| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. අනොත්‌තප්‌පීසුත්‌තං
2. Anottappīsuttaṃ
145. එවං මෙ සුතං – එකං සමයං ආයස්‌මා ච මහාකස්‌සපො ආයස්‌මා ච සාරිපුත්‌තො බාරාණසියං විහරන්‌ති ඉසිපතනෙ මිගදායෙ. අථ ඛො ආයස්‌මා සාරිපුත්‌තො සායන්‌හසමයං පටිසල්‌ලානා වුට්‌ඨිතො යෙනායස්‌මා මහාකස්‌සපො තෙනුපසඞ්‌කමි; උපසඞ්‌කමිත්‌වා ආයස්‌මතා මහාකස්‌සපෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා සාරිපුත්‌තො ආයස්‌මන්‌තං මහාකස්‌සපං එතදවොච – ‘‘වුච්‌චති හිදං, ආවුසො කස්‌සප, අනාතාපී අනොත්‌තප්‌පී අභබ්‌බො සම්‌බොධාය අභබ්‌බො නිබ්‌බානාය අභබ්‌බො අනුත්‌තරස්‌ස යොගක්‌ඛෙමස්‌ස අධිගමාය; ආතාපී ච ඛො ඔත්‌තප්‌පී භබ්‌බො සම්‌බොධාය භබ්‌බො නිබ්‌බානාය භබ්‌බො අනුත්‌තරස්‌ස යොගක්‌ඛෙමස්‌ස අධිගමායා’’ති.
145. Evaṃ me sutaṃ – ekaṃ samayaṃ āyasmā ca mahākassapo āyasmā ca sāriputto bārāṇasiyaṃ viharanti isipatane migadāye. Atha kho āyasmā sāriputto sāyanhasamayaṃ paṭisallānā vuṭṭhito yenāyasmā mahākassapo tenupasaṅkami; upasaṅkamitvā āyasmatā mahākassapena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā sāriputto āyasmantaṃ mahākassapaṃ etadavoca – ‘‘vuccati hidaṃ, āvuso kassapa, anātāpī anottappī abhabbo sambodhāya abhabbo nibbānāya abhabbo anuttarassa yogakkhemassa adhigamāya; ātāpī ca kho ottappī bhabbo sambodhāya bhabbo nibbānāya bhabbo anuttarassa yogakkhemassa adhigamāyā’’ti.
‘‘කිත්‌තාවතා නු ඛො, ආවුසො, අනාතාපී හොති අනොත්‌තප්‌පී අභබ්‌බො සම්‌බොධාය අභබ්‌බො නිබ්‌බානාය අභබ්‌බො අනුත්‌තරස්‌ස යොගක්‌ඛෙමස්‌ස අධිගමාය; කිත්‌තාවතා ච පනාවුසො, ආතාපී හොති ඔත්‌තප්‌පී භබ්‌බො සම්‌බොධාය භබ්‌බො නිබ්‌බානාය භබ්‌බො අනුත්‌තරස්‌ස යොගක්‌ඛෙමස්‌ස අධිගමායා’’ති? ‘‘ඉධාවුසො, භික්‌ඛු ‘අනුප්‌පන්‌නා මෙ පාපකා අකුසලා ධම්‌මා උප්‌පජ්‌ජමානා අනත්‌ථාය සංවත්‌තෙය්‍යු’න්‌ති න ආතප්‌පං කරොති, ‘උප්‌පන්‌නා මෙ පාපකා අකුසලා ධම්‌මා අප්‌පහීයමානා අනත්‌ථාය සංවත්‌තෙය්‍යු’න්‌ති න ආතප්‌පං කරොති, ‘අනුප්‌පන්‌නා මෙ කුසලා ධම්‌මානුප්‌පජ්‌ජමානා අනත්‌ථාය සංවත්‌තෙය්‍යු’න්‌ති න ආතප්‌පං කරොති, ‘උප්‌පන්‌නා මෙ කුසලා ධම්‌මා නිරුජ්‌ඣමානා අනත්‌ථාය සංවත්‌තෙය්‍යු’න්‌ති න ආතප්‌පං කරොති. එවං ඛො, ආවුසො, අනාතාපී හොති’’.
‘‘Kittāvatā nu kho, āvuso, anātāpī hoti anottappī abhabbo sambodhāya abhabbo nibbānāya abhabbo anuttarassa yogakkhemassa adhigamāya; kittāvatā ca panāvuso, ātāpī hoti ottappī bhabbo sambodhāya bhabbo nibbānāya bhabbo anuttarassa yogakkhemassa adhigamāyā’’ti? ‘‘Idhāvuso, bhikkhu ‘anuppannā me pāpakā akusalā dhammā uppajjamānā anatthāya saṃvatteyyu’nti na ātappaṃ karoti, ‘uppannā me pāpakā akusalā dhammā appahīyamānā anatthāya saṃvatteyyu’nti na ātappaṃ karoti, ‘anuppannā me kusalā dhammānuppajjamānā anatthāya saṃvatteyyu’nti na ātappaṃ karoti, ‘uppannā me kusalā dhammā nirujjhamānā anatthāya saṃvatteyyu’nti na ātappaṃ karoti. Evaṃ kho, āvuso, anātāpī hoti’’.
‘‘කථඤ්‌චාවුසො, අනොත්‌තප්‌පී හොති? ඉධාවුසො, භික්‌ඛු ‘අනුප්‌පන්‌නා මෙ පාපකා අකුසලා ධම්‌මා උප්‌පජ්‌ජමානා අනත්‌ථාය සංවත්‌තෙය්‍යු’න්‌ති න ඔත්‌තප්‌පති, ‘උප්‌පන්‌නා මෙ පාපකා අකුසලා ධම්‌මා අප්‌පහීයමානා අනත්‌ථාය සංවත්‌තෙය්‍යු’න්‌ති න ඔත්‌තප්‌පති, ‘අනුප්‌පන්‌නා මෙ කුසලා ධම්‌මානුප්‌පජ්‌ජමානා අනත්‌ථාය සංවත්‌තෙය්‍යු’න්‌ති න ඔත්‌තප්‌පති, ‘උප්‌පන්‌නා මෙ කුසලා ධම්‌මා නිරුජ්‌ඣමානා අනත්‌ථාය සංවත්‌තෙය්‍යු’න්‌ති න ඔත්‌තප්‌පති. එවං ඛො, ආවුසො, අනොත්‌තප්‌පී හොති. එවං ඛො, ආවුසො, අනාතාපී අනොත්‌තප්‌පී අභබ්‌බො සම්‌බොධාය අභබ්‌බො නිබ්‌බානාය අභබ්‌බො අනුත්‌තරස්‌ස යොගක්‌ඛෙමස්‌ස අධිගමාය.
‘‘Kathañcāvuso, anottappī hoti? Idhāvuso, bhikkhu ‘anuppannā me pāpakā akusalā dhammā uppajjamānā anatthāya saṃvatteyyu’nti na ottappati, ‘uppannā me pāpakā akusalā dhammā appahīyamānā anatthāya saṃvatteyyu’nti na ottappati, ‘anuppannā me kusalā dhammānuppajjamānā anatthāya saṃvatteyyu’nti na ottappati, ‘uppannā me kusalā dhammā nirujjhamānā anatthāya saṃvatteyyu’nti na ottappati. Evaṃ kho, āvuso, anottappī hoti. Evaṃ kho, āvuso, anātāpī anottappī abhabbo sambodhāya abhabbo nibbānāya abhabbo anuttarassa yogakkhemassa adhigamāya.
‘‘කථඤ්‌චාවුසො, ආතාපී හොති? ඉධාවුසො, භික්‌ඛු ‘අනුප්‌පන්‌නා මෙ පාපකා අකුසලා ධම්‌මා උප්‌පජ්‌ජමානා අනත්‌ථාය සංවත්‌තෙය්‍යු’න්‌ති ආතප්‌පං කරොති, ‘උප්‌පන්‌නා මෙ පාපකා අකුසලා ධම්‌මා අප්‌පහීයමානා අනත්‌ථාය සංවත්‌තෙය්‍යු’න්‌ති ආතප්‌පං කරොති, අනුප්‌පන්‌නා මෙ කුසලා ධම්‌මා…පෙ.… ආතප්‌පං කරොති. එවං ඛො, ආවුසො, ආතාපී හොති.
‘‘Kathañcāvuso, ātāpī hoti? Idhāvuso, bhikkhu ‘anuppannā me pāpakā akusalā dhammā uppajjamānā anatthāya saṃvatteyyu’nti ātappaṃ karoti, ‘uppannā me pāpakā akusalā dhammā appahīyamānā anatthāya saṃvatteyyu’nti ātappaṃ karoti, anuppannā me kusalā dhammā…pe… ātappaṃ karoti. Evaṃ kho, āvuso, ātāpī hoti.
‘‘කථඤ්‌චාවුසො, ඔත්‌තප්‌පී හොති? ඉධාවුසො, භික්‌ඛු ‘අනුප්‌පන්‌නා මෙ පාපකා අකුසලා ධම්‌මා උප්‌පජ්‌ජමානා අනත්‌ථාය සංවත්‌තෙය්‍යු’න්‌ති ඔත්‌තප්‌පති, ‘උප්‌පන්‌නා මෙ පාපකා අකුසලා ධම්‌මා අප්‌පහීයමානා අනත්‌ථාය සංවත්‌තෙය්‍යු’න්‌ති ඔත්‌තප්‌පති, ‘අනුප්‌පන්‌නා මෙ කුසලා ධම්‌මා අනුප්‌පජ්‌ජමානා අනත්‌ථාය සංවත්‌තෙය්‍යු’න්‌ත්‌න්‌ත්‌ති ඔත්‌තප්‌පති, ‘උප්‌පන්‌නා මෙ කුසලා ධම්‌මා නිරුජ්‌ඣමානා අනත්‌ථාය සංවත්‌තෙය්‍යු’න්‌ති ඔත්‌තප්‌පති. එවං ඛො, ආවුසො, ඔත්‌තප්‌පී හොති. එවං ඛො, ආවුසො, ආතාපී ඔත්‌තප්‌පී භබ්‌බො සම්‌බොධාය භබ්‌බො නිබ්‌බානාය භබ්‌බො අනුත්‌තරස්‌ස යොගක්‌ඛෙමස්‌ස අධිගමායා’’ති. දුතියං.
‘‘Kathañcāvuso, ottappī hoti? Idhāvuso, bhikkhu ‘anuppannā me pāpakā akusalā dhammā uppajjamānā anatthāya saṃvatteyyu’nti ottappati, ‘uppannā me pāpakā akusalā dhammā appahīyamānā anatthāya saṃvatteyyu’nti ottappati, ‘anuppannā me kusalā dhammā anuppajjamānā anatthāya saṃvatteyyu’ntntti ottappati, ‘uppannā me kusalā dhammā nirujjhamānā anatthāya saṃvatteyyu’nti ottappati. Evaṃ kho, āvuso, ottappī hoti. Evaṃ kho, āvuso, ātāpī ottappī bhabbo sambodhāya bhabbo nibbānāya bhabbo anuttarassa yogakkhemassa adhigamāyā’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. අනොත්‌තප්‌පීසුත්‌තවණ්‌ණනා • 2. Anottappīsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. අනොත්‌තප්‌පීසුත්‌තවණ්‌ණනා • 2. Anottappīsuttavaṇṇanā
