| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
7. அந்தக்³கா³ஹிகாதி³ட்டி²னித்³தே³ஸவண்ணனா
7. Antaggāhikādiṭṭhiniddesavaṇṇanā
140. அந்தக்³கா³ஹிகாய தி³ட்டி²யா பட²மவாரே ஆகாரபுச்சா². து³தியே ஆகாரக³ஹணங். ததியே ஆகாரவிஸ்ஸஜ்ஜனங். தத்த² லோகோதி அத்தா. ஸோ அந்தோதி அஞ்ஞமஞ்ஞபடிபக்கே²ஸு ஸஸ்ஸதுச்சே²த³ந்தேஸு ஸஸ்ஸதக்³கா³ஹே ஸஸ்ஸதந்தோ, அஸஸ்ஸதக்³கா³ஹே உச்சே²த³ந்தோ. பரித்தங் ஓகாஸந்தி ஸுப்பமத்தங் வா ஸராவமத்தங் வா கு²த்³த³கங் டா²னங். நீலகதோ ப²ரதீதி நீலந்தி ஆரம்மணங் கரோதி. அயங் லோகோதி அத்தானங் ஸந்தா⁴ய வுத்தங். பரிவடுமோதி ஸமந்ததோ பரிச்சே²த³வா. அந்தஸஞ்ஞீதி அந்தவாதிஸஞ்ஞீ. அந்தோ அஸ்ஸ அத்தீ²தி அந்தோதி க³ஹேதப்³ப³ங். யங் ப²ரதீதி யங் கஸிணரூபங் ப²ரதி. தங் வத்து² சேவ லோகோ சாதி தங் கஸிணரூபங் ஆரம்மணஞ்சேவ ஆலோகியட்டே²ன லோகோ ச. யேன ப²ரதீதி யேன சித்தேன ப²ரதி. ஸோ அத்தா சேவ லோகோ சாதி அத்தானமபெக்கி²த்வா புல்லிங்க³ங் கதங், தங் சித்தங் அத்தா சேவ ஆலோகனட்டே²ன லோகோ சாதி வுத்தங் ஹோதி. அந்தவாதி அந்தோ. ஓகாஸகதோ ப²ரதீதி ஆலோககஸிணவஸேன தேஜோகஸிணவஸேன ஓதா³தகஸிணவஸேன வா ஓபா⁴ஸோதி ப²ரதி. நீலாதீ³னங் பஞ்சன்னங் பப⁴ஸ்ஸரகஸிணானங்யேவ க³ஹிதத்தா பத²வீஆபோவாயோகஸிணவஸேன அத்தாபி⁴னிவேஸோ ந ஹோதீதி க³ஹேதப்³ப³ங்.
140.Antaggāhikāya diṭṭhiyā paṭhamavāre ākārapucchā. Dutiye ākāragahaṇaṃ. Tatiye ākāravissajjanaṃ. Tattha lokoti attā. So antoti aññamaññapaṭipakkhesu sassatucchedantesu sassataggāhe sassatanto, asassataggāhe ucchedanto. Parittaṃ okāsanti suppamattaṃ vā sarāvamattaṃ vā khuddakaṃ ṭhānaṃ. Nīlakato pharatīti nīlanti ārammaṇaṃ karoti. Ayaṃ lokoti attānaṃ sandhāya vuttaṃ. Parivaṭumoti samantato paricchedavā. Antasaññīti antavātisaññī. Anto assa atthīti antoti gahetabbaṃ. Yaṃ pharatīti yaṃ kasiṇarūpaṃ pharati. Taṃ vatthu ceva loko cāti taṃ kasiṇarūpaṃ ārammaṇañceva ālokiyaṭṭhena loko ca. Yena pharatīti yena cittena pharati. So attā ceva loko cāti attānamapekkhitvā pulliṅgaṃ kataṃ, taṃ cittaṃ attā ceva ālokanaṭṭhena loko cāti vuttaṃ hoti. Antavāti anto. Okāsakato pharatīti ālokakasiṇavasena tejokasiṇavasena odātakasiṇavasena vā obhāsoti pharati. Nīlādīnaṃ pañcannaṃ pabhassarakasiṇānaṃyeva gahitattā pathavīāpovāyokasiṇavasena attābhiniveso na hotīti gahetabbaṃ.
விபுலங் ஓகாஸந்தி க²லமண்ட³லமத்தாதி³வஸேன மஹந்தங் டா²னங். அனந்தவாதி வுத்³த⁴அனந்தவா. அபரியந்தோதி வுத்³த⁴அபரியந்தோ. அனந்தஸஞ்ஞீதி அனந்தோதிஸஞ்ஞீ. தங் ஜீவந்தி ஸோ ஜீவோ. லிங்க³விபல்லாஸோ கதோ. ஜீவோதி ச அத்தா ஏவ. ரூபாதீ³னி பஞ்சபி பரிவடுமட்டே²ன ஸரீரங். ஜீவங் ந ஸரீரந்தி அத்தஸங்கா²தோ ஜீவோ ரூபஸங்கா²தங் ஸரீரங் ந ஹோதி. ஏஸ நயோ வேத³னாதீ³ஸு. ததா²க³தோதி ஸத்தோ. அரஹந்தி ஏகே. பரங் மரணாதி மரணதோ உத்³த⁴ங், பரலோகேதி அத்தோ². ரூபங் இதே⁴வ மரணத⁴ம்மந்தி அத்தனோ பாகடக்க²ந்த⁴ஸீஸேன பஞ்சக்க²ந்த⁴க்³க³ஹணங், தங் இமஸ்மிங்யேவ லோகே நஸ்ஸனபகதிகந்தி அத்தோ². ஸேஸக்க²ந்தே⁴ஸுபி ஏஸேவ நயோ. காயஸ்ஸ பே⁴தா³தி க²ந்த⁴பஞ்சகஸங்கா²தஸ்ஸ காயஸ்ஸ பே⁴த³தோ பரங். இமினா வசனேன ‘‘பரங் மரணா’’தி ஏதஸ்ஸ உத்³தே³ஸஸ்ஸ அத்தோ² வுத்தோ. ஹோதிபீதிஆதீ³ஸு ஹோதீதி மூலபத³ங். சதூஸுபி அபி-ஸத்³தோ³ ஸமுச்சயத்தோ². திட்ட²தீதி ஸஸ்ஸதத்தா திட்ட²தி, ந சவதீதி அத்தோ². ‘‘ஹோதீ’’தி பத³ஸ்ஸ வா அத்த²விஸேஸனத்த²ங் ‘‘திட்ட²தீ’’தி பத³ங் வுத்தந்தி வேதி³தப்³ப³ங். உப்பஜ்ஜதீதி அண்ட³ஜஜலாபு³ஜயோனிபவேஸவஸேன உப்பஜ்ஜதி நாம, நிப்³ப³த்ததீதி ஸங்ஸேத³ஜஓபபாதிகயோனிபவேஸவஸேன நிப்³ப³த்ததி நாமாதி அத்த²யோஜனா வேதி³தப்³பா³. உச்சி²ஜ்ஜதீதி பப³ந்தா⁴பா⁴வவஸேன. வினஸ்ஸதீதி ப⁴ங்க³வஸேன. ந ஹோதி பரங் மரணாதி புரிமபதா³னங் அத்த²விவரணங், சுதிதோ உத்³த⁴ங் ந விஜ்ஜதீதி அத்தோ². ஹோதி ச ந ச ஹோதீதி ஏகச்சஸஸ்ஸதிகானங் தி³ட்டி², ஏகேன பரியாயேன ஹோதி, ஏகேன பரியாயேன ந ஹோதீதி அத்தோ². ஜீவபா⁴வேன ஹோதி, புப்³ப³ஜீவஸ்ஸ அபா⁴வேன ந ஹோதீதி வுத்தங் ஹோதி. நேவ ஹோதி ந ந ஹோதீதி அமராவிக்கே²பிகானங் தி³ட்டி², ஹோதீதி ச நேவ ஹோதி, ந ஹோதீதி ச ந ஹோதீதி அத்தோ². அனுவாத³ப⁴யா முஸாவாத³ப⁴யா ச மந்த³த்தா மோமூஹத்தா ச புப்³ப³வுத்தனயஸ்ஸ படிக்கே²பமத்தங் கரோதி. இமேஹி பஞ்ஞாஸாய ஆகாரேஹீதி யதா²வுத்தானங் த³ஸன்னங் பஞ்சகானங் வஸேன பஞ்ஞாஸாய ஆகாரேஹீதி.
Vipulaṃ okāsanti khalamaṇḍalamattādivasena mahantaṃ ṭhānaṃ. Anantavāti vuddhaanantavā. Apariyantoti vuddhaapariyanto. Anantasaññīti anantotisaññī. Taṃ jīvanti so jīvo. Liṅgavipallāso kato. Jīvoti ca attā eva. Rūpādīni pañcapi parivaṭumaṭṭhena sarīraṃ. Jīvaṃ na sarīranti attasaṅkhāto jīvo rūpasaṅkhātaṃ sarīraṃ na hoti. Esa nayo vedanādīsu. Tathāgatoti satto. Arahanti eke. Paraṃ maraṇāti maraṇato uddhaṃ, paraloketi attho. Rūpaṃ idheva maraṇadhammanti attano pākaṭakkhandhasīsena pañcakkhandhaggahaṇaṃ, taṃ imasmiṃyeva loke nassanapakatikanti attho. Sesakkhandhesupi eseva nayo. Kāyassa bhedāti khandhapañcakasaṅkhātassa kāyassa bhedato paraṃ. Iminā vacanena ‘‘paraṃ maraṇā’’ti etassa uddesassa attho vutto. Hotipītiādīsu hotīti mūlapadaṃ. Catūsupi api-saddo samuccayattho. Tiṭṭhatīti sassatattā tiṭṭhati, na cavatīti attho. ‘‘Hotī’’ti padassa vā atthavisesanatthaṃ ‘‘tiṭṭhatī’’ti padaṃ vuttanti veditabbaṃ. Uppajjatīti aṇḍajajalābujayonipavesavasena uppajjati nāma, nibbattatīti saṃsedajaopapātikayonipavesavasena nibbattati nāmāti atthayojanā veditabbā. Ucchijjatīti pabandhābhāvavasena. Vinassatīti bhaṅgavasena. Na hoti paraṃ maraṇāti purimapadānaṃ atthavivaraṇaṃ, cutito uddhaṃ na vijjatīti attho. Hoti ca na ca hotīti ekaccasassatikānaṃ diṭṭhi, ekena pariyāyena hoti, ekena pariyāyena na hotīti attho. Jīvabhāvena hoti, pubbajīvassa abhāvena na hotīti vuttaṃ hoti. Neva hoti na na hotīti amarāvikkhepikānaṃ diṭṭhi, hotīti ca neva hoti, na hotīti ca na hotīti attho. Anuvādabhayā musāvādabhayā ca mandattā momūhattā ca pubbavuttanayassa paṭikkhepamattaṃ karoti. Imehi paññāsāya ākārehīti yathāvuttānaṃ dasannaṃ pañcakānaṃ vasena paññāsāya ākārehīti.
அந்தக்³கா³ஹிகாதி³ட்டி²னித்³தே³ஸவண்ணனா நிட்டி²தா.
Antaggāhikādiṭṭhiniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 7. அந்தக்³கா³ஹிகாதி³ட்டி²னித்³தே³ஸோ • 7. Antaggāhikādiṭṭhiniddeso
