| Library / Tipiṭaka / ತಿಪಿಟಕ • Tipiṭaka / ಕಙ್ಖಾವಿತರಣೀ-ಅಭಿನವ-ಟೀಕಾ • Kaṅkhāvitaraṇī-abhinava-ṭīkā |
೯. ರತನವಗ್ಗೋ
9. Ratanavaggo
೧. ಅನ್ತೇಪುರಸಿಕ್ಖಾಪದವಣ್ಣನಾ
1. Antepurasikkhāpadavaṇṇanā
ಅನಿಕ್ಖನ್ತರಾಜಕೇ ಅನಿಗ್ಗತರತನಕೇತಿ ಏತ್ಥ ‘‘ಸಯನಿಘರೇ’’ತಿ ಪಾಠಸೇಸೋ ದಟ್ಠಬ್ಬೋತಿ ಆಹ ‘‘ಅನಿಕ್ಖನ್ತೋ ರಾಜಾ ಇತೋ’’ತಿಆದಿ। ತತ್ಥ ಇತೋತಿ ಸಯನಿಘರತೋ। ಸಯನಿಘರೇತಿ ಸಯನೀಯಘರೇ। ಯತ್ಥ ರಞ್ಞೋ ಸಯನಂ ಪಞ್ಞತ್ತಂ ಹೋತಿ, ಅನ್ತಮಸೋ ಸಾಣಿಪಾಕಾರಪರಿಕ್ಖಿತ್ತಮ್ಪಿ, ತಸ್ಮಿನ್ತಿ ವುತ್ತಂ ಹೋತಿ। ರತಿಜನನಟ್ಠೇನ ರತನಂ, ಹತ್ಥಿಆದಿ। ಇಧ ಪನ ಇತ್ಥಿರತನಂ ಅಧಿಪ್ಪೇತನ್ತಿ ಆಹ ‘‘ರತನಂ ವುಚ್ಚತಿ ಮಹೇಸೀ’’ತಿ।
Anikkhantarājake aniggataratanaketi ettha ‘‘sayanighare’’ti pāṭhaseso daṭṭhabboti āha ‘‘anikkhanto rājā ito’’tiādi. Tattha itoti sayanigharato. Sayanighareti sayanīyaghare. Yattha rañño sayanaṃ paññattaṃ hoti, antamaso sāṇipākāraparikkhittampi, tasminti vuttaṃ hoti. Ratijananaṭṭhena ratanaṃ, hatthiādi. Idha pana itthiratanaṃ adhippetanti āha ‘‘ratanaṃ vuccati mahesī’’ti.
ಉಭೋಸೂತಿ ರಾಜಮಹೇಸೀಸು। ಕಿರಿಯಾಕಿರಿಯನ್ತಿ ಏತ್ಥ ಇನ್ದಖೀಲಾತಿಕ್ಕಮೋ ಕಿರಿಯಂ, ಅಪ್ಪಟಿಸಂವಿದಿತಂ ಅಕಿರಿಯನ್ತಿ ದಟ್ಠಬ್ಬಂ।
Ubhosūti rājamahesīsu. Kiriyākiriyanti ettha indakhīlātikkamo kiriyaṃ, appaṭisaṃviditaṃ akiriyanti daṭṭhabbaṃ.
ಅನ್ತೇಪುರಸಿಕ್ಖಾಪದವಣ್ಣನಾ ನಿಟ್ಠಿತಾ।
Antepurasikkhāpadavaṇṇanā niṭṭhitā.
