Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā

    2. анд̇араабхавагат̇ааван̣н̣анаа

    2. Antarābhavakathāvaṇṇanā

    505. анд̇арадтаанаанийд̇и анд̇аригадтаанаани. ниваарагадтаанаани бхинд̣̇ид̇ваа жа аагаасзна жа г̇аманад̇о. яад̣̇и со бхаваанам̣ анд̇араа на сияаад̇и со анд̇араабхаво гаамабхаваад̣̇ийнам̣ бхаваанам̣ анд̇арз яад̣̇и на бхавзяяа. на наама анд̇араабхавод̇и ‘‘саб̣б̣зна саб̣б̣ам̣ над̇т̇и наама анд̇араабхаво’’д̇и звам̣ бавад̇д̇асса сагаваад̣̇иважанасса бадигкзбз гааран̣ам̣ над̇т̇и, д̇асса бадигкзбз гааран̣ам̣ хад̣̇аяз табзд̇ваа на бадигкибад̇и, ат̇а ко д̇ат̇аа анижчанд̇о гзвалам̣ лад̣̇д̇хияаа бадигкибад̇ийд̇и ад̇т̇о.

    505. Antaraṭṭhānānīti antarikaṭṭhānāni. Nivārakaṭṭhānāni bhinditvā ca ākāsena ca gamanato. Yadi so bhavānaṃ antarā na siyāti so antarābhavo kāmabhavādīnaṃ bhavānaṃ antare yadi na bhaveyya. Na nāma antarābhavoti ‘‘sabbena sabbaṃ natthi nāma antarābhavo’’ti evaṃ pavattassa sakavādivacanassa paṭikkhepe kāraṇaṃ natthi, tassa paṭikkhepe kāraṇaṃ hadaye ṭhapetvā na paṭikkhipati, atha kho tathā anicchanto kevalaṃ laddhiyā paṭikkhipatīti attho.

    506. ж̇аад̇ийд̇и на ижчад̇ийд̇и самб̣анд̇хо.

    506. Jātīti na icchatīti sambandho.

    507. звам̣ д̇ам̣ д̇ад̇т̇а на ижчад̇ийд̇и гаамабхаваад̣̇ийсу вияа д̇ам̣ жуд̇ибадисанд̇хибарамбарам̣ д̇ад̇т̇а анд̇араабхаваавад̇т̇ааяа на ижчад̇и. со хи д̇асса бхаавибхаваниб̣б̣ад̇д̇агагаммад̇о зва бавад̇д̇им̣ ижчад̇и, д̇асмаа ж̇аад̇иж̇араамаран̣аани анижжад̇о гуд̇о жуд̇ибадисанд̇хибарамбараа. аяан̃жа ваад̣̇о анд̇араабхававаад̣̇ийнам̣ згажжаанам̣ вуд̇д̇о. яз ‘‘аббагзна гаалзна сад̇д̇аахзнзва ваа бадисанд̇хим̣ баабун̣аад̇ий’’д̇и вад̣̇анд̇и, яз бана ‘‘д̇ад̇т̇зва жавид̇ваа ааяаад̇ийд̇и сад̇д̇асад̇д̇аахааний’’д̇и вад̣̇анд̇и, д̇зхи анун̃н̃аад̇аава жуд̇ибадисанд̇хибарамбараад̇и д̇з ад̇хунаад̇анаа д̣̇адтаб̣б̣аа баал̣ияам̣ ‘‘анд̇араабхавз сад̇д̇аа ж̇ааяанд̇и ж̇ийяанд̇и мийяанд̇и жаванд̇и убабаж̇ж̇анд̇ийд̇и? на хзвам̣ вад̇д̇аб̣б̣з’’д̇и ааг̇ад̇ад̇д̇аа. яат̇аа жзд̇ам̣, звам̣ нираяуубаг̇аад̣̇ибхаавамбисса ад̇хунаад̇анаа бадиж̇аананд̇и. д̇ат̇аа хи д̇з вад̣̇анд̇и ‘‘уд̣̇д̇хам̣баад̣̇о д̇у наараго’’д̇иаад̣̇и. д̇ад̇т̇а яам̣ ниссааяа бараваад̣̇ий анд̇араабхавам̣ наама баригаббзд̇и, д̇ам̣ д̣̇ассзд̇ум̣ адтагат̇ааяам̣ ‘‘анд̇араабариниб̣б̣ааяийд̇и суд̇д̇абад̣̇ам̣ аяонисо г̇ахзд̇ваа’’д̇и вуд̇д̇ам̣. имасса хи ‘‘авихаад̣̇ийсу д̇ад̇т̇а д̇ад̇т̇а ааяувзмаж̇жхам̣ анад̇иггамид̇ваа анд̇араа аг̇г̇амаг̇г̇аад̇хиг̇амзна анавасзсагилзсабариниб̣б̣аанзна бариниб̣б̣ааяад̇и, анд̇араабариниб̣б̣ааяий’’д̇и суд̇д̇абад̣̇асса аяамад̇т̇о, на анд̇араабхавабхууд̇од̇и. д̇асмаа вуд̇д̇ам̣ ‘‘анд̇араабариниб̣б̣ааяийд̇и суд̇д̇абад̣̇ам̣ аяонисо г̇ахзд̇ваа’’д̇и.

    507. Evaṃtaṃ tattha na icchatīti kāmabhavādīsu viya taṃ cutipaṭisandhiparamparaṃ tattha antarābhavāvatthāya na icchati. So hi tassa bhāvibhavanibbattakakammato eva pavattiṃ icchati, tasmā jātijarāmaraṇāni aniccato kuto cutipaṭisandhiparamparā. Ayañca vādo antarābhavavādīnaṃ ekaccānaṃ vutto. Ye ‘‘appakena kālena sattāheneva vā paṭisandhiṃ pāpuṇātī’’ti vadanti, ye pana ‘‘tattheva cavitvā āyātīti sattasattāhānī’’ti vadanti, tehi anuññātāva cutipaṭisandhiparamparāti te adhunātanā daṭṭhabbā pāḷiyaṃ ‘‘antarābhave sattā jāyanti jīyanti mīyanti cavanti upapajjantīti? Na hevaṃ vattabbe’’ti āgatattā. Yathā cetaṃ, evaṃ nirayūpagādibhāvampissa adhunātanā paṭijānanti. Tathā hi te vadanti ‘‘uddhaṃpādo tu nārako’’tiādi. Tattha yaṃ nissāya paravādī antarābhavaṃ nāma parikappeti, taṃ dassetuṃ aṭṭhakathāyaṃ ‘‘antarāparinibbāyīti suttapadaṃ ayoniso gahetvā’’ti vuttaṃ. Imassa hi ‘‘avihādīsu tattha tattha āyuvemajjhaṃ anatikkamitvā antarā aggamaggādhigamena anavasesakilesaparinibbānena parinibbāyati, antarāparinibbāyī’’ti suttapadassa ayamattho, na antarābhavabhūtoti. Tasmā vuttaṃ ‘‘antarāparinibbāyīti suttapadaṃ ayoniso gahetvā’’ti.

    яз бана ‘‘самбхавзсийд̇и важанад̇о ад̇т̇зва анд̇араабхаво. со хи самбхавам̣ убабад̇д̇им̣ зсад̇ийд̇и самбхавзсий’’д̇и вад̣̇анд̇и, д̇зби яз бхууд̇аава на буна бхависсанд̇и, д̇з кийн̣аасаваа ‘‘бхууд̇аанам̣ ваа сад̇д̇аанам̣ тид̇ияаа’’д̇и зд̇т̇а ‘‘бхууд̇аа’’д̇и вуд̇д̇аа. д̇аб̣б̣ид̇хурад̇ааяа самбхавамзсанд̇ийд̇и самбхавзсино, аббахийнабхавасам̣яож̇анад̇д̇аа сзгкаа бут̇уж̇ж̇анаа. жад̇уусу ваа яонийсу ан̣д̣аж̇аж̇алааб̣уж̇аа сад̇д̇аа яаава ан̣д̣агосам̣ вад̇т̇игосан̃жа на бхинд̣̇анд̇и, д̇аава самбхавзсий наама, ан̣д̣агосад̇о вад̇т̇игосад̇о жа нигканд̇аа бхууд̇аа наама. сам̣сзд̣̇аж̇аобабаад̇игаа жа батамажид̇д̇агкан̣з самбхавзсий наама, д̣̇уд̇ияажид̇д̇агкан̣ад̇о бадтааяа бхууд̇аа наама. язна ваа ирияаабат̇зна ж̇ааяанд̇и, яаава д̇ад̇о ан̃н̃ам̣ на баабун̣анд̇и, д̇аава самбхавзсий наама, д̇ад̇о барам̣ бхууд̇аа наамаад̇и звам̣ уж̇угз баал̣иануг̇ад̇з ад̇т̇з сад̇и гим̣ анид̣̇д̇хаарид̇асса бад̇т̇иязна анд̇араабхавзна ад̇д̇абхаавзна баригаббид̇зна баяож̇ананд̇и бадигкибид̇аб̣б̣аа.

    Ye pana ‘‘sambhavesīti vacanato attheva antarābhavo. So hi sambhavaṃ upapattiṃ esatīti sambhavesī’’ti vadanti, tepi ye bhūtāva na puna bhavissanti, te khīṇāsavā ‘‘bhūtānaṃ vā sattānaṃ ṭhitiyā’’ti ettha ‘‘bhūtā’’ti vuttā. Tabbidhuratāya sambhavamesantīti sambhavesino, appahīnabhavasaṃyojanattā sekkhā puthujjanā. Catūsu vā yonīsu aṇḍajajalābujā sattā yāva aṇḍakosaṃ vatthikosañca na bhindanti, tāva sambhavesī nāma, aṇḍakosato vatthikosato ca nikkhantā bhūtā nāma. Saṃsedajaopapātikā ca paṭhamacittakkhaṇe sambhavesī nāma, dutiyacittakkhaṇato paṭṭhāya bhūtā nāma. Yena vā iriyāpathena jāyanti, yāva tato aññaṃ na pāpuṇanti, tāva sambhavesī nāma, tato paraṃ bhūtā nāmāti evaṃ ujuke pāḷianugate atthe sati kiṃ aniddhāritassa patthiyena antarābhavena attabhāvena parikappitena payojananti paṭikkhipitabbā.

    яам̣ банзгз ‘‘санд̇аанавасзна бавад̇д̇амаанаанам̣ д̇хаммаанам̣ авижчзд̣̇зна д̣̇зсанд̇арзсу баад̇убхааво д̣̇идто. яат̇аа д̇ам̣ вийхиаад̣̇иавин̃н̃аан̣агасанд̇аанз, звам̣ савин̃н̃аан̣агасанд̇аанзби авижчзд̣̇зна д̣̇зсанд̇арз баад̇убхаавзна бхавид̇аб̣б̣ам̣. аяан̃жа наяо сад̇и анд̇араабхавз яуж̇ж̇ад̇и, наан̃н̃ат̇аа’’д̇и яуд̇д̇им̣ вад̣̇анд̇и, д̇зхи ид̣̇д̇химад̇о жзд̇овасиббад̇д̇асса жид̇д̇аануг̇ад̇игам̣ гааяам̣ ад̇хидтаханд̇асса кан̣зна б̣рахмалогад̇о ид̇хуубасан̇гаманз ид̇о ваа б̣рахмалогуубаг̇аманз яуд̇д̇и вад̇д̇аб̣б̣аа. яад̣̇и саб̣б̣ад̇т̇зва вижчиннад̣̇зсз д̇хаммаанам̣ бавад̇д̇и на ижчид̇аа, яад̣̇иби сияаа ‘‘ид̣̇д̇химанд̇аанам̣ ид̣̇д̇хивисаяо ажинд̇зяяо’’д̇и, д̇ам̣ ид̇хааби самаанам̣ ‘‘гаммавибааго ажинд̇зяяо’’д̇и важанад̇о, д̇асмаа д̇ам̣ д̇зсам̣ мад̇имад̇д̇амзва. ажинд̇зяяасабхааваа хи сабхаавад̇хаммаа, д̇з гад̇т̇ажи бажжаяавасзна вижчиннад̣̇зсз баад̇убхаванд̇и, гад̇т̇ажи авижчиннад̣̇зсз жа. д̇ат̇аа хи мукагхосаад̣̇ийхи бажжаязхи ан̃н̃асмим̣ д̣̇зсз аад̣̇аасабаб̣б̣ад̇абад̣̇зсаад̣̇игз бадиб̣имб̣абадигхосаад̣̇игам̣ ниб̣б̣ад̇д̇амаанам̣ д̣̇идтанд̇и.

    Yaṃ paneke ‘‘santānavasena pavattamānānaṃ dhammānaṃ avicchedena desantaresu pātubhāvo diṭṭho. Yathā taṃ vīhiādiaviññāṇakasantāne, evaṃ saviññāṇakasantānepi avicchedena desantare pātubhāvena bhavitabbaṃ. Ayañca nayo sati antarābhave yujjati, nāññathā’’ti yuttiṃ vadanti, tehi iddhimato cetovasippattassa cittānugatikaṃ kāyaṃ adhiṭṭhahantassa khaṇena brahmalokato idhūpasaṅkamane ito vā brahmalokūpagamane yutti vattabbā. Yadi sabbattheva vicchinnadese dhammānaṃ pavatti na icchitā, yadipi siyā ‘‘iddhimantānaṃ iddhivisayo acinteyyo’’ti, taṃ idhāpi samānaṃ ‘‘kammavipāko acinteyyo’’ti vacanato, tasmā taṃ tesaṃ matimattameva. Acinteyyasabhāvā hi sabhāvadhammā, te katthaci paccayavasena vicchinnadese pātubhavanti, katthaci avicchinnadese ca. Tathā hi mukhaghosādīhi paccayehi aññasmiṃ dese ādāsapabbatapadesādike paṭibimbapaṭighosādikaṃ nibbattamānaṃ diṭṭhanti.

    зд̇т̇ааха – бадиб̣имб̣ам̣ д̇аава асид̣̇д̇хад̇д̇аа асад̣̇исад̇д̇аа жа на нид̣̇ассанам̣. бадиб̣имб̣ан̃хи наама ан̃н̃ад̣̇зва руубанд̇арам̣ уббаж̇ж̇ад̇ийд̇и асид̣̇д̇хамзд̇ам̣. сид̣̇д̇хияамби асад̣̇исад̇д̇аа на нид̣̇ассанам̣ сияаа згасмим̣ таанз д̣̇виннам̣ сахатаанаабхаавад̇о. яад̇т̇зва хи аад̣̇аасаруубам̣ бадиб̣имб̣аруубан̃жа д̣̇иссад̇и, на жа згасмим̣ д̣̇зсз руубад̣̇ваяасса сахабхааво яуд̇д̇о ниссаяабхууд̇ад̣̇зсад̇о, асад̣̇исан̃жзд̇ам̣ санд̇хаанад̇о. на хи мукасса бадиб̣имб̣асанд̇хаанабхууд̇ам̣ аад̣̇аасасанд̇хаанасамб̣анд̇хад̇д̇аа санд̇хаанам̣ уд̣̇д̣̇исса авижчзд̣̇зна д̣̇зсанд̇арз баад̇убхааво вужжад̇и, на асанд̇аананд̇и асамаанамзва д̇анд̇и.

    Etthāha – paṭibimbaṃ tāva asiddhattā asadisattā ca na nidassanaṃ. Paṭibimbañhi nāma aññadeva rūpantaraṃ uppajjatīti asiddhametaṃ. Siddhiyampi asadisattā na nidassanaṃ siyā ekasmiṃ ṭhāne dvinnaṃ sahaṭhānābhāvato. Yattheva hi ādāsarūpaṃ paṭibimbarūpañca dissati, na ca ekasmiṃ dese rūpadvayassa sahabhāvo yutto nissayabhūtadesato, asadisañcetaṃ sandhānato. Na hi mukhassa paṭibimbasandhānabhūtaṃ ādāsasandhānasambandhattā sandhānaṃ uddissa avicchedena desantare pātubhāvo vuccati, na asantānanti asamānameva tanti.

    д̇ад̇т̇а яам̣ вуд̇д̇ам̣ ‘‘бадиб̣имб̣ам̣ наама ан̃н̃ад̣̇зва руубанд̇арам̣ уббаж̇ж̇ад̇ийд̇и асид̣̇д̇хам̣ згасмим̣ таанз д̣̇виннам̣ сахатаанабхаавад̇о’’д̇и, д̇аяид̣̇ам̣ асанд̇аанамзва сахатаанам̣ жод̣̇ид̇ам̣ бхиннаниссаяад̇д̇аа. на хи бхиннаниссаяаанам̣ сахатаанам̣ ад̇т̇и. яат̇аа анзгзсам̣ ман̣ид̣̇ийбаад̣̇ийнам̣ бабхааруубам̣ згасмим̣ бад̣̇зсз бавад̇д̇амаанам̣ ажчид̇амаанад̇ааяа ниранд̇арад̇ааяа жа абхиннадтаанам̣ вияа бан̃н̃ааяад̇и, бхиннаниссаяад̇д̇аа бана бхиннадтаанамзва д̇ам̣, г̇ахан̣ависзсзна д̇ат̇ааабхиннадтаанамад̇д̇ам̣, звам̣ аад̣̇аасаруубабадиб̣имб̣аруубзсуби д̣̇адтаб̣б̣ам̣. д̇аад̣̇исабажжаяасамавааязна хи д̇ад̇т̇а д̇ам̣ уббаж̇ж̇ад̇и жзва виг̇ажчад̇и жа, зван̃жзд̇ам̣ самбадижчид̇аб̣б̣ам̣ жагкувин̃н̃аан̣асса г̇ожарабхаавуубаг̇аманад̇о. ан̃н̃ат̇аа аалогзна винааби бан̃н̃ааязяяа, жагкувин̃н̃аан̣асса ваа на г̇ожаро вияа сияаа. д̇асса бана саамаг̇г̇ияаа со аанубхааво, яам̣ д̇ат̇аа д̣̇ассанам̣ ход̇ийд̇и. ажинд̇зяяо хи д̇хаммаанам̣ саамад̇т̇ияабхзд̣̇од̇и вад̣̇анд̇знаби аяамзвад̇т̇о саад̇хид̇о бхиннаниссаяассаби абхиннадтаанасса вияа убадтаанад̇о. зд̇знзва уд̣̇агаад̣̇ийсу бадиб̣имб̣аруубаабхааважод̣̇анаа бадигкид̇д̇аа взд̣̇ид̇аб̣б̣аа.

    Tattha yaṃ vuttaṃ ‘‘paṭibimbaṃ nāma aññadeva rūpantaraṃ uppajjatīti asiddhaṃ ekasmiṃ ṭhāne dvinnaṃ sahaṭhānabhāvato’’ti, tayidaṃ asantānameva sahaṭhānaṃ coditaṃ bhinnanissayattā. Na hi bhinnanissayānaṃ sahaṭhānaṃ atthi. Yathā anekesaṃ maṇidīpādīnaṃ pabhārūpaṃ ekasmiṃ padese pavattamānaṃ acchitamānatāya nirantaratāya ca abhinnaṭṭhānaṃ viya paññāyati, bhinnanissayattā pana bhinnaṭṭhānameva taṃ, gahaṇavisesena tathāabhinnaṭṭhānamattaṃ, evaṃ ādāsarūpapaṭibimbarūpesupi daṭṭhabbaṃ. Tādisapaccayasamavāyena hi tattha taṃ uppajjati ceva vigacchati ca, evañcetaṃ sampaṭicchitabbaṃ cakkhuviññāṇassa gocarabhāvūpagamanato. Aññathā ālokena vināpi paññāyeyya, cakkhuviññāṇassa vā na gocaro viya siyā. Tassa pana sāmaggiyā so ānubhāvo, yaṃ tathā dassanaṃ hotīti. Acinteyyo hi dhammānaṃ sāmatthiyabhedoti vadantenapi ayamevattho sādhito bhinnanissayassapi abhinnaṭṭhānassa viya upaṭṭhānato. Eteneva udakādīsu paṭibimbarūpābhāvacodanā paṭikkhittā veditabbā.

    сид̣̇д̇хз жа бадиб̣имб̣аруубз д̇асса нид̣̇ассанабхааво сид̣̇д̇хоязва ход̇и хзд̇упалаанам̣ вижчиннад̣̇зсад̇аавибхааванад̇о. яам̣ бана вуд̇д̇ам̣ ‘‘асад̣̇исад̇д̇аа на нид̣̇ассана’’нд̇и, д̇ад̣̇аяуд̇д̇ам̣. гасмаа? на хи нид̣̇ассанам̣ наама нид̣̇ассид̇аб̣б̣зна саб̣б̣ад̣̇аа сад̣̇исамзва ход̇и. жуд̇игканд̇хаад̇хаанад̇о вижчиннад̣̇зсз убабад̇д̇игканд̇хаа баад̇убхаванд̇ийд̇и зд̇асса ад̇т̇асса саад̇ханад̇т̇ам̣ мукаруубад̇о вижчиннз таанз д̇асса палабхууд̇ам̣ бадиб̣имб̣аруубам̣ ниб̣б̣ад̇д̇ад̇ийд̇и зд̇т̇а д̇асса нид̣̇ассанад̇т̇асса ад̇хиббзд̇ад̇д̇аа. зд̇зна асанд̇аанажод̣̇анаа бадигкид̇д̇аа взд̣̇ид̇аб̣б̣аа.

    Siddhe ca paṭibimbarūpe tassa nidassanabhāvo siddhoyeva hoti hetuphalānaṃ vicchinnadesatāvibhāvanato. Yaṃ pana vuttaṃ ‘‘asadisattā na nidassana’’nti, tadayuttaṃ. Kasmā? Na hi nidassanaṃ nāma nidassitabbena sabbadā sadisameva hoti. Cutikkhandhādhānato vicchinnadese upapattikkhandhā pātubhavantīti etassa atthassa sādhanatthaṃ mukharūpato vicchinne ṭhāne tassa phalabhūtaṃ paṭibimbarūpaṃ nibbattatīti ettha tassa nidassanatthassa adhippetattā. Etena asantānacodanā paṭikkhittā veditabbā.

    яасмаа ваа мукабадиб̣имб̣аруубаанам̣ хзд̇упалабхааво сид̣̇д̇хо, д̇асмааби саа бадигкид̇д̇аава ход̇и. хзд̇упалабхаавасамб̣анд̇хзсу хи санд̇аанавохааро. яат̇аавуд̇д̇ад̣̇вийхигааран̣зхи бадиб̣имб̣ам̣ уббаж̇ж̇ад̇и б̣имб̣ад̇о аад̣̇аасад̇о жа, на жзвам̣ убабад̇д̇игканд̇хаанам̣ вижчиннад̣̇зсуббад̇д̇и. яат̇аа жзд̇т̇а бадиб̣имб̣аруубам̣ нид̣̇ассид̇ам̣, звам̣ бадигхосад̣̇ийбамуд̣̇д̣̇аад̣̇аяоби нид̣̇ассид̇аб̣б̣аа. яат̇аа хи бадигхосад̣̇ийбамуд̣̇д̣̇аад̣̇аяо сад̣̇д̣̇аад̣̇ихзд̇угаа хонд̇и, ан̃н̃ад̇ра аг̇анд̇ваа хонд̇и, звамзва ид̣̇ам̣ жид̇д̇анд̇и.

    Yasmā vā mukhapaṭibimbarūpānaṃ hetuphalabhāvo siddho, tasmāpi sā paṭikkhittāva hoti. Hetuphalabhāvasambandhesu hi santānavohāro. Yathāvuttadvīhikāraṇehi paṭibimbaṃ uppajjati bimbato ādāsato ca, na cevaṃ upapattikkhandhānaṃ vicchinnadesuppatti. Yathā cettha paṭibimbarūpaṃ nidassitaṃ, evaṃ paṭighosadīpamuddādayopi nidassitabbā. Yathā hi paṭighosadīpamuddādayo saddādihetukā honti, aññatra agantvā honti, evameva idaṃ cittanti.

    абижааяам̣ анд̇араабхававаад̣̇ий звам̣ бужчид̇аб̣б̣о – яад̣̇и ‘‘д̇хаммаанам̣ вижчиннад̣̇зсуббад̇д̇и на яуд̇д̇аа’’д̇и анд̇араабхаво баригаббид̇о, раахуаад̣̇ийнам̣ сарийрз гат̇аманзгаяож̇анасахассанд̇аригзсу баад̣̇адтаанахад̣̇аяадтаанзсу гааяавин̃н̃аан̣амановин̃н̃аан̣уббад̇д̇и вижчиннад̣̇зсз яуд̇д̇аа. яад̣̇и згасанд̇аанабхаавад̇о, ид̇хааби д̇ам̣самаанам̣. на жзд̇т̇а аруубад̇хаммабхаавад̇о алам̣ барихаарааяа бан̃жавогаарз руубааруубад̇хаммаанам̣ ан̃н̃аман̃н̃ам̣ самб̣анд̇хад̇д̇аа. вад̇д̇амаанзхи д̇аава бажжаязхи вижчиннад̣̇зсз паласса уббад̇д̇и сид̣̇д̇хаа, гиман̇г̇ам̣ бана ад̇ийд̇зхи бан̃жавогаарабхавзхи. яад̇т̇а вибаагавин̃н̃аан̣асса бажжаяо, д̇ад̇т̇асса ниссаяабхууд̇асса вад̇т̇усса сахабхаавийнан̃жа канд̇хаанам̣ самбхавод̇и лад̣̇д̇хогаасзна гаммунаа ниб̣б̣ад̇д̇ияамаанасса авасзсабажжаяанд̇арасахид̇асса вибаагавин̃н̃аан̣асса уббад̇д̇ияам̣ наалам̣ вижчиннад̣̇зсад̇аа виб̣анд̇хааяа. яат̇аа жа анзгагаббасахассанд̇аригааби жуд̇игканд̇хаа убабад̇д̇игканд̇хаанам̣ ананд̇арабажжаяод̇и на гаалад̣̇уурад̇аа, звам̣ анзгаяож̇анасахассанд̇аригааби д̇з д̇зсам̣ ананд̇арабажжаяо хонд̇ийд̇и на д̣̇зсад̣̇уурад̇аа. звам̣ жуд̇игканд̇ханирод̇хаананд̇арам̣ убабад̇д̇идтаанз бажжаяанд̇арасамавааязна бадисанд̇хигканд̇хаа баад̇убхаванд̇ийд̇и над̇т̇зва анд̇араабхаво. асад̇и жа д̇асмим̣ яам̣ д̇асса гзжи ‘‘бхаавибхаваниб̣б̣ад̇д̇агагаммуно д̇ад̇о зва бхаавибуримагаалабхаваагааро саж̇аад̇исуд̣̇д̇хад̣̇иб̣б̣ажагкуг̇ожаро ахийнинд̣̇рияо гзнажи аббадихад̇аг̇амано г̇анд̇хаахааро’’д̇и звамаад̣̇игааран̣аагаараад̣̇им̣ ван̣н̣знд̇и, д̇ам̣ ван̃жхаад̇анаяасса рассад̣̇ийгхасаамад̇аад̣̇ививаад̣̇асад̣̇исанд̇и взд̣̇ид̇аб̣б̣ам̣.

    Apicāyaṃ antarābhavavādī evaṃ pucchitabbo – yadi ‘‘dhammānaṃ vicchinnadesuppatti na yuttā’’ti antarābhavo parikappito, rāhuādīnaṃ sarīre kathamanekayojanasahassantarikesu pādaṭṭhānahadayaṭṭhānesu kāyaviññāṇamanoviññāṇuppatti vicchinnadese yuttā. Yadi ekasantānabhāvato, idhāpi taṃsamānaṃ. Na cettha arūpadhammabhāvato alaṃ parihārāya pañcavokāre rūpārūpadhammānaṃ aññamaññaṃ sambandhattā. Vattamānehi tāva paccayehi vicchinnadese phalassa uppatti siddhā, kimaṅgaṃ pana atītehi pañcavokārabhavehi. Yattha vipākaviññāṇassa paccayo, tatthassa nissayabhūtassa vatthussa sahabhāvīnañca khandhānaṃ sambhavoti laddhokāsena kammunā nibbattiyamānassa avasesapaccayantarasahitassa vipākaviññāṇassa uppattiyaṃ nālaṃ vicchinnadesatā vibandhāya. Yathā ca anekakappasahassantarikāpi cutikkhandhā upapattikkhandhānaṃ anantarapaccayoti na kāladūratā, evaṃ anekayojanasahassantarikāpi te tesaṃ anantarapaccayo hontīti na desadūratā. Evaṃ cutikkhandhanirodhānantaraṃ upapattiṭṭhāne paccayantarasamavāyena paṭisandhikkhandhā pātubhavantīti nattheva antarābhavo. Asati ca tasmiṃ yaṃ tassa keci ‘‘bhāvibhavanibbattakakammuno tato eva bhāvipurimakālabhavākāro sajātisuddhadibbacakkhugocaro ahīnindriyo kenaci appaṭihatagamano gandhāhāro’’ti evamādikāraṇākārādiṃ vaṇṇenti, taṃ vañjhātanayassa rassadīghasāmatādivivādasadisanti veditabbaṃ.

    анд̇араабхавагат̇ааван̣н̣анаа нидтид̇аа.

    Antarābhavakathāvaṇṇanā niṭṭhitā.







    Related texts:



    д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / гат̇аавад̇т̇убаал̣и • Kathāvatthupāḷi / (74) 2. анд̇араабхавагат̇аа • (74) 2. Antarābhavakathā

    адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 2. анд̇араабхавагат̇ааван̣н̣анаа • 2. Antarābhavakathāvaṇṇanā

    дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 2. анд̇араабхавагат̇ааван̣н̣анаа • 2. Antarābhavakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact