| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
২. অঞ্ঞৰাদকসিক্খাপদৰণ্ণনা
2. Aññavādakasikkhāpadavaṇṇanā
৯৪. দুতিযসিক্খাপদে – অনাচারং আচরিত্ৰাতি অকাতব্বং কত্ৰা; কাযৰচীদ্ৰারেসু আপত্তিং আপজ্জিত্ৰাতি ৰুত্তং হোতি। অঞ্ঞেনঞ্ঞং পটিচরতীতি অঞ্ঞেন ৰচনেন অঞ্ঞং ৰচনং পটিচরতি পটিচ্ছাদেতি অজ্ঝোত্থরতি; ইদানি তং পটিচরণৰিধিং দস্সেন্তো ‘‘কো আপন্নো’’তিআদিমাহ। তত্রাযং ৰচনসম্বন্ধো – সো কির কিঞ্চি ৰীতিক্কমং দিস্ৰা ‘‘আৰুসো, আপত্তিং আপন্নোসী’’তি সঙ্ঘমজ্ঝে আপত্তিযা অনুযুঞ্জিযমানো ‘‘কো আপন্নো’’তি ৰদতি। ‘‘ততো ত্ৰ’’ন্তি ৰুত্তে ‘‘অহং কিং আপন্নো’’তি ৰদতি। অথ ‘‘পাচিত্তিযং ৰা দুক্কটং ৰা’’তি ৰুত্তে ৰত্থুং পুচ্ছন্তো ‘‘অহং কিস্মিং আপন্নো’’তি ৰদতি। ততো ‘‘অসুকস্মিং নাম ৰত্থুস্মি’’ন্তি ৰুত্তে ‘‘অহং কথং আপন্নো, কিং করোন্তো আপন্নোম্হী’’তি পুচ্ছতি। অথ ‘‘ইদং নাম করোন্তো আপন্নো’’তি ৰুত্তে ‘‘কং ভণথা’’তি ৰদতি। ততো ‘‘তং ভণামা’’তি ৰুত্তে ‘‘কিং ভণথা’’তি ৰদতি।
94. Dutiyasikkhāpade – anācāraṃ ācaritvāti akātabbaṃ katvā; kāyavacīdvāresu āpattiṃ āpajjitvāti vuttaṃ hoti. Aññenaññaṃ paṭicaratīti aññena vacanena aññaṃ vacanaṃ paṭicarati paṭicchādeti ajjhottharati; idāni taṃ paṭicaraṇavidhiṃ dassento ‘‘ko āpanno’’tiādimāha. Tatrāyaṃ vacanasambandho – so kira kiñci vītikkamaṃ disvā ‘‘āvuso, āpattiṃ āpannosī’’ti saṅghamajjhe āpattiyā anuyuñjiyamāno ‘‘ko āpanno’’ti vadati. ‘‘Tato tva’’nti vutte ‘‘ahaṃ kiṃ āpanno’’ti vadati. Atha ‘‘pācittiyaṃ vā dukkaṭaṃ vā’’ti vutte vatthuṃ pucchanto ‘‘ahaṃ kismiṃ āpanno’’ti vadati. Tato ‘‘asukasmiṃ nāma vatthusmi’’nti vutte ‘‘ahaṃ kathaṃ āpanno, kiṃ karonto āpannomhī’’ti pucchati. Atha ‘‘idaṃ nāma karonto āpanno’’ti vutte ‘‘kaṃ bhaṇathā’’ti vadati. Tato ‘‘taṃ bhaṇāmā’’ti vutte ‘‘kiṃ bhaṇathā’’ti vadati.
অপিচেত্থ অযং পাল়িমুত্তকোপি অঞ্ঞেনঞ্ঞং পটিচরণৰিধি – ভিক্খূহি ‘‘তৰ সিপাটিকায কহাপণো দিট্ঠো, কিস্সেৰমসারুপ্পং করোসী’’তি ৰুত্তো ‘‘সুদিট্ঠং, ভন্তে, ন পনেসো কহাপণো; তিপুমণ্ডলং এত’’ন্তি ভণন্তো ৰা ‘‘ত্ৰং সুরং পিৰন্তো দিট্ঠো, কিস্সেৰং করোসী’’তি ৰুত্তো ‘‘সুদিট্ঠো , ভন্তে, ন পনেসা সুরা, ভেসজ্জত্থায সম্পাদিতং অরিট্ঠ’’ন্তি ভণন্তো ৰা ‘‘ত্ৰং পটিচ্ছন্নে আসনে মাতুগামেন সদ্ধিং নিসিন্নো দিট্ঠো, কিস্সেৰমসারুপ্পং করোসী’’তি ৰুত্তো ‘‘যেন দিট্ঠং সুদিট্ঠং, ৰিঞ্ঞূ পনেত্থ দুতিযো অত্থি, সো কিস্স ন দিট্ঠো’’তি ভণন্তো ৰা, ‘‘ঈদিসং তযা কিঞ্চি দিট্ঠ’’ন্তি পুট্ঠো ‘‘ন সুণামী’’তি সোতমুপনেন্তো ৰা, সোতদ্ৰারে পুচ্ছন্তানং চক্খুং উপনেন্তো ৰা, অঞ্ঞেনঞ্ঞং পটিচরতীতি ৰেদিতব্বো। অঞ্ঞৰাদকং রোপেতূতি অঞ্ঞৰাদকং আরোপেতু; পতিট্ঠাপেতূতি অত্থো। ৰিহেসকং রোপেতূতি এতস্মিম্পি এসেৰ নযো।
Apicettha ayaṃ pāḷimuttakopi aññenaññaṃ paṭicaraṇavidhi – bhikkhūhi ‘‘tava sipāṭikāya kahāpaṇo diṭṭho, kissevamasāruppaṃ karosī’’ti vutto ‘‘sudiṭṭhaṃ, bhante, na paneso kahāpaṇo; tipumaṇḍalaṃ eta’’nti bhaṇanto vā ‘‘tvaṃ suraṃ pivanto diṭṭho, kissevaṃ karosī’’ti vutto ‘‘sudiṭṭho , bhante, na panesā surā, bhesajjatthāya sampāditaṃ ariṭṭha’’nti bhaṇanto vā ‘‘tvaṃ paṭicchanne āsane mātugāmena saddhiṃ nisinno diṭṭho, kissevamasāruppaṃ karosī’’ti vutto ‘‘yena diṭṭhaṃ sudiṭṭhaṃ, viññū panettha dutiyo atthi, so kissa na diṭṭho’’ti bhaṇanto vā, ‘‘īdisaṃ tayā kiñci diṭṭha’’nti puṭṭho ‘‘na suṇāmī’’ti sotamupanento vā, sotadvāre pucchantānaṃ cakkhuṃ upanento vā, aññenaññaṃ paṭicaratīti veditabbo. Aññavādakaṃ ropetūti aññavādakaṃ āropetu; patiṭṭhāpetūti attho. Vihesakaṃ ropetūti etasmimpi eseva nayo.
৯৮. অঞ্ঞৰাদকে ৰিহেসকে পাচিত্তিযন্তি এত্থ অঞ্ঞং ৰদতীতি অঞ্ঞৰাদকং; অঞ্ঞেনঞ্ঞং পটিচরণস্সেতং নামং। ৰিহেসেতীতি ৰিহেসকং; তুণ্হীভূতস্সেতং নামং, তস্মিং অঞ্ঞৰাদকে ৰিহেসকে। পাচিত্তিযন্তি ৰত্থুদ্ৰযে পাচিত্তিযদ্ৰযং ৰুত্তং।
98.Aññavādake vihesake pācittiyanti ettha aññaṃ vadatīti aññavādakaṃ; aññenaññaṃ paṭicaraṇassetaṃ nāmaṃ. Vihesetīti vihesakaṃ; tuṇhībhūtassetaṃ nāmaṃ, tasmiṃ aññavādake vihesake. Pācittiyanti vatthudvaye pācittiyadvayaṃ vuttaṃ.
১০০. অরোপিতে অঞ্ঞৰাদকেতি কম্মৰাচায অনারোপিতে অঞ্ঞৰাদকে। অরোপিতে ৰিহেসকেতি এতস্মিম্পি এসেৰ নযো।
100.Aropite aññavādaketi kammavācāya anāropite aññavādake. Aropite vihesaketi etasmimpi eseva nayo.
১০১. ধম্মকম্মে ধম্মকম্মসঞ্ঞীতিআদীসু যং তং অঞ্ঞৰাদকৰিহেসকরোপনকম্মং কতং, তঞ্চে ধম্মকম্মং হোতি, সো চ ভিক্খু তস্মিং ধম্মকম্মসঞ্ঞী অঞ্ঞৰাদকঞ্চ ৰিহেসকঞ্চ করোতি, অথস্স তস্মিং অঞ্ঞৰাদকে চ ৰিহেসকে চ আপত্তি পাচিত্তিযস্সাতি ইমিনা নযেন অত্থো ৰেদিতব্বো।
101.Dhammakamme dhammakammasaññītiādīsu yaṃ taṃ aññavādakavihesakaropanakammaṃ kataṃ, tañce dhammakammaṃ hoti, so ca bhikkhu tasmiṃ dhammakammasaññī aññavādakañca vihesakañca karoti, athassa tasmiṃ aññavādake ca vihesake ca āpatti pācittiyassāti iminā nayena attho veditabbo.
১০২. অজানন্তো পুচ্ছতীতি আপত্তিং ৰা আপন্নভাৰং অজানন্তোযেৰ ‘‘কিং তুম্হে ভণথ, অহং ন জানামী’’তি পুচ্ছতি। গিলানো ৰা ন কথেতীতি মুখে তাদিসো ব্যাধি হোতি, যেন কথেতুং ন সক্কোতি। সঙ্ঘস্স ভণ্ডনং ৰাতিআদীসু সঙ্ঘমজ্ঝে কথিতে তপ্পচ্চযা সঙ্ঘস্স ভণ্ডনং ৰা কলহো ৰা ৰিৰাদো ৰা ভৰিস্সতি, সো মা অহোসীতি মঞ্ঞমানো ন কথেতীতি ইমিনা নযেন অত্থো ৰেদিতব্বো। সেসং উত্তানমেৰাতি।
102.Ajānanto pucchatīti āpattiṃ vā āpannabhāvaṃ ajānantoyeva ‘‘kiṃ tumhe bhaṇatha, ahaṃ na jānāmī’’ti pucchati. Gilāno vā na kathetīti mukhe tādiso byādhi hoti, yena kathetuṃ na sakkoti. Saṅghassa bhaṇḍanaṃ vātiādīsu saṅghamajjhe kathite tappaccayā saṅghassa bhaṇḍanaṃ vā kalaho vā vivādo vā bhavissati, so mā ahosīti maññamāno na kathetīti iminā nayena attho veditabbo. Sesaṃ uttānamevāti.
তিসমুট্ঠানং – কাযচিত্ততো ৰাচাচিত্ততো কাযৰাচাচিত্ততো চ সমুট্ঠাতি, সিযা কিরিযং , সিযা অকিরিযং, অঞ্ঞেনঞ্ঞং পটিচরন্তস্স হি কিরিযং হোতি, তুণ্হীভাৰেন ৰিহেসন্তস্স অকিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি।
Tisamuṭṭhānaṃ – kāyacittato vācācittato kāyavācācittato ca samuṭṭhāti, siyā kiriyaṃ , siyā akiriyaṃ, aññenaññaṃ paṭicarantassa hi kiriyaṃ hoti, tuṇhībhāvena vihesantassa akiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
অঞ্ঞৰাদকসিক্খাপদং দুতিযং।
Aññavādakasikkhāpadaṃ dutiyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ২. ভূতগামৰগ্গো • 2. Bhūtagāmavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. অঞ্ঞৰাদকসিক্খাপদৰণ্ণনা • 2. Aññavādakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. অঞ্ঞৰাদকসিক্খাপদৰণ্ণনা • 2. Aññavādakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. অঞ্ঞৰাদকসিক্খাপদৰণ্ণনা • 2. Aññavādakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২. অঞ্ঞৰাদকসিক্খাপদং • 2. Aññavādakasikkhāpadaṃ
