| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
9. ராஜவக்³கோ³
9. Rājavaggo
1. அந்தேபுரஸிக்கா²பத³வண்ணனா
1. Antepurasikkhāpadavaṇṇanā
497-499. ராஜவக்³க³ஸ்ஸ பட²மஸிக்கா²பதே³ அட்ட²கதா²யங் ஸப்³ப³ங் உத்தானத்த²மேவ. பாளியங் பன அயமனுத்தானபத³த்தோ². கதங் வா கரிஸ்ஸந்தி வாதி மேது²னவீதிக்கமனங் கதங் வா கரிஸ்ஸந்தி வா. இமேஸந்தி பத³ங் விப⁴த்திவிபரிணாமங் கத்வா உப⁴யத்த² யோஜேதப்³ப³ங் ‘‘இமேஹி கதங் இமே கரிஸ்ஸந்தீ’’தி. ரதனந்தி மணிரதனாதீ³ஸு யங்கிஞ்சி. உப⁴தோதி த்³வீஹி பக்கே²ஹி. ‘‘உப⁴தோ ஸுஜாதோ’’தி எத்தகே வுத்தே யேஹி கேஹிசி த்³வீஹி பா⁴கே³ஹி ஸுஜாததா விஞ்ஞாயெய்ய, ஸுஜாத-ஸத்³தோ³ ச ‘‘ஸுஜாதோ சாருத³ஸ்ஸனோ’’திஆதீ³ஸு ஆரோஹஸம்பத்திபரியாயோதி ஜாதிவஸேனேவ ஸுஜாததங் விபா⁴வேதுங் ‘‘மாதிதோ ச பிதிதோ சா’’தி வுத்தங். அனோரஸபுத்தவஸேனபி லோகே மாதுபிதுஸமஞ்ஞா தி³ஸ்ஸதி, இத⁴ பன ஸா ஓரஸபுத்தவஸேனேவ இச்சி²தாதி த³ஸ்ஸேதுங் ‘‘ஸங்ஸுத்³த⁴க³ஹணிகோ’’தி வுத்தங். க³ப்³ப⁴ங் க³ண்ஹாதி தா⁴ரேதீதி க³ஹணீ, க³ப்³பா⁴ஸயஸஞ்ஞிதோ மாதுகுச்சி²ப்பதே³ஸோ. ஸங்ஸுத்³தா⁴ க³ஹணீ அஸ்ஸாதி ஸங்ஸுத்³த⁴க³ஹணிகோ, ஸங்ஸுத்³தா⁴ தஸ்ஸ மாதுகுச்சீ²தி வுத்தங் ஹோதி. ‘‘ஸமவேபாகினியா க³ஹணியா’’தி எத்த² பன யதா²பு⁴த்தஸ்ஸ ஆஹாரஸ்ஸ விபாசனவஸேன க³ண்ஹனதோ அச²ட்³ட³னதோ கம்மஜதேஜோதா⁴து ‘‘க³ஹணீ’’தி வுச்சதி.
497-499. Rājavaggassa paṭhamasikkhāpade aṭṭhakathāyaṃ sabbaṃ uttānatthameva. Pāḷiyaṃ pana ayamanuttānapadattho. Kataṃ vā karissanti vāti methunavītikkamanaṃ kataṃ vā karissanti vā. Imesanti padaṃ vibhattivipariṇāmaṃ katvā ubhayattha yojetabbaṃ ‘‘imehi kataṃ ime karissantī’’ti. Ratananti maṇiratanādīsu yaṃkiñci. Ubhatoti dvīhi pakkhehi. ‘‘Ubhato sujāto’’ti ettake vutte yehi kehici dvīhi bhāgehi sujātatā viññāyeyya, sujāta-saddo ca ‘‘sujāto cārudassano’’tiādīsu ārohasampattipariyāyoti jātivaseneva sujātataṃ vibhāvetuṃ ‘‘mātito ca pitito cā’’ti vuttaṃ. Anorasaputtavasenapi loke mātupitusamaññā dissati, idha pana sā orasaputtavaseneva icchitāti dassetuṃ ‘‘saṃsuddhagahaṇiko’’ti vuttaṃ. Gabbhaṃ gaṇhāti dhāretīti gahaṇī, gabbhāsayasaññito mātukucchippadeso. Saṃsuddhā gahaṇī assāti saṃsuddhagahaṇiko, saṃsuddhā tassa mātukucchīti vuttaṃ hoti. ‘‘Samavepākiniyā gahaṇiyā’’ti ettha pana yathābhuttassa āhārassa vipācanavasena gaṇhanato achaḍḍanato kammajatejodhātu ‘‘gahaṇī’’ti vuccati.
யாவ ஸத்தமா பிதாமஹயுகா³தி எத்த² பிது பிதா பிதாமஹோ, பிதாமஹஸ்ஸ யுக³ங் பிதாமஹயுக³ங். ‘‘யுக³’’ந்தி ஆயுப்பமாணங் வுச்சதி. அபி⁴லாபமத்தமேவ சேதங், அத்த²தோ பன பிதாமஹோயேவ பிதாமஹயுக³ங். பிதா ச மாதா ச பிதரோ, பிதூனங் பிதரோ பிதாமஹா, தேஸங் யுகோ³ பிதாமஹயுகோ³, தஸ்மா யாவ ஸத்தமா பிதாமஹயுகா³, பிதாமஹத்³வந்தா³தி ஏவமெத்த² அத்தோ² த³ட்ட²ப்³போ³. ஏவஞ்ஹி பிதாமஹக்³க³ஹணேனேவ மாதாமஹோபி க³ஹிதோ ஹோதி. யுக³-ஸத்³தோ³ செத்த² ஏகஸேஸேன த³ட்ட²ப்³போ³ யுகோ³ ச யுகோ³ ச யுகோ³தி. ஏவஞ்ஹி தத்த² தத்த² த்³வந்த³ங் க³ஹிதமேவ ஹோதி, தஸ்மா ததோ உத்³த⁴ங் ஸப்³பே³பி புப்³ப³புரிஸா பிதாமஹயுக³க்³க³ஹணேனேவ க³ஹிதா. ஏவங் யாவ ஸத்தமோ பிதாமஹயுகோ³, தாவ ஸங்ஸுத்³த⁴க³ஹணிகோ.
Yāvasattamā pitāmahayugāti ettha pitu pitā pitāmaho, pitāmahassa yugaṃ pitāmahayugaṃ. ‘‘Yuga’’nti āyuppamāṇaṃ vuccati. Abhilāpamattameva cetaṃ, atthato pana pitāmahoyeva pitāmahayugaṃ. Pitā ca mātā ca pitaro, pitūnaṃ pitaro pitāmahā, tesaṃ yugo pitāmahayugo, tasmā yāva sattamā pitāmahayugā, pitāmahadvandāti evamettha attho daṭṭhabbo. Evañhi pitāmahaggahaṇeneva mātāmahopi gahito hoti. Yuga-saddo cettha ekasesena daṭṭhabbo yugo ca yugo ca yugoti. Evañhi tattha tattha dvandaṃ gahitameva hoti, tasmā tato uddhaṃ sabbepi pubbapurisā pitāmahayugaggahaṇeneva gahitā. Evaṃ yāva sattamo pitāmahayugo, tāva saṃsuddhagahaṇiko.
அக்கி²த்தோதி ‘‘அபனேத² ஏதங், கிங் இமினா’’தி ஏவங் அக்கி²த்தோ அனவக்கி²த்தோ. அனுபகுட்டோ²தி ந உபகுட்டோ², ந அக்கோஸங் வா நிந்த³ங் வா பத்தபுப்³போ³. கேன காரணேனாதி ஆஹ ‘‘ஜாதிவாதே³னா’’தி. எத்த² ச ‘‘உப⁴தோ…பே॰… பிதாமஹயுகா³’’தி ஏதேன தஸ்ஸ யோனிதோ³ஸாபா⁴வோ த³ஸ்ஸிதோ ஸங்ஸுத்³த⁴க³ஹணிகபா⁴வகித்தனதோ, ‘‘அக்கி²த்தோ’’தி இமினா கிரியாபராதா⁴பா⁴வோ. கிரியாபராதே⁴ன ஹி ஸத்தா கே²பங் பாபுணந்தி. ‘‘அனுபகுட்டோ²’’தி இமினா அயுத்தஸங்ஸக்³கா³பா⁴வோ. அயுத்தஸங்ஸக்³க³ஞ்ஹி படிச்ச ஸத்தா அக்கோஸங் லப⁴ந்தி. ஸேஸமெத்த² உத்தானமேவ. க²த்தியதா, அபி⁴ஸித்ததா, உபி⁴ன்னம்பி ஸயனிக⁴ரதோ அனிக்க²ந்ததா, அப்படிஸங்விதி³ததா, இந்த³கீ²லாதிக்கமோதி இமானி பனெத்த² பஞ்ச அங்கா³னி.
Akkhittoti ‘‘apanetha etaṃ, kiṃ iminā’’ti evaṃ akkhitto anavakkhitto. Anupakuṭṭhoti na upakuṭṭho, na akkosaṃ vā nindaṃ vā pattapubbo. Kena kāraṇenāti āha ‘‘jātivādenā’’ti. Ettha ca ‘‘ubhato…pe… pitāmahayugā’’ti etena tassa yonidosābhāvo dassito saṃsuddhagahaṇikabhāvakittanato, ‘‘akkhitto’’ti iminā kiriyāparādhābhāvo. Kiriyāparādhena hi sattā khepaṃ pāpuṇanti. ‘‘Anupakuṭṭho’’ti iminā ayuttasaṃsaggābhāvo. Ayuttasaṃsaggañhi paṭicca sattā akkosaṃ labhanti. Sesamettha uttānameva. Khattiyatā, abhisittatā, ubhinnampi sayanigharato anikkhantatā, appaṭisaṃviditatā, indakhīlātikkamoti imāni panettha pañca aṅgāni.
அந்தேபுரஸிக்கா²பத³வண்ணனா நிட்டி²தா.
Antepurasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரதனவக்³கோ³ • 9. Ratanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. அந்தேபுரஸிக்கா²பத³வண்ணனா • 1. Antepurasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. அந்தேபுரஸிக்கா²பத³வண்ணனா • 1. Antepurasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. அந்தேபுரஸிக்கா²பத³வண்ணனா • 1. Antepurasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. அந்தேபுரஸிக்கா²பத³-அத்த²யோஜனா • 1. Antepurasikkhāpada-atthayojanā
