| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
2. අනොත්‌තප්‌පීසුත්‌තවණ්‌ණනා
2. Anottappīsuttavaṇṇanā
145. දුතියෙ අනාතාපීති යං වීරියං කිලෙසෙ ආතපති, තෙන රහිතො. අනොත්‌තප්‌පීති නිබ්‌භයො කිලෙසුප්‌පත්‌තිතො කුසලානුප්‌පත්‌තිතො ච භයරහිතො. සම්‌බොධායාති සම්‌බුජ්‌ඣනත්‌ථාය. නිබ්‌බානායාති නිබ්‌බානසච්‌ඡිකිරියාය. අනුත්‌තරස්‌ස යොගක්‌ඛෙමස්‌සාති අරහත්‌තස්‌ස තඤ්‌හි අනුත්‌තරඤ්‌චෙව චතූහි ච යොගෙහි ඛෙමං.
145. Dutiye anātāpīti yaṃ vīriyaṃ kilese ātapati, tena rahito. Anottappīti nibbhayo kilesuppattito kusalānuppattito ca bhayarahito. Sambodhāyāti sambujjhanatthāya. Nibbānāyāti nibbānasacchikiriyāya. Anuttarassa yogakkhemassāti arahattassa tañhi anuttarañceva catūhi ca yogehi khemaṃ.
අනුප්‌පන්‌නාතිආදීසු යෙ පුබ්‌බෙ අප්‌පටිලද්‌ධපුබ්‌බං චීවරාදිං වා පච්‌චයං උපට්‌ඨාකසද්‌ධිවිහාරික-අන්‌තෙවාසීනං වා අඤ්‌ඤතරතො මනුඤ්‌ඤවත්‌ථුං පටිලභිත්‌වා තං සුභං සුඛන්‌ති අයොනිසො ගණ්‌හන්‌තස්‌ස අඤ්‌ඤතරං වා පන අනනුභූතපුබ්‌බං ආරම්‌මණං යථා තථා වා අයොනිසො ආවජ්‌ජෙන්‌තස්‌ස ලොභාදයො පාපකා අකුසලා ධම්‌මා උප්‌පජ්‌ජන්‌ති, තෙ අනුප්‌පන්‌නාති වෙදිතබ්‌බා. අඤ්‌ඤථා හි අනමතග්‌ගෙ සංසාරෙ අනුප්‌පන්‌නා නාම පාපකා ධම්‌මා නත්‌ථි. අනුභූතපුබ්‌බෙපි ච වත්‌ථුම්‌හි ආරම්‌මණෙ වා යස්‌ස පකතිබුද්‌ධියා වා උද්‌දෙසපරිපුච්‌ඡාය වා පරියත්‌තිනවකම්‌මයොනිසොමනසිකාරානං වා අඤ්‌ඤතරවසෙන පුබ්‌බෙ අනුප්‌පජ්‌ජිත්‌වා පච්‌ඡා තාදිසෙන පච්‌චයෙන සහසා උප්‌පජ්‌ජන්‌ති, ඉමෙපි ‘‘අනුප්‌පන්‌නා උප්‌පජ්‌ජමානා අනත්‌ථාය සංවත්‌තෙය්‍යු’’න්‌ති වෙදිතබ්‌බා. තෙසුයෙව පන වත්‌ථාරම්‌මණෙසු පුනප්‌පුනං උප්‌පජ්‌ජමානා නප්‌පහීයන්‌ති නාම, තෙ ‘‘උප්‌පන්‌නා අප්‌පහීයමානා අනත්‌ථාය සංවත්‌තෙය්‍යු’’න්‌ති වෙදිතබ්‌බා. අයමෙත්‌ථ සඞ්‌ඛෙපො, විත්‌ථාරතො පන උප්‌පන්‌නානුප්‌පන්‌නභෙදො ච පහානප්‌පහානවිධානඤ්‌ච සබ්‌බං විසුද්‌ධිමග්‌ගෙ ඤාණදස්‌සනවිසුද්‌ධිනිද්‌දෙසෙ කථිතං.
Anuppannātiādīsu ye pubbe appaṭiladdhapubbaṃ cīvarādiṃ vā paccayaṃ upaṭṭhākasaddhivihārika-antevāsīnaṃ vā aññatarato manuññavatthuṃ paṭilabhitvā taṃ subhaṃ sukhanti ayoniso gaṇhantassa aññataraṃ vā pana ananubhūtapubbaṃ ārammaṇaṃ yathā tathā vā ayoniso āvajjentassa lobhādayo pāpakā akusalā dhammā uppajjanti, te anuppannāti veditabbā. Aññathā hi anamatagge saṃsāre anuppannā nāma pāpakā dhammā natthi. Anubhūtapubbepi ca vatthumhi ārammaṇe vā yassa pakatibuddhiyā vā uddesaparipucchāya vā pariyattinavakammayonisomanasikārānaṃ vā aññataravasena pubbe anuppajjitvā pacchā tādisena paccayena sahasā uppajjanti, imepi ‘‘anuppannā uppajjamānā anatthāya saṃvatteyyu’’nti veditabbā. Tesuyeva pana vatthārammaṇesu punappunaṃ uppajjamānā nappahīyanti nāma, te ‘‘uppannā appahīyamānā anatthāya saṃvatteyyu’’nti veditabbā. Ayamettha saṅkhepo, vitthārato pana uppannānuppannabhedo ca pahānappahānavidhānañca sabbaṃ visuddhimagge ñāṇadassanavisuddhiniddese kathitaṃ.
අනුප්‌පන්‌නා මෙ කුසලා ධම්‌මාති අප්‌පටිලද්‌ධාපි සීලසමාධිමග්‌ගඵලසඞ්‌ඛාතා අනවජ්‌ජධම්‌මා. උප්‌පන්‌නාති තෙයෙව පටිලද්‌ධා. නිරුජ්‌ඣමානා අනත්‌ථාය සංවත්‌තෙය්‍යුන්‌ති තෙ සීලාදිධම්‌මා පරිහානිවසෙන පුන අනුප්‌පත්‌තියා නිරුජ්‌ඣමානා අනත්‌ථාය සංවත්‌තෙය්‍යුන්‌ති වෙදිතබ්‌බා. එත්‌ථ ච ලොකියා පරිහායන්‌ති, ලොකුත්‌තරානං පරිහානි නත්‌ථීති. ‘‘උප්‌පන්‌නානං කුසලානං ධම්‌මානං ඨිතියා’’ති ඉමස්‌ස පන සම්‌මප්‌පධානස්‌ස වසෙනායං දෙසනා කතා. දුතියමග්‌ගො වා සීඝං අනුප්‌පජ්‌ජමානො, පඨමමග්‌ගො නිරුජ්‌ඣමානො අනත්‌ථාය සංවත්‌තෙය්‍යාති එවම්‌පෙත්‌ථ අත්‌ථො දට්‌ඨබ්‌බො. ඉති ඉමස්‌මිං සුත්‌තෙ ඉමෙ චත්‌තාරො සම්‌මප්‌පධානා පුබ්‌බභාගවිපස්‌සනාවසෙන කථිතාති. දුතියං.
Anuppannāme kusalā dhammāti appaṭiladdhāpi sīlasamādhimaggaphalasaṅkhātā anavajjadhammā. Uppannāti teyeva paṭiladdhā. Nirujjhamānā anatthāya saṃvatteyyunti te sīlādidhammā parihānivasena puna anuppattiyā nirujjhamānā anatthāya saṃvatteyyunti veditabbā. Ettha ca lokiyā parihāyanti, lokuttarānaṃ parihāni natthīti. ‘‘Uppannānaṃ kusalānaṃ dhammānaṃ ṭhitiyā’’ti imassa pana sammappadhānassa vasenāyaṃ desanā katā. Dutiyamaggo vā sīghaṃ anuppajjamāno, paṭhamamaggo nirujjhamāno anatthāya saṃvatteyyāti evampettha attho daṭṭhabbo. Iti imasmiṃ sutte ime cattāro sammappadhānā pubbabhāgavipassanāvasena kathitāti. Dutiyaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 2. අනොත්‌තප්‌පීසුත්‌තං • 2. Anottappīsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. අනොත්‌තප්‌පීසුත්‌තවණ්‌ණනා • 2. Anottappīsuttavaṇṇanā
