| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১১. অন্তৰগ্গো
11. Antavaggo
১. অন্তসুত্তং
1. Antasuttaṃ
১০৩. সাৰত্থিনিদানং । ‘‘চত্তারোমে, ভিক্খৰে, অন্তা। কতমে চত্তারো? সক্কাযন্তো , সক্কাযসমুদযন্তো, সক্কাযনিরোধন্তো, সক্কাযনিরোধগামিনিপ্পটিপদন্তো। কতমো চ, ভিক্খৰে, সক্কাযন্তো? পঞ্চুপাদানক্খন্ধাতিস্স ৰচনীযং। কতমে পঞ্চ? সেয্যথিদং – রূপুপাদানক্খন্ধো, ৰেদনুপাদানক্খন্ধো, সঞ্ঞুপাদানক্খন্ধো, সঙ্খারুপাদানক্খন্ধো, ৰিঞ্ঞাণুপাদানক্খন্ধো – অযং ৰুচ্চতি, ভিক্খৰে, সক্কাযন্তো’’।
103. Sāvatthinidānaṃ . ‘‘Cattārome, bhikkhave, antā. Katame cattāro? Sakkāyanto , sakkāyasamudayanto, sakkāyanirodhanto, sakkāyanirodhagāminippaṭipadanto. Katamo ca, bhikkhave, sakkāyanto? Pañcupādānakkhandhātissa vacanīyaṃ. Katame pañca? Seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho – ayaṃ vuccati, bhikkhave, sakkāyanto’’.
‘‘কতমো চ, ভিক্খৰে, সক্কাযসমুদযন্তো? যাযং তণ্হা পোনোভৰিকা নন্দিরাগসহগতা তত্রতত্রাভিনন্দিনী, সেয্যথিদং – কামতণ্হা, ভৰতণ্হা, ৰিভৰতণ্হা। অযং ৰুচ্চতি, ভিক্খৰে, সক্কাযসমুদযন্তো।
‘‘Katamo ca, bhikkhave, sakkāyasamudayanto? Yāyaṃ taṇhā ponobhavikā nandirāgasahagatā tatratatrābhinandinī, seyyathidaṃ – kāmataṇhā, bhavataṇhā, vibhavataṇhā. Ayaṃ vuccati, bhikkhave, sakkāyasamudayanto.
‘‘কতমো চ, ভিক্খৰে, সক্কাযনিরোধন্তো? যো তস্সাযেৰ তণ্হায অসেসৰিরাগনিরোধো চাগো পটিনিস্সগ্গো মুত্তি অনালযো – অযং ৰুচ্চতি, ভিক্খৰে, সক্কাযনিরোধন্তো।
‘‘Katamo ca, bhikkhave, sakkāyanirodhanto? Yo tassāyeva taṇhāya asesavirāganirodho cāgo paṭinissaggo mutti anālayo – ayaṃ vuccati, bhikkhave, sakkāyanirodhanto.
‘‘কতমো চ, ভিক্খৰে, সক্কাযনিরোধগামিনিপ্পটিপদন্তো? অযমেৰ অরিযো অট্ঠঙ্গিকো মগ্গো। সেয্যথিদং – সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি। অযং ৰুচ্চতি, ভিক্খৰে, সক্কাযনিরোধগামিনিপ্পটিপদন্তো । ইমে খো, ভিক্খৰে, চত্তারো অন্তা’’তি। পঠমং।
‘‘Katamo ca, bhikkhave, sakkāyanirodhagāminippaṭipadanto? Ayameva ariyo aṭṭhaṅgiko maggo. Seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi. Ayaṃ vuccati, bhikkhave, sakkāyanirodhagāminippaṭipadanto . Ime kho, bhikkhave, cattāro antā’’ti. Paṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. অন্তসুত্তৰণ্ণনা • 1. Antasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. অন্তসুত্তৰণ্ণনা • 1. Antasuttavaṇṇanā
