| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
அந்தராயேஅனாபத்திவஸ்ஸச்சே²த³கதா²வண்ணனா
Antarāyeanāpattivassacchedakathāvaṇṇanā
200. பாளியங் க³ண்ஹிங்ஸூதி க³ஹெத்வா கா²தி³ங்ஸு. பரிபாதிங்ஸூதி பலாபேஸுங், அனுப³ந்தி⁴ங்ஸூதி அத்தோ².
200. Pāḷiyaṃ gaṇhiṃsūti gahetvā khādiṃsu. Paripātiṃsūti palāpesuṃ, anubandhiṃsūti attho.
201. ஸத்தாஹவாரேன அருணோ உட்டா²பேதப்³போ³தி எத்த² ச²தி³வஸானி ப³ஹித்³தா⁴ வீதினாமெத்வா ஸத்தமே தி³வஸே புராருணா ஏவ அந்தோஉபசாரஸீமாய பவிஸித்வா அருணங் உட்டா²பெத்வா புனதி³வஸே ஸத்தாஹங் அதி⁴ட்டா²ய க³ந்தப்³ப³ந்தி அதி⁴ப்பாயோ. கேசி பன ‘‘ஸத்தமே தி³வஸே ஆக³ந்த்வா அருணங் அனுட்டா²பெத்வா தத³ஹேவ தி³வஸபா⁴கே³பி க³ந்துங் வட்டதீ’’தி வத³ந்தி, தங் ந க³ஹேதப்³ப³ங் ‘‘அருணோ உட்டா²பேதப்³போ³’’தி வுத்தத்தா. ஸத்தமே தி³வஸே தத்த² அருணுட்டா²பனமேவ ஹி ஸந்தா⁴ய பாளியம்பி ‘‘ஸத்தாஹங் ஸன்னிவத்தோ காதப்³போ³’’தி வுத்தங். அருணங் அனுட்டா²பெத்வா க³ச்ச²ந்தோ அந்தோ அப்பவிஸித்வா ப³ஹித்³தா⁴வ ஸத்தாஹங் வீதினாமெந்தேன ஸமுச்சி²ன்னவஸ்ஸோ ஏவ ப⁴விஸ்ஸதி அருணஸ்ஸ ப³ஹி ஏவ உட்டா²பிதத்தா. இதரதா² ‘‘அருணோ உட்டா²பேதப்³போ³’’தி வசனங் நிரத்த²கங் ஸியா ‘‘ஸத்தாஹவாரேன அந்தோவிஹாரே பவிஸித்வா அருணங் அனுட்டா²பெத்வாபி க³ந்தப்³ப³’’ந்தி வத்தப்³ப³தோ. அஞ்ஞேஸு ச டா²னேஸு அருணுட்டா²பனமேவ வுச்சதி. வக்க²தி ஹி சீவரக்க²ந்த⁴கே ‘‘ஏகஸ்மிங் விஹாரே வஸந்தோ இதரஸ்மிங் ஸத்தாஹவாரேன அருணமேவ உட்டா²பேதீ’’தி (மஹாவ॰ அட்ட²॰ 364).
201.Sattāhavārena aruṇo uṭṭhāpetabboti ettha chadivasāni bahiddhā vītināmetvā sattame divase purāruṇā eva antoupacārasīmāya pavisitvā aruṇaṃ uṭṭhāpetvā punadivase sattāhaṃ adhiṭṭhāya gantabbanti adhippāyo. Keci pana ‘‘sattame divase āgantvā aruṇaṃ anuṭṭhāpetvā tadaheva divasabhāgepi gantuṃ vaṭṭatī’’ti vadanti, taṃ na gahetabbaṃ ‘‘aruṇo uṭṭhāpetabbo’’ti vuttattā. Sattame divase tattha aruṇuṭṭhāpanameva hi sandhāya pāḷiyampi ‘‘sattāhaṃ sannivatto kātabbo’’ti vuttaṃ. Aruṇaṃ anuṭṭhāpetvā gacchanto anto appavisitvā bahiddhāva sattāhaṃ vītināmentena samucchinnavasso eva bhavissati aruṇassa bahi eva uṭṭhāpitattā. Itarathā ‘‘aruṇo uṭṭhāpetabbo’’ti vacanaṃ niratthakaṃ siyā ‘‘sattāhavārena antovihāre pavisitvā aruṇaṃ anuṭṭhāpetvāpi gantabba’’nti vattabbato. Aññesu ca ṭhānesu aruṇuṭṭhāpanameva vuccati. Vakkhati hi cīvarakkhandhake ‘‘ekasmiṃ vihāre vasanto itarasmiṃ sattāhavārena aruṇameva uṭṭhāpetī’’ti (mahāva. aṭṭha. 364).
அதா²பி யங் தே வதெ³ய்யுங் ‘‘ஸத்தமே தி³வஸே யதா³ கதா³சி பவிட்டே²ன தங்தி³வஸனிஸ்ஸிதோ அதீதஅருணோ உட்டா²பிதோ நாம ஹோதீதி இமமத்த²ங் ஸந்தா⁴ய அட்ட²கதா²யங் வுத்த’’ந்தி, தங் ஸத்³த³க³தியாபி ந ஸமேதி. ந ஹி உட்டி²தே அருணே பச்சா² பவிட்டோ² தஸ்ஸ பயோஜகோ உட்டா²பகோ ப⁴விதுமரஹதி. யதி³ ப⁴வெய்ய, வஸ்ஸங் உபக³ந்த்வா பனஸ்ஸ அருணங் அனுட்டா²பெத்வா தத³ஹேவ ஸத்தாஹகரணீயேன பக்கந்தஸ்ஸாபீதி எத்த² ‘‘அருணங் அனுட்டா²பெத்வா’’தி வசனங் விருஜ்ஜெ²ய்ய, தேனபி தங்தி³வஸஸன்னிஸ்ஸிதஸ்ஸ அருணஸ்ஸ உட்டா²பிதத்தா. ஆரஞ்ஞகஸ்ஸாபி ஹி பி⁴க்கு²னோ ஸாயன்ஹஸமயே அங்க³யுத்தங் அரஞ்ஞட்டா²னங் க³ந்த்வா ததா³ ஏவ நிவத்தந்தஸ்ஸ அருணோ உட்டா²பிதோ து⁴தங்க³ஞ்ச விஸோதி⁴தங் ஸியா, ந சேதங் யுத்தங் அருணுக்³க³மனகாலே ஏவ அருணுட்டா²பனஸ்ஸ வுத்தத்தா. வுத்தஞ்ஹி ‘‘காலஸ்ஸேவ பன நிக்க²மித்வா அங்க³யுத்தே டா²னே அருணங் உட்டா²பேதப்³ப³ங். ஸசே அருணுட்டா²னவேலாயங் தேஸங் ஆபா³தோ⁴ வட்³ட⁴தி, தேஸங் ஏவ கிச்சங் காதப்³ப³ங், ந து⁴தங்க³விஸுத்³தி⁴கேன ப⁴விதப்³ப³’’ந்தி (விஸுத்³தி⁴॰ 1.31). ததா² பாரிவாஸிகாதீ³னம்பி அருணங் அனுட்டா²பெத்வா வத்தங் நிக்கி²பந்தானங் ரத்திச்சே²தோ³ வுத்தோ. ‘‘உக்³க³தே அருணே நிக்கி²பிதப்³ப³’’ந்தி (சூளவ॰ 97) ஹி வுத்தங். ஸஹஸெய்யஸிக்கா²பதே³பி அனுபஸம்பன்னேஹி ஸஹ நிவுத்த²பா⁴வபரிமோசனத்த²ங் ‘‘புராருணா நிக்க²மித்வா’’திஆதி³ வுத்தங். ஏவங் சீவரவிப்பவாஸாதீ³ஸு ச ஸப்³ப³த்த² ரத்திபரியோஸானே ஆகா³மிஅருணவஸேனேவ அருணுட்டா²பனங் த³ஸ்ஸிதங், ந அதீதாருணவஸேன. தஸ்மா வுத்தனயேனேவெத்த² அருணுட்டா²பனங் வேதி³தப்³ப³ங் அஞ்ஞதா² வஸ்ஸச்சே²த³த்தா.
Athāpi yaṃ te vadeyyuṃ ‘‘sattame divase yadā kadāci paviṭṭhena taṃdivasanissito atītaaruṇo uṭṭhāpito nāma hotīti imamatthaṃ sandhāya aṭṭhakathāyaṃ vutta’’nti, taṃ saddagatiyāpi na sameti. Na hi uṭṭhite aruṇe pacchā paviṭṭho tassa payojako uṭṭhāpako bhavitumarahati. Yadi bhaveyya, vassaṃ upagantvā panassa aruṇaṃ anuṭṭhāpetvā tadaheva sattāhakaraṇīyena pakkantassāpīti ettha ‘‘aruṇaṃ anuṭṭhāpetvā’’ti vacanaṃ virujjheyya, tenapi taṃdivasasannissitassa aruṇassa uṭṭhāpitattā. Āraññakassāpi hi bhikkhuno sāyanhasamaye aṅgayuttaṃ araññaṭṭhānaṃ gantvā tadā eva nivattantassa aruṇo uṭṭhāpito dhutaṅgañca visodhitaṃ siyā, na cetaṃ yuttaṃ aruṇuggamanakāle eva aruṇuṭṭhāpanassa vuttattā. Vuttañhi ‘‘kālasseva pana nikkhamitvā aṅgayutte ṭhāne aruṇaṃ uṭṭhāpetabbaṃ. Sace aruṇuṭṭhānavelāyaṃ tesaṃ ābādho vaḍḍhati, tesaṃ eva kiccaṃ kātabbaṃ, na dhutaṅgavisuddhikena bhavitabba’’nti (visuddhi. 1.31). Tathā pārivāsikādīnampi aruṇaṃ anuṭṭhāpetvā vattaṃ nikkhipantānaṃ ratticchedo vutto. ‘‘Uggate aruṇe nikkhipitabba’’nti (cūḷava. 97) hi vuttaṃ. Sahaseyyasikkhāpadepi anupasampannehi saha nivutthabhāvaparimocanatthaṃ ‘‘purāruṇā nikkhamitvā’’tiādi vuttaṃ. Evaṃ cīvaravippavāsādīsu ca sabbattha rattipariyosāne āgāmiaruṇavaseneva aruṇuṭṭhāpanaṃ dassitaṃ, na atītāruṇavasena. Tasmā vuttanayenevettha aruṇuṭṭhāpanaṃ veditabbaṃ aññathā vassacchedattā.
யங் பன வஸ்ஸங் உபக³தஸ்ஸ தத³ஹேவ அருணங் அனுட்டா²பெத்வா ஸகரணீயஸ்ஸ பக்கமனவசனங், தங் வஸ்ஸங் உபக³தகாலதோ பட்டா²ய யதா³ கதா³சி நிமித்தே ஸதி க³மனஸ்ஸ அனுஞ்ஞாதத்தா யுத்தங், ந பன ஸத்தாஹவாரேன க³தஸ்ஸ அருணங் அனுட்டா²பெத்வா தத³ஹேவ க³மனங் ‘‘அருணோ உட்டா²பேதப்³போ³’’தி வுத்தத்தா ஏவ. யதா² வா ‘‘ஸத்தாஹங் அனாக³தாய பவாரணாய ஸகரணீயோ பக்கமதி, ஆக³ச்செ²ய்ய வா ஸோ, பி⁴க்க²வே, பி⁴க்கு² தங் ஆவாஸங், ந வா ஆக³ச்செ²ய்யா’’திஆதி³னா (மஹாவ॰ 207) பச்சி²மஸத்தாஹே அனாக³மனே அனுஞ்ஞாதேபி அஞ்ஞஸத்தாஹேஸு ந வட்டதி. ஏவங் பட²மஸத்தாஹே அருணங் அனுட்டா²பெத்வா க³மனே அனுஞ்ஞாதேபி ததோ பரேஸு ஸத்தாஹேஸு ஆக³தஸ்ஸ அருணங் அனுட்டா²பெத்வா க³மனங் ந வட்டதீதி நிட்ட²மெத்த² க³ந்தப்³ப³ங். இத⁴ ஆஹடந்தி விஹாரதோ ப³ஹி ஆக³தட்டா²னே ஆனீதங்.
Yaṃ pana vassaṃ upagatassa tadaheva aruṇaṃ anuṭṭhāpetvā sakaraṇīyassa pakkamanavacanaṃ, taṃ vassaṃ upagatakālato paṭṭhāya yadā kadāci nimitte sati gamanassa anuññātattā yuttaṃ, na pana sattāhavārena gatassa aruṇaṃ anuṭṭhāpetvā tadaheva gamanaṃ ‘‘aruṇo uṭṭhāpetabbo’’ti vuttattā eva. Yathā vā ‘‘sattāhaṃ anāgatāya pavāraṇāya sakaraṇīyo pakkamati, āgaccheyya vā so, bhikkhave, bhikkhu taṃ āvāsaṃ, na vā āgaccheyyā’’tiādinā (mahāva. 207) pacchimasattāhe anāgamane anuññātepi aññasattāhesu na vaṭṭati. Evaṃ paṭhamasattāhe aruṇaṃ anuṭṭhāpetvā gamane anuññātepi tato paresu sattāhesu āgatassa aruṇaṃ anuṭṭhāpetvā gamanaṃ na vaṭṭatīti niṭṭhamettha gantabbaṃ. Idha āhaṭanti vihārato bahi āgataṭṭhāne ānītaṃ.
அந்தராயேஅனாபத்திவஸ்ஸச்சே²த³கதா²வண்ணனா நிட்டி²தா.
Antarāyeanāpattivassacchedakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 113. அந்தராயே அனாபத்திவஸ்ஸச்சே²த³வாரோ • 113. Antarāye anāpattivassacchedavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அந்தராயேஅனாபத்திவஸ்ஸச்சே²த³கதா² • Antarāyeanāpattivassacchedakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அந்தராயே அனாபத்திவஸ்ஸச்சே²த³கதா²வண்ணனா • Antarāye anāpattivassacchedakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அந்தராயேஅனாபத்திவஸ்ஸச்சே²த³கதா²வண்ணனா • Antarāyeanāpattivassacchedakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 113. அந்தராயே அனாபத்திவஸ்ஸச்சே²த³கதா² • 113. Antarāye anāpattivassacchedakathā
