| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. அனொத்தப்பீஸுத்தவண்ணனா
2. Anottappīsuttavaṇṇanā
145. து³தியே அனாதாபீதி யங் வீரியங் கிலேஸே ஆதபதி, தேன ரஹிதோ. அனொத்தப்பீதி நிப்³ப⁴யோ கிலேஸுப்பத்திதோ குஸலானுப்பத்திதோ ச ப⁴யரஹிதோ. ஸம்போ³தா⁴யாதி ஸம்பு³ஜ்ஜ²னத்தா²ய. நிப்³பா³னாயாதி நிப்³பா³னஸச்சி²கிரியாய. அனுத்தரஸ்ஸ யோக³க்கே²மஸ்ஸாதி அரஹத்தஸ்ஸ தஞ்ஹி அனுத்தரஞ்சேவ சதூஹி ச யோகே³ஹி கே²மங்.
145. Dutiye anātāpīti yaṃ vīriyaṃ kilese ātapati, tena rahito. Anottappīti nibbhayo kilesuppattito kusalānuppattito ca bhayarahito. Sambodhāyāti sambujjhanatthāya. Nibbānāyāti nibbānasacchikiriyāya. Anuttarassa yogakkhemassāti arahattassa tañhi anuttarañceva catūhi ca yogehi khemaṃ.
அனுப்பன்னாதிஆதீ³ஸு யே புப்³பே³ அப்படிலத்³த⁴புப்³ப³ங் சீவராதி³ங் வா பச்சயங் உபட்டா²கஸத்³தி⁴விஹாரிக-அந்தேவாஸீனங் வா அஞ்ஞதரதோ மனுஞ்ஞவத்து²ங் படிலபி⁴த்வா தங் ஸுப⁴ங் ஸுக²ந்தி அயோனிஸோ க³ண்ஹந்தஸ்ஸ அஞ்ஞதரங் வா பன அனநுபூ⁴தபுப்³ப³ங் ஆரம்மணங் யதா² ததா² வா அயோனிஸோ ஆவஜ்ஜெந்தஸ்ஸ லோபா⁴த³யோ பாபகா அகுஸலா த⁴ம்மா உப்பஜ்ஜந்தி, தே அனுப்பன்னாதி வேதி³தப்³பா³. அஞ்ஞதா² ஹி அனமதக்³கே³ ஸங்ஸாரே அனுப்பன்னா நாம பாபகா த⁴ம்மா நத்தி². அனுபூ⁴தபுப்³பே³பி ச வத்து²ம்ஹி ஆரம்மணே வா யஸ்ஸ பகதிபு³த்³தி⁴யா வா உத்³தே³ஸபரிபுச்சா²ய வா பரியத்தினவகம்மயோனிஸோமனஸிகாரானங் வா அஞ்ஞதரவஸேன புப்³பே³ அனுப்பஜ்ஜித்வா பச்சா² தாதி³ஸேன பச்சயேன ஸஹஸா உப்பஜ்ஜந்தி, இமேபி ‘‘அனுப்பன்னா உப்பஜ்ஜமானா அனத்தா²ய ஸங்வத்தெய்யு’’ந்தி வேதி³தப்³பா³. தேஸுயேவ பன வத்தா²ரம்மணேஸு புனப்புனங் உப்பஜ்ஜமானா நப்பஹீயந்தி நாம, தே ‘‘உப்பன்னா அப்பஹீயமானா அனத்தா²ய ஸங்வத்தெய்யு’’ந்தி வேதி³தப்³பா³. அயமெத்த² ஸங்கே²போ, வித்தா²ரதோ பன உப்பன்னானுப்பன்னபே⁴தோ³ ச பஹானப்பஹானவிதா⁴னஞ்ச ஸப்³ப³ங் விஸுத்³தி⁴மக்³கே³ ஞாணத³ஸ்ஸனவிஸுத்³தி⁴னித்³தே³ஸே கதி²தங்.
Anuppannātiādīsu ye pubbe appaṭiladdhapubbaṃ cīvarādiṃ vā paccayaṃ upaṭṭhākasaddhivihārika-antevāsīnaṃ vā aññatarato manuññavatthuṃ paṭilabhitvā taṃ subhaṃ sukhanti ayoniso gaṇhantassa aññataraṃ vā pana ananubhūtapubbaṃ ārammaṇaṃ yathā tathā vā ayoniso āvajjentassa lobhādayo pāpakā akusalā dhammā uppajjanti, te anuppannāti veditabbā. Aññathā hi anamatagge saṃsāre anuppannā nāma pāpakā dhammā natthi. Anubhūtapubbepi ca vatthumhi ārammaṇe vā yassa pakatibuddhiyā vā uddesaparipucchāya vā pariyattinavakammayonisomanasikārānaṃ vā aññataravasena pubbe anuppajjitvā pacchā tādisena paccayena sahasā uppajjanti, imepi ‘‘anuppannā uppajjamānā anatthāya saṃvatteyyu’’nti veditabbā. Tesuyeva pana vatthārammaṇesu punappunaṃ uppajjamānā nappahīyanti nāma, te ‘‘uppannā appahīyamānā anatthāya saṃvatteyyu’’nti veditabbā. Ayamettha saṅkhepo, vitthārato pana uppannānuppannabhedo ca pahānappahānavidhānañca sabbaṃ visuddhimagge ñāṇadassanavisuddhiniddese kathitaṃ.
அனுப்பன்னா மே குஸலா த⁴ம்மாதி அப்படிலத்³தா⁴பி ஸீலஸமாதி⁴மக்³க³ப²லஸங்கா²தா அனவஜ்ஜத⁴ம்மா. உப்பன்னாதி தேயேவ படிலத்³தா⁴. நிருஜ்ஜ²மானா அனத்தா²ய ஸங்வத்தெய்யுந்தி தே ஸீலாதி³த⁴ம்மா பரிஹானிவஸேன புன அனுப்பத்தியா நிருஜ்ஜ²மானா அனத்தா²ய ஸங்வத்தெய்யுந்தி வேதி³தப்³பா³. எத்த² ச லோகியா பரிஹாயந்தி, லோகுத்தரானங் பரிஹானி நத்தீ²தி. ‘‘உப்பன்னானங் குஸலானங் த⁴ம்மானங் டி²தியா’’தி இமஸ்ஸ பன ஸம்மப்பதா⁴னஸ்ஸ வஸேனாயங் தே³ஸனா கதா. து³தியமக்³கோ³ வா ஸீக⁴ங் அனுப்பஜ்ஜமானோ, பட²மமக்³கோ³ நிருஜ்ஜ²மானோ அனத்தா²ய ஸங்வத்தெய்யாதி ஏவம்பெத்த² அத்தோ² த³ட்ட²ப்³போ³. இதி இமஸ்மிங் ஸுத்தே இமே சத்தாரோ ஸம்மப்பதா⁴னா புப்³ப³பா⁴க³விபஸ்ஸனாவஸேன கதி²தாதி. து³தியங்.
Anuppannāme kusalā dhammāti appaṭiladdhāpi sīlasamādhimaggaphalasaṅkhātā anavajjadhammā. Uppannāti teyeva paṭiladdhā. Nirujjhamānā anatthāya saṃvatteyyunti te sīlādidhammā parihānivasena puna anuppattiyā nirujjhamānā anatthāya saṃvatteyyunti veditabbā. Ettha ca lokiyā parihāyanti, lokuttarānaṃ parihāni natthīti. ‘‘Uppannānaṃ kusalānaṃ dhammānaṃ ṭhitiyā’’ti imassa pana sammappadhānassa vasenāyaṃ desanā katā. Dutiyamaggo vā sīghaṃ anuppajjamāno, paṭhamamaggo nirujjhamāno anatthāya saṃvatteyyāti evampettha attho daṭṭhabbo. Iti imasmiṃ sutte ime cattāro sammappadhānā pubbabhāgavipassanāvasena kathitāti. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. அனொத்தப்பீஸுத்தங் • 2. Anottappīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. அனொத்தப்பீஸுத்தவண்ணனா • 2. Anottappīsuttavaṇṇanā
