucchati. Atha ‘‘idaṃ nāma karonto āpanno’’ti vutte ‘‘kaṃ bhaṇathā’’ti vadati. Tato ‘‘taṃ bhaṇāmā’’ti vutte ‘‘kiṃ bhaṇathā’’ti vadati.
அபிசெத்த² அயங் பாளிமுத்தகோபி அஞ்ஞேனஞ்ஞங் படிசரணவிதி⁴ – பி⁴க்கூ²ஹி ‘‘தவ ஸிபாடிகாய கஹாபணோ தி³ட்டோ², கிஸ்ஸேவமஸாருப்பங் கரோஸீ’’தி வுத்தோ ‘‘ஸுதி³ட்ட²ங், ப⁴ந்தே, ந பனேஸோ கஹாபணோ; திபுமண்ட³லங் ஏத’’ந்தி ப⁴ணந்தோ வா ‘‘த்வங் ஸுரங் பிவந்தோ தி³ட்டோ², கிஸ்ஸேவங் கரோஸீ’’தி வுத்தோ ‘‘ஸுதி³ட்டோ² , ப⁴ந்தே, ந பனேஸா ஸுரா, பே⁴ஸஜ்ஜத்தா²ய ஸம்பாதி³தங் அரிட்ட²’’ந்தி ப⁴ணந்தோ வா ‘‘த்வங் படிச்ச²ன்னே ஆஸனே மாதுகா³மேன ஸத்³தி⁴ங் நிஸின்னோ தி³ட்டோ², கிஸ்ஸேவமஸாருப்பங் கரோஸீ’’தி வுத்தோ ‘‘யேன தி³ட்ட²ங் ஸுதி³ட்ட²ங், விஞ்ஞூ பனெத்த² து³தியோ அத்தி², ஸோ கிஸ்ஸ ந தி³ட்டோ²’’தி ப⁴ணந்தோ வா, ‘‘ஈதி³ஸங் தயா கிஞ்சி தி³ட்ட²’’ந்தி புட்டோ² ‘‘ந ஸுணாமீ’’தி ஸோதமுபனெந்தோ வா, ஸோதத்³வாரே புச்ச²ந்தானங் சக்கு²ங் உபனெந்தோ வா, அஞ்ஞேனஞ்ஞங் படிசரதீதி வேதி³தப்³போ³. அஞ்ஞவாத³கங் ரோபேதூதி அஞ்ஞவாத³கங் ஆரோபேது; பதிட்டா²பேதூதி அத்தோ². விஹேஸகங் ரோபேதூதி ஏதஸ்மிம்பி ஏஸேவ நயோ.
Apicettha ayaṃ pāḷimuttakopi aññenaññaṃ paṭicaraṇavidhi – bhikkhūhi ‘‘tava sipāṭikāya kahāpaṇo diṭṭho, kissevamasāruppaṃ karosī’’ti vutto ‘‘sudiṭṭhaṃ, bhante, na paneso kahāpaṇo; tipumaṇḍalaṃ eta’’nti bhaṇanto vā ‘‘tvaṃ suraṃ pivanto diṭṭho, kissevaṃ karosī’’ti vutto ‘‘sudiṭṭho , bhante, na panesā surā, bhesajjatthāya sampāditaṃ ariṭṭha’’nti bhaṇanto vā ‘‘tvaṃ paṭicchanne āsane mātugāmena saddhiṃ nisinno diṭṭho, kissevamasāruppaṃ karosī’’ti vutto ‘‘yena diṭṭhaṃ sudiṭṭhaṃ, viññū panettha dutiyo atthi, so kissa na diṭṭho’’ti bhaṇanto vā, ‘‘īdisaṃ tayā kiñci diṭṭha’’nti puṭṭho ‘‘na suṇāmī’’ti sotamupanento vā, sotadvāre pucchantānaṃ cakkhuṃ upanento vā, aññenaññaṃ paṭicaratīti veditabbo. Aññavādakaṃ ropetūti aññavādakaṃ āropetu; patiṭṭhāpetūti attho. Vihesakaṃ ropetūti etasmimpi eseva nayo.
98. அஞ்ஞவாத³கே விஹேஸகே பாசித்தியந்தி எத்த² அஞ்ஞங் வத³தீதி அஞ்ஞவாத³கங்; அஞ்ஞேனஞ்ஞங் படிசரணஸ்ஸேதங் நாமங். விஹேஸேதீதி விஹேஸகங்; துண்ஹீபூ⁴தஸ்ஸேதங் நாமங், தஸ்மிங் அஞ்ஞவாத³கே விஹேஸகே. பாசித்தியந்தி வத்து²த்³வயே பாசித்தியத்³வயங் வுத்தங்.
98.Aññavādake vihesake pācittiyanti ettha aññaṃ vadatīti aññavādakaṃ; aññenaññaṃ paṭicaraṇassetaṃ nāmaṃ. Vihesetīti vihesakaṃ; tuṇhībhūtassetaṃ nāmaṃ, tasmiṃ aññavādake vihesake. Pācittiyanti vatthudvaye pācittiyadvayaṃ vuttaṃ.
100. அரோபிதே அஞ்ஞவாத³கேதி கம்மவாசாய அனாரோபிதே அஞ்ஞவாத³கே. அரோபிதே விஹேஸகேதி ஏதஸ்மிம்பி ஏஸேவ நயோ.
100.Aropite aññavādaketi kammavācāya anāropite aññavādake. Aropite vihesaketi etasmimpi eseva nayo.
101. த⁴ம்மகம்மே த⁴ம்மகம்மஸஞ்ஞீதிஆதீ³ஸு யங் தங் அஞ்ஞவாத³கவிஹேஸகரோபனகம்மங் கதங், தஞ்சே த⁴ம்மகம்மங் ஹோதி, ஸோ ச பி⁴க்கு² தஸ்மிங் த⁴ம்மகம்மஸஞ்ஞீ அஞ்ஞவாத³கஞ்ச விஹேஸகஞ்ச கரோதி, அத²ஸ்ஸ தஸ்மிங் அஞ்ஞவாத³கே ச விஹேஸகே ச ஆபத்தி பாசித்தியஸ்ஸாதி இமினா நயேன அத்தோ² வேதி³தப்³போ³.
101.Dhammakamme dhammakammasaññītiādīsu yaṃ taṃ aññavādakavihesakaropanakammaṃ kataṃ, tañce dhammakammaṃ hoti, so ca bhikkhu tasmiṃ dhammakammasaññī aññavādakañca vihesakañca karoti, athassa tasmiṃ aññavādake ca vihesake ca āpatti pācittiyassāti iminā nayena attho veditabbo.
102. அஜானந்தோ புச்ச²தீதி ஆபத்திங் வா ஆபன்னபா⁴வங் அஜானந்தோயேவ ‘‘கிங் தும்ஹே ப⁴ணத², அஹங் ந ஜானாமீ’’தி புச்ச²தி. கி³லானோ வா ந கதே²தீதி முகே² தாதி³ஸோ ப்³யாதி⁴ ஹோதி, யேன கதே²துங் ந ஸக்கோதி. ஸங்க⁴ஸ்ஸ ப⁴ண்ட³னங் வாதிஆதீ³ஸு ஸங்க⁴மஜ்ஜே² கதி²தே தப்பச்சயா ஸங்க⁴ஸ்ஸ ப⁴ண்ட³னங் வா கலஹோ வா விவாதோ³ வா ப⁴விஸ்ஸதி, ஸோ மா அஹோஸீதி மஞ்ஞமானோ ந கதே²தீதி இமினா நயேன அத்தோ² வேதி³தப்³போ³. ஸேஸங் உத்தானமேவாதி.
102.Ajānanto pucchatīti āpattiṃ vā āpannabhāvaṃ ajānantoyeva ‘‘kiṃ tumhe bhaṇatha, ahaṃ na jānāmī’’ti pucchati. Gilāno vā na kathetīti mukhe tādiso byādhi hoti, yena kathetuṃ na sakkoti. Saṅghassa bhaṇḍanaṃ vātiādīsu saṅghamajjhe kathite tappaccayā saṅghassa bhaṇḍanaṃ vā kalaho vā vivādo vā bhavissati, so mā ahosīti maññamāno na kathetīti iminā nayena attho veditabbo. Sesaṃ uttānamevāti.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, ஸியா கிரியங் , ஸியா அகிரியங், அஞ்ஞேனஞ்ஞங் படிசரந்தஸ்ஸ ஹி கிரியங் ஹோதி, துண்ஹீபா⁴வேன விஹேஸந்தஸ்ஸ அகிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Tisamuṭṭhānaṃ – kāyacittato vācācittato kāyavācācittato ca samuṭṭhāti, siyā kiriyaṃ , siyā akiriyaṃ, aññenaññaṃ paṭicarantassa hi kiriyaṃ hoti, tuṇhībhāvena vihesantassa akiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
அஞ்ஞவாத³கஸிக்கா²பத³ங் து³தியங்.
Aññavādakasikkhāpadaṃ dutiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. அஞ்ஞவாத³கஸிக்கா²பத³வண்ணனா • 2. Aññavādakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. அஞ்ஞவாத³கஸிக்கா²பத³வண்ணனா • 2. Aññavādakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. அஞ்ஞவாத³கஸிக்கா²பத³வண்ணனா • 2. Aññavādakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. அஞ்ஞவாத³கஸிக்கா²பத³ங் • 2. Aññavādakasikkhāpadaṃ
