| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. அஞ்ஞவாத³கஸிக்கா²பத³வண்ணனா
2. Aññavādakasikkhāpadavaṇṇanā
யமத்த²ந்தி ‘‘த்வங் கிர து³க்கடாபத்திங் ஆபன்னோ’’திஆதி³கங் யங் கிஞ்சி அத்த²ங். ததோ அஞ்ஞந்தி புச்சி²தத்த²தோ அஞ்ஞமத்த²ங். அஞ்ஞேனஞ்ஞங் படிசரணஸ்ஸாதி வினயத⁴ரேன யங் வசனங் தோ³ஸபுச்ச²னத்த²ங் வுத்தங், ததோ அஞ்ஞேன வசனேன படிச்சா²த³னஸ்ஸ. படிச்சா²த³னத்தோ²பி ஹி சரஸத்³தோ³ ஹோதி அனேகத்த²த்தா தா⁴தூனங். வுத்தந்தி பாளியங் வுத்தங்.
Yamatthanti ‘‘tvaṃ kira dukkaṭāpattiṃ āpanno’’tiādikaṃ yaṃ kiñci atthaṃ. Tato aññanti pucchitatthato aññamatthaṃ. Aññenaññaṃ paṭicaraṇassāti vinayadharena yaṃ vacanaṃ dosapucchanatthaṃ vuttaṃ, tato aññena vacanena paṭicchādanassa. Paṭicchādanatthopi hi carasaddo hoti anekatthattā dhātūnaṃ. Vuttanti pāḷiyaṃ vuttaṃ.
ஸாவஸேஸங் ஆபத்திங் ஆபன்னோதி எத்த² ட²பெத்வா பாராஜிகங் ஸேஸா ஸாவஸேஸாபத்தி நாம, தங் ஆபன்னோ. அனுயுஞ்ஜியமானோதி ‘‘கிங், ஆவுஸோ, இத்த²ன்னாமங் ஆபத்திங் ஆபன்னோஸீ’’தி புச்சி²யமானோ. அஞ்ஞேன வசனேனாதி ‘‘கோ ஆபன்னோ? கிங் ஆபன்னோ? கிஸ்மிங் ஆபன்னோ? கத²ங் ஆபன்னோ? கங் ப⁴ணத²? கிங் ப⁴ணதா²’’தி அஞ்ஞேன வசனேன. அஞ்ஞந்தி ‘‘கிங் த்வங் இத்த²ன்னாமங் ஆபத்திங் ஆபன்னோஸீ’’திஆதி³கங் அனுயுஞ்ஜகவசனங். ததா² ததா² விக்கி²பதீதி தேன தேன பகாரேன விக்கி²பதி. கிங் வுத்தங் ஹோதி? ஸோ (பாசி॰ அட்ட²॰ 94) கிஞ்சி வீதிக்கமங் தி³ஸ்வா ‘‘ஆவுஸோ, ஆபத்திங் ஆபன்னோஸீ’’தி ஸங்க⁴மஜ்ஜே² ஆபத்தியா அனுயுஞ்ஜியமானோ ‘‘கோ ஆபன்னோ’’தி வத³தி. ததோ ‘‘த்வ’’ந்தி வுத்தே ‘‘அஹங் கிங் ஆபன்னோ’’தி வத³தி. அத² ‘‘பாசித்தியங் வா து³க்கடங் வா’’தி வுத்தே ‘‘அஹங் கிஸ்மிங் ஆபன்னோ’’தி வத³தி. ததோ ‘‘அமுகஸ்மிங் நாம வத்து²ஸ்மி’’ந்தி வுத்தே ‘‘அஹங் கத²ங் ஆபன்னோ, கிங் கரொந்தோ ஆபன்னொம்ஹீ’’தி புச்ச²தி. அத² ‘‘இத³ங் நாம கரொந்தோ ஆபன்னோ’’தி வுத்தே ‘‘கங் ப⁴ணதா²’’தி வத³தி. ததோ ‘‘தங் ப⁴ணாமா’’தி வுத்தே ‘‘கிங் ப⁴ணதா²’’தி ஏவமனேகேஹி பகாரேஹி விக்கி²பதீதி வுத்தங் ஹோதி.
Sāvasesaṃ āpattiṃ āpannoti ettha ṭhapetvā pārājikaṃ sesā sāvasesāpatti nāma, taṃ āpanno. Anuyuñjiyamānoti ‘‘kiṃ, āvuso, itthannāmaṃ āpattiṃ āpannosī’’ti pucchiyamāno. Aññena vacanenāti ‘‘ko āpanno? Kiṃ āpanno? Kismiṃ āpanno? Kathaṃ āpanno? Kaṃ bhaṇatha? Kiṃ bhaṇathā’’ti aññena vacanena. Aññanti ‘‘kiṃ tvaṃ itthannāmaṃ āpattiṃ āpannosī’’tiādikaṃ anuyuñjakavacanaṃ. Tathā tathā vikkhipatīti tena tena pakārena vikkhipati. Kiṃ vuttaṃ hoti? So (pāci. aṭṭha. 94) kiñci vītikkamaṃ disvā ‘‘āvuso, āpattiṃ āpannosī’’ti saṅghamajjhe āpattiyā anuyuñjiyamāno ‘‘ko āpanno’’ti vadati. Tato ‘‘tva’’nti vutte ‘‘ahaṃ kiṃ āpanno’’ti vadati. Atha ‘‘pācittiyaṃ vā dukkaṭaṃ vā’’ti vutte ‘‘ahaṃ kismiṃ āpanno’’ti vadati. Tato ‘‘amukasmiṃ nāma vatthusmi’’nti vutte ‘‘ahaṃ kathaṃ āpanno, kiṃ karonto āpannomhī’’ti pucchati. Atha ‘‘idaṃ nāma karonto āpanno’’ti vutte ‘‘kaṃ bhaṇathā’’ti vadati. Tato ‘‘taṃ bhaṇāmā’’ti vutte ‘‘kiṃ bhaṇathā’’ti evamanekehi pakārehi vikkhipatīti vuttaṃ hoti.
யோ பன பி⁴க்கு² ஸாவஸேஸங் ஆபத்திங் ஆபன்னோ, தங் ந கதே²துகாமோ துண்ஹீபா⁴வேன விஹேஸேதீதி ஸம்ப³ந்தோ⁴. விஹேஸேதீதி சிரனிஸஜ்ஜாசிரபா⁴ஸனேஹி பிட்டி²ஆகி³லாயனதாலுஸோஸாதி³வஸேன ஸங்க⁴ங் விஹேஸேதி, பரிஸ்ஸமங் தேஸங் கரோதீதி அத்தோ². பரிஸ்ஸமோ ஹி விஹேஸா நாம. அஞ்ஞவாத³ககம்மந்தி அஞ்ஞவாத³கஸ்ஸ பி⁴க்கு²னோ அஞ்ஞவாத³காரோபனத்த²ங் காதப்³ப³ங் ஞத்திது³தியகம்மங். விஹேஸககம்மந்தி எத்தா²பி ஏஸேவ நயோ. தஸ்மிங் ஸங்கே⁴ன கதேதி தஸ்மிங் அஞ்ஞவாத³ககம்மே ச விஹேஸககம்மே ச ஸங்கே⁴ன ஞத்திது³தியகம்மவாசாய கதே. ததா² கரொந்தானந்தி தங் பகாரங் கரொந்தானங், அஞ்ஞவாத³கஞ்ச விஹேஸகஞ்ச கரொந்தானந்தி அத்தோ².
Yo pana bhikkhu sāvasesaṃ āpattiṃ āpanno, taṃ na kathetukāmo tuṇhībhāvena vihesetīti sambandho. Vihesetīti ciranisajjācirabhāsanehi piṭṭhiāgilāyanatālusosādivasena saṅghaṃ viheseti, parissamaṃ tesaṃ karotīti attho. Parissamo hi vihesā nāma. Aññavādakakammanti aññavādakassa bhikkhuno aññavādakāropanatthaṃ kātabbaṃ ñattidutiyakammaṃ. Vihesakakammanti etthāpi eseva nayo. Tasmiṃ saṅghena kateti tasmiṃ aññavādakakamme ca vihesakakamme ca saṅghena ñattidutiyakammavācāya kate. Tathā karontānanti taṃ pakāraṃ karontānaṃ, aññavādakañca vihesakañca karontānanti attho.
‘‘விஹேஸகேதி அயமெத்த² அனுபஞ்ஞத்தீ’’தி அவசனஞ்செத்த² ‘‘ஆபத்திகரா ச ஹோதி அஞ்ஞவாத³கஸிக்கா²பதா³தீ³ஸு வியா’’தி (கங்கா²॰ அட்ட²॰ பட²மபாராஜிகவண்ணனா) வுத்தத்தாயேவ பஞ்ஞாயதீதி கத்வா. ஏஸ நயோ உபரி ஸிக்கா²பதே³ஸு. த⁴ம்மகம்மே திகபாசித்தியந்தி த⁴ம்மகம்மே த⁴ம்மகம்மஸஞ்ஞிவேமதிகஅத⁴ம்மகம்மஸஞ்ஞீனங் வஸேன தீணி பாசித்தியானி. அத⁴ம்மகம்மே திகது³க்கடந்தி எத்தா²பி ஏஸேவ நயோ. அனாரோபிதேதி கம்மவாசாய அனாரோபிதே, அப்பதிட்டா²பிதேதி அத்தோ². கே³லஞ்ஞேனாதி யேன கதே²துங் ந ஸக்கோதி, முகே² தாதி³ஸேன ப்³யாதி⁴னா. ஸங்க⁴ஸ்ஸ ப⁴ண்ட³னாதீ³னி ப⁴விஸ்ஸந்தீதி ஸங்க⁴மஜ்ஜே² கதி²தே தப்பச்சயா ஸங்க⁴ஸ்ஸ ப⁴ண்ட³னங் வா கலஹோ வா விக்³க³ஹோ வா விவாதோ³ வா ஸங்க⁴பே⁴தோ³ வா ஸங்க⁴ராஜி வா ப⁴விஸ்ஸந்தீதி இமினா வா அதி⁴ப்பாயேன ந கதெ²ந்தஸ்ஸ. எத்த² ச அத⁴ம்மேனாதி அபூ⁴தேன வத்து²னா.
‘‘Vihesaketi ayamettha anupaññattī’’ti avacanañcettha ‘‘āpattikarā ca hoti aññavādakasikkhāpadādīsu viyā’’ti (kaṅkhā. aṭṭha. paṭhamapārājikavaṇṇanā) vuttattāyeva paññāyatīti katvā. Esa nayo upari sikkhāpadesu. Dhammakamme tikapācittiyanti dhammakamme dhammakammasaññivematikaadhammakammasaññīnaṃ vasena tīṇi pācittiyāni. Adhammakamme tikadukkaṭanti etthāpi eseva nayo. Anāropiteti kammavācāya anāropite, appatiṭṭhāpiteti attho. Gelaññenāti yena kathetuṃ na sakkoti, mukhe tādisena byādhinā. Saṅghassa bhaṇḍanādīni bhavissantīti saṅghamajjhe kathite tappaccayā saṅghassa bhaṇḍanaṃ vā kalaho vā viggaho vā vivādo vā saṅghabhedo vā saṅgharāji vā bhavissantīti iminā vā adhippāyena na kathentassa. Ettha ca adhammenāti abhūtena vatthunā.
‘‘ஸமுட்டா²னாதீ³னி அதி³ன்னாதா³னஸதி³ஸானீ’’தி அவிஸேஸங் அதிதி³ஸித்வா விஸேஸங் த³ஸ்ஸேதுங் ‘‘இத³ங் பனா’’திஆதி³ வுத்தங். ஸியா கிரியங் அஞ்ஞேனஞ்ஞங் படிசரந்தஸ்ஸ. ஸியா அகிரியங் துண்ஹீபா⁴வேன விஹேஸெந்தஸ்ஸ.
‘‘Samuṭṭhānādīni adinnādānasadisānī’’ti avisesaṃ atidisitvā visesaṃ dassetuṃ ‘‘idaṃ panā’’tiādi vuttaṃ. Siyā kiriyaṃ aññenaññaṃ paṭicarantassa. Siyā akiriyaṃ tuṇhībhāvena vihesentassa.
அஞ்ஞவாத³கஸிக்கா²பத³வண்ணனா நிட்டி²தா.
Aññavādakasikkhāpadavaṇṇanā niṭṭhitā.
