| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
๔. อญฺญวิญฺญาปนสิกฺขาปทวณฺณนา
4. Aññaviññāpanasikkhāpadavaṇṇanā
ปฎิลาเภนาติ ปฐมวิญฺญตฺติโต อูนตรสฺสาปิ อญฺญสฺส ปฎิลาเภนฯ
Paṭilābhenāti paṭhamaviññattito ūnatarassāpi aññassa paṭilābhena.
ตสฺมิํ อปฺปโหเนฺต ปุน ตเญฺญวาติ ยํ ปฐมํ วิญฺญตฺตํ, โถกตฺตา ตสฺมิํ อปฺปโหเนฺต ปุน ตเญฺญว วิญฺญาเปนฺติยาติ อโตฺถฯ อเญฺญนปิ อเตฺถ สตี ติ ปฐมํ วิญฺญตฺติโต อเญฺญนปิ อเตฺถ สติฯ เตน สทฺธิํ อญฺญญฺจาติ ยํ ปฐมํ วิญฺญตฺตํ, เตน สทฺธิํ อญฺญญฺจฯ กิํ วุตฺตํ โหติ? สเจ ปฐมํ สปฺปิ วิญฺญตฺตํ, ‘‘ยมกํ ปจิตพฺพ’’นฺติ จ เวเชฺชน วุตฺตตฺตา เตเลนาปิ อโตฺถ โหติฯ ตโต ‘‘เตเลนาปิ เม อโตฺถ’’ติ เอวมาทินา อญฺญญฺจ วิญฺญาเปนฺติยาติ วุตฺตํ โหติฯ อานิสํสํ ทเสฺสตฺวาติ ‘‘สเจ กหาปณสฺส สปฺปิ อาภตํ โหติ, อิมินา มูเลน ทฺวิคุณํ เตลํ ลพฺภติ, เตเลนาปิ จ อิทํ กิจฺจํ นิปฺปชฺชติ, ตสฺมา เตลํ อาหรา’’ติ เอวํ อานิสํสํ ทเสฺสตฺวาฯ
Tasmiṃ appahonte puna taññevāti yaṃ paṭhamaṃ viññattaṃ, thokattā tasmiṃ appahonte puna taññeva viññāpentiyāti attho. Aññenapi atthe satī ti paṭhamaṃ viññattito aññenapi atthe sati. Tena saddhiṃ aññañcāti yaṃ paṭhamaṃ viññattaṃ, tena saddhiṃ aññañca. Kiṃ vuttaṃ hoti? Sace paṭhamaṃ sappi viññattaṃ, ‘‘yamakaṃ pacitabba’’nti ca vejjena vuttattā telenāpi attho hoti. Tato ‘‘telenāpi me attho’’ti evamādinā aññañca viññāpentiyāti vuttaṃ hoti. Ānisaṃsaṃ dassetvāti ‘‘sace kahāpaṇassa sappi ābhataṃ hoti, iminā mūlena dviguṇaṃ telaṃ labbhati, telenāpi ca idaṃ kiccaṃ nippajjati, tasmā telaṃ āharā’’ti evaṃ ānisaṃsaṃ dassetvā.
อญฺญวิญฺญาปนสิกฺขาปทวณฺณนา นิฎฺฐิตาฯ
Aññaviññāpanasikkhāpadavaṇṇanā niṭṭhitā.
