| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೯. ಅನೋಮದಸ್ಸೀಬುದ್ಧವಂಸೋ
9. Anomadassībuddhavaṃso
೧.
1.
ಸೋಭಿತಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ।
Sobhitassa aparena, sambuddho dvipaduttamo;
ಅನೋಮದಸ್ಸೀ ಅಮಿತಯಸೋ, ತೇಜಸ್ಸೀ ದುರತಿಕ್ಕಮೋ॥
Anomadassī amitayaso, tejassī duratikkamo.
೨.
2.
ಸೋ ಛೇತ್ವಾ ಬನ್ಧನಂ ಸಬ್ಬಂ, ವಿದ್ಧಂಸೇತ್ವಾ ತಯೋ ಭವೇ।
So chetvā bandhanaṃ sabbaṃ, viddhaṃsetvā tayo bhave;
ಅನಿವತ್ತಿಗಮನಂ ಮಗ್ಗಂ, ದೇಸೇಸಿ ದೇವಮಾನುಸೇ॥
Anivattigamanaṃ maggaṃ, desesi devamānuse.
೩.
3.
ಸಾಗರೋವ ಅಸಙ್ಖೋಭೋ, ಪಬ್ಬತೋವ ದುರಾಸದೋ।
Sāgarova asaṅkhobho, pabbatova durāsado;
ಆಕಾಸೋವ ಅನನ್ತೋ ಸೋ, ಸಾಲರಾಜಾವ ಫುಲ್ಲಿತೋ॥
Ākāsova ananto so, sālarājāva phullito.
೪.
4.
ದಸ್ಸನೇನಪಿ ತಂ ಬುದ್ಧಂ, ತೋಸಿತಾ ಹೋನ್ತಿ ಪಾಣಿನೋ।
Dassanenapi taṃ buddhaṃ, tositā honti pāṇino;
ಬ್ಯಾಹರನ್ತಂ ಗಿರಂ ಸುತ್ವಾ, ಅಮತಂ ಪಾಪುಣನ್ತಿ ತೇ॥
Byāharantaṃ giraṃ sutvā, amataṃ pāpuṇanti te.
೫.
5.
ಧಮ್ಮಾಭಿಸಮಯೋ ತಸ್ಸ, ಇದ್ಧೋ ಫೀತೋ ತದಾ ಅಹು।
Dhammābhisamayo tassa, iddho phīto tadā ahu;
ಕೋಟಿಸತಾನಿ ಅಭಿಸಮಿಂಸು, ಪಠಮೇ ಧಮ್ಮದೇಸನೇ॥
Koṭisatāni abhisamiṃsu, paṭhame dhammadesane.
೬.
6.
ತತೋ ಪರಂ ಅಭಿಸಮಯೇ, ವಸ್ಸನ್ತೇ ಧಮ್ಮವುಟ್ಠಿಯೋ।
Tato paraṃ abhisamaye, vassante dhammavuṭṭhiyo;
ಅಸೀತಿಕೋಟಿಯೋಭಿಸಮಿಂಸು, ದುತಿಯೇ ಧಮ್ಮದೇಸನೇ॥
Asītikoṭiyobhisamiṃsu, dutiye dhammadesane.
೭.
7.
ತತೋಪರಞ್ಹಿ ವಸ್ಸನ್ತೇ, ತಪ್ಪಯನ್ತೇ ಚ ಪಾಣಿನಂ।
Tatoparañhi vassante, tappayante ca pāṇinaṃ;
ಅಟ್ಠಸತ್ತತಿಕೋಟೀನಂ, ತತಿಯಾಭಿಸಮಯೋ ಅಹು॥
Aṭṭhasattatikoṭīnaṃ, tatiyābhisamayo ahu.
೮.
8.
ಸನ್ನಿಪಾತಾ ತಯೋ ಆಸುಂ, ತಸ್ಸಾಪಿ ಚ ಮಹೇಸಿನೋ।
Sannipātā tayo āsuṃ, tassāpi ca mahesino;
ಅಭಿಞ್ಞಾಬಲಪ್ಪತ್ತಾನಂ, ಪುಪ್ಫಿತಾನಂ ವಿಮುತ್ತಿಯಾ॥
Abhiññābalappattānaṃ, pupphitānaṃ vimuttiyā.
೯.
9.
ಅಟ್ಠಸತಸಹಸ್ಸಾನಂ, ಸನ್ನಿಪಾತೋ ತದಾ ಅಹು।
Aṭṭhasatasahassānaṃ, sannipāto tadā ahu;
ಪಹೀನಮದಮೋಹಾನಂ, ಸನ್ತಚಿತ್ತಾನ ತಾದಿನಂ॥
Pahīnamadamohānaṃ, santacittāna tādinaṃ.
೧೦.
10.
ಸತ್ತಸತಸಹಸ್ಸಾನಂ , ದುತಿಯೋ ಆಸಿ ಸಮಾಗಮೋ।
Sattasatasahassānaṃ , dutiyo āsi samāgamo;
ಅನಙ್ಗಣಾನಂ ವಿರಜಾನಂ, ಉಪಸನ್ತಾನ ತಾದಿನಂ॥
Anaṅgaṇānaṃ virajānaṃ, upasantāna tādinaṃ.
೧೧.
11.
ಛನ್ನಂ ಸತಸಹಸ್ಸಾನಂ, ತತಿಯೋ ಆಸಿ ಸಮಾಗಮೋ।
Channaṃ satasahassānaṃ, tatiyo āsi samāgamo;
ಅಭಿಞ್ಞಾಬಲಪ್ಪತ್ತಾನಂ, ನಿಬ್ಬುತಾನಂ ತಪಸ್ಸಿನಂ॥
Abhiññābalappattānaṃ, nibbutānaṃ tapassinaṃ.
೧೨.
12.
ಅಹಂ ತೇನ ಸಮಯೇನ, ಯಕ್ಖೋ ಆಸಿಂ ಮಹಿದ್ಧಿಕೋ।
Ahaṃ tena samayena, yakkho āsiṃ mahiddhiko;
ನೇಕಾನಂ ಯಕ್ಖಕೋಟೀನಂ, ವಸವತ್ತಿಮ್ಹಿ ಇಸ್ಸರೋ॥
Nekānaṃ yakkhakoṭīnaṃ, vasavattimhi issaro.
೧೩.
13.
ತದಾಪಿ ತಂ ಬುದ್ಧವರಂ, ಉಪಗನ್ತ್ವಾ ಮಹೇಸಿನಂ।
Tadāpi taṃ buddhavaraṃ, upagantvā mahesinaṃ;
ಅನ್ನಪಾನೇನ ತಪ್ಪೇಸಿಂ, ಸಸಙ್ಘಂ ಲೋಕನಾಯಕಂ॥
Annapānena tappesiṃ, sasaṅghaṃ lokanāyakaṃ.
೧೪.
14.
ಸೋಪಿ ಮಂ ತದಾ ಬ್ಯಾಕಾಸಿ, ವಿಸುದ್ಧನಯನೋ ಮುನಿ।
Sopi maṃ tadā byākāsi, visuddhanayano muni;
‘‘ಅಪರಿಮೇಯ್ಯಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Aparimeyyito kappe, ayaṃ buddho bhavissati.
೧೫.
15.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೬.
16.
ತಸ್ಸಾಪಿ ವಚನಂ ಸುತ್ವಾ, ಹಟ್ಠೋ ಸಂವಿಗ್ಗಮಾನಸೋ।
Tassāpi vacanaṃ sutvā, haṭṭho saṃviggamānaso;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೭.
17.
ನಗರಂ ಚನ್ದವತೀ ನಾಮ, ಯಸವಾ ನಾಮ ಖತ್ತಿಯೋ।
Nagaraṃ candavatī nāma, yasavā nāma khattiyo;
ಮಾತಾ ಯಸೋಧರಾ ನಾಮ, ಅನೋಮದಸ್ಸಿಸ್ಸ ಸತ್ಥುನೋ॥
Mātā yasodharā nāma, anomadassissa satthuno.
೧೮.
18.
ದಸವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।
Dasavassasahassāni, agāraṃ ajjha so vasi;
ಸಿರೀ ಉಪಸಿರೀ ವಡ್ಢೋ, ತಯೋ ಪಾಸಾದಮುತ್ತಮಾ॥
Sirī upasirī vaḍḍho, tayo pāsādamuttamā.
೧೯.
19.
ತೇವೀಸತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Tevīsatisahassāni, nāriyo samalaṅkatā;
ಸಿರಿಮಾ ನಾಮ ಸಾ ನಾರೀ, ಉಪವಾಣೋ ನಾಮ ಅತ್ರಜೋ॥
Sirimā nāma sā nārī, upavāṇo nāma atrajo.
೨೦.
20.
ನಿಮಿತ್ತೇ ಚತುರೋ ದಿಸ್ವಾ, ಸಿವಿಕಾಯಾಭಿನಿಕ್ಖಮಿ।
Nimitte caturo disvā, sivikāyābhinikkhami;
ಅನೂನದಸಮಾಸಾನಿ, ಪಧಾನಂ ಪದಹೀ ಜಿನೋ॥
Anūnadasamāsāni, padhānaṃ padahī jino.
೨೧.
21.
ಬ್ರಹ್ಮುನಾ ಯಾಚಿತೋ ಸನ್ತೋ, ಅನೋಮದಸ್ಸೀ ಮಹಾಮುನಿ।
Brahmunā yācito santo, anomadassī mahāmuni;
೨೨.
22.
ವರುಣೋ ನಾಮುಪಟ್ಠಾಕೋ, ಅನೋಮದಸ್ಸಿಸ್ಸ ಸತ್ಥುನೋ॥
Varuṇo nāmupaṭṭhāko, anomadassissa satthuno.
೨೩.
23.
ಸುನ್ದರೀ ಚ ಸುಮನಾ ಚ, ಅಹೇಸುಂ ಅಗ್ಗಸಾವಿಕಾ।
Sundarī ca sumanā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಅಜ್ಜುನೋತಿ ಪವುಚ್ಚತಿ॥
Bodhi tassa bhagavato, ajjunoti pavuccati.
೨೪.
24.
ನನ್ದಿವಡ್ಢೋ ಸಿರಿವಡ್ಢೋ, ಅಹೇಸುಂ ಅಗ್ಗುಪಟ್ಠಕಾ।
Nandivaḍḍho sirivaḍḍho, ahesuṃ aggupaṭṭhakā;
ಉಪ್ಪಲಾ ಚೇವ ಪದುಮಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Uppalā ceva padumā ca, ahesuṃ aggupaṭṭhikā.
೨೫.
25.
ಅಟ್ಠಪಣ್ಣಾಸರತನಂ , ಅಚ್ಚುಗ್ಗತೋ ಮಹಾಮುನಿ।
Aṭṭhapaṇṇāsaratanaṃ , accuggato mahāmuni;
ಪಭಾ ನಿದ್ಧಾವತೀ ತಸ್ಸ, ಸತರಂಸೀವ ಉಗ್ಗತೋ॥
Pabhā niddhāvatī tassa, sataraṃsīva uggato.
೨೬.
26.
ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ।
Vassasatasahassāni, āyu vijjati tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೭.
27.
ಸುಪುಪ್ಫಿತಂ ಪಾವಚನಂ, ಅರಹನ್ತೇಹಿ ತಾದಿಹಿ।
Supupphitaṃ pāvacanaṃ, arahantehi tādihi;
ವೀತರಾಗೇಹಿ ವಿಮಲೇಹಿ, ಸೋಭಿತ್ಥ ಜಿನಸಾಸನಂ॥
Vītarāgehi vimalehi, sobhittha jinasāsanaṃ.
೨೮.
28.
ಸೋ ಚ ಸತ್ಥಾ ಅಮಿತಯಸೋ, ಯುಗಾನಿ ತಾನಿ ಅತುಲಿಯಾನಿ।
So ca satthā amitayaso, yugāni tāni atuliyāni;
ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ॥
Sabbaṃ tamantarahitaṃ, nanu rittā sabbasaṅkhārā.
೨೯.
29.
ಅನೋಮದಸ್ಸೀ ಜಿನೋ ಸತ್ಥಾ, ಧಮ್ಮಾರಾಮಮ್ಹಿ ನಿಬ್ಬುತೋ।
Anomadassī jino satthā, dhammārāmamhi nibbuto;
ತತ್ಥೇವಸ್ಸ ಜಿನಥೂಪೋ, ಉಬ್ಬೇಧೋ ಪಞ್ಚವೀಸತೀತಿ॥
Tatthevassa jinathūpo, ubbedho pañcavīsatīti.
ಅನೋಮದಸ್ಸಿಸ್ಸ ಭಗವತೋ ವಂಸೋ ಸತ್ತಮೋ।
Anomadassissa bhagavato vaṃso sattamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೯. ಅನೋಮದಸ್ಸೀಬುದ್ಧವಂಸವಣ್ಣನಾ • 9. Anomadassībuddhavaṃsavaṇṇanā
