| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៦-៧. អន្តេវាសិកសុត្តាទិវណ្ណនា
6-7. Antevāsikasuttādivaṇṇanā
១៥១-១៥២. អន្ត-សទ្ទោ សមីបត្ថេ វត្តតិ ‘‘ឧទកន្តំ វនន្ត’’ន្តិអាទីសុ, កិលេសោ បន អតិអាសន្នេ វសតិ អព្ភន្តរវុត្តិតាយាតិ ‘‘អន្តេវាសិក’’ន្តិ វុត្តោ វិភត្តិអលោបេន យថា ‘‘វនេកុសលោ, កូលេរុក្ខា’’តិ។ តេនាហ – ‘‘អនន្តេវាសិកន្តិ អន្តោវសនកិលេសវិរហិត’’ន្តិ។ អាចរណកកិលេសវិរហិតន្តិ សមុទាចរណកិលេសរហិតំ។ អន្តោ អស្ស វសន្តីតិ អស្ស បុគ្គលស្ស អន្តោ អព្ភន្តរេ ចិត្តេ វសន្តិ បវត្តន្តិ។ តេ ឯតំ អធិភវន្តីតិ តេ កិលេសា ឯតំ បុគ្គលំ អភិភវិត្វា អត្តនោ វសេ វត្តេន្តិ។ តេនាហ – ‘‘អជ្ឈោត្ថរន្តិ សិក្ខាបេន្តិ វា’’តិ។ តេហិ អាចរិយេហីតិ តេហិ កិលេសសង្ខាតេហិ សត្តេ អត្តនោ គតិយំ ឋបេន្តេហិ អាចរិយេហិ។ សត្តមំ ហេដ្ឋា កថិតនយមេវាតិ យស្មា ហេដ្ឋា ខន្ធវសេន ទេសនា អាគតា, ឥធ អាយតនវសេនាតិ អយមេវ វិសេសោ។
151-152. Anta-saddo samīpatthe vattati ‘‘udakantaṃ vananta’’ntiādīsu, kileso pana atiāsanne vasati abbhantaravuttitāyāti ‘‘antevāsika’’nti vutto vibhattialopena yathā ‘‘vanekusalo, kūlerukkhā’’ti. Tenāha – ‘‘anantevāsikanti antovasanakilesavirahita’’nti. Ācaraṇakakilesavirahitanti samudācaraṇakilesarahitaṃ. Antoassa vasantīti assa puggalassa anto abbhantare citte vasanti pavattanti. Te etaṃ adhibhavantīti te kilesā etaṃ puggalaṃ abhibhavitvā attano vase vattenti. Tenāha – ‘‘ajjhottharanti sikkhāpenti vā’’ti. Tehi ācariyehīti tehi kilesasaṅkhātehi satte attano gatiyaṃ ṭhapentehi ācariyehi. Sattamaṃ heṭṭhā kathitanayamevāti yasmā heṭṭhā khandhavasena desanā āgatā, idha āyatanavasenāti ayameva viseso.
អន្តេវាសិកសុត្តាទិវណ្ណនា និដ្ឋិតា។
Antevāsikasuttādivaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
៦. អន្តេវាសិកសុត្តំ • 6. Antevāsikasuttaṃ
៧. កិមត្ថិយព្រហ្មចរិយសុត្តំ • 7. Kimatthiyabrahmacariyasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦-៧. អន្តេវាសិកសុត្តាទិវណ្ណនា • 6-7. Antevāsikasuttādivaṇṇanā
