| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
५. अञ्ञो अनुसयोतिकथावण्णना
5. Añño anusayotikathāvaṇṇanā
७००-७०१. इदानि अञ्ञो अनुसयोतिकथा नाम होति। तत्थ यस्मा पुथुज्जनो कुसलाब्याकते चित्ते वत्तमाने सानुसयोति वत्तब्बो, न परियुट्ठितोति तस्मा अञ्ञो अनुसयो, अञ्ञं परियुट्ठानन्ति येसं लद्धि, सेय्यथापि अन्धकानं; ते सन्धाय अञ्ञो कामरागानुसयोति पुच्छा सकवादिस्स पटिञ्ञा इतरस्स। सेसं हेट्ठा अनुसयकथायं वुत्तनयेनेव वेदितब्बं। सानुसयोतिआदि पन तस्मिं समये अनुसयस्स अप्पहीनत्ता सानुसयोति वत्तब्बतं, अनुप्पन्नत्ता च परियुट्ठितोति अवत्तब्बतं दीपेति, न अनुसयपरियुट्ठानानं अञ्ञत्तं, तस्मा असाधकन्ति।
700-701. Idāni añño anusayotikathā nāma hoti. Tattha yasmā puthujjano kusalābyākate citte vattamāne sānusayoti vattabbo, na pariyuṭṭhitoti tasmā añño anusayo, aññaṃ pariyuṭṭhānanti yesaṃ laddhi, seyyathāpi andhakānaṃ; te sandhāya añño kāmarāgānusayoti pucchā sakavādissa paṭiññā itarassa. Sesaṃ heṭṭhā anusayakathāyaṃ vuttanayeneva veditabbaṃ. Sānusayotiādi pana tasmiṃ samaye anusayassa appahīnattā sānusayoti vattabbataṃ, anuppannattā ca pariyuṭṭhitoti avattabbataṃ dīpeti, na anusayapariyuṭṭhānānaṃ aññattaṃ, tasmā asādhakanti.
अञ्ञो अनुसयोतिकथावण्णना।
Añño anusayotikathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१४०) ५. अञ्ञो अनुसयोतिकथा • (140) 5. Añño anusayotikathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ५. अञ्ञोअनुसयोतिकथावण्णना • 5. Aññoanusayotikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ५. अञ्ञोअनुसयोतिकथावण्णना • 5. Aññoanusayotikathāvaṇṇanā
