| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. အနောမသုတ္တဝဏ္ဏနာ
5. Anomasuttavaṇṇanā
၄၅. အနောမနာမန္တိ အနူနနာမံ။ ဂုဏနေမိတ္တိကာနိ ဧဝ ဟိ ဘဂဝတော နာမာနိ။ ဂုဏာနဉ္စသ္သ ပရိပုဏ္ဏတာယ အနူနနာမန္တိ အာဟ ‘‘သဗ္ဗဂုဏသမန္နာဂတတ္တာ’’တိအာဒိ။ အပိစ တထာ တေဝိဇ္ဇော, ဆဠဘိညောတိအာဒီနိ နာမာနိ အနောမနာမာနိ န ဟောန္တိ ပရိစ္ဆိန္နဝိသယတ္တာ, ဘဂဝတော ပန သတ္ထာ, သဗ္ဗညူ, သမ္မာသမ္ဗုဒ္ဓောတိအာဒီနိ နာမာနိ အနောမနာမာနိ နာမ မဟာဝိသယတ္တာ အနူနဘာဝတော။ တေနာဟ ‘‘အဝေကလ္လနာမ’’န္တိ။ ခန္ဓန္တရာဒယောတိ ခန္ဓဝိသေသာဒိကေ။ ဉာဏေန ယာထာဝတော အရဏီယဋ္ဌေန အတ္ထေ။ အန္ဝယပညာဓိဂမာယာတိ လောကုတ္တရပညာပဋိလာဘာယ။ ပဋိပဒန္တိ သမထဝိပသ္သနာပဋိပဒံ။ ကိလေသကာမာနံ ဝသေန အလ္လီယိတဗ္ဗဋ္ဌေန ကာမာ ဧဝ အာလယော။ အတီတကာလေယေဝ ကမနတံ ဂဟေတ္ဝာ ဝုတ္တံ ‘‘ကမမာန’’န္တိ။ န ဧတရဟိ တဒဘာဝတောတိ အာဟ ‘‘အတီတံ ပန ဥပာဒာယ ဣဒံ ဝုတ္တ’’န္တိ။ မဟာနုဘာဝတာဒိနာ မဟန္တာနံ။
45.Anomanāmanti anūnanāmaṃ. Guṇanemittikāni eva hi bhagavato nāmāni. Guṇānañcassa paripuṇṇatāya anūnanāmanti āha ‘‘sabbaguṇasamannāgatattā’’tiādi. Apica tathā tevijjo, chaḷabhiññotiādīni nāmāni anomanāmāni na honti paricchinnavisayattā, bhagavato pana satthā, sabbaññū, sammāsambuddhotiādīni nāmāni anomanāmāni nāma mahāvisayattā anūnabhāvato. Tenāha ‘‘avekallanāma’’nti. Khandhantarādayoti khandhavisesādike. Ñāṇena yāthāvato araṇīyaṭṭhena atthe. Anvayapaññādhigamāyāti lokuttarapaññāpaṭilābhāya. Paṭipadanti samathavipassanāpaṭipadaṃ. Kilesakāmānaṃ vasena allīyitabbaṭṭhena kāmā eva ālayo. Atītakāleyeva kamanataṃ gahetvā vuttaṃ ‘‘kamamāna’’nti. Na etarahi tadabhāvatoti āha ‘‘atītaṃ pana upādāya idaṃ vutta’’nti. Mahānubhāvatādinā mahantānaṃ.
အနောမသုတ္တဝဏ္ဏနာ နိဋ္ဌိတာ။
Anomasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. အနောမသုတ္တံ • 5. Anomasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. အနောမသုတ္တဝဏ္ဏနာ • 5. Anomasuttavaṇṇanā
