| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
11. අන්‌තවග්‌ගො
11. Antavaggo
1. අන්‌තසුත්‌තං
1. Antasuttaṃ
103. සාවත්‌ථිනිදානං . ‘‘චත්‌තාරොමෙ, භික්‌ඛවෙ, අන්‌තා. කතමෙ චත්‌තාරො? සක්‌කායන්‌තො , සක්‌කායසමුදයන්‌තො, සක්‌කායනිරොධන්‌තො, සක්‌කායනිරොධගාමිනිප්‌පටිපදන්‌තො. කතමො ච, භික්‌ඛවෙ, සක්‌කායන්‌තො? පඤ්‌චුපාදානක්‌ඛන්‌ධාතිස්‌ස වචනීයං. කතමෙ පඤ්‌ච? සෙය්‍යථිදං – රූපුපාදානක්‌ඛන්‌ධො, වෙදනුපාදානක්‌ඛන්‌ධො, සඤ්‌ඤුපාදානක්‌ඛන්‌ධො, සඞ්‌ඛාරුපාදානක්‌ඛන්‌ධො, විඤ්‌ඤාණුපාදානක්‌ඛන්‌ධො – අයං වුච්‌චති, භික්‌ඛවෙ, සක්‌කායන්‌තො’’.
103. Sāvatthinidānaṃ . ‘‘Cattārome, bhikkhave, antā. Katame cattāro? Sakkāyanto , sakkāyasamudayanto, sakkāyanirodhanto, sakkāyanirodhagāminippaṭipadanto. Katamo ca, bhikkhave, sakkāyanto? Pañcupādānakkhandhātissa vacanīyaṃ. Katame pañca? Seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho – ayaṃ vuccati, bhikkhave, sakkāyanto’’.
‘‘කතමො ච, භික්‌ඛවෙ, සක්‌කායසමුදයන්‌තො? යායං තණ්‌හා පොනොභවිකා නන්‌දිරාගසහගතා තත්‍රතත්‍රාභිනන්‌දිනී, සෙය්‍යථිදං – කාමතණ්‌හා, භවතණ්‌හා, විභවතණ්‌හා. අයං වුච්‌චති, භික්‌ඛවෙ, සක්‌කායසමුදයන්‌තො.
‘‘Katamo ca, bhikkhave, sakkāyasamudayanto? Yāyaṃ taṇhā ponobhavikā nandirāgasahagatā tatratatrābhinandinī, seyyathidaṃ – kāmataṇhā, bhavataṇhā, vibhavataṇhā. Ayaṃ vuccati, bhikkhave, sakkāyasamudayanto.
‘‘කතමො ච, භික්‌ඛවෙ, සක්‌කායනිරොධන්‌තො? යො තස්‌සායෙව තණ්‌හාය අසෙසවිරාගනිරොධො චාගො පටිනිස්‌සග්‌ගො මුත්‌ති අනාලයො – අයං වුච්‌චති, භික්‌ඛවෙ, සක්‌කායනිරොධන්‌තො.
‘‘Katamo ca, bhikkhave, sakkāyanirodhanto? Yo tassāyeva taṇhāya asesavirāganirodho cāgo paṭinissaggo mutti anālayo – ayaṃ vuccati, bhikkhave, sakkāyanirodhanto.
‘‘කතමො ච, භික්‌ඛවෙ, සක්‌කායනිරොධගාමිනිප්‌පටිපදන්‌තො? අයමෙව අරියො අට්‌ඨඞ්‌ගිකො මග්‌ගො. සෙය්‍යථිදං – සම්‌මාදිට්‌ඨි, සම්‌මාසඞ්‌කප්‌පො, සම්‌මාවාචා, සම්‌මාකම්‌මන්‌තො, සම්‌මාආජීවො, සම්‌මාවායාමො, සම්‌මාසති, සම්‌මාසමාධි. අයං වුච්‌චති, භික්‌ඛවෙ, සක්‌කායනිරොධගාමිනිප්‌පටිපදන්‌තො . ඉමෙ ඛො, භික්‌ඛවෙ, චත්‌තාරො අන්‌තා’’ති. පඨමං.
‘‘Katamo ca, bhikkhave, sakkāyanirodhagāminippaṭipadanto? Ayameva ariyo aṭṭhaṅgiko maggo. Seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi. Ayaṃ vuccati, bhikkhave, sakkāyanirodhagāminippaṭipadanto . Ime kho, bhikkhave, cattāro antā’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. අන්‌තසුත්‌තවණ්‌ණනා • 1. Antasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. අන්‌තසුත්‌තවණ්‌ණනා • 1. Antasuttavaṇṇanā
