| Library / Tipiṭaka / తిపిటక • Tipiṭaka / కఙ్ఖావితరణీ-అభినవ-టీకా • Kaṅkhāvitaraṇī-abhinava-ṭīkā |
౪. అఞ్ఞవిఞ్ఞాపనసిక్ఖాపదవణ్ణనా
4. Aññaviññāpanasikkhāpadavaṇṇanā
పటిలాభేనాతి పఠమవిఞ్ఞత్తితో ఊనతరస్సాపి అఞ్ఞస్స పటిలాభేన.
Paṭilābhenāti paṭhamaviññattito ūnatarassāpi aññassa paṭilābhena.
తస్మిం అప్పహోన్తే పున తఞ్ఞేవాతి యం పఠమం విఞ్ఞత్తం, థోకత్తా తస్మిం అప్పహోన్తే పున తఞ్ఞేవ విఞ్ఞాపేన్తియాతి అత్థో. అఞ్ఞేనపి అత్థే సతీ తి పఠమం విఞ్ఞత్తితో అఞ్ఞేనపి అత్థే సతి. తేన సద్ధిం అఞ్ఞఞ్చాతి యం పఠమం విఞ్ఞత్తం, తేన సద్ధిం అఞ్ఞఞ్చ. కిం వుత్తం హోతి? సచే పఠమం సప్పి విఞ్ఞత్తం, ‘‘యమకం పచితబ్బ’’న్తి చ వేజ్జేన వుత్తత్తా తేలేనాపి అత్థో హోతి. తతో ‘‘తేలేనాపి మే అత్థో’’తి ఏవమాదినా అఞ్ఞఞ్చ విఞ్ఞాపేన్తియాతి వుత్తం హోతి. ఆనిసంసం దస్సేత్వాతి ‘‘సచే కహాపణస్స సప్పి ఆభతం హోతి, ఇమినా మూలేన ద్విగుణం తేలం లబ్భతి, తేలేనాపి చ ఇదం కిచ్చం నిప్పజ్జతి, తస్మా తేలం ఆహరా’’తి ఏవం ఆనిసంసం దస్సేత్వా.
Tasmiṃ appahonte puna taññevāti yaṃ paṭhamaṃ viññattaṃ, thokattā tasmiṃ appahonte puna taññeva viññāpentiyāti attho. Aññenapi atthe satī ti paṭhamaṃ viññattito aññenapi atthe sati. Tena saddhiṃ aññañcāti yaṃ paṭhamaṃ viññattaṃ, tena saddhiṃ aññañca. Kiṃ vuttaṃ hoti? Sace paṭhamaṃ sappi viññattaṃ, ‘‘yamakaṃ pacitabba’’nti ca vejjena vuttattā telenāpi attho hoti. Tato ‘‘telenāpi me attho’’ti evamādinā aññañca viññāpentiyāti vuttaṃ hoti. Ānisaṃsaṃ dassetvāti ‘‘sace kahāpaṇassa sappi ābhataṃ hoti, iminā mūlena dviguṇaṃ telaṃ labbhati, telenāpi ca idaṃ kiccaṃ nippajjati, tasmā telaṃ āharā’’ti evaṃ ānisaṃsaṃ dassetvā.
అఞ్ఞవిఞ్ఞాపనసిక్ఖాపదవణ్ణనా నిట్ఠితా.
Aññaviññāpanasikkhāpadavaṇṇanā niṭṭhitā.
