| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൨. അനോത്തപ്പീസുത്തവണ്ണനാ
2. Anottappīsuttavaṇṇanā
൧൪൫. ദുതിയേ അനാതാപീതി യം വീരിയം കിലേസേ ആതപതി, തേന രഹിതോ. അനോത്തപ്പീതി നിബ്ഭയോ കിലേസുപ്പത്തിതോ കുസലാനുപ്പത്തിതോ ച ഭയരഹിതോ. സമ്ബോധായാതി സമ്ബുജ്ഝനത്ഥായ. നിബ്ബാനായാതി നിബ്ബാനസച്ഛികിരിയായ. അനുത്തരസ്സ യോഗക്ഖേമസ്സാതി അരഹത്തസ്സ തഞ്ഹി അനുത്തരഞ്ചേവ ചതൂഹി ച യോഗേഹി ഖേമം.
145. Dutiye anātāpīti yaṃ vīriyaṃ kilese ātapati, tena rahito. Anottappīti nibbhayo kilesuppattito kusalānuppattito ca bhayarahito. Sambodhāyāti sambujjhanatthāya. Nibbānāyāti nibbānasacchikiriyāya. Anuttarassa yogakkhemassāti arahattassa tañhi anuttarañceva catūhi ca yogehi khemaṃ.
അനുപ്പന്നാതിആദീസു യേ പുബ്ബേ അപ്പടിലദ്ധപുബ്ബം ചീവരാദിം വാ പച്ചയം ഉപട്ഠാകസദ്ധിവിഹാരിക-അന്തേവാസീനം വാ അഞ്ഞതരതോ മനുഞ്ഞവത്ഥും പടിലഭിത്വാ തം സുഭം സുഖന്തി അയോനിസോ ഗണ്ഹന്തസ്സ അഞ്ഞതരം വാ പന അനനുഭൂതപുബ്ബം ആരമ്മണം യഥാ തഥാ വാ അയോനിസോ ആവജ്ജേന്തസ്സ ലോഭാദയോ പാപകാ അകുസലാ ധമ്മാ ഉപ്പജ്ജന്തി, തേ അനുപ്പന്നാതി വേദിതബ്ബാ. അഞ്ഞഥാ ഹി അനമതഗ്ഗേ സംസാരേ അനുപ്പന്നാ നാമ പാപകാ ധമ്മാ നത്ഥി. അനുഭൂതപുബ്ബേപി ച വത്ഥുമ്ഹി ആരമ്മണേ വാ യസ്സ പകതിബുദ്ധിയാ വാ ഉദ്ദേസപരിപുച്ഛായ വാ പരിയത്തിനവകമ്മയോനിസോമനസികാരാനം വാ അഞ്ഞതരവസേന പുബ്ബേ അനുപ്പജ്ജിത്വാ പച്ഛാ താദിസേന പച്ചയേന സഹസാ ഉപ്പജ്ജന്തി, ഇമേപി ‘‘അനുപ്പന്നാ ഉപ്പജ്ജമാനാ അനത്ഥായ സംവത്തേയ്യു’’ന്തി വേദിതബ്ബാ. തേസുയേവ പന വത്ഥാരമ്മണേസു പുനപ്പുനം ഉപ്പജ്ജമാനാ നപ്പഹീയന്തി നാമ, തേ ‘‘ഉപ്പന്നാ അപ്പഹീയമാനാ അനത്ഥായ സംവത്തേയ്യു’’ന്തി വേദിതബ്ബാ. അയമേത്ഥ സങ്ഖേപോ, വിത്ഥാരതോ പന ഉപ്പന്നാനുപ്പന്നഭേദോ ച പഹാനപ്പഹാനവിധാനഞ്ച സബ്ബം വിസുദ്ധിമഗ്ഗേ ഞാണദസ്സനവിസുദ്ധിനിദ്ദേസേ കഥിതം.
Anuppannātiādīsu ye pubbe appaṭiladdhapubbaṃ cīvarādiṃ vā paccayaṃ upaṭṭhākasaddhivihārika-antevāsīnaṃ vā aññatarato manuññavatthuṃ paṭilabhitvā taṃ subhaṃ sukhanti ayoniso gaṇhantassa aññataraṃ vā pana ananubhūtapubbaṃ ārammaṇaṃ yathā tathā vā ayoniso āvajjentassa lobhādayo pāpakā akusalā dhammā uppajjanti, te anuppannāti veditabbā. Aññathā hi anamatagge saṃsāre anuppannā nāma pāpakā dhammā natthi. Anubhūtapubbepi ca vatthumhi ārammaṇe vā yassa pakatibuddhiyā vā uddesaparipucchāya vā pariyattinavakammayonisomanasikārānaṃ vā aññataravasena pubbe anuppajjitvā pacchā tādisena paccayena sahasā uppajjanti, imepi ‘‘anuppannā uppajjamānā anatthāya saṃvatteyyu’’nti veditabbā. Tesuyeva pana vatthārammaṇesu punappunaṃ uppajjamānā nappahīyanti nāma, te ‘‘uppannā appahīyamānā anatthāya saṃvatteyyu’’nti veditabbā. Ayamettha saṅkhepo, vitthārato pana uppannānuppannabhedo ca pahānappahānavidhānañca sabbaṃ visuddhimagge ñāṇadassanavisuddhiniddese kathitaṃ.
അനുപ്പന്നാ മേ കുസലാ ധമ്മാതി അപ്പടിലദ്ധാപി സീലസമാധിമഗ്ഗഫലസങ്ഖാതാ അനവജ്ജധമ്മാ. ഉപ്പന്നാതി തേയേവ പടിലദ്ധാ. നിരുജ്ഝമാനാ അനത്ഥായ സംവത്തേയ്യുന്തി തേ സീലാദിധമ്മാ പരിഹാനിവസേന പുന അനുപ്പത്തിയാ നിരുജ്ഝമാനാ അനത്ഥായ സംവത്തേയ്യുന്തി വേദിതബ്ബാ. ഏത്ഥ ച ലോകിയാ പരിഹായന്തി, ലോകുത്തരാനം പരിഹാനി നത്ഥീതി. ‘‘ഉപ്പന്നാനം കുസലാനം ധമ്മാനം ഠിതിയാ’’തി ഇമസ്സ പന സമ്മപ്പധാനസ്സ വസേനായം ദേസനാ കതാ. ദുതിയമഗ്ഗോ വാ സീഘം അനുപ്പജ്ജമാനോ, പഠമമഗ്ഗോ നിരുജ്ഝമാനോ അനത്ഥായ സംവത്തേയ്യാതി ഏവമ്പേത്ഥ അത്ഥോ ദട്ഠബ്ബോ. ഇതി ഇമസ്മിം സുത്തേ ഇമേ ചത്താരോ സമ്മപ്പധാനാ പുബ്ബഭാഗവിപസ്സനാവസേന കഥിതാതി. ദുതിയം.
Anuppannāme kusalā dhammāti appaṭiladdhāpi sīlasamādhimaggaphalasaṅkhātā anavajjadhammā. Uppannāti teyeva paṭiladdhā. Nirujjhamānā anatthāya saṃvatteyyunti te sīlādidhammā parihānivasena puna anuppattiyā nirujjhamānā anatthāya saṃvatteyyunti veditabbā. Ettha ca lokiyā parihāyanti, lokuttarānaṃ parihāni natthīti. ‘‘Uppannānaṃ kusalānaṃ dhammānaṃ ṭhitiyā’’ti imassa pana sammappadhānassa vasenāyaṃ desanā katā. Dutiyamaggo vā sīghaṃ anuppajjamāno, paṭhamamaggo nirujjhamāno anatthāya saṃvatteyyāti evampettha attho daṭṭhabbo. Iti imasmiṃ sutte ime cattāro sammappadhānā pubbabhāgavipassanāvasena kathitāti. Dutiyaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൨. അനോത്തപ്പീസുത്തം • 2. Anottappīsuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൨. അനോത്തപ്പീസുത്തവണ്ണനാ • 2. Anottappīsuttavaṇṇanā
