| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၄. အညဝိညာပနသိက္ခာပဒဝဏ္ဏနာ
4. Aññaviññāpanasikkhāpadavaṇṇanā
ပဋိလာဘေနာတိ ပဌမဝိညတ္တိတော ဦနတရသ္သာပိ အညသ္သ ပဋိလာဘေန။
Paṭilābhenāti paṭhamaviññattito ūnatarassāpi aññassa paṭilābhena.
တသ္မိံ အပ္ပဟောန္တေ ပုန တညေဝာတိ ယံ ပဌမံ ဝိညတ္တံ, ထောကတ္တာ တသ္မိံ အပ္ပဟောန္တေ ပုန တညေဝ ဝိညာပေန္တိယာတိ အတ္ထော။ အညေနပိ အတ္ထေ သတီ တိ ပဌမံ ဝိညတ္တိတော အညေနပိ အတ္ထေ သတိ။ တေန သဒ္ဓိံ အညဉ္စာတိ ယံ ပဌမံ ဝိညတ္တံ, တေန သဒ္ဓိံ အညဉ္စ။ ကိံ ဝုတ္တံ ဟောတိ? သစေ ပဌမံ သပ္ပိ ဝိညတ္တံ, ‘‘ယမကံ ပစိတဗ္ဗ’’န္တိ စ ဝေဇ္ဇေန ဝုတ္တတ္တာ တေလေနာပိ အတ္ထော ဟောတိ။ တတော ‘‘တေလေနာပိ မေ အတ္ထော’’တိ ဧဝမာဒိနာ အညဉ္စ ဝိညာပေန္တိယာတိ ဝုတ္တံ ဟောတိ။ အာနိသံသံ ဒသ္သေတ္ဝာတိ ‘‘သစေ ကဟာပဏသ္သ သပ္ပိ အာဘတံ ဟောတိ, ဣမိနာ မူလေန ဒ္ဝိဂုဏံ တေလံ လဗ္ဘတိ, တေလေနာပိ စ ဣဒံ ကိစ္စံ နိပ္ပဇ္ဇတိ, တသ္မာ တေလံ အာဟရာ’’တိ ဧဝံ အာနိသံသံ ဒသ္သေတ္ဝာ။
Tasmiṃ appahonte puna taññevāti yaṃ paṭhamaṃ viññattaṃ, thokattā tasmiṃ appahonte puna taññeva viññāpentiyāti attho. Aññenapi atthe satī ti paṭhamaṃ viññattito aññenapi atthe sati. Tena saddhiṃ aññañcāti yaṃ paṭhamaṃ viññattaṃ, tena saddhiṃ aññañca. Kiṃ vuttaṃ hoti? Sace paṭhamaṃ sappi viññattaṃ, ‘‘yamakaṃ pacitabba’’nti ca vejjena vuttattā telenāpi attho hoti. Tato ‘‘telenāpi me attho’’ti evamādinā aññañca viññāpentiyāti vuttaṃ hoti. Ānisaṃsaṃ dassetvāti ‘‘sace kahāpaṇassa sappi ābhataṃ hoti, iminā mūlena dviguṇaṃ telaṃ labbhati, telenāpi ca idaṃ kiccaṃ nippajjati, tasmā telaṃ āharā’’ti evaṃ ānisaṃsaṃ dassetvā.
အညဝိညာပနသိက္ခာပဒဝဏ္ဏနာ နိဋ္ဌိတာ။
Aññaviññāpanasikkhāpadavaṇṇanā niṭṭhitā.
