| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
११३. अन्तराये अनापत्तिवस्सच्छेदकथा
113. Antarāye anāpattivassacchedakathā
२०१. अविदूरेति आसन्ने। तत्थाति गामे। सत्ताहवारेनाति सत्ताहे एकवारेन। अरुणो उट्ठापेतब्बोति विहारे अरुणो उट्ठापेतब्बो। तत्रेवाति गामेयेव। मयन्ति भिक्खू सन्धाय वुत्तं। पुन मयन्ति मनुस्से सन्धाय वुत्तं। तेसंयेवाति वस्सच्छेदभिक्खूनं एव। तन्ति सलाकभत्तादिं। वस्सग्गेनाति वस्सगणनाय।
201.Avidūreti āsanne. Tatthāti gāme. Sattāhavārenāti sattāhe ekavārena. Aruṇo uṭṭhāpetabboti vihāre aruṇo uṭṭhāpetabbo. Tatrevāti gāmeyeva. Mayanti bhikkhū sandhāya vuttaṃ. Puna mayanti manusse sandhāya vuttaṃ. Tesaṃyevāti vassacchedabhikkhūnaṃ eva. Tanti salākabhattādiṃ. Vassaggenāti vassagaṇanāya.
वस्सावासिकन्ति वस्सावासानं दातब्बं चीवरं। तत्थाति तस्मिं विहारे। येसं पापितन्ति सम्बन्धो। विहारेति वुट्ठितगामविहारे। उपनिक्खित्तकं भण्डन्ति सम्बन्धो। इधाति भिक्खुनो निवासट्ठाने। यं चीवरादिवेभङ्गियभण्डं अत्थि, तन्ति योजना। तत्थेवाति वुट्ठितगामविहारे एव। इतोति खेत्तवत्थुआदितो। कप्पियकारकानं हत्थेति सम्बन्धो। तत्रुप्पादेपीति तस्स विहारस्स दिन्नखेत्तवत्थुआदितो उप्पादे पच्चयेपि। ‘‘तत्थेव गन्त्वा अपलोकेत्वा भाजेतब्ब’’न्ति वचनस्स युत्तिं दस्सेन्तो आह ‘‘सङ्घिकञ्ही’’तिआदि। अन्तोविहारे वाति अन्तोसीमाय वा। उभयत्थाति अन्तोसीमबहिसीम सङ्खातेसु द्वीसु ठानेसु ठितं वेभङ्गियभण्डन्ति सम्बन्धो।
Vassāvāsikanti vassāvāsānaṃ dātabbaṃ cīvaraṃ. Tatthāti tasmiṃ vihāre. Yesaṃ pāpitanti sambandho. Vihāreti vuṭṭhitagāmavihāre. Upanikkhittakaṃ bhaṇḍanti sambandho. Idhāti bhikkhuno nivāsaṭṭhāne. Yaṃ cīvarādivebhaṅgiyabhaṇḍaṃ atthi, tanti yojanā. Tatthevāti vuṭṭhitagāmavihāre eva. Itoti khettavatthuādito. Kappiyakārakānaṃ hattheti sambandho. Tatruppādepīti tassa vihārassa dinnakhettavatthuādito uppāde paccayepi. ‘‘Tattheva gantvā apaloketvā bhājetabba’’nti vacanassa yuttiṃ dassento āha ‘‘saṅghikañhī’’tiādi. Antovihāre vāti antosīmāya vā. Ubhayatthāti antosīmabahisīma saṅkhātesu dvīsu ṭhānesu ṭhitaṃ vebhaṅgiyabhaṇḍanti sambandho.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / ११३. अन्तराये अनापत्तिवस्सच्छेदवारो • 113. Antarāye anāpattivassacchedavāro
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / अन्तरायेअनापत्तिवस्सच्छेदकथा • Antarāyeanāpattivassacchedakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / अन्तराये अनापत्तिवस्सच्छेदकथावण्णना • Antarāye anāpattivassacchedakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / अन्तरायेअनापत्तिवस्सच्छेदकथावण्णना • Antarāyeanāpattivassacchedakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / अन्तरायेअनापत्तिवस्सच्छेदकथावण्णना • Antarāyeanāpattivassacchedakathāvaṇṇanā
