| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༤. ཨཉྙཝིཉྙཱཔནསིཀྑཱཔདཝཎྞནཱ
4. Aññaviññāpanasikkhāpadavaṇṇanā
པཊིལཱབྷེནཱཏི པཋམཝིཉྙཏྟིཏོ ཨཱུནཏརསྶཱཔི ཨཉྙསྶ པཊིལཱབྷེན།
Paṭilābhenāti paṭhamaviññattito ūnatarassāpi aññassa paṭilābhena.
ཏསྨིཾ ཨཔྤཧོནྟེ པུན ཏཉྙེཝཱཏི ཡཾ པཋམཾ ཝིཉྙཏྟཾ, ཐོཀཏྟཱ ཏསྨིཾ ཨཔྤཧོནྟེ པུན ཏཉྙེཝ ཝིཉྙཱཔེནྟིཡཱཏི ཨཏྠོ། ཨཉྙེནཔི ཨཏྠེ སཏཱི ཏི པཋམཾ ཝིཉྙཏྟིཏོ ཨཉྙེནཔི ཨཏྠེ སཏི། ཏེན སདྡྷིཾ ཨཉྙཉྩཱཏི ཡཾ པཋམཾ ཝིཉྙཏྟཾ, ཏེན སདྡྷིཾ ཨཉྙཉྩ། ཀིཾ ཝུཏྟཾ ཧོཏི? སཙེ པཋམཾ སཔྤི ཝིཉྙཏྟཾ, ‘‘ཡམཀཾ པཙིཏབྦ’’ནྟི ཙ ཝེཛྫེན ཝུཏྟཏྟཱ ཏེལེནཱཔི ཨཏྠོ ཧོཏི། ཏཏོ ‘‘ཏེལེནཱཔི མེ ཨཏྠོ’’ཏི ཨེཝམཱདིནཱ ཨཉྙཉྩ ཝིཉྙཱཔེནྟིཡཱཏི ཝུཏྟཾ ཧོཏི། ཨཱནིསཾསཾ དསྶེཏྭཱཏི ‘‘སཙེ ཀཧཱཔཎསྶ སཔྤི ཨཱབྷཏཾ ཧོཏི, ཨིམིནཱ མཱུལེན དྭིགུཎཾ ཏེལཾ ལབྦྷཏི, ཏེལེནཱཔི ཙ ཨིདཾ ཀིཙྩཾ ནིཔྤཛྫཏི, ཏསྨཱ ཏེལཾ ཨཱཧརཱ’’ཏི ཨེཝཾ ཨཱནིསཾསཾ དསྶེཏྭཱ།
Tasmiṃ appahonte puna taññevāti yaṃ paṭhamaṃ viññattaṃ, thokattā tasmiṃ appahonte puna taññeva viññāpentiyāti attho. Aññenapi atthe satī ti paṭhamaṃ viññattito aññenapi atthe sati. Tena saddhiṃ aññañcāti yaṃ paṭhamaṃ viññattaṃ, tena saddhiṃ aññañca. Kiṃ vuttaṃ hoti? Sace paṭhamaṃ sappi viññattaṃ, ‘‘yamakaṃ pacitabba’’nti ca vejjena vuttattā telenāpi attho hoti. Tato ‘‘telenāpi me attho’’ti evamādinā aññañca viññāpentiyāti vuttaṃ hoti. Ānisaṃsaṃ dassetvāti ‘‘sace kahāpaṇassa sappi ābhataṃ hoti, iminā mūlena dviguṇaṃ telaṃ labbhati, telenāpi ca idaṃ kiccaṃ nippajjati, tasmā telaṃ āharā’’ti evaṃ ānisaṃsaṃ dassetvā.
ཨཉྙཝིཉྙཱཔནསིཀྑཱཔདཝཎྞནཱ ནིཊྛིཏཱ།
Aññaviññāpanasikkhāpadavaṇṇanā niṭṭhitā.
