| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
2. அந்தராப⁴வகதா²வண்ணனா
2. Antarābhavakathāvaṇṇanā
505. அந்தரட்டா²னானீதி அந்தரிகட்டா²னானி. நிவாரகட்டா²னானி பி⁴ந்தி³த்வா ச ஆகாஸேன ச க³மனதோ. யதி³ ஸோ ப⁴வானங் அந்தரா ந ஸியாதி ஸோ அந்தராப⁴வோ காமப⁴வாதீ³னங் ப⁴வானங் அந்தரே யதி³ ந ப⁴வெய்ய. ந நாம அந்தராப⁴வோதி ‘‘ஸப்³பே³ன ஸப்³ப³ங் நத்தி² நாம அந்தராப⁴வோ’’தி ஏவங் பவத்தஸ்ஸ ஸகவாதி³வசனஸ்ஸ படிக்கே²பே காரணங் நத்தி², தஸ்ஸ படிக்கே²பே காரணங் ஹத³யே ட²பெத்வா ந படிக்கி²பதி, அத² கோ² ததா² அனிச்ச²ந்தோ கேவலங் லத்³தி⁴யா படிக்கி²பதீதி அத்தோ².
505. Antaraṭṭhānānīti antarikaṭṭhānāni. Nivārakaṭṭhānāni bhinditvā ca ākāsena ca gamanato. Yadi so bhavānaṃ antarā na siyāti so antarābhavo kāmabhavādīnaṃ bhavānaṃ antare yadi na bhaveyya. Na nāma antarābhavoti ‘‘sabbena sabbaṃ natthi nāma antarābhavo’’ti evaṃ pavattassa sakavādivacanassa paṭikkhepe kāraṇaṃ natthi, tassa paṭikkhepe kāraṇaṃ hadaye ṭhapetvā na paṭikkhipati, atha kho tathā anicchanto kevalaṃ laddhiyā paṭikkhipatīti attho.
506. ஜாதீதி ந இச்ச²தீதி ஸம்ப³ந்தோ⁴.
506. Jātīti na icchatīti sambandho.
507. ஏவங் தங் தத்த² ந இச்ச²தீதி காமப⁴வாதீ³ஸு விய தங் சுதிபடிஸந்தி⁴பரம்பரங் தத்த² அந்தராப⁴வாவத்தா²ய ந இச்ச²தி. ஸோ ஹி தஸ்ஸ பா⁴விப⁴வனிப்³ப³த்தககம்மதோ ஏவ பவத்திங் இச்ச²தி, தஸ்மா ஜாதிஜராமரணானி அனிச்சதோ குதோ சுதிபடிஸந்தி⁴பரம்பரா. அயஞ்ச வாதோ³ அந்தராப⁴வவாதீ³னங் ஏகச்சானங் வுத்தோ. யே ‘‘அப்பகேன காலேன ஸத்தாஹேனேவ வா படிஸந்தி⁴ங் பாபுணாதீ’’தி வத³ந்தி, யே பன ‘‘தத்தே²வ சவித்வா ஆயாதீதி ஸத்தஸத்தாஹானீ’’தி வத³ந்தி, தேஹி அனுஞ்ஞாதாவ சுதிபடிஸந்தி⁴பரம்பராதி தே அது⁴னாதனா த³ட்ட²ப்³பா³ பாளியங் ‘‘அந்தராப⁴வே ஸத்தா ஜாயந்தி ஜீயந்தி மீயந்தி சவந்தி உபபஜ்ஜந்தீதி? ந ஹேவங் வத்தப்³பே³’’தி ஆக³தத்தா. யதா² சேதங், ஏவங் நிரயூபகா³தி³பா⁴வம்பிஸ்ஸ அது⁴னாதனா படிஜானந்தி. ததா² ஹி தே வத³ந்தி ‘‘உத்³த⁴ங்பாதோ³ து நாரகோ’’திஆதி³. தத்த² யங் நிஸ்ஸாய பரவாதீ³ அந்தராப⁴வங் நாம பரிகப்பேதி, தங் த³ஸ்ஸேதுங் அட்ட²கதா²யங் ‘‘அந்தராபரினிப்³பா³யீதி ஸுத்தபத³ங் அயோனிஸோ க³ஹெத்வா’’தி வுத்தங். இமஸ்ஸ ஹி ‘‘அவிஹாதீ³ஸு தத்த² தத்த² ஆயுவேமஜ்ஜ²ங் அனதிக்கமித்வா அந்தரா அக்³க³மக்³கா³தி⁴க³மேன அனவஸேஸகிலேஸபரினிப்³பா³னேன பரினிப்³பா³யதி, அந்தராபரினிப்³பா³யீ’’தி ஸுத்தபத³ஸ்ஸ அயமத்தோ², ந அந்தராப⁴வபூ⁴தோதி. தஸ்மா வுத்தங் ‘‘அந்தராபரினிப்³பா³யீதி ஸுத்தபத³ங் அயோனிஸோ க³ஹெத்வா’’தி.
507. Evaṃtaṃ tattha na icchatīti kāmabhavādīsu viya taṃ cutipaṭisandhiparamparaṃ tattha antarābhavāvatthāya na icchati. So hi tassa bhāvibhavanibbattakakammato eva pavattiṃ icchati, tasmā jātijarāmaraṇāni aniccato kuto cutipaṭisandhiparamparā. Ayañca vādo antarābhavavādīnaṃ ekaccānaṃ vutto. Ye ‘‘appakena kālena sattāheneva vā paṭisandhiṃ pāpuṇātī’’ti vadanti, ye pana ‘‘tattheva cavitvā āyātīti sattasattāhānī’’ti vadanti, tehi anuññātāva cutipaṭisandhiparamparāti te adhunātanā daṭṭhabbā pāḷiyaṃ ‘‘antarābhave sattā jāyanti jīyanti mīyanti cavanti upapajjantīti? Na hevaṃ vattabbe’’ti āgatattā. Yathā cetaṃ, evaṃ nirayūpagādibhāvampissa adhunātanā paṭijānanti. Tathā hi te vadanti ‘‘uddhaṃpādo tu nārako’’tiādi. Tattha yaṃ nissāya paravādī antarābhavaṃ nāma parikappeti, taṃ dassetuṃ aṭṭhakathāyaṃ ‘‘antarāparinibbāyīti suttapadaṃ ayoniso gahetvā’’ti vuttaṃ. Imassa hi ‘‘avihādīsu tattha tattha āyuvemajjhaṃ anatikkamitvā antarā aggamaggādhigamena anavasesakilesaparinibbānena parinibbāyati, antarāparinibbāyī’’ti suttapadassa ayamattho, na antarābhavabhūtoti. Tasmā vuttaṃ ‘‘antarāparinibbāyīti suttapadaṃ ayoniso gahetvā’’ti.
யே பன ‘‘ஸம்ப⁴வேஸீதி வசனதோ அத்தே²வ அந்தராப⁴வோ. ஸோ ஹி ஸம்ப⁴வங் உபபத்திங் ஏஸதீதி ஸம்ப⁴வேஸீ’’தி வத³ந்தி, தேபி யே பூ⁴தாவ ந புன ப⁴விஸ்ஸந்தி, தே கீ²ணாஸவா ‘‘பூ⁴தானங் வா ஸத்தானங் டி²தியா’’தி எத்த² ‘‘பூ⁴தா’’தி வுத்தா. தப்³பி³து⁴ரதாய ஸம்ப⁴வமேஸந்தீதி ஸம்ப⁴வேஸினோ, அப்பஹீனப⁴வஸங்யோஜனத்தா ஸெக்கா² புது²ஜ்ஜனா. சதூஸு வா யோனீஸு அண்ட³ஜஜலாபு³ஜா ஸத்தா யாவ அண்ட³கோஸங் வத்தி²கோஸஞ்ச ந பி⁴ந்த³ந்தி, தாவ ஸம்ப⁴வேஸீ நாம, அண்ட³கோஸதோ வத்தி²கோஸதோ ச நிக்க²ந்தா பூ⁴தா நாம. ஸங்ஸேத³ஜஓபபாதிகா ச பட²மசித்தக்க²ணே ஸம்ப⁴வேஸீ நாம, து³தியசித்தக்க²ணதோ பட்டா²ய பூ⁴தா நாம. யேன வா இரியாபதே²ன ஜாயந்தி, யாவ ததோ அஞ்ஞங் ந பாபுணந்தி, தாவ ஸம்ப⁴வேஸீ நாம, ததோ பரங் பூ⁴தா நாமாதி ஏவங் உஜுகே பாளிஅனுக³தே அத்தே² ஸதி கிங் அனித்³தா⁴ரிதஸ்ஸ பத்தி²யேன அந்தராப⁴வேன அத்தபா⁴வேன பரிகப்பிதேன பயோஜனந்தி படிக்கி²பிதப்³பா³.
Ye pana ‘‘sambhavesīti vacanato attheva antarābhavo. So hi sambhavaṃ upapattiṃ esatīti sambhavesī’’ti vadanti, tepi ye bhūtāva na puna bhavissanti, te khīṇāsavā ‘‘bhūtānaṃ vā sattānaṃ ṭhitiyā’’ti ettha ‘‘bhūtā’’ti vuttā. Tabbidhuratāya sambhavamesantīti sambhavesino, appahīnabhavasaṃyojanattā sekkhā puthujjanā. Catūsu vā yonīsu aṇḍajajalābujā sattā yāva aṇḍakosaṃ vatthikosañca na bhindanti, tāva sambhavesī nāma, aṇḍakosato vatthikosato ca nikkhantā bhūtā nāma. Saṃsedajaopapātikā ca paṭhamacittakkhaṇe sambhavesī nāma, dutiyacittakkhaṇato paṭṭhāya bhūtā nāma. Yena vā iriyāpathena jāyanti, yāva tato aññaṃ na pāpuṇanti, tāva sambhavesī nāma, tato paraṃ bhūtā nāmāti evaṃ ujuke pāḷianugate atthe sati kiṃ aniddhāritassa patthiyena antarābhavena attabhāvena parikappitena payojananti paṭikkhipitabbā.
யங் பனேகே ‘‘ஸந்தானவஸேன பவத்தமானானங் த⁴ம்மானங் அவிச்சே²தே³ன தே³ஸந்தரேஸு பாதுபா⁴வோ தி³ட்டோ². யதா² தங் வீஹிஆதி³அவிஞ்ஞாணகஸந்தானே, ஏவங் ஸவிஞ்ஞாணகஸந்தானேபி அவிச்சே²தே³ன தே³ஸந்தரே பாதுபா⁴வேன ப⁴விதப்³ப³ங். அயஞ்ச நயோ ஸதி அந்தராப⁴வே யுஜ்ஜதி, நாஞ்ஞதா²’’தி யுத்திங் வத³ந்தி, தேஹி இத்³தி⁴மதோ சேதோவஸிப்பத்தஸ்ஸ சித்தானுக³திகங் காயங் அதி⁴ட்ட²ஹந்தஸ்ஸ க²ணேன ப்³ரஹ்மலோகதோ இதூ⁴பஸங்கமனே இதோ வா ப்³ரஹ்மலோகூபக³மனே யுத்தி வத்தப்³பா³. யதி³ ஸப்³ப³த்தே²வ விச்சி²ன்னதே³ஸே த⁴ம்மானங் பவத்தி ந இச்சி²தா, யதி³பி ஸியா ‘‘இத்³தி⁴மந்தானங் இத்³தி⁴விஸயோ அசிந்தெய்யோ’’தி, தங் இதா⁴பி ஸமானங் ‘‘கம்மவிபாகோ அசிந்தெய்யோ’’தி வசனதோ, தஸ்மா தங் தேஸங் மதிமத்தமேவ. அசிந்தெய்யஸபா⁴வா ஹி ஸபா⁴வத⁴ம்மா, தே கத்த²சி பச்சயவஸேன விச்சி²ன்னதே³ஸே பாதுப⁴வந்தி, கத்த²சி அவிச்சி²ன்னதே³ஸே ச. ததா² ஹி முக²கோ⁴ஸாதீ³ஹி பச்சயேஹி அஞ்ஞஸ்மிங் தே³ஸே ஆதா³ஸபப்³ப³தபதே³ஸாதி³கே படிபி³ம்ப³படிகோ⁴ஸாதி³கங் நிப்³ப³த்தமானங் தி³ட்ட²ந்தி.
Yaṃ paneke ‘‘santānavasena pavattamānānaṃ dhammānaṃ avicchedena desantaresu pātubhāvo diṭṭho. Yathā taṃ vīhiādiaviññāṇakasantāne, evaṃ saviññāṇakasantānepi avicchedena desantare pātubhāvena bhavitabbaṃ. Ayañca nayo sati antarābhave yujjati, nāññathā’’ti yuttiṃ vadanti, tehi iddhimato cetovasippattassa cittānugatikaṃ kāyaṃ adhiṭṭhahantassa khaṇena brahmalokato idhūpasaṅkamane ito vā brahmalokūpagamane yutti vattabbā. Yadi sabbattheva vicchinnadese dhammānaṃ pavatti na icchitā, yadipi siyā ‘‘iddhimantānaṃ iddhivisayo acinteyyo’’ti, taṃ idhāpi samānaṃ ‘‘kammavipāko acinteyyo’’ti vacanato, tasmā taṃ tesaṃ matimattameva. Acinteyyasabhāvā hi sabhāvadhammā, te katthaci paccayavasena vicchinnadese pātubhavanti, katthaci avicchinnadese ca. Tathā hi mukhaghosādīhi paccayehi aññasmiṃ dese ādāsapabbatapadesādike paṭibimbapaṭighosādikaṃ nibbattamānaṃ diṭṭhanti.
எத்தா²ஹ – படிபி³ம்ப³ங் தாவ அஸித்³த⁴த்தா அஸதி³ஸத்தா ச ந நித³ஸ்ஸனங். படிபி³ம்ப³ஞ்ஹி நாம அஞ்ஞதே³வ ரூபந்தரங் உப்பஜ்ஜதீதி அஸித்³த⁴மேதங். ஸித்³தி⁴யம்பி அஸதி³ஸத்தா ந நித³ஸ்ஸனங் ஸியா ஏகஸ்மிங் டா²னே த்³வின்னங் ஸஹடா²னாபா⁴வதோ. யத்தே²வ ஹி ஆதா³ஸரூபங் படிபி³ம்ப³ரூபஞ்ச தி³ஸ்ஸதி, ந ச ஏகஸ்மிங் தே³ஸே ரூபத்³வயஸ்ஸ ஸஹபா⁴வோ யுத்தோ நிஸ்ஸயபூ⁴ததே³ஸதோ, அஸதி³ஸஞ்சேதங் ஸந்தா⁴னதோ. ந ஹி முக²ஸ்ஸ படிபி³ம்ப³ஸந்தா⁴னபூ⁴தங் ஆதா³ஸஸந்தா⁴னஸம்ப³ந்த⁴த்தா ஸந்தா⁴னங் உத்³தி³ஸ்ஸ அவிச்சே²தே³ன தே³ஸந்தரே பாதுபா⁴வோ வுச்சதி, ந அஸந்தானந்தி அஸமானமேவ தந்தி.
Etthāha – paṭibimbaṃ tāva asiddhattā asadisattā ca na nidassanaṃ. Paṭibimbañhi nāma aññadeva rūpantaraṃ uppajjatīti asiddhametaṃ. Siddhiyampi asadisattā na nidassanaṃ siyā ekasmiṃ ṭhāne dvinnaṃ sahaṭhānābhāvato. Yattheva hi ādāsarūpaṃ paṭibimbarūpañca dissati, na ca ekasmiṃ dese rūpadvayassa sahabhāvo yutto nissayabhūtadesato, asadisañcetaṃ sandhānato. Na hi mukhassa paṭibimbasandhānabhūtaṃ ādāsasandhānasambandhattā sandhānaṃ uddissa avicchedena desantare pātubhāvo vuccati, na asantānanti asamānameva tanti.
தத்த² யங் வுத்தங் ‘‘படிபி³ம்ப³ங் நாம அஞ்ஞதே³வ ரூபந்தரங் உப்பஜ்ஜதீதி அஸித்³த⁴ங் ஏகஸ்மிங் டா²னே த்³வின்னங் ஸஹடா²னபா⁴வதோ’’தி, தயித³ங் அஸந்தானமேவ ஸஹடா²னங் சோதி³தங் பி⁴ன்னநிஸ்ஸயத்தா. ந ஹி பி⁴ன்னநிஸ்ஸயானங் ஸஹடா²னங் அத்தி². யதா² அனேகேஸங் மணிதீ³பாதீ³னங் பபா⁴ரூபங் ஏகஸ்மிங் பதே³ஸே பவத்தமானங் அச்சி²தமானதாய நிரந்தரதாய ச அபி⁴ன்னட்டா²னங் விய பஞ்ஞாயதி, பி⁴ன்னநிஸ்ஸயத்தா பன பி⁴ன்னட்டா²னமேவ தங், க³ஹணவிஸேஸேன ததா²அபி⁴ன்னட்டா²னமத்தங், ஏவங் ஆதா³ஸரூபபடிபி³ம்ப³ரூபேஸுபி த³ட்ட²ப்³ப³ங். தாதி³ஸபச்சயஸமவாயேன ஹி தத்த² தங் உப்பஜ்ஜதி சேவ விக³ச்ச²தி ச, ஏவஞ்சேதங் ஸம்படிச்சி²தப்³ப³ங் சக்கு²விஞ்ஞாணஸ்ஸ கோ³சரபா⁴வூபக³மனதோ. அஞ்ஞதா² ஆலோகேன வினாபி பஞ்ஞாயெய்ய, சக்கு²விஞ்ஞாணஸ்ஸ வா ந கோ³சரோ விய ஸியா. தஸ்ஸ பன ஸாமக்³கி³யா ஸோ ஆனுபா⁴வோ, யங் ததா² த³ஸ்ஸனங் ஹோதீதி. அசிந்தெய்யோ ஹி த⁴ம்மானங் ஸாமத்தி²யபே⁴தோ³தி வத³ந்தேனபி அயமேவத்தோ² ஸாதி⁴தோ பி⁴ன்னநிஸ்ஸயஸ்ஸபி அபி⁴ன்னட்டா²னஸ்ஸ விய உபட்டா²னதோ. ஏதேனேவ உத³காதீ³ஸு படிபி³ம்ப³ரூபாபா⁴வசோத³னா படிக்கி²த்தா வேதி³தப்³பா³.
Tattha yaṃ vuttaṃ ‘‘paṭibimbaṃ nāma aññadeva rūpantaraṃ uppajjatīti asiddhaṃ ekasmiṃ ṭhāne dvinnaṃ sahaṭhānabhāvato’’ti, tayidaṃ asantānameva sahaṭhānaṃ coditaṃ bhinnanissayattā. Na hi bhinnanissayānaṃ sahaṭhānaṃ atthi. Yathā anekesaṃ maṇidīpādīnaṃ pabhārūpaṃ ekasmiṃ padese pavattamānaṃ acchitamānatāya nirantaratāya ca abhinnaṭṭhānaṃ viya paññāyati, bhinnanissayattā pana bhinnaṭṭhānameva taṃ, gahaṇavisesena tathāabhinnaṭṭhānamattaṃ, evaṃ ādāsarūpapaṭibimbarūpesupi daṭṭhabbaṃ. Tādisapaccayasamavāyena hi tattha taṃ uppajjati ceva vigacchati ca, evañcetaṃ sampaṭicchitabbaṃ cakkhuviññāṇassa gocarabhāvūpagamanato. Aññathā ālokena vināpi paññāyeyya, cakkhuviññāṇassa vā na gocaro viya siyā. Tassa pana sāmaggiyā so ānubhāvo, yaṃ tathā dassanaṃ hotīti. Acinteyyo hi dhammānaṃ sāmatthiyabhedoti vadantenapi ayamevattho sādhito bhinnanissayassapi abhinnaṭṭhānassa viya upaṭṭhānato. Eteneva udakādīsu paṭibimbarūpābhāvacodanā paṭikkhittā veditabbā.
ஸித்³தே⁴ ச படிபி³ம்ப³ரூபே தஸ்ஸ நித³ஸ்ஸனபா⁴வோ ஸித்³தோ⁴யேவ ஹோதி ஹேதுப²லானங் விச்சி²ன்னதே³ஸதாவிபா⁴வனதோ. யங் பன வுத்தங் ‘‘அஸதி³ஸத்தா ந நித³ஸ்ஸன’’ந்தி, தத³யுத்தங். கஸ்மா? ந ஹி நித³ஸ்ஸனங் நாம நித³ஸ்ஸிதப்³பே³ன ஸப்³ப³தா³ ஸதி³ஸமேவ ஹோதி. சுதிக்க²ந்தா⁴தா⁴னதோ விச்சி²ன்னதே³ஸே உபபத்திக்க²ந்தா⁴ பாதுப⁴வந்தீதி ஏதஸ்ஸ அத்த²ஸ்ஸ ஸாத⁴னத்த²ங் முக²ரூபதோ விச்சி²ன்னே டா²னே தஸ்ஸ ப²லபூ⁴தங் படிபி³ம்ப³ரூபங் நிப்³ப³த்ததீதி எத்த² தஸ்ஸ நித³ஸ்ஸனத்த²ஸ்ஸ அதி⁴ப்பேதத்தா. ஏதேன அஸந்தானசோத³னா படிக்கி²த்தா வேதி³தப்³பா³.
Siddhe ca paṭibimbarūpe tassa nidassanabhāvo siddhoyeva hoti hetuphalānaṃ vicchinnadesatāvibhāvanato. Yaṃ pana vuttaṃ ‘‘asadisattā na nidassana’’nti, tadayuttaṃ. Kasmā? Na hi nidassanaṃ nāma nidassitabbena sabbadā sadisameva hoti. Cutikkhandhādhānato vicchinnadese upapattikkhandhā pātubhavantīti etassa atthassa sādhanatthaṃ mukharūpato vicchinne ṭhāne tassa phalabhūtaṃ paṭibimbarūpaṃ nibbattatīti ettha tassa nidassanatthassa adhippetattā. Etena asantānacodanā paṭikkhittā veditabbā.
யஸ்மா வா முக²படிபி³ம்ப³ரூபானங் ஹேதுப²லபா⁴வோ ஸித்³தோ⁴, தஸ்மாபி ஸா படிக்கி²த்தாவ ஹோதி. ஹேதுப²லபா⁴வஸம்ப³ந்தே⁴ஸு ஹி ஸந்தானவோஹாரோ. யதா²வுத்தத்³வீஹிகாரணேஹி படிபி³ம்ப³ங் உப்பஜ்ஜதி பி³ம்ப³தோ ஆதா³ஸதோ ச, ந சேவங் உபபத்திக்க²ந்தா⁴னங் விச்சி²ன்னதே³ஸுப்பத்தி. யதா² செத்த² படிபி³ம்ப³ரூபங் நித³ஸ்ஸிதங், ஏவங் படிகோ⁴ஸதீ³பமுத்³தா³த³யோபி நித³ஸ்ஸிதப்³பா³. யதா² ஹி படிகோ⁴ஸதீ³பமுத்³தா³த³யோ ஸத்³தா³தி³ஹேதுகா ஹொந்தி, அஞ்ஞத்ர அக³ந்த்வா ஹொந்தி, ஏவமேவ இத³ங் சித்தந்தி.
Yasmā vā mukhapaṭibimbarūpānaṃ hetuphalabhāvo siddho, tasmāpi sā paṭikkhittāva hoti. Hetuphalabhāvasambandhesu hi santānavohāro. Yathāvuttadvīhikāraṇehi paṭibimbaṃ uppajjati bimbato ādāsato ca, na cevaṃ upapattikkhandhānaṃ vicchinnadesuppatti. Yathā cettha paṭibimbarūpaṃ nidassitaṃ, evaṃ paṭighosadīpamuddādayopi nidassitabbā. Yathā hi paṭighosadīpamuddādayo saddādihetukā honti, aññatra agantvā honti, evameva idaṃ cittanti.
அபிசாயங் அந்தராப⁴வவாதீ³ ஏவங் புச்சி²தப்³போ³ – யதி³ ‘‘த⁴ம்மானங் விச்சி²ன்னதே³ஸுப்பத்தி ந யுத்தா’’தி அந்தராப⁴வோ பரிகப்பிதோ, ராஹுஆதீ³னங் ஸரீரே கத²மனேகயோஜனஸஹஸ்ஸந்தரிகேஸு பாத³ட்டா²னஹத³யட்டா²னேஸு காயவிஞ்ஞாணமனோவிஞ்ஞாணுப்பத்தி விச்சி²ன்னதே³ஸே யுத்தா. யதி³ ஏகஸந்தானபா⁴வதோ, இதா⁴பி தங்ஸமானங். ந செத்த² அரூபத⁴ம்மபா⁴வதோ அலங் பரிஹாராய பஞ்சவோகாரே ரூபாரூபத⁴ம்மானங் அஞ்ஞமஞ்ஞங் ஸம்ப³ந்த⁴த்தா. வத்தமானேஹி தாவ பச்சயேஹி விச்சி²ன்னதே³ஸே ப²லஸ்ஸ உப்பத்தி ஸித்³தா⁴, கிமங்க³ங் பன அதீதேஹி பஞ்சவோகாரப⁴வேஹி. யத்த² விபாகவிஞ்ஞாணஸ்ஸ பச்சயோ, தத்த²ஸ்ஸ நிஸ்ஸயபூ⁴தஸ்ஸ வத்து²ஸ்ஸ ஸஹபா⁴வீனஞ்ச க²ந்தா⁴னங் ஸம்ப⁴வோதி லத்³தோ⁴காஸேன கம்முனா நிப்³ப³த்தியமானஸ்ஸ அவஸேஸபச்சயந்தரஸஹிதஸ்ஸ விபாகவிஞ்ஞாணஸ்ஸ உப்பத்தியங் நாலங் விச்சி²ன்னதே³ஸதா விப³ந்தா⁴ய. யதா² ச அனேககப்பஸஹஸ்ஸந்தரிகாபி சுதிக்க²ந்தா⁴ உபபத்திக்க²ந்தா⁴னங் அனந்தரபச்சயோதி ந காலதூ³ரதா, ஏவங் அனேகயோஜனஸஹஸ்ஸந்தரிகாபி தே தேஸங் அனந்தரபச்சயோ ஹொந்தீதி ந தே³ஸதூ³ரதா. ஏவங் சுதிக்க²ந்த⁴னிரோதா⁴னந்தரங் உபபத்திட்டா²னே பச்சயந்தரஸமவாயேன படிஸந்தி⁴க்க²ந்தா⁴ பாதுப⁴வந்தீதி நத்தே²வ அந்தராப⁴வோ. அஸதி ச தஸ்மிங் யங் தஸ்ஸ கேசி ‘‘பா⁴விப⁴வனிப்³ப³த்தககம்முனோ ததோ ஏவ பா⁴விபுரிமகாலப⁴வாகாரோ ஸஜாதிஸுத்³த⁴தி³ப்³ப³சக்கு²கோ³சரோ அஹீனிந்த்³ரியோ கேனசி அப்படிஹதக³மனோ க³ந்தா⁴ஹாரோ’’தி ஏவமாதி³காரணாகாராதி³ங் வண்ணெந்தி, தங் வஞ்ஜா²தனயஸ்ஸ ரஸ்ஸதீ³க⁴ஸாமதாதி³விவாத³ஸதி³ஸந்தி வேதி³தப்³ப³ங்.
Apicāyaṃ antarābhavavādī evaṃ pucchitabbo – yadi ‘‘dhammānaṃ vicchinnadesuppatti na yuttā’’ti antarābhavo parikappito, rāhuādīnaṃ sarīre kathamanekayojanasahassantarikesu pādaṭṭhānahadayaṭṭhānesu kāyaviññāṇamanoviññāṇuppatti vicchinnadese yuttā. Yadi ekasantānabhāvato, idhāpi taṃsamānaṃ. Na cettha arūpadhammabhāvato alaṃ parihārāya pañcavokāre rūpārūpadhammānaṃ aññamaññaṃ sambandhattā. Vattamānehi tāva paccayehi vicchinnadese phalassa uppatti siddhā, kimaṅgaṃ pana atītehi pañcavokārabhavehi. Yattha vipākaviññāṇassa paccayo, tatthassa nissayabhūtassa vatthussa sahabhāvīnañca khandhānaṃ sambhavoti laddhokāsena kammunā nibbattiyamānassa avasesapaccayantarasahitassa vipākaviññāṇassa uppattiyaṃ nālaṃ vicchinnadesatā vibandhāya. Yathā ca anekakappasahassantarikāpi cutikkhandhā upapattikkhandhānaṃ anantarapaccayoti na kāladūratā, evaṃ anekayojanasahassantarikāpi te tesaṃ anantarapaccayo hontīti na desadūratā. Evaṃ cutikkhandhanirodhānantaraṃ upapattiṭṭhāne paccayantarasamavāyena paṭisandhikkhandhā pātubhavantīti nattheva antarābhavo. Asati ca tasmiṃ yaṃ tassa keci ‘‘bhāvibhavanibbattakakammuno tato eva bhāvipurimakālabhavākāro sajātisuddhadibbacakkhugocaro ahīnindriyo kenaci appaṭihatagamano gandhāhāro’’ti evamādikāraṇākārādiṃ vaṇṇenti, taṃ vañjhātanayassa rassadīghasāmatādivivādasadisanti veditabbaṃ.
அந்தராப⁴வகதா²வண்ணனா நிட்டி²தா.
Antarābhavakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (74) 2. அந்தராப⁴வகதா² • (74) 2. Antarābhavakathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 2. அந்தராப⁴வகதா²வண்ணனா • 2. Antarābhavakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. அந்தராப⁴வகதா²வண்ணனா • 2. Antarābhavakathāvaṇṇanā
