| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. அந்தராப⁴வகதா²வண்ணனா
2. Antarābhavakathāvaṇṇanā
505. இதா³னி அந்தராப⁴வகதா² நாம ஹோதி. தத்த² யேஸங் ‘‘அந்தரா பரினிப்³பா³யீ’’தி ஸுத்தபத³ங் அயோனிஸோ க³ஹெத்வா ‘‘அந்தராப⁴வோ நாம அத்தி², யத்த² ஸத்தோ தி³ப்³ப³சக்கு²கோ விய அதி³ப்³ப³சக்கு²கோ, இத்³தி⁴மா விய அனித்³தி⁴மா மாதாபிதிஸமாக³மஞ்சேவ உதுஸமயஞ்ச ஓலோகயமானோ ஸத்தாஹங் வா அதிரேகஸத்தாஹங் வா திட்ட²தீ’’தி லத்³தி⁴, ஸெய்யதா²பி புப்³ப³ஸேலியானஞ்சேவ ஸம்மிதியானஞ்ச; தே ஸந்தா⁴ய அத்தீ²தி புச்சா² ஸகவாதி³ஸ்ஸ, லத்³தி⁴யங் ட²த்வா படிஞ்ஞா இதரஸ்ஸ. அத² நங் யே ச ப⁴க³வதா தயோ ப⁴வா வுத்தா, தேஸங் வஸேன சோதே³துங் காமப⁴வோதிஆதி³மாஹ. தத்ராயங் அதி⁴ப்பாயோ – யதி³ தே அந்தராப⁴வோ நாம கோசி ப⁴வோ அத்தி², தேன காமப⁴வாதீ³னங்யேவ அஞ்ஞதரேன ப⁴விதப்³ப³ங் பஞ்சவோகாரப⁴வாதி³னா விய, தேன தங் புச்சா²மி – ‘‘கிங் தே அயங் அந்தராப⁴வோ நாம காமப⁴வோ, உதா³ஹு ரூபப⁴வோ அரூபப⁴வோ வா’’தி? இதரோ ததா² அனிச்ச²ந்தோ ஸப்³ப³ங் படிக்கி²பதி. காமப⁴வஸ்ஸ சாதிஆதி³ யதி³ அந்தராப⁴வோ நாம அத்தி², இமேஸங் ப⁴வானங் அந்தரா த்³வின்னங் ஸீமானங் ஸீமந்தரிகா விய ப⁴வெய்யாதி சோதே³துங் ஆரத்³த⁴ங். பரவாதீ³ பன ததா² அனிச்ச²ந்தோ ஸப்³ப³பஞ்ஹே படிக்கி²பதி கேவலங் லத்³தி⁴யா, ந ஸஹத⁴ம்மேன. தேனேவ நங் ஸகவாதீ³ ‘நோ வத ரே’தி படிஸேதே⁴தி.
505. Idāni antarābhavakathā nāma hoti. Tattha yesaṃ ‘‘antarā parinibbāyī’’ti suttapadaṃ ayoniso gahetvā ‘‘antarābhavo nāma atthi, yattha satto dibbacakkhuko viya adibbacakkhuko, iddhimā viya aniddhimā mātāpitisamāgamañceva utusamayañca olokayamāno sattāhaṃ vā atirekasattāhaṃ vā tiṭṭhatī’’ti laddhi, seyyathāpi pubbaseliyānañceva sammitiyānañca; te sandhāya atthīti pucchā sakavādissa, laddhiyaṃ ṭhatvā paṭiññā itarassa. Atha naṃ ye ca bhagavatā tayo bhavā vuttā, tesaṃ vasena codetuṃ kāmabhavotiādimāha. Tatrāyaṃ adhippāyo – yadi te antarābhavo nāma koci bhavo atthi, tena kāmabhavādīnaṃyeva aññatarena bhavitabbaṃ pañcavokārabhavādinā viya, tena taṃ pucchāmi – ‘‘kiṃ te ayaṃ antarābhavo nāma kāmabhavo, udāhu rūpabhavo arūpabhavo vā’’ti? Itaro tathā anicchanto sabbaṃ paṭikkhipati. Kāmabhavassa cātiādi yadi antarābhavo nāma atthi, imesaṃ bhavānaṃ antarā dvinnaṃ sīmānaṃ sīmantarikā viya bhaveyyāti codetuṃ āraddhaṃ. Paravādī pana tathā anicchanto sabbapañhe paṭikkhipati kevalaṃ laddhiyā, na sahadhammena. Teneva naṃ sakavādī ‘no vata re’ti paṭisedheti.
506. பஞ்சமீ ஸா யோனீதிஆதீ³னிபி யதா²பரிச்சி²ன்னயோனிஆதீ³ஸு ஸோ ஸமோதா⁴னங் ந க³ச்ச²தி, அத² தேன ததோ ததோ அதிரேகேன ப⁴விதப்³ப³ந்தி சோதே³துங் வுத்தானி. அந்தராப⁴வூபக³ங் கம்மந்தி யதி³ ஸோபி ஏகோ ப⁴வோ, யதா² காமப⁴வூபகா³தீ³னி கம்மானி அத்தீ²தி ஸத்தா²ரா விப⁴ஜித்வா த³ஸ்ஸிதானி, ஏவங் தது³பகே³னாபி கம்மேன ப⁴விதப்³ப³ந்தி சோத³னத்த²ங் வுத்தங். யஸ்மா பன பரஸமயே அந்தராப⁴வூபக³ங் நாம பாடியேக்கங் கம்மங் நத்தி², யங் யங் ப⁴வங் உபபஜ்ஜிஸ்ஸதி, தது³பகே³னேவ கம்மேன அந்தராப⁴வே நிப்³ப³த்ததீதி தேஸங் லத்³தி⁴, தஸ்மா ‘நஹேவ’ந்தி படிக்கி²த்தங். அத்தி² அந்தராப⁴வூபகா³ ஸத்தாதி புட்டோ²பி காமப⁴வூபகா³யேவ நாம தேதி லத்³தி⁴யா படிக்கி²பதி. ஜாயந்தீதிஆதீ³னி புட்டோ²பி தத்த² ஜாதிஜராமரணானி சேவ சுதிபடிஸந்தி⁴பரம்பரஞ்ச அனிச்ச²ந்தோ படிக்கி²பதி. ரூபாதி³வஸேன புட்டோ²பி யஸ்மா அந்தராப⁴வஸத்தஸ்ஸ அனித³ஸ்ஸனங் ரூபங், வேத³னாத³யோபி அஞ்ஞேஸங் விய ந ஓளாரிகாதி தஸ்ஸ லத்³தி⁴, தஸ்மா படிக்கி²பதி. இமினாவ காரணேன பஞ்சவோகாரப⁴வபா⁴வேபி படிக்கே²போ வேதி³தப்³போ³.
506. Pañcamī sā yonītiādīnipi yathāparicchinnayoniādīsu so samodhānaṃ na gacchati, atha tena tato tato atirekena bhavitabbanti codetuṃ vuttāni. Antarābhavūpagaṃ kammanti yadi sopi eko bhavo, yathā kāmabhavūpagādīni kammāni atthīti satthārā vibhajitvā dassitāni, evaṃ tadupagenāpi kammena bhavitabbanti codanatthaṃ vuttaṃ. Yasmā pana parasamaye antarābhavūpagaṃ nāma pāṭiyekkaṃ kammaṃ natthi, yaṃ yaṃ bhavaṃ upapajjissati, tadupageneva kammena antarābhave nibbattatīti tesaṃ laddhi, tasmā ‘naheva’nti paṭikkhittaṃ. Atthi antarābhavūpagā sattāti puṭṭhopi kāmabhavūpagāyeva nāma teti laddhiyā paṭikkhipati. Jāyantītiādīni puṭṭhopi tattha jātijarāmaraṇāni ceva cutipaṭisandhiparamparañca anicchanto paṭikkhipati. Rūpādivasena puṭṭhopi yasmā antarābhavasattassa anidassanaṃ rūpaṃ, vedanādayopi aññesaṃ viya na oḷārikāti tassa laddhi, tasmā paṭikkhipati. Imināva kāraṇena pañcavokārabhavabhāvepi paṭikkhepo veditabbo.
507. இதா³னி காமப⁴வோ ப⁴வோ க³தீதிஆதி³ ப⁴வஸங்ஸந்த³னங் நாம ஹோதி. தத்ராயங் அதி⁴ப்பாயோ – யதி³ தே அந்தராப⁴வோ நாம கோசி ப⁴வோ ப⁴வெய்ய, யதா² காமப⁴வாதீ³ஸு ப⁴வக³திஆதி³பே⁴தோ³ லப்³ப⁴தி, ததா² தத்ராபி லப்³பே⁴த². யதா² வா தத்த² ந லப்³ப⁴தி, ததா² இமேஸுபி ந லப்³பே⁴த². ஸமானஸ்மிஞ்ஹி ப⁴வபா⁴வே ஏதெஸ்வேவேஸ விபா⁴கோ³ அத்தி², ந இதரஸ்மிந்தி கோ எத்த² விஸேஸஹேதூதி. இதரோ புன லத்³தி⁴மத்தவஸேன தங் தங் படிஜானாதி சேவ படிக்கி²பதி ச.
507. Idāni kāmabhavo bhavo gatītiādi bhavasaṃsandanaṃ nāma hoti. Tatrāyaṃ adhippāyo – yadi te antarābhavo nāma koci bhavo bhaveyya, yathā kāmabhavādīsu bhavagatiādibhedo labbhati, tathā tatrāpi labbhetha. Yathā vā tattha na labbhati, tathā imesupi na labbhetha. Samānasmiñhi bhavabhāve etesvevesa vibhāgo atthi, na itarasminti ko ettha visesahetūti. Itaro puna laddhimattavasena taṃ taṃ paṭijānāti ceva paṭikkhipati ca.
508. ஸப்³பே³ஸஞ்ஞேவ ஸத்தானங் அத்தி² அந்தராப⁴வோதி புட்டோ² யஸ்மா நிரயூபக³அஸஞ்ஞஸத்தூபக³அரூபூபகா³னங் அந்தராப⁴வங் ந இச்ச²தி, தஸ்மா படிக்கி²பதி. தேனேவ காரணேன படிலோமே படிஜானாதி. ஆனந்தரியஸ்ஸாதிஆதி³ யேஸங் ஸோ அந்தராப⁴வங் ந இச்ச²தி, தே தாவ விப⁴ஜித்வா த³ஸ்ஸேதுங் வுத்தங். தங் ஸப்³ப³ங் பாளிஅனுஸாரேனேவ வேதி³தப்³ப³ங் ஸத்³தி⁴ங் ஸுத்தஸாத⁴னேனாதி.
508. Sabbesaññeva sattānaṃ atthi antarābhavoti puṭṭho yasmā nirayūpagaasaññasattūpagaarūpūpagānaṃ antarābhavaṃ na icchati, tasmā paṭikkhipati. Teneva kāraṇena paṭilome paṭijānāti. Ānantariyassātiādi yesaṃ so antarābhavaṃ na icchati, te tāva vibhajitvā dassetuṃ vuttaṃ. Taṃ sabbaṃ pāḷianusāreneva veditabbaṃ saddhiṃ suttasādhanenāti.
அந்தராப⁴வகதா²வண்ணனா.
Antarābhavakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (74) 2. அந்தராப⁴வகதா² • (74) 2. Antarābhavakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. அந்தராப⁴வகதா²வண்ணனா • 2. Antarābhavakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. அந்தராப⁴வகதா²வண்ணனா • 2. Antarābhavakathāvaṇṇanā
