| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
9. ரதனவக்³கோ³
9. Ratanavaggo
1. அந்தேபுரஸிக்கா²பத³வண்ணனா
1. Antepurasikkhāpadavaṇṇanā
494. ராஜவக்³க³ஸ்ஸ பட²மஸிக்கா²பதே³ – ஓரகோதி பரித்தகோ. உபரிபாஸாத³வரக³தோதி பாஸாத³வரஸ்ஸ உபரிக³தோ. அய்யானங் வாஹஸாதி அய்யானங் காரணா; தேஹி ஜானாபிதத்தா ஜானாமீதி வுத்தங் ஹோதி.
494. Rājavaggassa paṭhamasikkhāpade – orakoti parittako. Uparipāsādavaragatoti pāsādavarassa uparigato. Ayyānaṃ vāhasāti ayyānaṃ kāraṇā; tehi jānāpitattā jānāmīti vuttaṃ hoti.
497. பிதரங் பத்தே²தீதி அந்தரங் பஸ்ஸித்வா கா⁴தேதுங் இச்ச²தி. ராஜந்தேபுரங் ஹத்தி²ஸம்மத்³த³ந்திஆதீ³ஸு ஹத்தீ²ஹி ஸம்மத்³தோ³ எத்தா²தி ஹத்தி²ஸம்மத்³த³ங்; ஹத்தி²ஸம்பா³த⁴ந்தி அத்தோ². அஸ்ஸரத²ஸம்மத்³த³பதே³பி ஏஸேவ நயோ. ‘‘ஸம்மத்த’’ந்தி கேசி பட²ந்தி, தங் ந க³ஹேதப்³ப³ங். ‘‘ரஞ்ஞோ அந்தேபுரே ஹத்தி²ஸம்மத்³த³’’ந்திபி பாடோ², தத்த² ஹத்தீ²னங் ஸம்மத்³த³ங் ஹத்தி²ஸம்மத்³த³ந்தி அத்தோ², ரஞ்ஞோ அந்தேபுரே ஹத்தி²ஸம்மத்³தோ³ அத்தீ²தி வுத்தங் ஹோதி. ஏஸ நயோ ஸேஸபதே³ஸுபி. ரஜனீயானீதி தஸ்மிங் அந்தேபுரே ஏதி³ஸானி ரூபாதீ³னி.
497.Pitaraṃ patthetīti antaraṃ passitvā ghātetuṃ icchati. Rājantepuraṃ hatthisammaddantiādīsu hatthīhi sammaddo etthāti hatthisammaddaṃ; hatthisambādhanti attho. Assarathasammaddapadepi eseva nayo. ‘‘Sammatta’’nti keci paṭhanti, taṃ na gahetabbaṃ. ‘‘Rañño antepure hatthisammadda’’ntipi pāṭho, tattha hatthīnaṃ sammaddaṃ hatthisammaddanti attho, rañño antepure hatthisammaddo atthīti vuttaṃ hoti. Esa nayo sesapadesupi. Rajanīyānīti tasmiṃ antepure edisāni rūpādīni.
498. முத்³தா⁴வஸித்தஸ்ஸாதி முத்³த⁴னி அவஸித்தஸ்ஸ. அனிக்க²ந்தோ ராஜா இதோதி அனிக்க²ந்தராஜகங், தஸ்மிங் அனிக்க²ந்தராஜகே; ஸயனிக⁴ரேதி அத்தோ². ரதனங் வுச்சதி மஹேஸீ, நிக்³க³தந்தி நிக்க²ந்தங், அனிக்³க³தங் ரதனங் இதோதி அனிக்³க³தரதனகங், தஸ்மிங் அனிக்³க³தரதனகே; ஸயனிக⁴ரேதி அத்தோ². ஸேஸமெத்த² உத்தானமேவ.
498.Muddhāvasittassāti muddhani avasittassa. Anikkhanto rājā itoti anikkhantarājakaṃ, tasmiṃ anikkhantarājake; sayanighareti attho. Ratanaṃ vuccati mahesī, niggatanti nikkhantaṃ, aniggataṃ ratanaṃ itoti aniggataratanakaṃ, tasmiṃ aniggataratanake; sayanighareti attho. Sesamettha uttānameva.
கதி²னஸமுட்டா²னங் – காயவாசதோ காயவாசாசித்ததோ ச ஸமுட்டா²தி, கிரியாகிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Kathinasamuṭṭhānaṃ – kāyavācato kāyavācācittato ca samuṭṭhāti, kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
அந்தேபுரஸிக்கா²பத³ங் பட²மங்.
Antepurasikkhāpadaṃ paṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரதனவக்³கோ³ • 9. Ratanavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. அந்தேபுரஸிக்கா²பத³வண்ணனா • 1. Antepurasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. அந்தேபுரஸிக்கா²பத³வண்ணனா • 1. Antepurasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. அந்தேபுரஸிக்கா²பத³-அத்த²யோஜனா • 1. Antepurasikkhāpada-atthayojanā
