| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৯. রতনৰগ্গো
9. Ratanavaggo
১. অন্তেপুরসিক্খাপদৰণ্ণনা
1. Antepurasikkhāpadavaṇṇanā
৪৯৪. রাজৰগ্গস্স পঠমসিক্খাপদে – ওরকোতি পরিত্তকো। উপরিপাসাদৰরগতোতি পাসাদৰরস্স উপরিগতো। অয্যানং ৰাহসাতি অয্যানং কারণা; তেহি জানাপিতত্তা জানামীতি ৰুত্তং হোতি।
494. Rājavaggassa paṭhamasikkhāpade – orakoti parittako. Uparipāsādavaragatoti pāsādavarassa uparigato. Ayyānaṃ vāhasāti ayyānaṃ kāraṇā; tehi jānāpitattā jānāmīti vuttaṃ hoti.
৪৯৭. পিতরং পত্থেতীতি অন্তরং পস্সিত্ৰা ঘাতেতুং ইচ্ছতি। রাজন্তেপুরং হত্থিসম্মদ্দন্তিআদীসু হত্থীহি সম্মদ্দো এত্থাতি হত্থিসম্মদ্দং; হত্থিসম্বাধন্তি অত্থো। অস্সরথসম্মদ্দপদেপি এসেৰ নযো। ‘‘সম্মত্ত’’ন্তি কেচি পঠন্তি, তং ন গহেতব্বং। ‘‘রঞ্ঞো অন্তেপুরে হত্থিসম্মদ্দ’’ন্তিপি পাঠো, তত্থ হত্থীনং সম্মদ্দং হত্থিসম্মদ্দন্তি অত্থো, রঞ্ঞো অন্তেপুরে হত্থিসম্মদ্দো অত্থীতি ৰুত্তং হোতি। এস নযো সেসপদেসুপি। রজনীযানীতি তস্মিং অন্তেপুরে এদিসানি রূপাদীনি।
497.Pitaraṃ patthetīti antaraṃ passitvā ghātetuṃ icchati. Rājantepuraṃ hatthisammaddantiādīsu hatthīhi sammaddo etthāti hatthisammaddaṃ; hatthisambādhanti attho. Assarathasammaddapadepi eseva nayo. ‘‘Sammatta’’nti keci paṭhanti, taṃ na gahetabbaṃ. ‘‘Rañño antepure hatthisammadda’’ntipi pāṭho, tattha hatthīnaṃ sammaddaṃ hatthisammaddanti attho, rañño antepure hatthisammaddo atthīti vuttaṃ hoti. Esa nayo sesapadesupi. Rajanīyānīti tasmiṃ antepure edisāni rūpādīni.
৪৯৮. মুদ্ধাৰসিত্তস্সাতি মুদ্ধনি অৰসিত্তস্স। অনিক্খন্তো রাজা ইতোতি অনিক্খন্তরাজকং, তস্মিং অনিক্খন্তরাজকে; সযনিঘরেতি অত্থো। রতনং ৰুচ্চতি মহেসী, নিগ্গতন্তি নিক্খন্তং, অনিগ্গতং রতনং ইতোতি অনিগ্গতরতনকং, তস্মিং অনিগ্গতরতনকে; সযনিঘরেতি অত্থো। সেসমেত্থ উত্তানমেৰ।
498.Muddhāvasittassāti muddhani avasittassa. Anikkhanto rājā itoti anikkhantarājakaṃ, tasmiṃ anikkhantarājake; sayanighareti attho. Ratanaṃ vuccati mahesī, niggatanti nikkhantaṃ, aniggataṃ ratanaṃ itoti aniggataratanakaṃ, tasmiṃ aniggataratanake; sayanighareti attho. Sesamettha uttānameva.
কথিনসমুট্ঠানং – কাযৰাচতো কাযৰাচাচিত্ততো চ সমুট্ঠাতি, কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
Kathinasamuṭṭhānaṃ – kāyavācato kāyavācācittato ca samuṭṭhāti, kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
অন্তেপুরসিক্খাপদং পঠমং।
Antepurasikkhāpadaṃ paṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৯. রতনৰগ্গো • 9. Ratanavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. অন্তেপুরসিক্খাপদৰণ্ণনা • 1. Antepurasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. অন্তেপুরসিক্খাপদৰণ্ণনা • 1. Antepurasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. অন্তেপুরসিক্খাপদ-অত্থযোজনা • 1. Antepurasikkhāpada-atthayojanā
