| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
14. அந்தேவாஸிகவத்தகதா²
14. Antevāsikavattakathā
381. தேன கோ² பன ஸமயேன ஆசரியா அந்தேவாஸிகேஸு ந ஸம்மா வத்தந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆசரியா அந்தேவாஸிகேஸு ந ஸம்மா வத்திஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, ஆசரியா அந்தேவாஸிகேஸு ந ஸம்மா வத்தந்தீ’’தி? ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
381. Tena kho pana samayena ācariyā antevāsikesu na sammā vattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma ācariyā antevāsikesu na sammā vattissantī’’ti! Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, ācariyā antevāsikesu na sammā vattantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
382. ‘‘தேன ஹி, பி⁴க்க²வே, ஆசரியானங் அந்தேவாஸிகேஸு வத்தங் பஞ்ஞபெஸ்ஸாமி யதா² ஆசரியேஹி அந்தேவாஸிகேஸு ஸம்மா வத்திதப்³ப³ங். 1 ஆசரியேன, பி⁴க்க²வே, அந்தேவாஸிகம்ஹி ஸம்மா வத்திதப்³ப³ங். தத்ராயங் ஸம்மாவத்தனா –
382. ‘‘Tena hi, bhikkhave, ācariyānaṃ antevāsikesu vattaṃ paññapessāmi yathā ācariyehi antevāsikesu sammā vattitabbaṃ. 2 Ācariyena, bhikkhave, antevāsikamhi sammā vattitabbaṃ. Tatrāyaṃ sammāvattanā –
‘‘ஆசரியேன, பி⁴க்க²வே, அந்தேவாஸிகோ ஸங்க³ஹேதப்³போ³ அனுக்³க³ஹேதப்³போ³ உத்³தே³ஸேன பரிபுச்சா²ய ஓவாதே³ன அனுஸாஸனியா. ஸசே ஆசரியஸ்ஸ பத்தோ ஹோதி, அந்தேவாஸிகஸ்ஸ பத்தோ ந ஹோதி, ஆசரியேன அந்தேவாஸிகஸ்ஸ பத்தோ தா³தப்³போ³, உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ பத்தோ உப்பஜ்ஜியேதா²தி. ஸசே ஆசரியஸ்ஸ சீவரங் ஹோதி, அந்தேவாஸிகஸ்ஸ சீவரங் ந ஹோதி, ஆசரியேன அந்தேவாஸிகஸ்ஸ சீவரங் தா³தப்³ப³ங், உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ சீவரங் உப்பஜ்ஜியேதா²தி. ஸசே ஆசரியஸ்ஸ பரிக்கா²ரோ ஹோதி, அந்தேவாஸிகஸ்ஸ பரிக்கா²ரோ ந ஹோதி, ஆசரியேன அந்தேவாஸிகஸ்ஸ பரிக்கா²ரோ தா³தப்³போ³, உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ பரிக்கா²ரோ உப்பஜ்ஜியேதா²தி.
‘‘Ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā. Sace ācariyassa patto hoti, antevāsikassa patto na hoti, ācariyena antevāsikassa patto dātabbo, ussukkaṃ vā kātabbaṃ – kinti nu kho antevāsikassa patto uppajjiyethāti. Sace ācariyassa cīvaraṃ hoti, antevāsikassa cīvaraṃ na hoti, ācariyena antevāsikassa cīvaraṃ dātabbaṃ, ussukkaṃ vā kātabbaṃ – kinti nu kho antevāsikassa cīvaraṃ uppajjiyethāti. Sace ācariyassa parikkhāro hoti, antevāsikassa parikkhāro na hoti, ācariyena antevāsikassa parikkhāro dātabbo, ussukkaṃ vā kātabbaṃ – kinti nu kho antevāsikassa parikkhāro uppajjiyethāti.
‘‘ஸசே அந்தேவாஸிகோ கி³லானோ ஹோதி, காலஸ்ஸேவ உட்டா²ய த³ந்தகட்ட²ங் தா³தப்³ப³ங், முகோ²த³கங் தா³தப்³ப³ங், ஆஸனங் பஞ்ஞபேதப்³ப³ங். ஸசே யாகு³ ஹோதி , பா⁴ஜனங் தோ⁴வித்வா யாகு³ உபனாமேதப்³பா³. யாகு³ங் பீதஸ்ஸ உத³கங் த³த்வா பா⁴ஜனங் படிக்³க³ஹெத்வா நீசங் கத்வா ஸாது⁴கங் அப்படிக⁴ங்ஸந்தேன தோ⁴வித்வா படிஸாமேதப்³ப³ங் . அந்தேவாஸிகம்ஹி வுட்டி²தே ஆஸனங் உத்³த⁴ரிதப்³ப³ங். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.
‘‘Sace antevāsiko gilāno hoti, kālasseva uṭṭhāya dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti , bhājanaṃ dhovitvā yāgu upanāmetabbā. Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ . Antevāsikamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.
‘‘ஸசே அந்தேவாஸிகோ கா³மங் பவிஸிதுகாமோ ஹோதி, நிவாஸனங் தா³தப்³ப³ங், படினிவாஸனங் படிக்³க³ஹேதப்³ப³ங், காயப³ந்த⁴னங் தா³தப்³ப³ங், ஸகு³ணங் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ தா³தப்³போ³.
‘‘Sace antevāsiko gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo.
‘‘எத்தாவதா நிவத்திஸ்ஸதீதி ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங், பச்சுக்³க³ந்த்வா பத்தசீவரங் படிக்³க³ஹேதப்³ப³ங், படினிவாஸனங் தா³தப்³ப³ங், நிவாஸனங் படிக்³க³ஹேதப்³ப³ங். ஸசே சீவரங் ஸின்னங் ஹோதி, முஹுத்தங் உண்ஹே ஓதாபேதப்³ப³ங், ந ச உண்ஹே சீவரங் நித³ஹிதப்³ப³ங். சீவரங் ஸங்க⁴ரிதப்³ப³ங். சீவரங் ஸங்க⁴ரந்தேன சதுரங்கு³லங் கண்ணங் உஸ்ஸாரெத்வா சீவரங் ஸங்க⁴ரிதப்³ப³ங் – மா மஜ்ஜே² ப⁴ங்கோ³ அஹோஸீதி. ஓபோ⁴கே³ காயப³ந்த⁴னங் காதப்³ப³ங்.
‘‘Ettāvatā nivattissatīti āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ – mā majjhe bhaṅgo ahosīti. Obhoge kāyabandhanaṃ kātabbaṃ.
‘‘ஸசே பிண்ட³பாதோ ஹோதி, அந்தேவாஸிகோ ச பு⁴ஞ்ஜிதுகாமோ ஹோதி, உத³கங் த³த்வா பிண்ட³பாதோ உபனாமேதப்³போ³. அந்தேவாஸிகோ பானீயேன புச்சி²தப்³போ³. பு⁴த்தாவிஸ்ஸ உத³கங் த³த்வா பத்தங் படிக்³க³ஹெத்வா நீசங் கத்வா ஸாது⁴கங் அப்படிக⁴ங்ஸந்தேன தோ⁴வித்வா வோத³கங் கத்வா முஹுத்தங் உண்ஹே ஓதாபேதப்³போ³, ந ச உண்ஹே பத்தோ நித³ஹிதப்³போ³. பத்தசீவரங் நிக்கி²பிதப்³ப³ங். பத்தங் நிக்கி²பந்தேன…பே॰… சீவரங் நிக்கி²பந்தேன…பே॰… பாரதோ அந்தங் ஓரதோ போ⁴க³ங் கத்வா சீவரங் நிக்கி²பிதப்³ப³ங். அந்தேவாஸிகம்ஹி உட்டி²தே ஆஸனங் உத்³த⁴ரிதப்³ப³ங், பாதோ³த³கங் பாத³பீட²ங் பாத³கத²லிகங் படிஸாமேதப்³ப³ங். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.
‘‘Sace piṇḍapāto hoti, antevāsiko ca bhuñjitukāmo hoti, udakaṃ datvā piṇḍapāto upanāmetabbo. Antevāsiko pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena…pe… cīvaraṃ nikkhipantena…pe… pārato antaṃ orato bhogaṃ katvā cīvaraṃ nikkhipitabbaṃ. Antevāsikamhi uṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
‘‘ஸசே அந்தேவாஸிகோ நஹாயிதுகாமோ ஹோதி, நஹானங் படியாதே³தப்³ப³ங். ஸசே ஸீதேன அத்தோ² ஹோதி, ஸீதங் படியாதே³தப்³ப³ங். ஸசே உண்ஹேன அத்தோ² ஹோதி, உண்ஹங் படியாதே³தப்³ப³ங்.
‘‘Sace antevāsiko nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
‘‘ஸசே அந்தேவாஸிகோ ஜந்தாக⁴ரங் பவிஸிதுகாமோ ஹோதி, சுண்ணங் ஸன்னேதப்³ப³ங், மத்திகா தேமேதப்³பா³, ஜந்தாக⁴ரபீட²ங் ஆதா³ய 3 க³ந்த்வா ஜந்தாக⁴ரபீட²ங் த³த்வா சீவரங் படிக்³க³ஹெத்வா ஏகமந்தங் நிக்கி²பிதப்³ப³ங், சுண்ணங் தா³தப்³ப³ங், மத்திகா தா³தப்³பா³. ஸசே உஸ்ஸஹதி ஜந்தாக⁴ரங் பவிஸிதப்³ப³ங். ஜந்தாக⁴ரங் பவிஸந்தேன மத்திகாய முக²ங் மக்கெ²த்வா புரதோ ச பச்ச²தோ ச படிச்சா²தெ³த்வா ஜந்தாக⁴ரங் பவிஸிதப்³ப³ங். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ங். ந நவா பி⁴க்கூ² ஆஸனேன படிபா³ஹிதப்³பா³ . ஜந்தாக⁴ரே அந்தேவாஸிகஸ்ஸ பரிகம்மங் காதப்³ப³ங். ஜந்தாக⁴ரா நிக்க²மந்தேன ஜந்தாக⁴ரபீட²ங் ஆதா³ய புரதோ ச பச்ச²தோ ச படிச்சா²தெ³த்வா ஜந்தாக⁴ரா நிக்க²மிதப்³ப³ங்.
‘‘Sace antevāsiko jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya 4 gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā . Jantāghare antevāsikassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
‘‘உத³கேபி அந்தேவாஸிகஸ்ஸ பரிகம்மங் காதப்³ப³ங். நஹாதேன பட²மதரங் உத்தரித்வா அத்தனோ க³த்தங் வோத³கங் கத்வா நிவாஸெத்வா அந்தேவாஸிகஸ்ஸ க³த்ததோ உத³கங் பமஜ்ஜிதப்³ப³ங், நிவாஸனங் தா³தப்³ப³ங், ஸங்கா⁴டி தா³தப்³பா³, ஜந்தாக⁴ரபீட²ங் ஆதா³ய பட²மதரங் ஆக³ந்த்வா ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங், அந்தேவாஸிகோ பானீயேன புச்சி²தப்³போ³.
‘‘Udakepi antevāsikassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā antevāsikassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, antevāsiko pānīyena pucchitabbo.
‘‘யஸ்மிங் விஹாரே அந்தேவாஸிகோ விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி, ஸோதே⁴தப்³போ³. விஹாரங் ஸோதெ⁴ந்தேன பட²மங் பத்தசீவரங் நீஹரித்வா ஏகமந்தங் நிக்கி²பிதப்³ப³ங்…பே॰… ஆசமனகும்பி⁴யா உத³கங் ந ஹோதி, ஆசமனகும்பி⁴யா உத³கங் ஆஸிஞ்சிதப்³ப³ங்.
‘‘Yasmiṃ vihāre antevāsiko viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ…pe… ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘ஸசே அந்தேவாஸிகஸ்ஸ அனபி⁴ரதி உப்பன்னா ஹோதி, ஆசரியேன வூபகாஸேதப்³போ³, வூபகாஸாபேதப்³போ³, த⁴ம்மகதா² வாஸ்ஸ காதப்³பா³. ஸசே அந்தேவாஸிகஸ்ஸ குக்குச்சங் உப்பன்னங் ஹோதி, ஆசரியேன வினோதே³தப்³ப³ங், வினோதா³பேதப்³ப³ங், த⁴ம்மகதா² வாஸ்ஸ காதப்³பா³. ஸசே அந்தேவாஸிகஸ்ஸ தி³ட்டி²க³தங் உப்பன்னங் ஹோதி, ஆசரியேன விவேசேதப்³ப³ங், விவேசாபேதப்³ப³ங், த⁴ம்மகதா² வாஸ்ஸ காதப்³பா³. ஸசே அந்தேவாஸிகோ க³ருத⁴ம்மங் அஜ்ஜா²பன்னோ ஹோதி, பரிவாஸாரஹோ, ஆசரியேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ அந்தேவாஸிகஸ்ஸ பரிவாஸங் த³தெ³ய்யாதி. ஸசே அந்தேவாஸிகோ மூலாயபடிகஸ்ஸனாரஹோ ஹோதி, ஆசரியேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ அந்தேவாஸிகங் மூலாய படிகஸ்ஸெய்யாதி. ஸசே அந்தேவாஸிகோ மானத்தாரஹோ ஹோதி, ஆசரியேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ அந்தேவாஸிகஸ்ஸ மானத்தங் த³தெ³ய்யாதி. ஸசே அந்தேவாஸிகோ அப்³பா⁴னாரஹோ ஹோதி, ஆசரியேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ அந்தேவாஸிகங் அப்³பெ⁴ய்யாதி. ஸசே ஸங்கோ⁴ அந்தேவாஸிகஸ்ஸ கம்மங் கத்துகாமோ ஹோதி, தஜ்ஜனீயங் வா நியஸ்ஸங் வா பப்³பா³ஜனீயங் வா படிஸாரணீயங் வா உக்கே²பனீயங் வா, ஆசரியேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ அந்தேவாஸிகஸ்ஸ கம்மங் ந கரெய்ய , லஹுகாய வா பரிணாமெய்யாதி. கதங் வா பனஸ்ஸ ஹோதி, ஸங்கே⁴ன கம்மங், தஜ்ஜனீயங் வா நியஸ்ஸங் வா பப்³பா³ஜனீயங் வா படிஸாரணீயங் வா உக்கே²பனீயங் வா, ஆசரியேன உஸ்ஸுக்கங் காதப்³ப³ங் – கிந்தி நு கோ² அந்தேவாஸிகோ ஸம்மா வத்தெய்ய, லோமங் பாதெய்ய, நெத்தா²ரங் வத்தெய்ய, ஸங்கோ⁴ தங் கம்மங் படிப்பஸ்ஸம்பெ⁴ய்யாதி.
‘‘Sace antevāsikassa anabhirati uppannā hoti, ācariyena vūpakāsetabbo, vūpakāsāpetabbo, dhammakathā vāssa kātabbā. Sace antevāsikassa kukkuccaṃ uppannaṃ hoti, ācariyena vinodetabbaṃ, vinodāpetabbaṃ, dhammakathā vāssa kātabbā. Sace antevāsikassa diṭṭhigataṃ uppannaṃ hoti, ācariyena vivecetabbaṃ, vivecāpetabbaṃ, dhammakathā vāssa kātabbā. Sace antevāsiko garudhammaṃ ajjhāpanno hoti, parivāsāraho, ācariyena ussukkaṃ kātabbaṃ – kinti nu kho saṅgho antevāsikassa parivāsaṃ dadeyyāti. Sace antevāsiko mūlāyapaṭikassanāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ mūlāya paṭikasseyyāti. Sace antevāsiko mānattāraho hoti, ācariyena ussukkaṃ kātabbaṃ – kinti nu kho saṅgho antevāsikassa mānattaṃ dadeyyāti. Sace antevāsiko abbhānāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ abbheyyāti. Sace saṅgho antevāsikassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho saṅgho antevāsikassa kammaṃ na kareyya , lahukāya vā pariṇāmeyyāti. Kataṃ vā panassa hoti, saṅghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho antevāsiko sammā vatteyya, lomaṃ pāteyya, netthāraṃ vatteyya, saṅgho taṃ kammaṃ paṭippassambheyyāti.
‘‘ஸசே அந்தேவாஸிகஸ்ஸ சீவரங் தோ⁴விதப்³ப³ங் ஹோதி, ஆசரியேன ஆசிக்கி²தப்³ப³ங் – ஏவங் தோ⁴வெய்யாஸீதி, உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ சீவரங் தோ⁴வியேதா²தி. ஸசே அந்தேவாஸிகஸ்ஸ சீவரங் காதப்³ப³ங் ஹோதி, ஆசரியேன ஆசிக்கி²தப்³ப³ங் – ஏவங் கரெய்யாஸீதி, உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ சீவரங் கரியேதா²தி. ஸசே அந்தேவாஸிகஸ்ஸ ரஜனங் பசிதப்³ப³ங் ஹோதி, ஆசரியேன ஆசிக்கி²தப்³ப³ங் – ஏவங் பசெய்யாஸீதி, உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ ரஜனங் பசியேதா²தி. ஸசே அந்தேவாஸிகஸ்ஸ சீவரங் ரஜிதப்³ப³ங் ஹோதி, ஆசரியேன ஆசிக்கி²தப்³ப³ங் – ஏவங் ரஜெய்யாஸீதி, உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ சீவரங் ரஜியேதா²தி. சீவரங் ரஜந்தேன ஸாது⁴கங் ஸம்பரிவத்தகங் ஸம்பரிவத்தகங் ரஜிதப்³ப³ங். ந ச அச்சி²ன்னே தே²வே பக்கமிதப்³ப³ங். ஸசே அந்தேவாஸிகோ கி³லானோ ஹோதி, யாவஜீவங் உபட்டா²தப்³போ³, வுட்டா²னமஸ்ஸ ஆக³மேதப்³ப³ங். இத³ங் கோ², பி⁴க்க²வே, ஆசரியானங் அந்தேவாஸிகேஸு வத்தங் யதா² ஆசரியேஹி அந்தேவாஸிகேஸு ஸம்மா வத்திதப்³ப³’’ந்தி.
‘‘Sace antevāsikassa cīvaraṃ dhovitabbaṃ hoti, ācariyena ācikkhitabbaṃ – evaṃ dhoveyyāsīti, ussukkaṃ vā kātabbaṃ – kinti nu kho antevāsikassa cīvaraṃ dhoviyethāti. Sace antevāsikassa cīvaraṃ kātabbaṃ hoti, ācariyena ācikkhitabbaṃ – evaṃ kareyyāsīti, ussukkaṃ vā kātabbaṃ – kinti nu kho antevāsikassa cīvaraṃ kariyethāti. Sace antevāsikassa rajanaṃ pacitabbaṃ hoti, ācariyena ācikkhitabbaṃ – evaṃ paceyyāsīti, ussukkaṃ vā kātabbaṃ – kinti nu kho antevāsikassa rajanaṃ paciyethāti. Sace antevāsikassa cīvaraṃ rajitabbaṃ hoti, ācariyena ācikkhitabbaṃ – evaṃ rajeyyāsīti, ussukkaṃ vā kātabbaṃ – kinti nu kho antevāsikassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ. Na ca acchinne theve pakkamitabbaṃ. Sace antevāsiko gilāno hoti, yāvajīvaṃ upaṭṭhātabbo, vuṭṭhānamassa āgametabbaṃ. Idaṃ kho, bhikkhave, ācariyānaṃ antevāsikesu vattaṃ yathā ācariyehi antevāsikesu sammā vattitabba’’nti.
வத்தக்க²ந்த⁴கோ அட்ட²மோ.
Vattakkhandhako aṭṭhamo.
இமம்ஹி க²ந்த⁴கே வத்தூ² ஏகூனவீஸதி, வத்தா சுத்³த³ஸ.
Imamhi khandhake vatthū ekūnavīsati, vattā cuddasa.
தஸ்ஸுத்³தா³னங் –
Tassuddānaṃ –
ஸஉபாஹனா ச²த்தா ச, ஓகு³ண்டி² ஸீஸங் பானீயங்;
Saupāhanā chattā ca, oguṇṭhi sīsaṃ pānīyaṃ;
நாபி⁴வாதே³ ந புச்ச²ந்தி, அஹி உஜ்ஜ²ந்தி பேஸலா.
Nābhivāde na pucchanti, ahi ujjhanti pesalā.
ஓமுஞ்சி ச²த்தங் க²ந்தே⁴ ச, அதரஞ்ச படிக்கமங்;
Omuñci chattaṃ khandhe ca, atarañca paṭikkamaṃ;
பத்தசீவரங் நிக்கி²பா, பதிரூபஞ்ச புச்சி²தா.
Pattacīvaraṃ nikkhipā, patirūpañca pucchitā.
ஆஸிஞ்செய்ய தோ⁴விதேன, ஸுக்கே²னல்லேனுபாஹனா;
Āsiñceyya dhovitena, sukkhenallenupāhanā;
வுட்³டோ⁴ நவகோ புச்செ²ய்ய, அஜ்ஜா²வுட்ட²ஞ்ச கோ³சரா.
Vuḍḍho navako puccheyya, ajjhāvuṭṭhañca gocarā.
ஸெக்கா² வச்சா பானீ பரி, கத்தரங் கதிகங் ததோ;
Sekkhā vaccā pānī pari, kattaraṃ katikaṃ tato;
காலங் முஹுத்தங் உக்லாபோ, பூ⁴மத்த²ரணங் நீஹரே.
Kālaṃ muhuttaṃ uklāpo, bhūmattharaṇaṃ nīhare.
படிபாதோ³ பி⁴ஸிபி³ப்³போ³, மஞ்சபீட²ஞ்ச மல்லகங்;
Paṭipādo bhisibibbo, mañcapīṭhañca mallakaṃ;
அபஸ்ஸேனுல்லோககண்ணா, கே³ருகா காள அகதா.
Apassenullokakaṇṇā, gerukā kāḷa akatā.
ஸங்காரஞ்ச பூ⁴மத்த²ரணங், படிபாத³கங் மஞ்சபீட²ங்;
Saṅkārañca bhūmattharaṇaṃ, paṭipādakaṃ mañcapīṭhaṃ;
பி⁴ஸி நிஸீத³னம்பி, மல்லகங் அபஸ்ஸேன ச.
Bhisi nisīdanampi, mallakaṃ apassena ca.
பத்தசீவரங் பூ⁴மி ச, பாரந்தங் ஓரதோ போ⁴க³ங்;
Pattacīvaraṃ bhūmi ca, pārantaṃ orato bhogaṃ;
புரத்தி²மா பச்சி²மா ச, உத்தரா அத² த³க்கி²ணா.
Puratthimā pacchimā ca, uttarā atha dakkhiṇā.
ஸீதுண்ஹே ச தி³வாரத்திங், பரிவேணஞ்ச கொட்ட²கோ;
Sītuṇhe ca divārattiṃ, pariveṇañca koṭṭhako;
உபட்டா²னக்³கி³ ஸாலா ச, வத்தங் வச்சகுடீஸு ச.
Upaṭṭhānaggi sālā ca, vattaṃ vaccakuṭīsu ca.
பானீ பரிபோ⁴ஜனியா, கும்பி⁴ ஆசமனேஸு ச;
Pānī paribhojaniyā, kumbhi ācamanesu ca;
நேவாஸனங் ந உத³கங், ந பச்சு ந ச பானியங்;
Nevāsanaṃ na udakaṃ, na paccu na ca pāniyaṃ;
நாபி⁴வாதே³ நபஞ்ஞபே, உஜ்ஜா²யந்தி ச பேஸலா.
Nābhivāde napaññape, ujjhāyanti ca pesalā.
வுட்³டா⁴ஸனஞ்ச உத³கங், பச்சுக்³க³ந்த்வா ச பானியங்;
Vuḍḍhāsanañca udakaṃ, paccuggantvā ca pāniyaṃ;
உபாஹனே ஏகமந்தங், அபி⁴வாதே³ ச பஞ்ஞபே.
Upāhane ekamantaṃ, abhivāde ca paññape.
வுத்த²ங் கோ³சரஸெக்கோ² ச, டா²னங் பானியபோ⁴ஜனங்;
Vutthaṃ gocarasekkho ca, ṭhānaṃ pāniyabhojanaṃ;
கத்தரங் கதிகங் காலங், நவகஸ்ஸ நிஸின்னகே.
Kattaraṃ katikaṃ kālaṃ, navakassa nisinnake.
அபி⁴வாத³யே ஆசிக்கே², யதா² ஹெட்டா² ததா² நயே;
Abhivādaye ācikkhe, yathā heṭṭhā tathā naye;
நித்³தி³ட்ட²ங் ஸத்த²வாஹேன வத்தங் ஆவாஸிகேஹிமே.
Niddiṭṭhaṃ satthavāhena vattaṃ āvāsikehime.
க³மிகா தா³ருமத்தி ச, விவரித்வா ந புச்சி²ய;
Gamikā dārumatti ca, vivaritvā na pucchiya;
நஸ்ஸந்தி ச அகு³த்தஞ்ச, உஜ்ஜா²யந்தி ச பேஸலா.
Nassanti ca aguttañca, ujjhāyanti ca pesalā.
படிஸாமெத்வா த²கெத்வா, ஆபுச்சி²த்வாவ பக்கமே;
Paṭisāmetvā thaketvā, āpucchitvāva pakkame;
பி⁴க்கு² வா ஸாமணேரோ வா, ஆராமிகோ உபாஸகோ.
Bhikkhu vā sāmaṇero vā, ārāmiko upāsako.
பாஸாணகேஸு ச புஞ்ஜங், படிஸாமே த²கெய்ய ச;
Pāsāṇakesu ca puñjaṃ, paṭisāme thakeyya ca;
ஸசே உஸ்ஸஹதி உஸ்ஸுக்கங், அனோவஸ்ஸே ததே²வ ச.
Sace ussahati ussukkaṃ, anovasse tatheva ca.
ஸப்³போ³ ஓவஸ்ஸதி கா³மங், அஜ்ஜோ²காஸே ததே²வ ச;
Sabbo ovassati gāmaṃ, ajjhokāse tatheva ca;
அப்பேவங்கா³னி ஸேஸெய்யுங், வத்தங் க³மிகபி⁴க்கு²னா.
Appevaṅgāni seseyyuṃ, vattaṃ gamikabhikkhunā.
நானுமோத³ந்தி தே²ரேன, ஓஹாய சதுபஞ்சஹி;
Nānumodanti therena, ohāya catupañcahi;
வச்சிதோ முச்சி²தோ ஆஸி, வத்தானுமோத³னேஸுமே.
Vaccito mucchito āsi, vattānumodanesume.
ச²ப்³ப³க்³கி³யா து³ன்னிவத்தா², அதோ²பி ச து³ப்பாருதா;
Chabbaggiyā dunnivatthā, athopi ca duppārutā;
அனாகப்பா ச வோக்கம்ம, தே²ரே அனுபக²ஜ்ஜனே.
Anākappā ca vokkamma, there anupakhajjane.
நவே பி⁴க்கூ² ச ஸங்கா⁴டி, உஜ்ஜா²யந்தி ச பேஸலா;
Nave bhikkhū ca saṅghāṭi, ujjhāyanti ca pesalā;
திமண்ட³லங் நிவாஸெத்வா, காயஸகு³ணக³ண்டி²கா.
Timaṇḍalaṃ nivāsetvā, kāyasaguṇagaṇṭhikā.
ந வோக்கம்ம படிச்ச²ன்னங், ஸுஸங்வுதொக்கி²த்தசக்கு²;
Na vokkamma paṭicchannaṃ, susaṃvutokkhittacakkhu;
உக்கி²த்தோஜ்ஜக்³கி⁴காஸத்³தோ³, தயோ சேவ பசாலனா.
Ukkhittojjagghikāsaddo, tayo ceva pacālanā.
க²ம்போ⁴கு³ண்டி²உக்குடிகா, படிச்ச²ன்னங் ஸுஸங்வுதோ;
Khambhoguṇṭhiukkuṭikā, paṭicchannaṃ susaṃvuto;
ஒக்கி²த்துக்கி²த்தஉஜ்ஜக்³கி⁴, அப்பஸத்³தோ³ தயோ சலா.
Okkhittukkhittaujjagghi, appasaddo tayo calā.
க²ம்போ⁴கு³ண்டி²பல்லத்தி² ச, அனுபக²ஜ்ஜ நாஸனே;
Khambhoguṇṭhipallatthi ca, anupakhajja nāsane;
ஒத்த²ரித்வான உத³கே, நீசங் கத்வான ஸிஞ்சியா.
Ottharitvāna udake, nīcaṃ katvāna siñciyā.
படி ஸாமந்தா ஸங்கா⁴டி, ஓத³னே ச படிக்³க³ஹே;
Paṭi sāmantā saṅghāṭi, odane ca paṭiggahe;
ஸூபங் உத்தரிப⁴ங்கே³ன, ஸப்³பே³ஸங் ஸமதித்தி² ச.
Sūpaṃ uttaribhaṅgena, sabbesaṃ samatitthi ca.
ஸக்கச்சங் பத்தஸஞ்ஞீ ச, ஸபதா³னஞ்ச ஸூபகங்;
Sakkaccaṃ pattasaññī ca, sapadānañca sūpakaṃ;
ந தூ²பதோ படிச்சா²தே³, விஞ்ஞத்துஜ்ஜா²னஸஞ்ஞினா.
Na thūpato paṭicchāde, viññattujjhānasaññinā.
மஹந்தமண்ட³லத்³வாரங், ஸப்³ப³ஹத்தோ² ந ப்³யாஹரே;
Mahantamaṇḍaladvāraṃ, sabbahattho na byāhare;
உக்கே²போ சே²த³னாக³ண்ட³, து⁴னங் ஸித்தா²வகாரகங்.
Ukkhepo chedanāgaṇḍa, dhunaṃ sitthāvakārakaṃ.
ஜிவ்ஹானிச்சா²ரகஞ்சேவ, சபுசபு ஸுருஸுரு;
Jivhānicchārakañceva, capucapu surusuru;
ஹத்த²பத்தொட்ட²னில்லேஹங், ஸாமிஸேன படிக்³க³ஹே.
Hatthapattoṭṭhanillehaṃ, sāmisena paṭiggahe.
யாவ ந ஸப்³பே³ உத³கே, நீசங் கத்வான ஸிஞ்சியங்;
Yāva na sabbe udake, nīcaṃ katvāna siñciyaṃ;
படி ஸாமந்தா ஸங்கா⁴டி, நீசங் கத்வா ச²மாய ச.
Paṭi sāmantā saṅghāṭi, nīcaṃ katvā chamāya ca.
ஸஸித்த²கங் நிவத்தந்தே, ஸுப்படிச்ச²ன்னமுக்குடி;
Sasitthakaṃ nivattante, suppaṭicchannamukkuṭi;
த⁴ம்மராஜேன பஞ்ஞத்தங், இத³ங் ப⁴த்தக்³க³வத்தனங்.
Dhammarājena paññattaṃ, idaṃ bhattaggavattanaṃ.
து³ன்னிவத்தா² அனாகப்பா, அஸல்லெக்கெ²த்வா ச ஸஹஸா;
Dunnivatthā anākappā, asallekkhetvā ca sahasā;
தூ³ரே அச்ச சிரங் லஹுங், ததே²வ பிண்ட³சாரிகோ.
Dūre acca ciraṃ lahuṃ, tatheva piṇḍacāriko.
படிச்ச²ன்னோவ க³ச்செ²ய்ய, ஸுங்ஸவுதொக்கி²த்தசக்கு²;
Paṭicchannova gaccheyya, suṃsavutokkhittacakkhu;
உக்கி²த்தோஜ்ஜக்³கி⁴காஸத்³தோ³, தயோ சேவ பசாலனா.
Ukkhittojjagghikāsaddo, tayo ceva pacālanā.
க²ம்போ⁴கு³ண்டி²உக்குடிகா, ஸல்லக்கெ²த்வா ச ஸஹஸா;
Khambhoguṇṭhiukkuṭikā, sallakkhetvā ca sahasā;
தூ³ரே அச்ச சிரங் லஹுங், ஆஸனகங் கடச்சு²கா.
Dūre acca ciraṃ lahuṃ, āsanakaṃ kaṭacchukā.
பா⁴ஜனங் வா ட²பேதி ச, உச்சாரெத்வா பணாமெத்வா;
Bhājanaṃ vā ṭhapeti ca, uccāretvā paṇāmetvā;
படிக்³க³ஹே ந உல்லோகே, ஸூபேஸுபி ததே²வ தங்.
Paṭiggahe na ulloke, sūpesupi tatheva taṃ.
பி⁴க்கு² ஸங்கா⁴டியா சா²தே³, படிச்ச²ன்னேவ க³ச்சி²யங்;
Bhikkhu saṅghāṭiyā chāde, paṭicchanneva gacchiyaṃ;
ஸங்வுதொக்கி²த்தசக்கு² ச, உக்கி²த்தோஜ்ஜக்³கி⁴காய ச;
Saṃvutokkhittacakkhu ca, ukkhittojjagghikāya ca;
அப்பஸத்³தோ³ தயோ சாலா, க²ம்போ⁴கு³ண்டி²கஉக்குடி.
Appasaddo tayo cālā, khambhoguṇṭhikaukkuṭi.
பட²மாஸனவக்கார , பானியங் பரிபோ⁴ஜனீ;
Paṭhamāsanavakkāra , pāniyaṃ paribhojanī;
பச்சா²கங்க²தி பு⁴ஞ்ஜெய்ய, ஓபிலாபெய்ய உத்³த⁴ரே.
Pacchākaṅkhati bhuñjeyya, opilāpeyya uddhare.
படிஸாமெய்ய ஸம்மஜ்ஜே, ரித்தங் துச்ச²ங் உபட்ட²பே;
Paṭisāmeyya sammajje, rittaṃ tucchaṃ upaṭṭhape;
ஹத்த²விகாரே பி⁴ந்தெ³ய்ய, வத்தித³ங் பிண்ட³சாரிகே.
Hatthavikāre bhindeyya, vattidaṃ piṇḍacārike.
பானீ பரி அக்³கி³ரணி, நக்க²த்ததி³ஸசோரா ச;
Pānī pari aggiraṇi, nakkhattadisacorā ca;
ஸப்³ப³ங் நத்தீ²தி கொட்டெத்வா, பத்தங்ஸே சீவரங் ததோ.
Sabbaṃ natthīti koṭṭetvā, pattaṃse cīvaraṃ tato.
இதா³னி அங்ஸே லக்³கெ³த்வா, திமண்ட³லங் பரிமண்ட³லங்;
Idāni aṃse laggetvā, timaṇḍalaṃ parimaṇḍalaṃ;
யதா² பிண்ட³சாரிவத்தங், நயே ஆரஞ்ஞகேஸுபி.
Yathā piṇḍacārivattaṃ, naye āraññakesupi.
பத்தங்ஸே சீவரங் ஸீஸே, ஆரோஹித்வா ச பானியங்;
Pattaṃse cīvaraṃ sīse, ārohitvā ca pāniyaṃ;
பரிபோ⁴ஜனியங் அக்³கி³, அரணீ சாபி கத்தரங்.
Paribhojaniyaṃ aggi, araṇī cāpi kattaraṃ.
நக்க²த்தங் ஸப்பதே³ஸங் வா, தி³ஸாபி குஸலோ ப⁴வே;
Nakkhattaṃ sappadesaṃ vā, disāpi kusalo bhave;
ஸத்துத்தமேன பஞ்ஞத்தங், வத்தங் ஆரஞ்ஞகேஸுமே.
Sattuttamena paññattaṃ, vattaṃ āraññakesume.
அஜ்ஜோ²காஸே ஓகிரிங்ஸு, உஜ்ஜா²யந்தி ச பேஸலா;
Ajjhokāse okiriṃsu, ujjhāyanti ca pesalā;
ஸசே விஹாரோ உக்லாபோ, பட²மங் பத்தசீவரங்.
Sace vihāro uklāpo, paṭhamaṃ pattacīvaraṃ.
பி⁴ஸிபி³ப்³போ³ஹனங் மஞ்சங், பீட²ஞ்ச கே²ளமல்லகங்;
Bhisibibbohanaṃ mañcaṃ, pīṭhañca kheḷamallakaṃ;
அபஸ்ஸேனுல்லோககண்ணா, கே³ருகா காள அகதா.
Apassenullokakaṇṇā, gerukā kāḷa akatā.
ஸங்காரங் பி⁴க்கு²ஸாமந்தா, ஸேனாவிஹாரபானியங்;
Saṅkāraṃ bhikkhusāmantā, senāvihārapāniyaṃ;
பரிபோ⁴ஜனஸாமந்தா, படிவாதே ச அங்க³ணே.
Paribhojanasāmantā, paṭivāte ca aṅgaṇe.
அதோ⁴வாதே அத்த²ரணங், படிபாத³கமஞ்சோ ச;
Adhovāte attharaṇaṃ, paṭipādakamañco ca;
பீட²ங் பி⁴ஸி நிஸீத³னங், மல்லகங் அபஸ்ஸேன ச.
Pīṭhaṃ bhisi nisīdanaṃ, mallakaṃ apassena ca.
பத்தசீவரங் பூ⁴மி ச, பாரந்தங் ஓரதோ போ⁴க³ங்;
Pattacīvaraṃ bhūmi ca, pārantaṃ orato bhogaṃ;
புரத்தி²மா ச பச்சி²மா, உத்தரா அத² த³க்கி²ணா.
Puratthimā ca pacchimā, uttarā atha dakkhiṇā.
ஸீதுண்ஹே ச தி³வா ரத்திங், பரிவேணஞ்ச கொட்ட²கோ;
Sītuṇhe ca divā rattiṃ, pariveṇañca koṭṭhako;
உபட்டா²னக்³கி³ஸாலா ச, வச்சகுடீ ச பானியங்.
Upaṭṭhānaggisālā ca, vaccakuṭī ca pāniyaṃ.
ஆசமனகும்பி⁴ வுட்³டே⁴ ச, உத்³தே³ஸபுச்ச²னா ஸஜ்ஜா²;
Ācamanakumbhi vuḍḍhe ca, uddesapucchanā sajjhā;
த⁴ம்மோ பதீ³பங் விஜ்ஜா²பே, ந விவரே நபி த²கே.
Dhammo padīpaṃ vijjhāpe, na vivare napi thake.
யேன வுட்³டோ⁴ பரிவத்தி, கண்ணேனபி ந க⁴ட்டயே;
Yena vuḍḍho parivatti, kaṇṇenapi na ghaṭṭaye;
பஞ்ஞபேஸி மஹாவீரோ, வத்தங் ஸேனாஸனேஸு தங்.
Paññapesi mahāvīro, vattaṃ senāsanesu taṃ.
நிவாரியமானா த்³வாரங், முச்சி²துஜ்ஜ²ந்தி பேஸலா;
Nivāriyamānā dvāraṃ, mucchitujjhanti pesalā;
சா²ரிகங் ச²ட்³ட³யே ஜந்தா, பரிப⁴ண்ட³ங் ததே²வ ச.
Chārikaṃ chaḍḍaye jantā, paribhaṇḍaṃ tatheva ca.
பரிவேணங் கொட்ட²கோ ஸாலா, சுண்ணமத்திகதோ³ணிகா;
Pariveṇaṃ koṭṭhako sālā, cuṇṇamattikadoṇikā;
முக²ங் புரதோ ந தே²ரே, ந நவே உஸ்ஸஹதி ஸசே.
Mukhaṃ purato na there, na nave ussahati sace.
புரதோ உபரிமக்³கோ³, சிக்க²ல்லங் மத்தி பீட²கங்;
Purato uparimaggo, cikkhallaṃ matti pīṭhakaṃ;
விஜ்ஜா²பெத்வா த²கெத்வா ச, வத்தங் ஜந்தாக⁴ரேஸுமே.
Vijjhāpetvā thaketvā ca, vattaṃ jantāgharesume.
நாசமேதி யதா²வுட்³ட⁴ங், படிபாடி ச ஸஹஸா;
Nācameti yathāvuḍḍhaṃ, paṭipāṭi ca sahasā;
உப்³ப⁴ஜி நித்து²னோ கட்ட²ங், வச்சங் பஸ்ஸாவ கே²ளகங்.
Ubbhaji nitthuno kaṭṭhaṃ, vaccaṃ passāva kheḷakaṃ.
ப²ருஸா கூப ஸஹஸா, உப்³ப⁴ஜி சபு ஸேஸேன;
Pharusā kūpa sahasā, ubbhaji capu sesena;
ப³ஹி அந்தோ ச உக்காஸே, ரஜ்ஜு அதரமானஞ்ச.
Bahi anto ca ukkāse, rajju ataramānañca.
ஸஹஸா உப்³ப⁴ஜி டி²தே, நித்து²னே கட்ட² வச்சஞ்ச;
Sahasā ubbhaji ṭhite, nitthune kaṭṭha vaccañca;
பஸ்ஸாவ கே²ள ப²ருஸா, கூபஞ்ச வச்சபாது³கே.
Passāva kheḷa pharusā, kūpañca vaccapāduke.
நாதிஸஹஸா உப்³ப⁴ஜி, பாது³காய சபுசபு;
Nātisahasā ubbhaji, pādukāya capucapu;
ந ஸேஸயே படிச்சா²தே³, உஹதபித⁴ரேன ச.
Na sesaye paṭicchāde, uhatapidharena ca.
வச்சகுடீ பரிப⁴ண்ட³ங், பரிவேணஞ்ச கொட்ட²கோ;
Vaccakuṭī paribhaṇḍaṃ, pariveṇañca koṭṭhako;
ஆசமனே ச உத³கங், வத்தங் வச்சகுடீஸுமே.
Ācamane ca udakaṃ, vattaṃ vaccakuṭīsume.
உபாஹனா த³ந்தகட்ட²ங், முகோ²த³கஞ்ச ஆஸனங்;
Upāhanā dantakaṭṭhaṃ, mukhodakañca āsanaṃ;
யாகு³ உத³கங் தோ⁴வித்வா, உத்³தா⁴ருக்லாப கா³ம ச.
Yāgu udakaṃ dhovitvā, uddhāruklāpa gāma ca.
நிவாஸனா காயப³ந்தா⁴, ஸகு³ணங் பத்தஸோத³கங்;
Nivāsanā kāyabandhā, saguṇaṃ pattasodakaṃ;
பச்சா² திமண்ட³லோ சேவ, பரிமண்ட³ல ப³ந்த⁴னங்.
Pacchā timaṇḍalo ceva, parimaṇḍala bandhanaṃ.
ஸகு³ணங் தோ⁴வித்வா பச்சா², நாதிதூ³ரே படிக்³க³ஹே;
Saguṇaṃ dhovitvā pacchā, nātidūre paṭiggahe;
ப⁴ணமானஸ்ஸ ஆபத்தி, பட²மாக³ந்த்வான ஆஸனங்.
Bhaṇamānassa āpatti, paṭhamāgantvāna āsanaṃ.
உத³கங் பீட²கத²லி, பச்சுக்³க³ந்த்வா நிவாஸனங்;
Udakaṃ pīṭhakathali, paccuggantvā nivāsanaṃ;
ஓதாபே நித³ஹி ப⁴ங்கோ³, ஓபோ⁴கே³ பு⁴ஞ்ஜிது நமே.
Otāpe nidahi bhaṅgo, obhoge bhuñjitu name.
பானீயங் உத³கங் நீசங், முஹுத்தங் ந ச நித³ஹே;
Pānīyaṃ udakaṃ nīcaṃ, muhuttaṃ na ca nidahe;
பத்தசீவரங் பூ⁴மி ச, பாரந்தங் ஓரதோ போ⁴க³ங்.
Pattacīvaraṃ bhūmi ca, pārantaṃ orato bhogaṃ.
உத்³த⁴ரே படிஸாமே ச, உக்லாபோ ச நஹாயிதுங்;
Uddhare paṭisāme ca, uklāpo ca nahāyituṃ;
ஸீதங் உண்ஹங் ஜந்தாக⁴ரங், சுண்ணங் மத்திக பிட்டி²தோ.
Sītaṃ uṇhaṃ jantāgharaṃ, cuṇṇaṃ mattika piṭṭhito.
பீட²ஞ்ச சீவரங் சுண்ணங், மத்திகுஸ்ஸஹதி முக²ங்;
Pīṭhañca cīvaraṃ cuṇṇaṃ, mattikussahati mukhaṃ;
புரதோ தே²ரே நவே ச, பரிகம்மஞ்ச நிக்க²மே.
Purato there nave ca, parikammañca nikkhame.
புரதோ உத³கே ந்ஹாதே, நிவாஸெத்வா உபஜ்ஜா²யங்;
Purato udake nhāte, nivāsetvā upajjhāyaṃ;
நிவாஸனஞ்ச ஸங்கா⁴டி, பீட²கங் ஆஸனேன ச.
Nivāsanañca saṅghāṭi, pīṭhakaṃ āsanena ca.
பாதோ³ பீட²ங் கத²லிஞ்ச, பானீயுத்³தே³ஸபுச்ச²னா;
Pādo pīṭhaṃ kathaliñca, pānīyuddesapucchanā;
உக்லாபங் ஸுஸோதெ⁴ய்ய, பட²மங் பத்தசீவரங்.
Uklāpaṃ susodheyya, paṭhamaṃ pattacīvaraṃ.
நிஸீத³னபச்சத்த²ரணங், பி⁴ஸி பி³ப்³போ³ஹனானி ச;
Nisīdanapaccattharaṇaṃ, bhisi bibbohanāni ca;
மஞ்சோ பீட²ங் படிபாத³ங், மல்லகங் அபஸ்ஸேன ச.
Mañco pīṭhaṃ paṭipādaṃ, mallakaṃ apassena ca.
பூ⁴ம ஸந்தான ஆலோக, கே³ருகா காள அகதா;
Bhūma santāna āloka, gerukā kāḷa akatā;
பூ⁴மத்த²ரபடிபாதா³, மஞ்சோ பீட²ங் பி³ப்³போ³ஹனங்.
Bhūmattharapaṭipādā, mañco pīṭhaṃ bibbohanaṃ.
நிஸீத³த்த²ரணங் கே²ள, அபஸ்ஸே பத்தசீவரங்;
Nisīdattharaṇaṃ kheḷa, apasse pattacīvaraṃ;
புரத்தி²மா பச்சி²மா ச, உத்தரா அத² த³க்கி²ணா.
Puratthimā pacchimā ca, uttarā atha dakkhiṇā.
ஸீதுண்ஹஞ்ச தி³வா ரத்திங், பரிவேணஞ்ச கொட்ட²கோ;
Sītuṇhañca divā rattiṃ, pariveṇañca koṭṭhako;
உபட்டா²னக்³கி³ஸாலா ச, வச்சபானியபோ⁴ஜனீ.
Upaṭṭhānaggisālā ca, vaccapāniyabhojanī.
ஆசமங் அனபி⁴ரதி, குக்குச்சங் தி³ட்டி² ச க³ரு;
Ācamaṃ anabhirati, kukkuccaṃ diṭṭhi ca garu;
மூலமானத்தஅப்³பா⁴னங், தஜ்ஜனீயங் நியஸ்ஸகங்.
Mūlamānattaabbhānaṃ, tajjanīyaṃ niyassakaṃ.
பப்³பா³ஜ படிஸாரணீ, உக்கே²பஞ்ச கதங் யதி³;
Pabbāja paṭisāraṇī, ukkhepañca kataṃ yadi;
தோ⁴வே காதப்³ப³ங் ரஜஞ்ச, ரஜே ஸம்பரிவத்தகங்.
Dhove kātabbaṃ rajañca, raje samparivattakaṃ.
பத்தஞ்ச சீவரஞ்சாபி, பரிக்கா²ரஞ்ச சே²த³னங்;
Pattañca cīvarañcāpi, parikkhārañca chedanaṃ;
பரிகம்மங் வெய்யாவச்சங், பச்சா² பிண்ட³ங் பவிஸனங்.
Parikammaṃ veyyāvaccaṃ, pacchā piṇḍaṃ pavisanaṃ.
ந ஸுஸானங் தி³ஸா சேவ, யாவஜீவங் உபட்ட²ஹே;
Na susānaṃ disā ceva, yāvajīvaṃ upaṭṭhahe;
ஸத்³தி⁴விஹாரிகேனேதங், வத்துபஜ்ஜா²யகேஸுமே.
Saddhivihārikenetaṃ, vattupajjhāyakesume.
ஓவாத³ஸாஸனுத்³தே³ஸா, புச்சா² பத்தஞ்ச சீவரங்;
Ovādasāsanuddesā, pucchā pattañca cīvaraṃ;
பரிக்கா²ரோ கி³லானோ ச, ந பச்சா²ஸமணோ ப⁴வே.
Parikkhāro gilāno ca, na pacchāsamaṇo bhave.
உபஜ்ஜா²யேஸு யே வத்தா, ஏவங் ஆசரியேஸுபி;
Upajjhāyesu ye vattā, evaṃ ācariyesupi;
ஸத்³தி⁴விஹாரிகே வத்தா, ததே²வ அந்தேவாஸிகே.
Saddhivihārike vattā, tatheva antevāsike.
ஆக³ந்துகேஸு யே வத்தா, புன ஆவாஸிகேஸு ச;
Āgantukesu ye vattā, puna āvāsikesu ca;
க³மிகானுமோத³னிகா, ப⁴த்தக்³கே³ பிண்ட³சாரிகே.
Gamikānumodanikā, bhattagge piṇḍacārike.
ஆரஞ்ஞகேஸு யங் வத்தங், யஞ்ச ஸேனாஸனேஸுபி;
Āraññakesu yaṃ vattaṃ, yañca senāsanesupi;
ஜந்தாக⁴ரே வச்சகுடீ, உபஜ்ஜா² ஸத்³தி⁴விஹாரிகே.
Jantāghare vaccakuṭī, upajjhā saddhivihārike.
ஆசரியேஸு யங் வத்தங், ததே²வ அந்தேவாஸிகே;
Ācariyesu yaṃ vattaṃ, tatheva antevāsike;
ஏகூனவீஸதி வத்தூ², வத்தா சுத்³த³ஸ க²ந்த⁴கே.
Ekūnavīsati vatthū, vattā cuddasa khandhake.
வத்தங் அபரிபூரெந்தோ, ந ஸீலங் பரிபூரதி;
Vattaṃ aparipūrento, na sīlaṃ paripūrati;
அஸுத்³த⁴ஸீலோ து³ப்பஞ்ஞோ, சித்தேகக்³க³ங் ந விந்த³தி.
Asuddhasīlo duppañño, cittekaggaṃ na vindati.
விக்கி²த்தசித்தோனேகக்³கோ³, ஸம்மா த⁴ம்மங் ந பஸ்ஸதி;
Vikkhittacittonekaggo, sammā dhammaṃ na passati;
அபஸ்ஸமானோ ஸத்³த⁴ம்மங், து³க்கா² ந பரிமுச்சதி.
Apassamāno saddhammaṃ, dukkhā na parimuccati.
யங் வத்தங் பரிபூரெந்தோ, ஸீலம்பி பரிபூரதி;
Yaṃ vattaṃ paripūrento, sīlampi paripūrati;
விஸுத்³த⁴ஸீலோ ஸப்பஞ்ஞோ, சித்தேகக்³க³ம்பி விந்த³தி.
Visuddhasīlo sappañño, cittekaggampi vindati.
அவிக்கி²த்தசித்தோ ஏகக்³கோ³, ஸம்மா த⁴ம்மங் விபஸ்ஸதி;
Avikkhittacitto ekaggo, sammā dhammaṃ vipassati;
ஸம்பஸ்ஸமானோ ஸத்³த⁴ம்மங், து³க்கா² ஸோ பரிமுச்சதி.
Sampassamāno saddhammaṃ, dukkhā so parimuccati.
தஸ்மா ஹி வத்தங் பூரெய்ய, ஜினபுத்தோ விசக்க²ணோ;
Tasmā hi vattaṃ pūreyya, jinaputto vicakkhaṇo;
ஓவாத³ங் பு³த்³த⁴ஸெட்ட²ஸ்ஸ, ததோ நிப்³பா³னமேஹிதீதி.
Ovādaṃ buddhaseṭṭhassa, tato nibbānamehitīti.
வத்தக்க²ந்த⁴கங் நிட்டி²தங்.
Vattakkhandhakaṃ niṭṭhitaṃ.
Footnotes:
