| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൩. അഞ്ഞിന്ദ്രിയസുത്തവണ്ണനാ
3. Aññindriyasuttavaṇṇanā
൪൯൩. തതിയേ അനഞ്ഞാതഞ്ഞസ്സാമീതിന്ദ്രിയന്തി ‘‘അനമതഗ്ഗേ സംസാരേ അജാനിതപുബ്ബം ധമ്മം ജാനിസ്സാമീ’’തി പടിപന്നസ്സ സോതാപത്തിമഗ്ഗക്ഖണേ ഉപ്പന്നം ഇന്ദ്രിയം. അഞ്ഞിന്ദ്രിയന്തി തേസംയേവ ഞാതധമ്മാനം ആജാനനാകാരേന സോതാപത്തിഫലാദീസു ഛസു ഠാനേസു ഉപ്പന്നം ഇന്ദ്രിയം. അഞ്ഞാതാവിന്ദ്രിയന്തി അഞ്ഞാതാവീസു അരഹത്തഫലധമ്മേസു ഉപ്പന്നം ഇന്ദ്രിയം. തത്ഥ തത്ഥ തേന തേനാകാരേന ഉപ്പന്നസ്സ ഞാണസ്സേവേതം അധിവചനം. ഇദമ്പി സുത്തം അത്ഥുപ്പത്തികമേവ. സങ്ഘമജ്ഝസ്മിഞ്ഹി ‘‘കതി നു ഖോ ലോകുത്തരിന്ദ്രിയാനീ’’തി കഥാ ഉദപാദി, അഥ ഭഗവാ താനി ദസ്സേന്തോ തീണിമാനി, ഭിക്ഖവേ, ഇന്ദ്രിയാനീതിആദിമാഹ.
493. Tatiye anaññātaññassāmītindriyanti ‘‘anamatagge saṃsāre ajānitapubbaṃ dhammaṃ jānissāmī’’ti paṭipannassa sotāpattimaggakkhaṇe uppannaṃ indriyaṃ. Aññindriyanti tesaṃyeva ñātadhammānaṃ ājānanākārena sotāpattiphalādīsu chasu ṭhānesu uppannaṃ indriyaṃ. Aññātāvindriyanti aññātāvīsu arahattaphaladhammesu uppannaṃ indriyaṃ. Tattha tattha tena tenākārena uppannassa ñāṇassevetaṃ adhivacanaṃ. Idampi suttaṃ atthuppattikameva. Saṅghamajjhasmiñhi ‘‘kati nu kho lokuttarindriyānī’’ti kathā udapādi, atha bhagavā tāni dassento tīṇimāni, bhikkhave, indriyānītiādimāha.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൩. അഞ്ഞിന്ദ്രിയസുത്തം • 3. Aññindriyasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൩. അഞ്ഞിന്ദ്രിയസുത്തവണ്ണനാ • 3. Aññindriyasuttavaṇṇanā
