| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༩. རཏནཝགྒོ
9. Ratanavaggo
༡. ཨནྟེཔུརསིཀྑཱཔདཝཎྞནཱ
1. Antepurasikkhāpadavaṇṇanā
ཨནིཀྑནྟརཱཛཀེ ཨནིགྒཏརཏནཀེཏི ཨེཏྠ ‘‘སཡནིགྷརེ’’ཏི པཱཋསེསོ དཊྛབྦོཏི ཨཱཧ ‘‘ཨནིཀྑནྟོ རཱཛཱ ཨིཏོ’’ཏིཨཱདི། ཏཏྠ ཨིཏོཏི སཡནིགྷརཏོ། སཡནིགྷརེཏི སཡནཱིཡགྷརེ། ཡཏྠ རཉྙོ སཡནཾ པཉྙཏྟཾ ཧོཏི, ཨནྟམསོ སཱཎིཔཱཀཱརཔརིཀྑིཏྟམྤི, ཏསྨིནྟི ཝུཏྟཾ ཧོཏི། རཏིཛནནཊྛེན རཏནཾ, ཧཏྠིཨཱདི། ཨིདྷ པན ཨིཏྠིརཏནཾ ཨདྷིཔྤེཏནྟི ཨཱཧ ‘‘རཏནཾ ཝུཙྩཏི མཧེསཱི’’ཏི།
Anikkhantarājake aniggataratanaketi ettha ‘‘sayanighare’’ti pāṭhaseso daṭṭhabboti āha ‘‘anikkhanto rājā ito’’tiādi. Tattha itoti sayanigharato. Sayanighareti sayanīyaghare. Yattha rañño sayanaṃ paññattaṃ hoti, antamaso sāṇipākāraparikkhittampi, tasminti vuttaṃ hoti. Ratijananaṭṭhena ratanaṃ, hatthiādi. Idha pana itthiratanaṃ adhippetanti āha ‘‘ratanaṃ vuccati mahesī’’ti.
ཨུབྷོསཱུཏི རཱཛམཧེསཱིསུ། ཀིརིཡཱཀིརིཡནྟི ཨེཏྠ ཨིནྡཁཱིལཱཏིཀྐམོ ཀིརིཡཾ, ཨཔྤཊིསཾཝིདིཏཾ ཨཀིརིཡནྟི དཊྛབྦཾ།
Ubhosūti rājamahesīsu. Kiriyākiriyanti ettha indakhīlātikkamo kiriyaṃ, appaṭisaṃviditaṃ akiriyanti daṭṭhabbaṃ.
ཨནྟེཔུརསིཀྑཱཔདཝཎྞནཱ ནིཊྛིཏཱ།
Antepurasikkhāpadavaṇṇanā niṭṭhitā.
