| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. அஞ்ஞவாத³கஸிக்கா²பத³வண்ணனா
2. Aññavādakasikkhāpadavaṇṇanā
94. து³தியே அஞ்ஞங் வசனந்தி யங் தோ³ஸவிபா⁴வனத்த²ங் பரேஹி வுத்தவசனங் தங் தஸ்ஸ அனநுச்ச²விகேன அஞ்ஞேன வசனேன படிசரதி.
94. Dutiye aññaṃ vacananti yaṃ dosavibhāvanatthaṃ parehi vuttavacanaṃ taṃ tassa ananucchavikena aññena vacanena paṭicarati.
98. யதே³தங் அஞ்ஞேனஞ்ஞங் படிசரணவஸேன பவத்தவசனங், ததே³வ புச்சி²தமத்த²ங் ட²பெத்வா அஞ்ஞங் வத³தி பகாஸேதீதி அஞ்ஞவாத³கந்தி ஆஹ ‘‘அஞ்ஞேனஞ்ஞங் படிசரணஸ்ஸேதங் நாம’’ந்தி. துண்ஹீபூ⁴தஸ்ஸேதங் நாமந்தி துண்ஹீபா⁴வஸ்ஸேதங் நாமங், அயமேவ வா பாடோ². அஞ்ஞவாத³கங் ஆரோபேதுந்தி அஞ்ஞவாதே³ ஆரோபேதுங். விஹேஸகந்தி விஹேஸகத்தங்.
98. Yadetaṃ aññenaññaṃ paṭicaraṇavasena pavattavacanaṃ, tadeva pucchitamatthaṃ ṭhapetvā aññaṃ vadati pakāsetīti aññavādakanti āha ‘‘aññenaññaṃ paṭicaraṇassetaṃ nāma’’nti. Tuṇhībhūtassetaṃ nāmanti tuṇhībhāvassetaṃ nāmaṃ, ayameva vā pāṭho. Aññavādakaṃ āropetunti aññavāde āropetuṃ. Vihesakanti vihesakattaṃ.
99. பாளியங் ந உக்³கா⁴டேதுகாமோதி படிச்சா²தே³துகாமோ.
99. Pāḷiyaṃ na ugghāṭetukāmoti paṭicchādetukāmo.
100. அனாரோபிதே அஞ்ஞவாத³கேதி வுத்தது³க்கடங் பாளியங் ஆக³தஅஞ்ஞேனஞ்ஞபடிசரணவஸேன யுஜ்ஜதி, அட்ட²கதா²யங் ஆக³தனயேன பன முஸாவாதே³ன அஞ்ஞேனஞ்ஞங் படிசரந்தஸ்ஸ பாசித்தியேன ஸத்³தி⁴ங் து³க்கடங், ஆரோபிதே இமினாவ பாசித்தியங். கேசி பன ‘‘முஸாவாத³பாசித்தியேன ஸத்³தி⁴ங் பாசித்தியத்³வய’’ந்தி வத³ந்தி, வீமங்ஸிதப்³ப³ங். ஆதி³கம்மிகஸ்ஸபி முஸாவாதே³ இமினாவ அனாபத்தீதி த³ட்ட²ப்³ப³ங். த⁴ம்மகம்மேன ஆரோபிததா, ஆபத்தியா வா வத்து²னா வா அனுயுஞ்ஜியமானதா, சா²தே³துகாமதாய அஞ்ஞேனஞ்ஞங் படிசரணங், துண்ஹீபா⁴வோ சாதி இமானெத்த² தீணி அங்கா³னி.
100.Anāropite aññavādaketi vuttadukkaṭaṃ pāḷiyaṃ āgataaññenaññapaṭicaraṇavasena yujjati, aṭṭhakathāyaṃ āgatanayena pana musāvādena aññenaññaṃ paṭicarantassa pācittiyena saddhiṃ dukkaṭaṃ, āropite imināva pācittiyaṃ. Keci pana ‘‘musāvādapācittiyena saddhiṃ pācittiyadvaya’’nti vadanti, vīmaṃsitabbaṃ. Ādikammikassapi musāvāde imināva anāpattīti daṭṭhabbaṃ. Dhammakammena āropitatā, āpattiyā vā vatthunā vā anuyuñjiyamānatā, chādetukāmatāya aññenaññaṃ paṭicaraṇaṃ, tuṇhībhāvo cāti imānettha tīṇi aṅgāni.
அஞ்ஞவாத³கஸிக்கா²பத³வண்ணனா நிட்டி²தா.
Aññavādakasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. அஞ்ஞவாத³கஸிக்கா²பத³வண்ணனா • 2. Aññavādakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. அஞ்ஞவாத³கஸிக்கா²பத³வண்ணனா • 2. Aññavādakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. அஞ்ஞவாத³கஸிக்கா²பத³வண்ணனா • 2. Aññavādakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. அஞ்ஞவாத³கஸிக்கா²பத³ங் • 2. Aññavādakasikkhāpadaṃ
